<我嘅職業係專溝人地個女朋友>

Live

一晚由頭開始到追哂，終於同步
特登login 比正評，樓主唔好氣餒呀，雖然唔太多follower 但個故仔立意真係幾好，好欣賞你堅持出文，無因為正評or 負評放棄個故，我會追落去架
有幾段講愛情既野都忍唔住print screen 記低左，講得好好，等完左個故再分享
家陣睇到眼有啲矇，要抖下先，好耐無追故啦

btw 衣字真係好礙眼，我明樓主之前對衣字既回應，不論有無正字，但約定俗成，大多數人都係習慣左用依個or 呢個，所以讀者睇唔順，確實係影響觀感，令人唔舒服既野，我就不太明點解要保持一致性hahaa 希望最少下個故樓主可以考慮改改啦

我唔quote#452啦 費事quote文 quote上quote

但係同意樓主要正視自己錯字問題
唔止係 衣個>呢個/依個 岩>啱
始終呢啲廣東話正字唔係咁易學 都無需咁執著

只係仲有啲真係錯得好離譜
幻得幻失>患得患失
造愛>做愛

由條j變短個故開始已經發現樓主好多錯字
始終你寫文係用文字去表達 錯字真係會變成一大缺點

多謝你支持呀！ 依家我估整個故應該已經超過咗20萬字，一晚追到live真係好犀利

關於‘’衣‘’字個問題，我嚟緊再有新故會將依啲口語字眼全部改晒佢㗎喇。如果有follow我個ig會留意到我依家重post嘅故之前啲錯字都重執過晒。

不過即然咁多人講礙眼，我都唔再執著一致性，嚟緊出嗰啲我都會盡量執啱佢先

多謝你指正

我都知我有時係多錯別字，所以如上面所講重post嘅故都好努力執緊，嚟緊都會盡量留意。

不過關於造愛／做愛，我見兩個其實都有用。

以前學我記得做係類似do，造係類似make，所以係做功課，造船。

而造愛make love係因為講緊製造啲愛出嚟所以我用咗造愛，但動作做愛又講得通，所以我都唔知正字應該係邊個，只係見我見hk01都用咗造愛

12.11

「3曰2夜澳門開心遊?」郭子安聽到李立仁終於講出今日叫佢地嚟嘅原因後問。

「係呀，不過因為得兩張飛，所以咪諗住叫你地嚟同你地玩個遊戲決定邊兩個可以去囉~」李立仁解釋。

「咁點解唔索性加錢三個人一齊去?」張啟光問。

「啟光，你去咗英國點解個人反而會變得咁悶㗎... 就咁加錢去咁咪唔好玩囉~」李立仁窒左一窒然後以笑遮醜咁講。

「其實我興趣不大，咁我退出比佢地兩個去啦...」郭子安就一副無所謂咁嘅樣講。

「玩都唔玩就驚輸? 你唔覺得就算你無興趣去，但贏左再讓張飛出嚟咁成件事會型仔好多? 不過最後如果輸咗想讓都無得讓咁又確實係幾瘀嘅...」李立仁當然唔比郭子安退出於是就用激將法。

「Uncle Lee，你啲激將法好屎呀...」結果惹來郭子安些微嘅鄙視。

「如果獎品加埋佢呢?」李立仁見無辦法只好喺銀包拎咗五千蚊出嚟然後問。

「咁就唔同講法! 你想玩咩?」郭子安果然即刻換左另一個樣磨拳擦掌咁講。

「789!」李立仁係喺公司酒櫃忍痛咁拎咗支珍藏出嚟。

窗外嘅黎浩明暗地裏大屌咗一聲，唔明點解真心話大冒險就係outdate，789就唔係，唔通時代同潮流嘅變遷真係咁帶有選擇性?


三小時後，郭子安，李思柔同張啟光都被帶到唔同嘅房間。

黎浩明喺房外見郭子安已經醉到開始進入斷片狀態，就拎咗個陀螺走入去，然後再喺佢前面張枱轉個陀螺。

「郭子安，我係你心入面嘅一面鏡，係時候卸去你嘅偽裝，面對最真實嘅自己喇。」見郭子安開始不自覺咁望住咗個陀螺一陣，黎浩明就好似唸咒咁講。

「最真實嘅自己?」郭子安望住個轉轉下嘅陀螺眼神開始變得有啲迷離。

「無錯，之後我問你咩你都要照你個心入面真正所想如實作答。」黎浩明續說。

「知道。」郭子安已經進入咗被催眠嘅狀態。

「郭子安，我睇得出你明明好鍾意李思柔，但點解你要咁對佢?」黎浩明問。

「柔柔? 因為我唔想見到佢傷心...」郭子安答。

「點解你覺得接受佢同佢一齊會令佢傷心?」黎浩明追問。

「我好驚有日我會對其他女仔有感覺甚至出軌，然後傷害咗佢...」郭子安臉有少少難色咁答。

「你覺得自己未定性所以會出軌?」

郭子安:「我老豆以前係一個好花心嘅player，而我係佢個仔有佢嘅遺傳，坦白講我唔覺得自己真係可以永遠一心一意咁對一個人...」

「你老豆以前雖然做咗好耐player，但據我所知，佢識咗你媽咪後就已經修心養性定咗落嚟啦...」黎浩明皺一皺眉問。

「我曾經都以為係，直至有次我見到佢同另一個女人上咗酒店... 我就知有啲野係入咗骨改變唔到。」郭子安有啲為難咁講。

12.12

「所以你覺得自己都會同佢一樣?」黎浩明掩飾心入面嘅震驚繼續問。

郭子安:「嗯... 本身其實我都無咁大嘅擔心，直至有年柔柔養嘅果隻狗仔Dolly過咗身，當時柔柔悲痛欲絕，日日都喊得好傷心，我見到佢咁我個心都跟住覺得好痛，然後我就開始好驚如果我同佢一齊後有日我傷咗佢心，佢都一樣會喊得咁傷心，我真係唔想再有日會見到佢咁呀...」

「所以你就唔肯接受佢，相反仲故意不斷咁遊走喺唔同嘅女人之間?」黎浩明再續問。

「其實都唔係故意嘅，我本身個人都係花心底好易對人有feel，只係柔柔對我係特別重要同認真咁解... 所以我好驚如果真係同佢一齊，我有日會傷咗佢心... 我希望我咁做一來佢會可以對我死心然後搵到個真係可以對佢一心一意嘅人，二來我都想透過咁等自己對佢可以少啲感覺...」郭子安略帶痛苦地答。

「但如果佢真係如你所願對你死心唔再鍾意你，咁你又真係覺得ok唔會難過?」黎浩明反問。

「比起再次見到佢崩潰哭成淚人，我寧願自己承受哩種難受嘅感覺...」郭子安有力地答。

「明白，但似乎你嘅盤算暫時唔work喎，佢對你始終都係死唔到心...」黎浩明嘆息。

「係呀，所以我都好矛盾唔知應該點做好...」

「情況我大致了解，咁你依家先好好訓一覺啦...」黎浩明見問題問得七七八八，講完後手指就啪左一聲，然後郭子安就直接僕咗喺張枱上面呼呼大睡。

之後佢就離開咗房間走咗去另一間房。


「張啟光，你係咪好鍾意李思柔?」見到半醉狀態嘅張啟光，黎浩明用咗同一個方法然後又問。

「思柔姐姐? 係呀，我好鍾意思柔姐姐架!」聽到李思柔個名張啟光就好似個細路咁開始傻笑然後答。

「但佢年紀大過你幾年㗎喎，點解你會鍾意佢?」

「大過我咁又點? 由細到大思柔姐姐都好似大家姐咁好關心同照顧我地幾個比較細嘅細路，我地比人蝦佢又會幫我地出頭。記得我小學有年我地出去玩嗰陣，我比人屈我偷嘢，係得佢信我無偷係咁幫我講好說話咋...

思柔姐姐真係一個好有正義感嘅人嚟，我覺得佢好man又有型~ 而且我講個秘密你知呀，以前見思柔姐姐比我地幾隻馬騮激到扎扎跳嗰陣我都會好開心，因為我好鍾意見到佢嬲嗢個樣，為咗見佢個嬲樣以前我仲成日都會專登激嬲佢添呀~ 」

「咁你又唔同佢表白?」黎浩明心諗”果然係一個姐姐控...”然後就問。

「雖然我好鍾意思柔姐姐，但我知佢鍾意嘅人係子安哥，所以當時我從無諗過啲乜... 起初我以為我去左英國後慢慢會淡忘到佢，為此去到嗰邊我仲試咗同另一個女仔一齊，但一齊後我先發覺自己鍾意嘅始終都係思柔姐姐...

本身我以為經過咁多年佢同子安哥會走埋一齊，點知情況並唔係咁，個郭子安仲成日換女朋友去傷思柔姐姐嘅心... 所以我今次返嚟決定咗唔可以再比思柔姐姐受到傷害，我要努力追佢令佢忘記郭子安哩個花心男!」講講下張啟光由嬉皮笑臉變成越講越認真。

「所以今次返嚟你係另有目的?」

「琴晚見返思柔姐姐後，我就決定咗今次一定要用盡全力追佢，唔可以再比思柔姐姐唔開心亦唔可以比自己有遺憾!」張啟光堅定有力咁答。

「明白... 咁你依家先好好休息啦...」黎浩明啪咗下手指就又離開咗房間。

其實造/做 呢個係有解嘅
喺中文字義上
做係指人手/人嘅肉體所能夠做嘅嘢 例如做功課 做朋友
而造多數用指製造業嘅嘢 例如係造飛機 造車等用機器製成嘅過程

至於hk01用造愛
一個行業總會有啲black sheep
我相信唔係所有記者都會亂咁用字

sorry ar 我好少留言，唔識用回覆，quote 文太長tim sorry sorry
寫咁多字，出文咁快，會有錯別字都正常
所以出書先要有編輯，樓主都唔使太緊張
做讀者梗係想睇得順，錯字沙石可改就改啦，本身寫故都不容易

另外篇故真係幾好的，只係樓主無特別話要等n個正評，先出故，好欣賞你咁大方，所以我都特登login 支持一下，加油呀樓主

多謝解說 諗返都聽過哩個解法 下次會更正

哈哈 多謝你專登留言 大家睇得開心我就開心架喇～

好多時想要正評除咗係一種鼓勵，最重要係因為多正評先容易吸引更多新讀者嚟睇

12.13

「大致情況你聽到晒啦? 未來外父有咩睇法呀?」黎浩明離開咗間房後就去問一直喺窗外偷聽緊嘅李立仁。

「可以有咩睇法? 我想嘅只係個女可以開心幸福咁簡單... 如果啟光係好似軒爺咁好，咁就唔駛諗一定係良配啦，但偏偏思柔唔係鍾意佢...

至於子安，雖然至少知佢係緊張思柔想保護佢先唔同佢一齊，但...思柔真係鍾意佢，而如果佢地真係一齊，我都會擔心有日子安會傷害到佢...」李立仁擔憂地講。

「所以最好嘅方法係一係就令Celia移情別戀，一係就令子安唔會再咁花心。」黎浩明得出結論。

「講就係咁講，但世事邊有咁完美? 做咗咁耐輔導員，我好明白有啲嘢真係無得勉強， 唯一可以做嘅都係等佢地認清自己心意唔好因為唔知道或者誤會而後悔終生...」李立仁帶點無奈咁講。

「咁一係我地咩都唔做等佢地自然發展?」黎浩明又提議。

「我一直都係咁呀，然後自自然下思柔不經不覺都已經30歲，但就完全乜都發展到唔囉...」李立仁苦笑道。

「之前係因為咁多年嚟都無另一個外力影響啫，但依家張啟光返咗嚟又決定要追Celia，哩個沉寂已久嘅輪盤今次應該可以再次被推動。人嘅感情係好特別嘅，有時無危機或者未真正失去過，都唔知自己真正感受係點...」黎浩明一副智者口吻咁講。

「所以你覺得子安嘅態度嚟緊會因為啟光而有所改變?」李立仁問。

「咁就要睇佢真實有幾愛你個女，同埋你個女又有幾愛佢喇... 而且都唔好忽視啟光嘅吸引力同真誠，話唔定佢真係可以改變到Celia呢?」黎浩明講。

「嗯...咁所以我地依家應該繼續咩都唔做?」李立仁問。

「做! 就算唔干預但都要比啲 外力催谷下佢地先得嘅~ 你估頭先玩遊戲真係淨係隊霖佢地咁簡單?」黎浩明帶有少少高深莫測咁講。

「係喎... 你一早已經計好晒?」李立仁諗咗諗後就明白。

「可以咁講啦。」黎浩明淡然地答。

「一步算十步，厲害，到底你哩幾十年係點渡過㗎...」李立仁不得不驚嘆。



「我宣佈最後係子安同啟光贏出咗比賽~ 不過因為子安講咗唔去，所以佢會讓咗張飛出嚟，咁思柔你同啟光去啦，難得啟光返咗嚟香港~」等大家都酒醒後李立仁就宣佈比賽結果，而幾位當事人對頭先被催眠嘅情況就似乎完全無印象，只係得宿醉釀成嘅頭痛。

「子安你真係唔去? 總係感覺有啲怪...」李思柔覺得一男一女咁去好似有少少唔妥。

「我...」聽到李思柔同張啟光兩個一齊去澳門旅行，郭子安發覺自己個心有啲唔舒服想改變主意。

「點解怪? 啟光你覺得有無問題?」但李立仁喺佢出聲之前就先一步轉身問張啟光。

「完全唔怪呀，思柔姐姐難得我返嚟香港你就陪下我啦，Please~」張啟光笑住咁一臉期待地望住李思柔講。

「咁好啦...」見張啟光咁嘅樣李思柔都唔忍心拒絕只好答應。

「廿幾歲人仲成個細路咁興奮都唔知做咩...」見已成定局，郭子安只係收返本身想講嘅說話，心入面有點不是味兒自己喺度口噏噏。

「因為有得去玩我真係好開心囉~」不過張啟光都係聽到佢講嘅野就應道。


就係咁，之後個weekend 張啟光同李思柔就出發去咗澳門享受哩個三日兩晚嘅澳門開心遊。

12.14

「點呀啟光，咁耐無返香港慣唔慣呀?」搭船去澳門途中李思柔問張啟光。

「話晒喺度長大，唔會唔慣啦~」張啟光繼續露出佢招牌嘅陽光笑容答道。

不得不承認，望住哩個俊朗嘅臉容，就算有無嗰種感覺，都絕對係令人心曠神怡嘅賞心樂事，令人心情不自覺間咁變好。

「咁諗住留幾耐再返返英國?」李思柔問。

「未決定呀，不過今次可能唔走住喇。」張啟光微笑住答。

「點解? 想放個長假?」李思柔有啲驚訝追問。

「我想試下爭取一啲曾經放棄左嘅嘢先...」張啟光望住李思柔答。

「爭取啲咩?」

「唔話你聽住~ 咁你呢? 你哩幾年點呀?」張啟光沒有回答。

「嗯... 都幾好呀，畢業後我就開始做記者，近兩年仲開始可以有自己嘅專欄，都幾開心呀~ 」李思柔稍為回顧近幾年自己嘅狀況後答。

「寫嘢一向都係你嘅強項呀~ 不過我記得你以前嘅夢想係做個小說作家，點解依家會變咗寫專欄嘅?」張啟光問。

「係呀，不過要做一個全職小說作家唔係咁易，所以未成功之前都要搵其他嘢做維持下生計。而且我覺得做記者可以見識多啲唔同嘅人身閱歷同故仔對自己寫作都好有幫助，做下做下我仲覺得好有意義添~

你知唔知呀，嗰個Uncle Leon其實係我之前訪問嘅對象，而因為佢我仲發現咗好多關於我嗲哋嘅秘密添呀...」李思柔滿足地答道。

之後李思柔就將佢喺黎浩明口中聽到嘅故事同自己已經引証左嘅推測講比張啟光聽。

「竟然有啲咁橋嘅事? 無諗過你姨媽背後嘅故事原來係咁... 咁你聽完有咩感覺呀?」李立仁嘅故事相信大部人都會不自覺被吸引，張啟光亦不例外。

「嗯... 震憾、悲傷、同埋... 無奈? 真係可以用百感交集嚟形容... 無諗過我姨媽會係因為咁而自殺，亦無諗過佢同我嗲哋以及我媽咪以前有個咁嘅故事... 另一方面我明明應該好憎好嬲Uncle Leon先係，但見佢為自己犯嘅錯已經付出咗咁沉重嘅代價我又確實嬲唔落仲有啲可憐佢添...」李思柔帶點無奈咁講。

「坐咗咁多年監，又要內疚一世，而且當年其實都只係一個意外，所以佢都算係一個受害者嚟...」張啟光認同。

「係呀... 講真，哩個世界大把人犯過哩個錯啦，佢背住姨媽出軌雖然唔啱，但付出嘅代價真係太大...」李思柔有啲黯然咁講。

12.15

「唔多但都會有嘅，所以女仔最緊要要帶眼識人，唔好搵錯人錯付終生呀~」張啟光就語帶相關咁講。

「...係嘅... 但人係會變，有時邊到我地控制呀... 姨媽初初識Uncle Leon 嗰陣都完全唔覺得佢會係出軌嘅人，仲覺得佢好有安全感... 」李思柔苦笑道。

「但我深信有啲人真係可以永遠都唔會變~」張啟光滿有信心咁講。

「咁我都信嘅~ 就好似我雖然做緊記者，但都從未放棄我個小說夢㗎，仲一直努力緊~」李思柔就靜靜地轉移話題講。

「我知你係一個有堅持嘅人，加油呀~你第日出書我一定要做第一個讀者!」張啟光既欣賞又有啲擔心地說。

「哈哈，好呀， 到時送本有我親筆簽名嘅比你~」李思柔笑住道。

「你話㗎，一言為定! 咁你嘅感情生活呢? 好似仲未拍拖?」張啟光又問。

「未呀，都唔強求啦哩啲野... 喂， 唔好成日講我，講下你先，你依家咁靚仔，無理由拍得一次拖㗎喎!」李思柔唔想再講哩個話題就八卦咁問返張啟光。

「好奇咩? 咁唔鍾意就係唔鍾意㗎啦，學你話齋，無得勉強...」張啟光答。

「係咪因為你太高要求呀? 不過以你條件，確實係有咁嘅資格嘅~」李思柔自己幫張啟光諗埋原因。

「係呀，所以完全唔駛擔心我，你擔心下自己先啦~」張啟光將個波射返落李思柔度。

「哈，大個仔叻喇依家，識窒我喇!」李思柔講笑道。

「係呀，我真係大個㗎喇，所以唔好再當我係細路或者細佬咁~」張啟光乘機講。

「嗯，係嘅，你已經大個... 諗返起你以前細個成日流鼻涕又會激我個樣都好懷念...不過如果我真係有個咁高大又靚仔嘅細佬，行出街應該好威大把人羨慕我~」李思柔邊回憶邊帶點懷念咁講。

「咁呀思賢都唔太差啫~」張啟光幫李思柔個真細佬講返句。

「佢? 肥到成個波咁喎，而且激少我一陣都願啦...」李思柔諗起佢細佬就沒好氣咁講。

「其實照計你嗲哋媽咪都唔肥，無理由佢咁肥㗎...」

「聽聞我媽咪以前都肥肥地㗎，係姨媽走左後先變瘦...」李思柔解釋。

「原來係咁... 算啦，我地唔好再講唔開心嘅嘢，諗下哩兩日我地點盡情去食同玩好過啦~」張啟光提起精神講道。

「哈哈，好呀~」


之後二人就係澳門周圍行同盡情食，玩得不亦樂乎，之前因為太耐無見而形成嘅些微隔膜同拘謹亦好快就唔見晒。

幫手推下post 等睇新文😍

12.16
經過幾十年光景，依家嘅澳門同我地年代所認識嘅已經有咗翻天覆地嘅變化，不過一啲具有歷史價值嘅地方或者景物都仍然有保留落嚟。

只但係雖然外觀上改變咗好多，但澳門旅遊嘅行程節目仍然不外乎係飲飲食食，去下最著名嘅幾個景點，同喺賭場流連碰下運氣。

因為有三日行程咁多，所以李思柔同張啟光都放慢腳步去下大三巴，威尼斯人，澳門塔等唔同嘅景點遊覧。


官也街

「咦，我認得哩度呀，好多嘢買同食㗎~」張啟光去到官也街突然講。

李思柔:「係呀，哩度係好出名嘅老街，好多嘢食同埋係買手信嘅好地方~」

張啟光:「咁我地一陣記住買手信比佢地喇，唔係返到去佢地實”哦”死我地~」

「唔駛太擔心嘅，澳門其實我地間唔中都會嚟下，始終香港過嚟好方便，係你去左英國先少啲機會嚟啫~」李思柔笑住講。

「嗯嗯，要玩同食嘢其實都係住係香港好!」張啟光諗起英國嘅生活後說。

「不過喺英國就有自由囉...」李思柔諗起自己嘅專欄不時都會被要求修整後講。

「嗯... 掃興嘢唔好講喇，我地快啲行啦，放心今次我會跟實你唔會再走失㗎喇~」張啟光轉換下氣氛講。

「哈哈，你仲記得?」李思柔聽到就笑住講。

「咁深印象點會唔記得呀... 我仲記得果次因為Uncle Kwok早一晚喺賭場贏咗大錢，第二日就好豪咁話包晒我地嗰日嘅洗費，又帶咗我地嚟比咗我地幾個細路每人500蚊話任我地買嘢食。

本身我地三家人都一齊行，但行行下我自己胃食又貪玩就走開咗，結果買完出返嚟就發覺唔見晒你地，我周圍搵你地嗰陣仲蕩失埋路...嗰陣開始天黑我見唔到你地就開始喊... 好彩唔駛太耐你地就搵得返我...」張啟光邊回憶邊講。

「嗰次真係嚇死Uncle Cheung呀，幾驚你遇到拐子佬比人捉咗去賣豬仔呀，你知你青靚白淨幾靚仔㗎啦，實賣到個好價錢~」李思柔同樣邊回憶邊說。

張啟光:「後尾我聽返老豆講，先知原來係你當時醒起我緟意食花生糖，所以先專去有花生糖賣嘅附近地方搵我...」

「係呀，我仲記得搵到你嗰陣，你一邊拎住袋花生糖喺度食，一邊就喊到流晒鼻涕咁，個樣勁好笑~ 最衰當時無影相，唔係依家可以用嚟破壞你男神嘅形象~」李思柔諗起當時張啟光個樣就大笑講道。

「哈哈，黑歷史就唔好再拎出嚟講啦~」張啟光莞爾。

「好啦，咁我地快啲行啦，我個肚開始探測到有好西食有反應喇~」李思柔說完便帶著張啟光走。


就係咁，整個旅程飲飲食食，賭場賭下錢又玩下小型跑車撐下小艇，李思柔同張啟光都玩得好開心，兒時玩伴嘅親切感都全部返晒黎。

而哩三日張啟光都盡顯佢gentleman嘅風度，不論幫李思柔開關門，負責晒所有同服務人員嘅溝通，食咩飲咩去邊玩都全部將李思柔照顧得貼貼服服唔駛佢操心，淨係講自己有咩想法就得喇。這些貼心行為無疑令李思柔覺得張啟光真係大個仔，開始識照顧女仔了。

喺最後一晚佢地食咗餐好嘅法國大餐後，就搭船返返去香港。

12.17

「轉眼間就過咗三日，真係有啲唔捨得返香港想繼續休息下呀~」落船後李思柔邊伸個懶腰邊講。

「我都唔捨得想同你一直繼續玩落去呀... 不過想去澳門其實隨時有得去嘅~」張啟光望住李思柔笑住咁講。

「要搵食㗎，邊似得你好似唔駛撈咁~」李思柔就挖苦佢。

「咁起碼哩家份工都係你鍾意做嘅野呀~」張啟光就安慰佢。

「都係嘅，其實可以做到自己鍾意做嘅野已經比好多人幸福... 係呢，你都仲未講咁到底你之前話想喺香港爭取嘅係啲咩?」李思柔諗起張啟光之前講嘅野就問。其實喺澳門果陣佢都有再追問過但張啟光就點都堅持唔肯講。

「你真係想知?」不過張啟光今次語氣就好似有啲轉變。

「梗係想啦! 哎哋...」

哩個時候突然有個推住大喼嘅內地男人係側邊飛馳撞到李思柔，李思柔比佢撞到向側跌一跌就成個人撞左落側邊嘅張啟光度。

張啟光見李思柔比人撞親向自己嘅方向跌緊，就繼續喺佢旁邊擋住等佢唔會跌落地下，再順勢攬住咗佢。

「唔好意思...」企返定後善柔就邊抱歉邊想離開張啟光個懷抱，但佢發覺對方攬實咗佢並無鬆手。

「你頭先咪問我返黎想爭取啲咩嘅?」張啟光繼續用力攬住李實思柔問道。

「係呀...」見張啟光咁問李思柔嘅注意力就暫時被分散無再嘗試推開對方任由佢繼續攬住自己。

「其實我想爭取嗰個就係你...」張啟光稍為放鬆雙手等李思柔個上半身可以微微向後移望到自己嘅同時自己亦望到佢然後講。

「吓? 我?」完全無諗過嘅李思柔有d嚇呆咗唔明佢嘅意思。

「思柔姐姐，我鍾意你，我想做你男朋友...」講完張啟光就咩都唔理直接用自己個嘴錫左落李思柔軟熟嘅嘴唇上面。

「.... 你做咩呀? 傻咗呀?」唇上傳來嘅觸感驚醒咗本身仍然唔太知發生緊咩事嘅李思柔，然後佢終於用力推開咗張啟光。

「對唔住... 不過我想話比你聽，其實我一直都好鍾意你。」因為頭先食飯飲咗唔少酒嘅關係，加上哩幾日同李思柔無比嘅親近，張啟光決定把心一橫襯機直接同佢表白。

「你鍾意我?」李思柔睜大咗左雙眼望住張啟光唔敢相信。

12.18

「係，喺我離開香港去英國前我就已經鍾意你，不過我知你鍾意子安哥加上我又要走所以我當時都無諗過要做啲咩。去到嗰邊後我有試過同另一個女仔一齊希望可以忘記你，但之後我先發覺我心入面根本就淨係得你完全忘記唔到你...

然後今次返黎，我發覺你不單只並無同子安哥喺一齊，相反佢仲成日換女朋友，而你就仲係好傻咁喺度等佢... 所以我決定唔可以再比你咁受傷落去，我亦唔會再退讓，依家嘅我同以前已經唔同，我有條件可以比到幸福你照顧你，所以我要努力爭取你返嚟，佢根本唔配你鍾意佢!」張啟光望望李思柔情深款款咁講。

「你... 一直都鍾意我? 點會㗎... 我一直都好似你姐姐咁... 咪住! 就算係都唔代表你可以錫我，嗰個係... 係我初吻嚟㗎!」突然意識到自己原來已經無咗個初吻，李思柔有種好唔開心嘅感覺。

「對唔住...頭先第一次同你咁close，一時忍唔住就... 但你明唔明我壓抑咗自己對你嘅感情有幾耐? 你作為過來人應該好明白...」張啟光帶有歉意地解釋。

「我... 我唔知... 但點你都唔應該咁做... 同埋我大過你㗎...」李思柔開始不斷咁諗原因解釋自己唔可以接受對方。

「大過我咁又點? 依家姐弟戀都好common啫?我就係鍾意你成日好似個大家姐咁嘅樣... 比次機會我啦，我一定會對你好好㗎! 唔好再浪費自己時間同青春比嗰個郭子安啦，佢唔值㗎!」張啟光信心滿滿咁講。

「我真係完全無諗過... 同埋我對你都唔係嗰種感覺...」但李思柔仍然只係不斷搵原因拒絕。

「無諗過咪今日開始諗，感覺可以培養㗎嘛! 你頭先唔係都話我條件好好㗎咩? 其實我最想係話比你知你唔係無得揀，你仲有另一個option，一個更好嘅option。」張啟光以一個充滿陽光嘅笑容望住李思柔講。

「但... 但我真係一直都只係當你係我細佬咁...」面對張啟光熾熱嘅目光，李思柔唔敢直望佢擰側咗面望住地下咁講。

「比個機會我地試下啦，我唔係話要你即刻接受我，但至少唔好即刻推開我，試下比個機會大家相處發展，比個機會我拯救你出黎，我知你心底入面其實都想忘記郭子安㗎...」張啟光繼續勸說。

「我... 你比啲時間我消化下，真係太突然喇...」唔知點回應李思柔有啲六神無主。

「無問題! 最緊要你唔好咁快say no~ 我地哩幾日唔係都玩得好開心咩?」張啟光終於放開咗李思柔唔想比太大壓力佢。

「嗯... 咁我返屋企先喇...」而李思柔亦確實想快點離開。

「我送你呀?」張啟光想繼續陪住李思柔就提出。

「唔駛啦，都夜喇，你都快啲返酒店啦，我要自己靜一靜先...」李思柔婉拒。

「咁好啦，我幫你截車先...」張啟光亦明白無再堅持。

「唔該...」

「返到去就話聲我聽啦~」送咗李思柔上的士張啟光又好溫柔咁笑住講。

「知道...」依刻嘅李思柔對張啟光已經再無大家姐嘅架子。


(啟光鍾意我?
我到底有咩好佢一直鍾意咗我咁多年?
頭先... 我比佢拎走咗自己初吻?
可惡呀! 不過問心佢又真係好靚仔嘅...
我好似有啲嬲唔落...
點算呀...)

回程路上李思柔一直心煩意亂咁諗...

12.19

「返黎喇? 玩得開唔開心呀?」一返到屋企，李立仁就笑笑口咁問個女，好似佢一直都企咗喺度等緊李思柔返嚟咁。

「ok啦，幾好呀...」如果無最後嗰一幕發生，李思柔應該真係會笑得好開心咁同李立仁講。

「但你個樣好似唔太開心?」李立仁立刻察覺到愛女嘅唔妥。

「係咩? 唔係呀...」李思正常反應自然否認。

「嗲哋都呃喇依家... 同啟光玩得唔開心?」但李立仁無就咁放過佢。

「唔係呀...」李思柔唔好意思地講。

「你去沖過涼先啦，一陣再陪嗲哋傾下偈好無?...」見李思柔咁李立仁都無即刻逼佢。

「哦好...」李思柔無奈應道。



「嗲哋...」沖完涼後李思柔見李立仁一個人自己坐咗喺屋企bar枱嗰邊飲緊杯whisky明顯等緊自己，就主動行咗過去。

「有無嘢想問下嗲哋呀?」李立仁對愛女微笑咗下問。

「到底你同姨媽以前係點㗎?」見有機會李思柔就乘機問。

「我都知你想問好耐㗎喇，上次講黎伯啲嘢比我聽嗰陣你係咪已經好想問?」聽到李思柔嘅問題李立仁就一副”早知你”嘅樣講。

「係呀，不過我又驚你同媽咪唔開心或者唔想提所以就唔敢問...」李思柔承認。

「我同你姨媽，由我地出世嗰日就已經結下咗不解緣，基本上我頭十幾年嘅人生，全部都充滿住佢嘅身影，差唔多日日都會見到佢。你可以幻想下就好似細個你同子安咁，不過再close好多好多倍...」李立仁進入咗懷緬模式。

「我都聽聞嗰陣你地係形影不離，你每日放學都會上佢屋企，然後等嫲嫲放工先嚟接返你。」李思柔諗起黎浩明講嘅野。

「無錯，所以你可以想像到我地當時係有幾咁親近，而哩種親近同習慣亦令嗲哋唔知自己原來一直都鍾意佢，到有日終於意識到自己心意嘅時候已經係佢成為咗人地女朋友嗰陣...」

「你根本就遲鈍啦，不過就算你早知早覺，都唔代表你會成功嘅~」李思柔忍唔住窒佢嗲哋。

「衰女... 不過你講得啱嘅，而且如果當時成功，咁我又唔會有之後同你媽咪嘅故事，當然你姨媽亦應該仲會喺哩個世界上啦...」李立仁帶點感觸咁講。

「Sorry... 嗲哋其實你可以唔駛格硬講㗎，都發生咗亦過咗去...」感受到父親嘅悲傷李思柔都有啲唔好意思。

12.20

「唔緊要，嗲哋咁大個人，仲有咩睇唔化? 既然你已經知道，我亦唔需要隱瞞，始終我同你媽咪其實都知道，我地之間一定會有佢嘅存在，因為佢對我地太重要喇... 不過嗲哋講你聽嘅最大原因其實係因為另一樣嘢... 」感受到愛女嘅關心李立仁溫柔地微笑住講。

「係咩?」李思柔好奇。

「嗲哋想講你聽嘅係，就算我前半生一直好鍾意你姨媽，但最後比到下半生幸福我嘅係你媽咪，你明唔明我想講咩?」李立仁望住愛女講。

「...你想講你同媽咪一齊好幸福?」李思柔望住父親諗咗陣後眼珠一轉講。

「扮傻... 嗲哋知道你一直都好鍾意子安...」李立仁知李思柔言不由衷。

「邊係喎...」被父親一語道破李思柔面紅紅咁否認。

「你係我個女，我由細睇到你地大我點會唔知你諗咩呀~ 我明你地感情係好深，但如果佢一直對你都係咁嘅態度，你都要認真考慮下仲係咪無了期咁等落去... 有時放低啲執著，你會突然發覺自己原來仲有好多選擇，好多幸福可能一直都等緊你只係你太集中喺一樣嘢因而忽略左佢地嘅存在而自己唔知... 你睇嗲哋咪正正係一個活生生嘅例子囉?

當然我唔係話你要逼自己啲咩，感情亦無得勉強，只係唔想你太執著諗埋一邊，未嘗試過或者真係心思熟慮過就否決晒其他可能性。有時比啲唔同嘅機會自己，換過思維諗下嘗試下，可能你會發現好多嘢其實同你一直諗緊嘅都唔同，唔好自己鑽牛角尖諗埋一邊呀。」李立仁語重心長咁講。

「明白...」李思柔若有所思咁答。

「啟光如果可以遺傳到Uncle Cheung 2分1基因，應該都絕對係一個唔錯嘅對象嚟㗎~」見李思柔仲喺度扮傻李立仁就再直接啲講。

「...你又一早知?」李思柔無諗過自己都係岩岩知嘅野但原來自己父親似乎一早就已經知道，佢突然覺得自己好蠢，啱啱仲好意思笑對方遲鈍...

「正如頭先所講，我由細睇到你地大㗎嘛~」李立仁笑道，雖然實情明明係無耐前黎浩明講比佢聽佢先至知道。

「所以你都覺得我應該要認真考慮比機會佢?」李思柔問。

「至少嗲哋覺得既然依家你同子安已經維持左哩個狀況咁耐，咁比個機會啟光睇下佢為你可以做到咩程度對你都無咩處壞呀? 你亦可以試下放開自己個心睇下接唔接受到佢。如果ok，咁係好事，如果都係唔ok嘅，至少你試過比過機會大家，對得住啟光之餘亦更加清楚自己想要啲咩，咁唔係都係好事嚟咩?」李立仁認真分析。

「知道，我會認真考慮下㗎喇...」李思柔聽完就回應。

「嗲哋都係比下意見啫，唔係話一定啱，嗲哋淨係想你開心同幸福咋，明唔明?」李立仁露出慈祥嘅笑容講。

「我明白，多謝嗲哋...」感受到父親嘅關心李思柔都有啲感動。

「好啦夜喇都，咁去刷牙早d瞓啦~」

「Good night~」

12.21

李立仁見愛女返咗入房後自己坐多咗陣飲埋杯Whisky就都返返入自己房。

「點呀點呀? 」一見李立仁返房鄺善潼就即刻問。

「你係咁八咁關心個女又唔自己問下佢~ 」見老婆咁心急嘅樣李立仁都有啲忍俊不禁。

「咁由細到大佢都係鍾意同你傾偈多過同我㗎啦... 而且你先係輔導員嘛，梗係交返比專業人仕適合啲啦~」鄺善潼就解釋。雖然已經五十幾歲，但佢都仲係保持住活潑嘅性格。

「車，你其實都係好稱職嘅輔導員嚟㗎，當年唔係你話醒我我到依家可能都仲係靠溝緊人地個女朋友搵食呀~ 放心啦，提點到嘅我都已經提點左，之後點發展就要睇佢地各自嘅造化喇...」李立仁攬住老婆笑住咁講。

「唉，希望思柔今次可以順利出pool啦...」見自己個女30歲人都未拍過拖，父母唔擔心就假，鄺善潼都攬返住老公講。

「但如果佢揀錯受傷咁我寧願佢唔出pool喇... 不過其實不論子安定啟光，人品應該都有保証嘅...」李立仁就自己邊擔心邊安慰老婆。

「但個子安好花心喎!」鄺善潼唔太同意。

「但至少佢肯保護思柔呀... 而且佢無呃思柔思柔自己一直都好清楚對方係點，如果咁佢都仲要衝向對方，都只可以話係求仁得仁啦... 」李立仁苦笑道。作為感情輔導員佢都實在過真係見過太多人為咗愛情就算明知係火坑都照衝埋去。

「咁希望郭子安佢一直保護思柔落去唔好突然又忍唔住對佢出手啦...」鄺思潼仍然擔心道。

「好難講喇，啟光嘅加入令一切都出現咗變數... 始終見住自己鍾意嘅女人同另一個男人一齊哩種感受唔係咁好受㗎~」李立仁學黎浩明一副智者口吻。

「知你曾經感受好深喇~ 今晚係咪想瞓地下呀?」鄺善潼聽到就即刻裝作扭李立仁耳仔講。

「唔係唔係，不過無當時嘅感受依家又點會更識珍惜你呢老婆~」李立仁即刻扮死狗氹返老婆。


結果哩晚後，一啲無形嘅轉變就開始慢慢發生。

聽完李立仁講後，雖然李思柔唔知自己點先叫可以放開個心去嘗試接受張啟光，但至少當張啟光搵佢嗰陣，佢都唔會抗拒而係嘗試盡量比機會大家更多相處嘅時間。

而張啟光自嗰晚表白後亦都火力全開，每日噓寒問暖，見李思柔好似無點抗拒自己就更加放膽去追，一有空又去接李思柔放工。

本身李思柔對此都無咩特別感覺，覺得對方有少少over但又有啲尷尬唔好意思出聲叫對方唔駛，直至有次張啟光接佢嗰陣咁啱比佢啲同事發現到張啟光嘅存在。

推下post haha 加油呀樓主，真係少左錯字呀😍😍

好好睇

多謝幫推