<我嘅職業係專溝人地個女朋友>

1. 關於我嘅職業

我嘅職業係專溝人地個女朋友。
之所以話係職業，係因為我會收取酬勞去做衣件事。
之所以話係溝而唔係搶，係因為我嘅目標並唔係要人地個女朋友最終成為我個女朋友。
嚴格黎講， 我工作嘅目的係要令人地個女朋友飛左佢個男朋友。
而我用嘅方法就係令佢地移情別戀喜歡上我，然後再因為咁飛左佢地個男朋友。
當然事成後，我並唔會真係同果個女仔一齊啦。

可能好多人聽到衣度都會好不齒我嘅行為。
溝人條女衣個行為本身都已經唔要得架啦，你仲要溝到手後又唔要，咁算點先? 即係純玩弄對方感情?
咁不負責任嘅行為你都做得出，枉你讀左咁多年書，享用左香港咁多年嘅免費教育!
你衣d社會敗類名符其實係讀屎片，浪費晒立稅人辛苦賺返黎再上繳比政府嘅血汗錢，唔死都無用!

但如果我話你聽，
出糧比我做衣件事果個人正正係個女仔嘅男朋友，
而我會做衣件事亦只係為左保護個女仔，
咁你嘅諗法會唔會稍為有少少改變?

1.2

如果你聽唔明我講咩唔緊要， 或者容我係度再解釋多少少。

不論拍緊拖嘅你，定係拍過拖嘅你，
我估大部份點都曾經有一刻會諗過想同另一半分手。

想分手

可以係因為覺得同對方唔夾；
可以係因為接受唔到對方嘅一d行為或者性格；
可以係因為對對方無左感覺；
可以係因為對對方以外嘅人有左感覺；
可以係以上都不是嘅其他原因。

但無論咩原因都好，除非係對方對你唔住先或者做錯左d乜，唔係嘅話我相信就算你幾有決心要分手都好，都一定有一刻猶豫過點同對方講出

“不如我地分手啦”

衣幾個字。

無人會想做傷害對方果個，
亦無人會想自己做衰人。
所以如果有得揀，其實無人會想做提出分手果個。

你話如果咩都唔駛講唔駛做，
然後好似電話咁襟個制收線就可以同對方和平分手。
事後大家不但可以好似完全無事發生過咁做返好朋友，
又可以令雙方不論邊個都唔需要受到責備或者需要感到內疚，
咁所有野係咪都可以簡單完美好多?

1.3

可惜世界可以好簡單，但人就偏偏好複雜。
試問人同人嘅關係，邊有可能襟個制咁簡單就可以自動斷開?
如果真係咁簡單，咁衣種就唔係叫關係而係叫開關。
It is not a relationship but just a switch

於是唔少複雜嘅人會開始動心思，希望可以令對方成為主動提出分手果個。

佢地可能會選擇冷待對方，對對方越黎越差，
藉此希望對方有日會終於忍受唔住知難而退然後提出分手。
咁自己就唔係施害者而係受害者，
唔會受千夫所指嘅同時仲可以得到埋世人嘅同情同憐憫。

不過問心，事實上咁係咪就代表你真係唔係施害者而係受害者?

“施害者”並唔係指邊個提出分手，而係邊個先由愛對方變成唔再愛對方。

所以當你因為已經唔愛對方而去欺騙或者逼佢代你去做你想做嘅野，咁其實已經係施緊害果個。

哪怕對方最後因為咁而順你意代你提出分手，但佢其實都係受害者，佢都係會受到傷害。

只係世人多著重結果，
一有事總係會先問到底係邊個提出要分手，
然後先做成一個錯覺邊個提出分手果個就係傷害人果個衰人。

而且衣個做法其實仲有一個情況喎，
就係如果對方永遠唔肯放棄，堅持死都唔肯提出分手，
咁想分手嘅你又要等到幾時?
當拍拖變成衣種角力賽嘅時候，你唔累唔辛苦咩?

所以我為佢地提供左另一個方法，
一個對佢地黎講可以話係堪稱完美嘅分手方法。

1.4

「阿輝，不如我地分手啦...」

「下? 點解呀? 係咪我有咩做得唔好令你唔開心呀?」

「唔係呀! 你無唔好… 只係近排我發覺自己鍾意左另一個男仔，我想同佢發展，所以..我唔可以繼續同你一齊。對唔住呀...」

「佢...佢係咩人黎架?」

「佢係一個前排我意外識嘅男仔...」

「佢...對你好好?」

「嗯... 最重要係我地好夾，佢好似永遠都好知我需要d咩咁...

對唔住呀阿輝，係我對你唔住... 雖然我知我衣家講咩都無意思，不過我都想話你知我同佢之間係清清白白，我無背住你做過任何對你唔住嘅野，我地無一齊架...」

「傻妹... 我知你都唔想。你肯選擇話我聽而唔係背住我偷偷同佢一齊咁已經好好架喇…

如果衣個係你嘅選擇我會接受，只要你肯定佢真係比我更加適合你就得... 對我黎講，你過得開心同幸福先係最重要...

我只係痛心可以比幸福你果個人再唔係我...」

「阿輝...多謝你呀...」

「可唔可以最後送多個擁抱比我?」

「嗯...」

1.5

「多謝~」我喺阿輝手上接過我嘅酬勞然後講。

「我多謝你先岩! 你令我由變心果個變成受傷果個，個傻妹對我仲鬼死咁內疚添~

衣家我地分左手佢唔會傷心，大家又可以繼續做朋友好黎好去，我真係諗唔到有咩分手結局可以比衣家衣個更加圓滿!

所以你做嘅職業真係好偉大幫到好多人架！」阿輝完全無唔捨得果幾張金牛仲好開心好滿意咁拍左我一下膊頭講。

「我知，所以我先會做衣項工作。」我勉強露出個笑容回應。

「不過之後你諗住點處理Tracy？」 Tracy即係岩岩同佢講分手果個”ex”。

「我會憑空消失，佢唔會再搵到我。」我答。

「咁佢咪一樣會傷心？」阿輝有少許擔心咁問。

「傷心都係一時啫，始終我地無正式一齊大家認識嘅時間又唔係好長。

至少衣種傷心一定遠遠唔及佢喺最愛你嘅時候知道你變左心然後失去你啦。」我堅定有力咁答。

「咁又係… 始終無得到過，就唔會有失去嘅痛，而且你亦無可能真係因為咁而同佢一齊嘅。」阿輝有d尷尬咁講。

「嗯... 所以咁處理係最好架喇，只要你記得應承過我d乜。 」我皺了一皺眉然後提醒道。

「放心啦，就算佢之後搵返我我都唔會同返佢一齊，因為到時我已經好開心咁同左另一個一齊喇～」一諗起可以同新歡光明正大咁一齊，阿輝頭先嘅尷尬好快就被燦爛嘅笑容所取替。

「希望你真係做到，同埋雖然我唔介意有錢搵，但都希望你以後唔會再需要用到我嘅服務啦。」我目無表情咁講。

「係呢，我可唔可以問下你點解你會諗到做衣個職業?」或者自己知自己事，阿輝無回應我嘅說話反而問左我一個問題。

「你記唔記得頭先講過”無得到過就唔會有失去嘅痛”衣句說話?」對於佢嘅問題我微微有d愕然，然後諗左陣後答。

「記得呀，我講得唔岩咩?」輝問。

「曾經我都好似你咁諗，不過衣家我會話你之所以會咁講，係因為你未真係試過好愛一個人...」我黯然咁講。

「點解?」

「你有無諗過有時你之所以會失去，其實正正係因為你得唔到? 而衣一種失去嘅痛，包含嘅情緒可能係比得到過再失去更加之多…」

我講完衣句說話後就拎轉頭離開，剩低一臉茫然同不解嘅阿輝默默咁望住我漸行漸遠嘅背影。

大家好，又一段時間無見
今晚終於扚起心肝出新故
希望大家繼續支持~

補返兩條link先

紙言:https://www.shikoto.com/articles/259825.html

Penana:https://www.penana.com/story/111496/

留名

留名

1.6

「喂郭非凡，失戀啫，女朋友無左咪無左囉，有乜大不了呀? 唔駛日日好似世界末日咁嘅樣掛? 你男人黎架，似返個男人得唔得? 為左條女要生要死咁，你唔覺得好醜怪咩?」

中學果陣，曾經有段時間我有一個叫郭非凡嘅老死因為比女飛而成個人陷入左崩潰邊緣，日日個樣都好似全家死晒咁淨係識以淚洗面又成日唔出聲。

望住日日如死狗一般嘅佢，果陣未拍過拖又好天真嘅我完全唔明白亦唔理解點解失戀要咁傷心。而隨住過左幾星期後佢都仍然係咁，我開始失去耐性甚至覺得佢好無用。

有日當我陪佢返屋企果陣見佢又愁眉苦面想喊想喊咁嘅樣，我終於忍唔住連珠炮發話左佢一輪，希望可以透過咁鬧返醒佢。

可惜郭非凡望左我一陣後，就繼續眼濕濕向前行完全無理我嘅意思。

「我真係唔係好明… 以前你都無女架啦，衣家最多咪好似返返去以前咁，有咩咁大不了?」見佢唔應我我又忍唔住講。

終於，佢有反應。

「你估我好想咁架? 我都好憎見到自己咁廢咁無用呀! 明明知佢都已經唔再鍾意我唔再著緊我，我就仲日日掛住佢為佢喊苦喊忽… 但我真係控制唔到自己嘛! 我就係會成日諗起佢掛住佢，然後個心就好痛好痛…

不過你連拖都未拍過，你又點會明我衣家有幾痛苦呀…」一直無出聲嘅郭非凡突然好激動咁爆返我一鑊，然後就再無理我自己一支箭咁飆走左。


一臉莫明其妙嘅我之後就去左住我附近嘅鄺善柔屋企。

「咦，你唔係陪郭非凡咩? 咁快返黎嘅? 個樣做咩咁黑呀?」鄺善柔開門見到我後有d驚訝，又見我黑晒面咁就邊開門比我邊問。

「唔好再提佢喇，一講佢就嬲! 其實我都唔明點解d人分手後要喊到死去活來咁… 未一齊之前咪又係咩都無？咁分手後都只係變返以前咁啫？有需要咁傷心咩？」

我見善柔本身應該教緊佢阿妹善潼做功課，所以就邊答佢邊直接行去佢廳張梳化度坐低。

「你… 岩岩咁話完郭非凡?」鄺善柔見我咁講後問。

「係呀，見佢仲成日喊苦喊忽咁嘅樣忍唔住咪話左佢幾句囉，跟住佢發左我一輪脾氣後就自己走左去… 你話我講得唔岩咩?」我仍然帶點氣憤咁講。

「梗係唔岩啦! 你… 唉… 你真係一個木頭人黎架喎... 發生左就係發生左，邊有得講返以前點架? 你要明白人嘅感覺唔係一種絕對值而係一種對比值黎架。」善柔聽完我講後都有少少激動咁話我。

「喂，可唔可以講返d我聽得明嘅地球話?」我唔明白。

「蠢~ 」善柔沒好氣咁走埋黎彈左我個額頭一下然後就走攬住佢個cushion坐左係我側邊。

「喂，好痛呀!」我掩住個額頭講。

「你幻想下就好似你將隻手放係一杯熱水一陣後然後再即刻放入涷水，同埋你一開始就將隻手放入涷水，種感覺係咪差天共地?」鄺善柔笑住咁問。

「咁又好似真係有唔同...」我邊幻想個情況邊答。

「但明明都係放入同一杯水咋喎~ 所以溫度雖然係絕對值，但人嘅感覺就只係一種對比值。我地只可以感覺到兩者嘅差異或者改變而唔係好似sensor咁量度到一個絕對值。

失戀嘅人正正係因為得到過然後失去，曾經被愛過然後被拋棄，個正反差更大先會令人覺得更加痛苦，明唔明?」善柔一口氣解釋道。

「呀...明一d唔明一d啦...」

涷水熱水嘅比喻我當然明白，但始終自己無親身經歷過，喺感性上我都係唔會明白當中嘅痛可以有幾痛。

「仲唔明唔緊要~ 嗱，衣家你將衣粒糖放入口先~」佢企左起身唔知係邊個褲袋拎左粒糖出黎塞左落我個口。

「然後你再飲左衣杯野佢你就明架喇~」之後佢就行左入廚房再拎左杯唔知咩出黎叫我飲。

或者我真係想親身感受下佢講果種反差感，果刻我不虞有詐竟然真係好似智障咁好聽話就拎起左杯野黎飲，一入口就感受到一種苦到無得再苦嘅苦澀味由脷尖擴散晒成條脷再去到喉嚨。

「咳咳… 嘩，咩黎架? 咁苦嘅!」我好唔容易咁忍住無將d不知明液體從個口度噴返出黎，格硬將佢吞左落肚然後再回左啖氣後講。

「我阿媽煲嘅廿四味咋嘛~ 衣家你應該明晒啦?」鄺善柔見住我個樣笑得好開心咁講。

「鄺善柔!」我忍唔住大喝一聲。

但一講完好快我就已經feel到喺個胃入面有一堆野開始反搓湧緊上黎，然後我就即刻掩住個口衝左入廁所嘔。

「哈哈哈哈~」

結果之後果兩分鐘成間屋就得返我嘅嘔吐聲同埋善柔善潼兩姊妹笑得好清脆同燦爛嘅哈哈聲。


不過雖然後悔，但當日果種苦確實令我多左少少頓悟，首次感受到人嘅感覺原來並唔係普通有同無嘅加減數。

而隨住往後人越黎越大經歷越黎越多，我亦越發明白咩叫反差值。

人只要唔好太高期望，就唔會有太大失望。
只要無得到過嘅開心，就唔會有失去嘅痛苦。

鄺善柔

係你教識我點解得到過後再失去會咁痛苦。
所以我一直都好安守本份，唔敢諗自己可以有擁有你嘅一日。

但點解自從果日後我到衣家都仲係咁痛苦?

如果當日我可以成熟一d，又或者早少少比比多d勇氣自己，咁我同你嘅結局會唔會可以改寫？


自從果一日，我個心就好似遺落左一部份唔再完整。

但同時間我又發覺，喺我身上好似多左一d唔屬於我嘅野。

1.7

當我send左一個goodbye message比Tracy，delete晒我當日為左掩佢耳目而預備嘅幾個社教媒體，然後再將張sim咭從我部古董iphone4拎左出黎後，Tracy就唔會再有任何途徑搵得到我，亦代表我正式從佢嘅世界入面徹底消失。

正如我同阿輝所講，我相信當佢發現我好似突然喺衣個世界完全人間蒸發左之後，佢應該會疑惑同唔開心一段時間，但就只會係一段時間。而過左衣段時間後，佢好有可能會因為後悔而嘗試搵返阿輝。

如果阿輝衣個時候心軟又同返佢一齊，咁我做嘅所有野就係白忙一場，完全無左意義。

但如果阿輝堅持唔復合，Tracy雖然都會唔開心，會後悔，但因為始終鍾意過第二個分薄左對阿輝原有嘅感情，加上又係自己提出分手，所以我相信點樣佢嘅感受都會比起如果一開始因為阿輝變心有左第二個而直接同佢講分手好唔知幾多百倍。

人就係咁奇怪。

縱使最後嘅outcome一樣，但如果中間嘅process有d改變，人嘅感受都可以完全唔同。

就好似我地如果係將隻手由杯熱水放入涷水之前，先放一放入杯暖水，咁到你再將隻手放入涷水果陣，都唔會再入果種冰寒刺骨嘅感覺，但明明最後都係放入同一杯水。

我嘅工作其實就好似衣杯暖水咁，為被分手嘅女仔中間提供一個緩衝區。

或者佢地最後都仍會覺得有少少涷，但至少，我相信衣種涷唔會涷到令佢地傷及根骨，更加唔會影響到佢地嘅性命。

而衣個，就係我會選擇做衣個職業背後嘅主因。

1.8

岩岩講嘅鄺善柔，係自我一出世就已經註定要成為我生命中一個好特別存在嘅人。而為左介紹佢，不如就等我先同大家講一個好簡短嘅故事。


係二十多年前天朗氣清嘅一日，一對臨盆在即嘅夫婦正喺自己屋苑樓下心急如焚咁努力截緊的士。不過未等到的士，佢地卻先等到另一對同佢地一樣都係想趕去醫院生仔嘅夫婦。

佢地互相向大家微笑並點左一下頭，然後又繼續等待的士嘅出現。

明明平時周街都係，但到你想截果陣就偏偏一架都無，的士就係一樣咁嘅交通工具。

天幸過左唔係好耐，終於有架的士駛入黎落客。等原本嘅乘客落左車後，第一對夫婦就立即開門上車預備趕去醫院。

不過當老公安頓好老婆坐低想關門嘅時候，枱頭見到另一對夫婦個老公好焦急同擔心咁望住佢已經滿頭大汗嘅老婆時，衣位老公就忍唔住同佢地講左一句影響左衣兩個仍係媽媽肚內小朋友一生嘅說話。

「我估你地都趕住要去醫院，衣個鐘數好難截的士架，唔介意一係一齊?」

就係咁，衣一日喺同一間醫院入面，就多左一男一女同時降生喺衣個世界上。


因為衣次偶遇，衣兩對夫婦自此成為左好朋友。
而衣一男一女，就成為左一對同年同月同日同醫院生嘅青梅竹馬。
佢地男嘅叫李立仁，女嘅叫鄺善柔。
一個寓意佢要以仁德立於天下，一個寄望佢會係一個善良溫柔嘅女孩。

係咪覺得好老土? 李立仁自己初初都係咁諗。

最後女嘅可以完美咁做到父母嘅期望，
但男嘅就好不幸咁由立仁變成左壞人。

然後男仔長大後回望過去先明白父母對自己嘅寄望其實係何其偉大。


因為住得近又有緣份，李立仁同鄺善柔基本上真係由細一齊玩到大。

由於李立仁嘅老豆不時要返內地工作，阿媽又成日要加班晏收工，所以佢細個果陣有唔少時間被託管係鄺善柔屋企等佢阿媽放工先黎接自己返屋企。

作為回報，當李生李太喺香港得閒果陣，如果有咩特別活動好多時佢地都會邀請埋善柔善潼兩姊妹一齊去玩等鄺生鄺太可以休息下享受下二人世界。

結果鄺生鄺太就好似多左個仔，而李生李太就好似多左個女咁。

由於善柔之後都只係第一個阿妹，所以李立仁某程度上都算係半填補左鄺生鄺太追唔到個仔嘅遺憾。

而李立仁同鄺善柔兩個，就係喺咁嘅環境下一齊長大。

不過對於衣親如兄弟姊妹嘅兩人，有一個問題其實一直都煩擾緊佢地從未解開。

就係由於當時佢地兩個出世嘅時間實在太接近，所以一直都無人分辨到到底佢地邊個大d邊個細d，然後二人就一直都以自己係對方嘅阿哥/家姐而自居。

結果男嘅會專登稱呼女嘅做柔柔，而女嘅又會專登稱呼男嘅為仁仁。

而衣個問題到到今時今日，其實都仍然無人有答案。

1.9

歷史故事講完我地就返返黎現代。

對於我衣份職業，你可能會問

“嘩，你講到溝人條女好似好易咁，個女仔實會對你移情別戀然後為左你同男朋友分手架喇?”

我嘅答案係:

當然唔會易啦。

首先要個女仔移情別戀已經唔易，
仲要佢移情完後肯為你同男朋友分手就更難。
你諗下要做到咁，至少你要令佢鍾意你多過鍾意佢男朋友；
又或者覺得你比佢男朋友係一個更好更值得依靠同信賴嘅對象，
咁你先可能有機會達成目的。

不過雖然係難，但真係要做其實通常又總會搵到辦法。

除非一對情侶兩人之間真係完全無問題，
雙方都可以完全滿足到大家對愛情上喺心靈同生理上嘅所有需要，
唔係嘅話佢地之間就總會有破綻可尋。

可惜都唔知應該話係好彩定唔好彩，到目前為止我暫時確實仲未遇到過一對咁無懈可擊嘅情侶。

好彩係因為咁令我從未打爛過自己個金漆招牌，
唔好彩係因為咁聽落好去似從一而終嘅愛情並唔存在喺衣個世界上，感覺好悲涼咁。

不過我覺得要解釋點解無遇過嘅原因其實都唔算困難。

因為我無遇過其實並唔代表世界上就真係無衣d情侶存在，只係如果佢地真係咁完美，咁男方就自然唔會有需要搵我咁解啫。

而當一方有唔滿足而需要搵我嘅時候，其實另一方又點可能完全得到滿足?

所以搵得我出手嘅，基本上代表佢地之間嘅bonding本身就已經係有隙可尋。

只係睇有無人可以透過衣d”隙”將佢地之間仍然聯繫緊嘅”鍵”破壞然後將佢地分開咁解啫。

不過要成功做到衣個職業，我都唔否認係要多得我一個不可或缺嘅能力。

2. Winnie與Jason

喺一間24小時營業嘅健身室內，一位二十零歲嘅妙齡”少女”正喺度好努力咁一邊拎住個啞鈴一邊扭動住佢嘅”蛇腰”。

「小姐，唔好怪我唐突，不過我岩岩見你做果個動作唔係好岩，你咁好易整親條頸架...」我望左佢一陣後終於忍唔住就主動行過去同佢講。

「真係架? 我都係上網睇片然後嘗試跟住佢黎做咋...」少女向我報以一個尷尬嘅笑容。

「如果你無做開，一開始最好都係搵人教下你或者睇住你做好d... 上網就咁睇片好容易忽略左一d細微位，而衣d細微位一無注意一來好易用錯力效果唔理想，二來會好易整親架。

好似你頭先咁，我估你想練腰，但因為姿勢唔岩大部份力都係出自你隻手，偏偏你又無沉低個膊結果d力去晒條頸度...」我語重心長咁解釋。

「我其實唔係唔想搵人教，不過d私人教練真係好貴呀，閒閒地都要六七百蚊一個鐘...」少女更加尷尬咁講。

「咁都係嘅... 一係如果你唔介意嘅等我教下你? 我見你頭先咁真係好驚你整親呀...」我帶點擔心咁講。

「真係嘅？傻架咩，我點會介意呀！ 但咁唔太好意思嘅，好似搵你笨咁…」聽到我提議教佢佢即刻好興奮然後又有d唔好意思咁講。

「無所謂啦，能夠係尖場遇到都算係一種緣份，咪當交個朋友囉~ 或者如果你真係覺得唔好意思，等完左又覺得我教得還可以嘅咁之後咪請我食返餐飯當學費～」我笑住咁講。

「好呀～無問題!」一餐飯換一個教練咁抵，少女當然好開心咁答應。

「咁你叫咩名呀?」我問。

「我叫Winnie呀，你呢?」

「我叫Ryan。」一個明明想立仁但卻係已經壞左嘅人。

2.2

其實對我黎講，衣份工作有時最困難嘅地方並唔係要個女仔鍾意自己，而係一開始要點approach去認識佢地。

始終香港人同外國人唔同，喺外國你可以好隨意咁求其同d三唔識七嘅人搭訕傾偈，對方對衣d行為根本已經習以為常完全唔會介意仲可以對你好熱情添。

但喺香港如果你謬謬然咁走去撩個女仔搭訕，除非你好似彭于晏咁靚仔，唔係就只會立即被標籤為一個好似林雪扮董卓咁嘅變態痴漢，個女仔好可能仲驚過見鬼咁即刻走夾唔抖消失喺你嘅視線範圍之內。

First impression第一印象嘅重要性我相信好多人都明白。如果對方一開始對你印象唔好，基本上未正式開始你都已經可以話係衰左九成，需要用好長時間先可以補救到，大前提係如果佢仲肯比機會你補救嘅話。

所以要唔突兀咁接近個女仔再令對方慢慢對自己產生好感先係衣份工作最困難同最考功夫嘅地方。

好彩，我嘅生意至少有target嘅男朋友幫手做自己內應提供唔少嘅資訊，相對上都算令衣件唔容易嘅事容易左少少同埋可以慳返唔少時間。

2.3

「係呢，點解你突然會開始想做gym嘅?」做完gym後 Winne堅持要請我食餐感謝飯，而我就係食物到左後問佢。

「哈哈，應該唔難估呀…」佢帶點自嘲嘅語氣應道。

「女人突然做運動，通常都係減肥嘅…」而我亦好老實咁講。

「係囉…」Winnie聽完我個問題就一啖塞左半塊牛扒入口然後再扁住嘴咁答。

衣刻我好似從佢個嘴型仲依唏見到果半塊牛扒嘅型狀，兩邊都有個小尖角突左出黎，好似d卡通人物食野嘅畫面咁。

「你係近排突然肥左好多?」我掩飾住內心嘅震憾同恐懼問道。

「唔係呀…」Winnie一路𡁻住塊牛扒一路答。

「咁點解突然有衣個衝勁?」我續問。

「咪因為我男朋友囉... 佢衣家成日嫌我肥呀...」Winnie面露少少嘅哀傷。

「咁慘? 係近排先嫌以前無架?」

「以前無架，所以我都唔明，明明佢識我果陣我已經係咁肥架啦...

初初識果陣就係咁讚我得意話自己都鍾意比較有肉地嘅女仔，但近衣幾個月佢就成日有意無意咁嫌棄我比說話我聽。哩，琴日佢先笑完我仲肥過龍珠入面果隻肥布歐呀， 煩到死!」Winnie一口氣將佢早已積落嘅不滿爆發出黎。

坦白講，望住Winnie近乎100kg嘅身型，我唔可以話佢男朋友有用任何誇張嘅成份，相反可能佢仲算厚道同保守添。

呀對唔住呀讀者，我突然醒起自己好似一直都無形容Winne嘅外表比你地聽，可能比左個錯誤嘅印象你地。

而當佢提起肥布歐，亦令我諗起龍珠入面當肥布歐將魔界之王達普拉變左朱古力後再一啖放左落口個樣，同佢頭先放塊牛扒落口果樣好似真係有異曲同工之妙，唔怪得頭先我有一剎那覺得個畫面有d眼熟。



(如果唔知我講咩可以參考一下以上兩張圖片)

「咁衰架佢... 不過減肥其實外表因素都只係其次，最重要係健康，太肥心臟同血管好易有事，膝頭又容易受傷。」但我個口當然唔會咁講，仲講左d行到無得再行嘅野去表示我對佢嘅關心。

「咁我都明，所以咪黎試下做gym囉… 但減肥真係好辛苦呀!」Winnie將另外半塊牛扒一口氣放埋入口後又繼續扁住嘴講。

「咁衣個世界唔付出又點會有收穫呢~」我鼓勵佢道。

「做運動都已經好辛苦，最慘係仲要戒口，我最鍾意就係食野架嘛!」然後佢又放左幾塊薯仔入口繼續呻。

「努力一排睇下有無成效啦~我估當你見到自己真係瘦左果刻應該會有好大嘅鼓舞同動力令你可以繼續捱落去嘅~」我鼓勵道。

「希望啦...」衣個時候佢已經清左成隻碟再將整個甜品焦糖布甸一野啪左落個口。

(我記得肥布歐其實都好鍾意食野，仲要咩都好似又係咁一啖過.... )望住佢嘅食相我心入面不其然暗地裏諗。


「係呢，咁你同男朋友拍左拖幾耐？點識架？」慢慢我又將話題引導返去佢男朋友度。

「落多個B餐要薯條呀唔該~

都年幾有多喇，佢係我大學同學黎架。」

Winnie拎轉左身同侍應order左第二個餐後就拎返過頭過黎答我。

「…咁佢係咪好瘦架？」我收起對佢食量嘅震驚然後問。

「衣家係瘦左好多，但以前其實佢都係一個肥仔黎架～」叫左野食後Winnie心情好似又好返好多。

「咁佢又好意思嫌棄你？」

「或者女人都係命苦啦...」Winnie有d埋怨咁講。

「咁佢初初點解又會吸引到你嘅青睞呢？」我好奇問，再前設左係人追佢而唔係佢追人。

「因為某程度上，其實佢都算係拯救左我生命嘅一個人...」Winnie眼中流露出懷緬嘅神色。

「咁誇張? 點解咁講?」

然後Winnie就喺等緊第二個餐黎果陣，慢慢咁將佢嘅故事講左比我聽。

2.4

你 有無曾經試過覺得自己係衣個世界上好孤獨，
好似永遠都無人鍾意自己，歡迎自己，
去到邊都唔會有人肯包容你，接納你，需要你。

世界對你並不友善，去到邊自己都註定只係一個被嫌棄嘅人物?


我叫溫小蓮，英文名係Winnie。

父母叫我小蓮，係因為從母親個肚出黎果一刻開始，我就已經以8.5公斤刷新左醫院紀錄被列為世紀巨B。

而喺香港，早出世嘅大B對父母黎講可能係入學優勢嘅福音，但體積龐大嘅巨B對小朋友黎講就絕對係完全相反嘅詛咒。

所以父母希望個”小”字可以令我嘅體型稍為變小，衣個名係佢地對我往後人生嘅一種祝福。

可惜”肥”就好似一個烙印咁，一旦刻上就由我出生至今都從未離開過我。

比起名字嘅祝福，佢地比我”肥”衣個胎記似乎更加頑強同有效。

喺香港，過瘦嘅人唔會有事，但過肥嘅人就一定會被標籤然後註定要過一個唔愉快嘅童年。

你睇姜濤衣家咁紅咁靚仔，細個都會因為肥而比人欺凌；
欣宜由出道到衣家成功前受過幾多委屈同嘲諷；

你就會明白肥人喺香港到底係有幾悲慘同低等。
更何況我比佢地更加肥?

「嘩你睇下Winnie，行步路d肉都跳下跳下咁架，好恐怖呀…」
「老師，我唔想坐佢隔黎呀，佢一個人都霸晒兩個位咁濟成日過界，好逼好辛苦呀…我唔要同佢坐!」
「好心你咁大份繁忙時間就唔好搭巴士啦!應該要叫巴士公司收你兩個人嘅價錢!」
「人地叫Winnie the Pooh，你就叫Winnie the 豬! 哈哈~」

從少衣d難聽，充滿歧視同嫌棄嘅說話對我黎講都係家常便飯。
而唔知點解衣種態度其實仲會傳染，當有一個人笑你，其他人見到都會跟住佢一齊笑，到最後變成左連群結隊。
久而久之，我都接受左自己係一個人見人厭嘅人物，開始封閉自己。

當然我都唔係完全無朋友，部份女同學相對上都無咁介意我嘅身型仲會肯同我玩，只係d男同學基本上唔係成日笑我就係好怕我，一見到我就會敬而遠之。

所以由小學開始我都好唔鍾意亦好害怕d男仔。
我唔敢直望佢地，因為我好驚見到佢地望住我果種目光。
不論係畏懼、嘲諷、嫌棄定係好似見到異型咁，
我通通都唔會想見到。

2.5

不過就算我幾封閉自己都好，異性相吸始終係人嘅天性。
隨住年紀漸大，我開始見到身邊越黎越多女同學臉上出現蜜運中嘅笑容，
又或者為左某個男同學心猿意馬嘅表情。
雖然我心入面好驚亦好唔鍾意d男仔，
但原來同時我心入面亦好羨慕其他女同學，
好渴望自己有日都可以有個男仔咁樣愛自己
好想自己壓抑多年嘅感情可以搵到投放對象，同佢共渡愛河。
但我知憑自己嘅外表衣件事根本係無可能會發生，衣個世界根本唔會有人鍾意自己...
其實唔好話搵到個男仔鍾意自己，就連搵個完全唔介意自己肥可以唔嫌棄自己肯同自己做朋友嘅男仔都無。
然後，我開始怨恨個天點解要咁對我…

到底我係衣個世界生存係為咩?
我好努力希望可以得到別人嘅認同，
我好希望自己都可以有被需要嘅感覺，
但我得到嘅就只有全世界嘅人對自己嘅排斥同厭惡。


不過一次偶然嘅意外，我終於發現左自己真正嘅定位應該係咩。

事源係有次放學我因為肚痛去左廁所，然後聽到出面其他同學嘅對話。

「咦，你地有無見過Winnie?」

「唔太覺眼喎，你有野搵佢?」

「諗住叫佢陪我行下街咋嘛~」

「你近排好似同佢好friend做咩都搵埋佢喎~ 」

「咁佢份人其實都無咩嘅，搵親佢幫手佢都永遠唔會拒絕。而且你地唔覺得有佢係側邊，自己會即刻顯得瘦左靚左，自信都多左咩?」

「原來係咁! 我就係覺得奇怪你做咩同佢咁熟，原來你係要搵佢去抬高自己~」

「Shu… 我唔係你諗得咁衰，我都真心當佢係朋友架~」

「信你先奇啦! 你照下鏡睇下你衣家個樣笑得幾奸先啦~」


突然間，我明白原來身邊嘅人肯同自己玩，
並唔係因為自己值得做佢地嘅朋友，
而只係因為自己可以襯託出佢地嘅突出同美麗。

不過諗深一層，其實咁都幾好呀，我可以有朋友，佢地又可以有優越感，
各取所需，fair enough。
衣個世界無可能個個都係主角，總需要有d綠葉去襯托出鮮花嘅豔麗。
雖然只係做陪襯，但至少綠葉都會可以因為鮮花而有人觀賞。
既然自己適合做綠葉，
咁就努力做好本份去襯托其他鮮花。
至少，我都有我嘅作用，
可以講係另一種被需要呀~

所以我無因此而嬲或者同佢地停止來往，
而只係終於接受左衣個世界
原來真係無人會欣賞自己，
無人會重視自己，
無人會想真心同自己做朋友。

「嘩，你真係好fit身型好靚呀，如果我有你一半咁slim就好喇…」
「衣d污漕野等我黎拎啦，唔好整污糟你條靚裙嘛~」
「你地食唔晒唔想食唔好格硬食啦，比我幫你食埋佢，反正我都咁肥咯~」

我唯一可以做嘅，就係加倍努力去做好綠葉衣個角色，甚至更加貶低自己去抬高佢地。咁至少我可以成就到其他人，顯示出自己嘅功用。

2.6

到到大學，或者人真係開始會長大成熟，
d男同學無再好似中小學雞咁成日笑我，表面上開始會願意同我正常講下野，
所以情況好似好左少少。

不過一直都活係極度自卑當中嘅我當時感覺到佢地其實都只係想be polite，
唔想做得太難睇先會扮唔嫌棄我。
喺佢地心底入面，對我始終會築起一道圍牆，將我拒諸牆外。
所以心入面我其實仍然係好唔開心，感覺自己被孤立，亦唔相信衣個世界會有人鍾意自己。

而當別人會築起道圍牆防止自己進入時，因為唔想受傷，自己其實亦都同時會築起左一道圍牆防止其他人進入。

不過雖然係咁，但我知我心入面仍然一直都期待緊有個人可以將衣幅牆打爛，然後大家可以進入彼此嘅心入面。

我一直等一直等
直至有日， 衣個人終於出現咗...


「你…你好呀，請問介唔介意我坐你側邊?」

有日，慣常坐我側邊嘅女同學因為唔知醒走左堂，然後當時完全唔熟嘅Jason見我側邊有位就突然走左過黎問我。

「唔…唔介意…」因為有d意外所以我都有少少口齒不清。

「你… 係咪叫Winnie?」不過我發現除左我，Jason好似都有d怕醜講野唔太流暢。

「係…呀…」我答。

「Winnie你好…我…我… 我叫Jason呀~」

雖然從未傾過偈，但因為始終大家係讀同一科成日都會見到，開學前又會有d ice breaking活動，所以我地都會記得大家叫咩名。

「我知，我都認得你…」我胡亂應左句。

「唔好意思，同班左咁耐都好似無同你講過野…係呢… 我岩岩買咖啡今日買一送一多左杯，我…我可唔可以請你飲? 唔飲早堂好易訓著架~」然後佢就遞左左手拎住嘅一杯咖啡比我。

「哦…多謝你…」本身都真係有d眼訓，所以我都接受左佢杯咖啡。

「係呢，唔見平時坐你隔黎個同學仔嘅?」大家飲左啖咖啡後隔左陣佢又問。

「佢訓到唔知醒索性今日走堂呀…」

果陣因為有少少驚所以無多諗d咩就答。不過事後諗返，Jason衣個問題咪即係話左比我聽原來佢之前已經一直有留意我? 唔係佢點會知平時邊個同我一齊坐?

「原來係咁… 咁點解你會讀衣科嘅?」佢一副”原來如此”嘅樣，有d開心然後又繼續問。

於是我同Jason就開始左你一句我一句嘅交談，慢慢大家習慣左後就再無初初果種怕醜同拘謹嘅感覺，然後果日一整天嘅堂佢都坐左係我側邊。

我好懷疑果一日同Jason講嘅野已經多過我之前二十年同男仔講野嘅總和，最後佢仲問我拎左電話號碼。

其實當果日最後果課落堂果陣我係有d失落，因為我知過左果日後我地又會變返以前咁做返兩個陌生人再無機會傾偈，就算佢問我拎電話都係出於禮貌而唔會真係主動搵我。

點知

「聽日我再幫你買咖啡呀~」

果晚我就收到佢嘅whatsapp。

「唔駛啦…唔係幾好意思嘅…」

對於Jason突如其來嘅熱情同接近，我有d不知所措亦有d害怕，因為我真係未試過遇過一個會主動同自己傾偈嘅男仔，潛意式我想將佢推開。

「唔緊要喎，反正順手咋嘛，就咁話啦~」但Jason就堅持。

「咁…咁作為交換我幫你買早餐呀~」雖然一開始我就好自動咁築起左道牆，但心底入面其實我好想留一個窿等其他人可以偷偷入到黎，於是我諗左陣就忍唔住咁覆左。

就係咁，我同Jason慢慢開始接近大家，不時會whatsapp傾偈。而一星期後佢仲主動約我出去食晚飯。

其實咁快可以接受同Jason嘅親近，某程度上係因為我覺得佢同我都幾似。

除左大家都有個比較龐大嘅身型外，我感受到佢同我一樣都係唔太識同異性相處，顯得有d笨拙。亦因為咁，我覺得佢唔係想玩我或者為左d咩先對我好，所以對佢放低左戒心。

最重要係從佢對我嘅眼神同態度，我完全感受唔到任何嫌棄、排斥、厭惡或者嘲諷嘅成份，我好似真係搵到一個肯真心接納自己嘅人。

2.7

我記得果晚食飯，係我人身第一次同一個男仔單獨食飯。我好緊張，又驚唔小心泄露左自己d醜態，所以成晚戰戰兢兢，唔敢食得多又專登食得好慢。不過Jason好似好快就察覺到我嘅克制。

「Winnie…你係咪唔舒服?」佢關心咁問我。

「下? 唔係呀…」我裝作無事。

「唔係就好… 我見你好似好辛苦好唔自在咁… 其實… 你可以隨意d做返自己就得架喇…最緊要自己舒服~」Jason帶點溫柔咁講。

「你覺得我好唔自在咩?」我試探咁問道。

「唔好介意… 我見你望住d食物明明好想食但又好似要逼自己食少d食慢d，好似好辛苦咁….」

「邊有喎…」無諗過比Jason一語道破我硬著頭皮繼續否認。

「哈哈，無就最好啦~ 不過大家都鍾意食野，我覺得食野果陣最緊要開心舒服，好好享受~」講完Jason就喺我面前撕開左隻雞脾然後直接用手拎住黎食。

「咁你…唔介意女仔胃食同無儀態?」見佢自然嘅動作後我問。

「古語都有云，民以食為天呀~ 明明食野咁開心，咁就梗係要盡情享受啦! 諗咁多就住就住咁好辛苦啫~」Jason笑住講，而衣個笑容亦我感受到一種鼓勵。

見Jason都開始忘我咁食野，我漸漸都放低左矜持，回復返平時自己食野嘅節奏同態度，然後我發現Jason並無因為咁而有任何負面感覺，相反同我仲越食越放越開心添。

(佢真係完全唔介意人外表，相反仲同我好似添呀…)

我邊張食物放入口邊諗。

「你食野個樣真係好得意~」食食下Jason突然望住我講左句。

「下… 全世界應該得你一個會咁覺得…」我真係第一次聽有人讚我個食相…

「點會呀~ 而且就算係得我一個咁又點? 我鍾意咪得囉~ 仲好呀，無人同我爭~」而Jason越講越口花花。

「你…無飲酒都醉左亂講野嘅…」第一次比人flirt，我感受到自己塊面當時有幾紅同幾熱。

「對唔住… 我其實唔太識講野…」唔知係咪我嘅語氣令Jason誤會我唔鍾意，所以佢好似好驚咁即刻同我講sorry。

「唔緊要…」其實我唔係嬲，相反，我個心仲有d甜絲絲嘅感覺。因為衣次係第一次有男仔話我得意，仲好似有d暗示唔討厭自己咁。

唔可以否認，Jason對我嘅態度同熱情令我有d意外。而經過果晚我對佢嘅好感度亦都大增，我感受到自己幫自己築起嘅圍牆正逐漸被瓦解。

衣晚後我地都繼續每日會message傾偈，又會不時約出去一齊食飯。
而Jason亦越黎越主動送上關心同溫暖，做一d 我覺得好sweet嘅行為。

我好記得有幾次自己捱完通頂做功課，Jason第二朝都會主動係我屋企樓下等我為我送上一份早餐同咖啡，然後再同我一齊返學，但其實明明佢自己應該都通完頂好累。

又有一次夜晚我同佢出去嘅時候唔小心跌親擦傷左膝頭哥，Jason見到就好緊張，即刻扶我去坐低然後仲衝左去藥房買膠布同藥水，再好細心咁幫我清洗傷口同貼膠布。

當時喺Jason身上，我感覺到佢對自己真係好好，無任何嘅嫌棄同看不起，真心當自己係一個正常人甚至係愛人，完全接納晒自己嘅所有野。

果刻我終於知道原來衣個世界真係有人唔介意自己嘅外表，會真心真意對自己好。

於是我地就越黎越close，越黎越熟。而個多月後隨住Jason突如其來嘅表白後我地亦正式咁喺埋左一齊。

我仲記得果晚望住佢送嘅果紥玫瑰花，我真係成晚都甜到完全訓唔著。到到第二朝雖然好累好眼訓，但當出到去見到Jason後，我突然間又充滿返能量有返晒精神。

愛情嘅魔力真係好大，原來蜜運中嘅感覺係咁…正!

我終於明白之前d女同學拍拖果陣點解個樣會咁幸福，終於可以自己親身體會而唔駛再羨慕其他人。

唔係Jason嘅出現同接近，我相信衣家嘅我可能仲係極度自卑又無人會要嘅大肥婆。

係Jason令我知道原來自己都有人會鍾意，亦因而令我終於有機會體驗到正常人喜怒哀樂甜酸苦辣衣人生八態中自己一直缺少左嘅喜、樂同甜。

2.8

「原來係咁...唔怪得你肯為佢犧牲咁大啦。」聽完Winnie嘅憶述同自白後我講。

「係呀~ 其實雖然我細個果陣成日比人排斥比人笑，但我都無點諗過要減肥，因為真係太辛苦…

同埋我都係希望自己有日可以用外表以外嘅野得到人地嘅認同，就當係對上天一種唔想認命嘅控訴… 不過衣家為左Jason，我願意嘗試。」Winnie有力說道。

「睇得出你真係好鍾意佢呢~ 但點解頭先你又話佢會嫌你肥?」

「唉，我都唔知呀… 你話兩個人係咪真係對得耐左就會厭? 同埋唔知點解我地一齊左後佢慢慢就變瘦左，而我就可能因為心廣體胖比以前再膨脹左少少…唔知咁有無關係呢?」Winnie由甜蜜嘅樣子變成左苦瓜乾。

「越黎越瘦? 會唔會係因為你平時食晒佢d野呀…」見Winnie用一個故事嘅時間連第二個餐都就快食完，我不其然有左咁嘅推測。

「邊有喎！」佢成個口塞滿住野咁反駁。

「講笑啫～咁為左佢你之後繼續努力啦！」聽完故事後我都只可以叫佢繼續努力。

「唉，希望有用啦…」不過對Winnie就無乜鼓勵作用。

「我真心欣賞你肯為男朋友付出咁多呀! 真係比你感動到攪到衣家都有d眼濕畼添..黎緊等我繼續幫你手啦~」我繼續支持佢。

「真嘅? 多謝你呀!」Winnie太開心個口一路噴野一路講。

「你都係食埋d野先講啦…」


聽完Winnie嘅剖白，我理解佢點解會咁著緊Jason。
貌似佢對Jason嘅感情應該係牢不可破，
但我知佢地之間嘅背後其實已經出現左條裂痕，
而衣條裂痕係源自於Jason嘅改變。

不過嚴格黎講其實都唔係改變，
因為從第一日Jason接觸Winnie開始，佢就無當過對方係自己嘅終生伴侶。
衣家，只係目的已達，時間已到咁解啫。

食完衣餐飯後，我暗地裏好為Winnie而感到傷感。
不過既然比佢知道真相只會換黎傷痛，咁我寧願佢永願都唔知，然後以一個最唔傷心嘅方法完結衣段感情。

當然，雖然佢地之間嘅裂痕係存在，但有d野都係需要時間同契機，急唔黎嘅。

2.9

之後嘅一個月，我都keep住每星期有定期同Winnie去做gym。而除左嬌正佢d姿勢外，我亦為佢度身訂制左唔少減肥嘅program。

不過衣一切嘅付出似並無獲得應有嘅成效，然後Winnie開始感到氣餒，對做gym亦越黎越無動力。

「我想放棄喇.... 都無用嘅! 反正咁辛苦都無用，點解我唔繼續放縱自己喎!」從體重磅走返落黎後Winnie大發牢騷。

我都算係見証住Winnie努力嘅人，衣個月其實佢都真係跟足我要求咁做無偷過懶。只能話或者有d人真係吸啖氧氣都會肥啦，唔係嘅話理論上咁嘅運動量或多或少點都應該會見到有少少功效。

仲有一個解釋係經過上次果餐飯，我懷疑佢其實係因為運動量大左因而偷偷地食左比以前更多嘅野，結過反而變成input> output…

如果真係咁，無效果又唔可以話唔正常。

不過原因係咩都好啦，本身我嘅重點其實都唔係幫佢減肥。

減到咪睇下Jason會唔會改變主意，減唔到咁就繼續我原本嘅計劃。

至少衣一個月雖然佢刷唔到消脂，但我就刷左佢唔少嘅好感值。

「如果真係太辛苦就唔好勉強自己啦... 我相信你男朋友都會明嘅，有無同佢傾過?」見佢開始氣餒又發脾氣我就問。

「佢? 算吧啦…」Winne聽到後更加無心機。

「發生左咩事? 」我問。

「我同佢講我已經好努力好辛苦，但佢就淨係識話如果咁勤力點會無效，然後就話我一定係唔夠勤力又無戒口... 根本都完全唔體諒我唔鼓勵我!」Winnie發更大脾氣咁講。

其實Winnie應該都認同Jason所講自己並無戒口又未算真係盡左100%全力，但自己咁辛苦嘅時候佢都只係希望換黎對方一句鼓勵或者欣賞嘅說話，咁佢就可以有動力繼續辛苦落去。

可惜自己付出完最後得到嘅就只係對方無情嘅責備，少少appreciation都無，令佢更加唔知自己點解仲要咁辛苦。

「咁佢可能都係想為你好講野先嚴厲d希望你最後可以成功啫…」做樣我都要嘗試安慰下佢。

「唔係啦… 衣家我係佢心目中根本就咩都唔係! 」

「點解咁講?」

「其實我都唔知由幾時開始，好似我講嘅所有野佢都唔會鍾意唔會岩聽...

例如我地去食飯問佢想食咩，佢一定係答是但，但到到我揀好喇，佢又實會嫌三嫌四話衣樣唔好果樣唔好...

然後平時講d野，佢總係鍾意同我唱反調，好似當我講係A好d嘅話，佢就一定會話係B好d，明明本身話無意見…

淨係咁我都算… 但你知唔知最嬲係咩呀?如果有日佢d friend同佢講A係好d，佢又會即刻轉軚表示認同。

有次我話有套戲好好睇，佢有d不屑咁望一望我就無再理我。點知轉個頭佢個friend同佢講衣套戲好睇，佢第二日就即刻話要買飛去睇。

總知我講咩都係錯唔岩聽，其他人講嘅就咩都係岩，你話呀，邊有人咁對女朋友架!」Winnie越講越傷心眼淚開始係佢眼框打轉。

對於Winnie對Jason嘅控訴，我其實並唔意外，因為衣種行為典型就係當一方開始嫌棄另一方甚至係睇唔起對方時嘅自然行為。

當你心入面唔認同甚至睇唔起一個人嘅時候，無論佢講咩你都總係覺得唔岩唔認同，唔係你就會覺得自己同對方都係一樣。

「咁睇黎你地嘅問題根本唔關減唔減到肥事喎…」我沉思完一陣後講。

「其實我知可能係我唔夠努力，唔夠堅定所以效果咁差… 但我都只係希望佢可以appreciate下我嘅付出同努力，比d鼓勵我啫! 點知得到嘅就只有佢嘅鄙視同批評…我咁努力咪又係為左佢! 唔係點解我要咁虐待自己啫…

你話我係咪真係好差? 或者我應該好似以前咁，根本就唔應該幻想會有其他人欣賞自己鍾意自己… 好似以前咁諗咪幾好，就算唔開心都唔會好似衣家咁傷心…係我自己貪心發左d唔應該發嘅夢…」

眼淚終於流出，我知Jason對佢態度嘅改變再一次引發出返佢根深蒂固嘅自卑感，佢開始又陷入信心危機。

專門去溝啲雞都要表現自己實屬難得

都唔係你諗咁嘅

我改你個故啫

2.10

「Winnie，你唔應該咁諗架… 無論對方講或者做左d咩都好，我地都唔應該因為對方而質疑自己… 知唔知咩人係最charm? 就係有自信嘅人。如果你自己都唔信自己，唔欣賞自己，咁又點可以說服其他人去欣賞你?

衣幾個禮拜我見証住你有幾努力，為左佢付出左幾多嘅汗水。無論最後成唔成功，單憑你有衣個心，衣份毅力，肯為佢付出咁多，我就已經覺得你係一個滿分嘅女朋友，值得其他人珍惜。」我衷心滿有感情咁讚賞佢。

「哈，努力咁又點呀? 佢咪又係完全唔欣賞唔重視...」Winnie帶住晦氣咁講。

「佢唔識欣賞係一件事，但咁唔代表你就真係唔值得被欣賞。至少我就覺得你真係好好…而且我相信除左我，衣個世界都一定仲有唔少人會識欣賞你。」我堅定有力望住佢咁講。

「真係嘅?你真係欣賞我?」而我堅定嘅聲音亦令Winnie開始信服，聽到我嘅讚賞後好似受到鼓舞，心情平伏返少少。

「當然啦~ 唔係我點會無啦啦花咁多時間免費教你做gym? 我就係欣賞你，比你對對方嘅愛所感動我先希望你可以成功。」講完我都覺得自己背後好似正散發出聖人嘅光芒。

「多謝你呀… 可惜我只係辜負左你嘅努力…」Winnie有d感動。

「又唔好咁講，做運動點樣對你身體都會有好處。而且就算你最後真係減唔到，其實我覺得你衣家都好可愛呀~」我向佢舉起隻手指公講。

「下? 咁識講野嘅你? 好假呀，我先唔信你呀~」面對我對佢外型突如其來嘅讚賞，Winnie一開始有少少愕然仲話唔信我，但好快我就見到佢塊面已經紅住咁笑到見牙唔見眼。

「同埋... 有d野真係唔應該淨係睇外表或者淨係睇單一方面架，你知唔知肥布歐比我最深刻嘅印象其實並唔係佢肥?」然後我突然轉左認真mode。

「咁係咩?」Winnie好好奇咁問。

「係佢嘅善良，佢會連一隻狗仔都唔捨得佢死。

其實就算比你做到瘦布歐，正常布歐或者矮布歐，外表雖然可能無咁突出，但如果你好似佢地心腸咁衰咁惡毒，咁我寧願你係最善良嘅肥布歐，唔係我實唔會理你… 因為一個人嘅內在先係最重要，而就我觀察，你嘅內心比好多人都靚~」我向佢投以深情同欣賞嘅目光講道。

「多謝你呀… 如果佢都會好似你咁諗就好喇...」我見Winnie又開始眼泛淚光，因為我比左久違了嘅欣賞同認同比佢。

「好好同佢傾下啦… 如果佢真係鍾意你，佢一定會明白。但如果佢已經唔再鍾意你，咁佢亦都唔值得你再為佢付出同流眼淚。

兩個人一齊，學識互相欣賞係好重要。只有學識欣賞同放大對方嘅優點，包容同縮少對方嘅缺點，咁一段關係先可以長久。

唔係久而久之，大家眼中就只會剩返低對方嘅缺點繼而充滿嫌棄。始終破壞比建設容易太多喇…

就好似一張白紙咁，一個小小嘅污點已經會好明顯。但調返轉如果係一張已經滿有唔同色彩嘅紙張上面，你就算加d白點上去都好唔顯眼。」我好似安慰個小朋友咁輕輕拍住佢頭頂咁講。

「嗯…知道…」經過我嘅開解，Winnie終於收起返佢嘅眼淚。而從佢嘅眼神，我知有d種子已經被埋下。

不過講起肥布歐，都令我諗返起以前嘅一件往事…