<我嘅職業係專溝人地個女朋友>

多謝你鍾意同支持

12.22

「嘩，嗰個男仔咁靚仔嘅? 仲要高大再加係mix添㗎! 唔知佢等緊邊個呢?」

同事們見到一個比全盛時期陳冠希更靚仔仲要高大嘅男人出現喺佢地公司樓下，然後個男仔一見到佢地就兩眼發光笑住咁走埋嚟﹐再同佢地個同事Celia打招呼。

「送比你㗎~」張啟光隻手變魔術咁喺背後拎咗支紅玫瑰出嚟。

「Wooooo~」班同事見到哩個畫面全部開始起哄，然後一臉羨慕咁望住李思柔。

面對同事們嘅目光，李思柔只能夠向佢地報以一個尷尬嘅笑容再加一個”有咩明天再問再講”嘅表情，然後就急急腳咁撓住張啟光隻手逃跑般似的走咗去。


到第二朝，佢就受到全部女同事嘅嚴刑逼供。

「快啲講，嗰個男仔係邊個嚟嘅，同你有咩關係?」

「佢係我嗲哋嘅朋友個仔，我地由細都算玩到大，不過到佢高中嗰陣就移民咗去英國，係無耐前先返返嚟香港...」李思柔無奈如實答道。

「好朋友咁佢做咩送玫瑰比你? 好呀Celia你，有個咁靚仔嘅朋友都唔介紹比我地識...」同事們抱怨。

「我地真係只係有細玩到大嘅好朋友咋...」李思柔嘗試解釋。

「所以佢唔係你男朋友?」同事A問。

「唔係...」雖然感覺大家都似係發展中，但李思柔最後都係講咗哩個答案。

「但佢送花比你喎... 佢追緊你?」同事B問。

「可能係掛...唔知呀...」李思柔尷尬地說。

「咁點解你唔接受佢? 佢咁靚仔你都唔要，你傻咗呀?」同事C問。

「咁我對佢好似無嗰種感覺嘛...」李思柔說道。

「你有病呀? 有個咁高質嘅男人追你你都無感覺? 如果我有個咁嘅人追，我折壽10年都願呀...」同事A為李思柔痛心疾首咁講。

「喂，你唔要咁不如益下我地介紹比我地識呀?」同事B襯機提議。

「係囉係囉，搵晚食飯介紹比我地識啦~」其他女同事CDE聽到立即搶住和應。

所有同事你一句我一句咁纏住李思柔，又不斷對佢投以無比羨慕嘅目光，令本身無咩感覺嘅李思柔除咗覺得有d無奈同煩厭外，不自覺亦開始有一絲飄飄然嘅感覺...

而敵不過同事們嘅苦纏，李思柔亦真係約咗張啟光同佢班同事共晉晚餐。


成餐飯，班姣婆就不斷咁纏擾住張啟光講嘢。

「Anson，你好大隻喎，係咪成日做gym㗎?」
「Anson，你平時鍾意食咩㗎?」
「Anson，我聽Celia講你移民咗去英國，嗰邊生活點㗎? 會唔會考慮返黎香港生活呀?」


「Anson，你咁靚仔，有無女朋友呀? 鍾意邊類型嘅女仔?」

直至有人問出哩條問題後，全場突然間就靜晒全部人都望住張啟光。


「我無女朋友呀，因為我一直等緊一個女仔回覆我嘅心意。」張啟光充滿柔情地望住李思柔講。

本身啲女同事雖然都估到張啟光係鍾意李思柔，但哩刻聽到佢突然親口好深情咁望住後者講，佢地反而有啲唔知點接落去。

「但Celia對你好似無興趣喎...」直至有個同事仍然有啲唔心息就講。

12.23

「唔緊要㗎，我會一直努力一直等，反正都等咗咁多年，我唔介意繼續等㗎~」張啟光完全唔介意咁答。

「咁靚仔咁好人仲要咁專一... 神呀，Celia到底前世做咗咩事今世先會咁好彩得到男神個心呀... Anson，我地明白喇，等我地幫你下啦~ Celia，點解Anson咁好你都唔接受佢，你快啲講!」同事們感受到張啟光嘅誠意就決定幫佢一把順便食下花生。

「無啦啦做乜燒去我度呀... 明明係你地逼我介紹佢比你地識...」本身諗住低調淡出同事視線嘅李思柔超級尷尬咁講。

「我地已經明白Anson心有所屬唔會考慮我地，所以唯有盡力幫佢贏到美人歸啦... 而且你都算係我地好同事，我地都想你得到幸福嘅~ 你唔好再逃避喇，快啲答啦!」同事A裝作用心良苦嘅樣子。

「我... 我唔知呀...」見到張啟光期待嘅眼神，李思柔心一軟唔知點答好。

「唔緊要㗎，我講過我唔會逼你，慢慢嚟就好~ 你地都唔好逼Celia啦，我唔想自己比到壓力佢或者令佢唔開心呀...」意料之內嘅答案張啟光並無露出太大嘅失望表情，轉而求其他同事高抬貴手。

「點解哩個世界上仲會有咁完美嘅男人㗎... 唉Celia，真係唔知你諗緊咩㗎... 」見到張啟光無比溫柔同處處為李思柔著想嘅一面，其他同事都替佢感到不值。

「咁Anson其實你點解會鍾意Celia嘅? 我聽聞你地由細一齊玩到大但之後你就移民咗去英國，你地之間應該好少見面同聯絡?」同事C見氣氛有啲僵就轉一轉方法八卦咁問。

「因為Celia真係好好囉! 你地唔覺咩?」張啟光笑住咁答。

「係好好，不過應該唔足以令你咁痴情囉~ 你地之間一定有啲野發生過嘅，快啲講比我地聽啦!」同事C追問。

「咁一定有嘅，不過要問下當事人比唔比我係度講先得~」張啟光又笑笑口咁望住李思柔講。

「唔好玩啦... 我知個醜字點寫㗎...」

關於哩個問題，李思柔其實都好想知答案，因為就算上次張啟光表白，佢都無好具體咁講點解會一直鍾意自己。但要佢當住咁多人面前比人講出鍾意自己嘅原因，李思柔都實在無咁厚嘅面皮，所以帶住靦腆咁出聲拒絕。

「咁無辦法啦，有機會嘅可能我地私下先再講~ 不如調返轉你地講下比我聽Celia平時做嘢係點，係公司有咩趣事呀?」張啟光一副如我所料嘅表情然後就同其他同事講以免佢地再繼續糾纏喺哩個問題上令李思柔難堪。

於是班出賣朋友系列嘅同事就將李思柔平時喺公司不論型嘅瘀嘅叻嘅蠢嘅事蹟全部都講晒比張啟光聽，聽到張啟光好開心得嚟又十分滿足。


望住哩個張啟光，李思柔感受到張啟光對自己嘅真心，心入面都不禁有一絲暖意。

(係囉，明明有個咁完美對自己咁好嘅男仔等緊自己，點解我仲會為一個花心男而放棄佢?)

李思柔開始問自己但得唔到答案。

哩刻嘅佢，可能都仲未意識到自己個心其實不知不覺間已經漸漸為張啟光而打開。

12.24

時間又過咗兩星期，因為軒爺就快要返英國，所以三家人就去咗效外BBQ當為軒爺餞行。

整個BBQ，張啟光都毫不忌諱咁對李思柔大獻殷勤，自己燒親嘅嘢食基本上全部最後都放咗喺李思柔個膠碗入面，又驚佢口渴不時為佢遞上飲品，攪到李思柔自己都有少少唔好意思，但又並無開口叫張啟光唔好。

李啟光嘅舉動自然令其他所有人都留意到甚麼然後暗暗喺度偷笑，除咗一個人係例外。

「依婷，日本好唔好玩呀? 」留意到眾人嘅目光，李思柔就問啱啱同老公渡完蜜月返嚟嘅郭依婷希望可以藉此分散下大家嘅注意力。

「梗係好玩啦， 邊有女人去日本會覺得唔好玩㗎~ 我地仲要好好彩撞正有兩晚落雪超靚呀! 」諗起渡蜜月嘅情境郭依婷眉飛色舞咁講。

「你就好啦~ 咁有無我地啲手信呀?」李思柔笑問。

「梗係有啦，喺車度一陣會派比你地㗎喇，放心~」郭依婷一副你地放心嘅樣講。

「咁你老公對你好唔好呀? 」李思柔再問。

「好~佢敢唔好我打死佢呀! 本身佢今日都話嚟㗎，不過放咗太耐假公司今日有急事急call佢佢都唔好意思唔返去...」郭依婷有啲唔忿氣又有啲唔好意思咁講。

「唔緊要啦，之後仲大把機會見，最緊要佢對你好啫~」李思柔就安慰返佢。

「咁佢對我一直都好好嘅，唔係我都唔會揀佢啦~」郭依婷笑得好甜咁應道。

「啱呀，你睇你個舊情人幾快移情別戀呀，好彩你最後無揀佢咋~」哩個時候郭非凡突然插咗句嘴講笑道。

「哼，如果佢嗰陣有對我咁好，我都未必嫁比我老公啦! 不過大家記住唔好話返比我老公聽喎~」郭依婷望左望幫李思柔件雞翼搽緊蜜糖嘅張啟光一眼後就裝作生氣咁講。

「你羨慕唔嚟㗎喇，人地為咗溝女決定留返喺香港唔返英國添呀~」郭子安繼續講。

「真㗎? 張啟光你好嘢呀...當年我喊住係咁叫你唔好走你都唔肯為我留低，依家你為咗第二個你就...」因為啱啱先渡完蜜月返嚟所以郭依婷並未知道張啟光決定暫時留喺香港哩個決定。

曾經，郭依婷都真係好鍾意張啟光哩個兒時玩伴，不過大大下佢就感覺到對方對自己並唔係情人嗰種感覺，而因為太留意對方又有女性嘅直覺，佢之後亦都感受到對方真正鍾意嘅係李思柔，加上之後張啟光一家決定咗要移民去英國，所以好早佢就已經毅然決定要放棄張啟光然後再遇上依家個老公。

每個人對同一件事都可以有唔同選擇，而郭依婷同李思柔喺感情上嘅取態可以話正正係相反，前者果斷後者堅持。

所以對張啟光留低嘅漖定，郭依婷其實又唔係太意外，只係無諗過對方對李思柔會咁長情，或者佢地兩個某程度上都算係同一類人?同時間，佢亦偷偷咁望咗一望自己阿哥。

12.25

話晒都一齊長大，郭依婷對自己阿哥同李思柔嘅關係同感情自然都有一定了解。佢知李思柔一直鍾意自己阿哥，而佢亦覺得自己阿哥對李思柔並唔係無感覺，不過就一直都諗唔明點解佢阿哥好似好早已經決定咗自己唔會同李思柔一齊，相反仲成日換畫有唔同嘅女朋友攪到自己成個player咁風評極差。

佢特登望一望佢阿哥，其實都係感覺到郭子安頭先嘅反應有啲唔尋常。依刻，佢見到郭子安雖然笑笑口咁挖苦張啟光，但憑佢對佢阿哥嘅了解，佢知道佢臉上嘅笑容係扮出嚟。或者咁講，佢有種感覺係佢阿哥好努力咁想向大家同自己表示，佢完全唔介意亦無事，但就有少少欲蓋彌彰嘅感覺。

「咁嗰陣我就算唔想走，我父母都唔比我唔走啦~ 你估我嗰陣真係好想走咩? 我都好想可以留返喺香港陪住你... 同埋思柔姐姐㗎~」張啟光完全不怕醜咁直認道。

「所以係我最衰囉，原來我當年拆散咗兩對鴛鴦~ 依家補償返比你自己留返喺香港，仲有咩唔滿意呀衰仔~」軒爺哩個時候都忍唔住出聲講笑道。

「無~爸爸你最好~ 希望我唔會辜負你一番心意，好快比到新抱茶你飲啦~」張啟光笑住講道，同時亦攪到李思柔塊面仲紅過蘋果。

作為張啟光父親，軒爺都支持自己個寶貝仔嘅選擇希望佢可以成功，始終佢都算睇住李思柔長大，雖然係比自己個仔大幾年，但軒爺對哩個未來新抱嘅人品絕對係百分百滿意。

而佢見到李思柔臉上嘅表情雖然非常怕醜同尷尬，但實際上又完全無拒絕同迴避，軒爺就覺得到張啟光今次唔係無機會。

之後郭子安不時都會對張啟光單單打打取笑下佢同李思柔，但作為當事人嘅張啟光就笑得越嚟越燦爛完全無怕醜同尷尬嘅感覺，好似恨不得你繼續講將佢同李思柔拉得越埋越好，而李思柔就一臉尷尬但就努力咁扮無事咩都聽唔到。

不過哩個話題無可能一直持續落去，所以當話題已過，郭子安就開始越嚟越心不在焉，坐坐下仲借尿遁走咗去一段時間都無返嚟。

而留意到郭子安唔尋常嘅除左郭依婷外，仲有李立仁。見郭子安突然行開消失咗一陣子，佢都靜俏俏咁離開咗自己個位置。

12.26

「子安?」行咗段路果然見郭子安正自己一個喺度對住個山發呆。

「Uncle Lee?」郭子安回過神來見到李立仁就禮貌地同佢打咗聲招呼。

「有無興趣傾下偈呀?」李立仁問。

「好呀，無所謂呀...」對於長輩郭子安自然不能拒絕。

李立仁:「做咩燒燒下野食突然自己一個走咗出嚟?」

「無呀，見食到飽飽地咪諗住周圍行下消化下囉...」郭子安胡亂編了個理由。

「見到思柔同啟光咁close好唔舒服?」但李立仁決定單刀直入。

「... 唔係呀，點會呢?」郭子安自然扮笑笑口否認。

「Uncle睇住你地大，有啲嘢我唔會唔知嘅..」李立仁講。

「真係無呀...」郭子安堅持。

「你應該知思柔有個姨媽?」見郭子安否認李立仁突然轉問道。

「嗯... 不過好似柔柔未出世前就已經離開咗?」郭子安問。

「係呀，佢同我其實係同年同月同日同地方出世，由我地相遇開始就已經結下咗不解緣。我地差唔多日日見面，由細玩到大，真係講感情比你同思柔細個嗰陣仲要親好多。但亦因為咁，所以我一直都唔知自己對佢真正嘅感覺，直至有日佢突然同我講佢有男朋友了，嗰陣我先開始意識到原來自己對佢並唔係朋友或者親人咁簡單，但醒悟同後悔已經太遲，結果哩個遺憾就陪住咗我一世...」李立仁又再開始講同樣嘅故事。

「你咁同我講會唔會對Auntie唔太好呀? 佢知道可能會嬲㗎喎~」郭子安就講笑道。

「你Auntie本身就最清楚我地之間嘅嘢... 不過我想講嘅係我之後可以有你Auntie只係我好彩，如果無佢，我依家可能仲係頹廢咁過緊單身生活...

其實同你分享哩個故事，純粹係想話比你聽有啲野如果有機會嗰陣你唔捉緊，到到真係失去嗰陣先識後悔就已經太遲㗎喇...」李立仁語重心長咁講。

「但同樣地，做人應該都要有自知之明，如果明知自己比唔到幸福人，點解又要破壞佢嘅安寧同幸福，對佢造成傷害?」郭子安反問。

「坦白講，以你嘅往蹟，如果我係以父親嘅身份，我都唔希望你同我個女有咩感情瓜葛... 但如果以一個由細睇到你大嘅uncle身份，我都想話比你聽有啲野識後悔嗰陣已經太遲，而哩種痛苦仲可能會陪住你一世添...

我地年代有首歌叫愛得太遲，嗰陣爆紅都係因為真係唱出咗好多人嘅心聲...

不過就憑你啱啱嗰句，我知你都確實真係唔適合我個女。如果你真係夠愛佢，唔想佢再傷心難過，只要你諗起佢傷心嗰陣個樣，你就唔會比自己犯錯...

所以如果你對自己真係無信心，咁喺你唔夠愛佢哩個大前題下，你個決定都係無錯嘅...」

郭子安聽完李立仁嘅說話後並無回應，只係苦笑咗下。

(係啦，係咪因為我唔夠愛柔柔，所以我先會擔心自己有日犯錯然後傷害咗佢?
如果夠愛唔想佢傷心，點解我會咁無自信覺得自己會受唔住誘惑?

或者我確實係無資格...)

郭子安心裏默默咁係度諗。

不過佢知有個人，或者可以解答到佢嘅疑難。

推文，唔…覺得寫下一代既感情，節奏明顯慢左，語句都累贅左呢…

因為太多新人物所以諗住初初節奏慢少少等大家對佢地有多啲熟悉感先，嚟緊劇情會開始推得快同有啲突破位。

不過因為後面有啲位我仲未確定到劇情點走好，加上新年前又忙，所以嚟緊嘅出文速度會減慢，可能要隔日先出到文，唔好意思

唔緊要呀，確實近呢幾篇有啲free flow 諗到想寫乜就寫乜既感覺，甚至有啲位重複咁描寫(例如同事讚人都要兩個場景咁讚，仲要讚一樣既野…) 真係冗長左啲…
加油呀，慢慢寫啦，支持支持😊

12.27

「老豆，我可唔可以問你一個問題?」BBQ後，因為郭依婷有老公接，所以郭子安就同佢父親郭非凡一齊離開。

「少有喎，問啦。」郭非凡略感意外又帶點心虛地望了一望自己的兒子然後說道。

「聽聞你以前好多女朋友，但自從遇見媽咪後就決心定咗落嚟，係咪真㗎?」

「人不風流枉少年，後生仔有邊個無花心過呀? 到咁上下玩夠咪自然會想定落嚟囉~ 」郭非凡笑了笑答。

「我好認真想問你㗎...」但郭子安一臉認真望住自己父親，明顯地這不是他想要的答案。

「當年你老豆我比個初戀傷得好深，過咗段好痛苦嘅時間，然後有日我突然諗通咗其實只要唔比自己投入感情，咁就唔會受到傷害，所以寧願做傷人嗰個都唔想做比人傷嗰個，然後不知不覺就變咗做一個player維持咗一段好長好長嘅時間，長到自己都麻木晒唔知點為指一段真正嘅關係，點先叫真正鍾意一個人...

直至有次我帶你阿爺去覆診嗰陣機緣巧合認識咗你媽咪，佢比我嘅感覺同之前嘅女仔都唔同。我仲記得嗰次我地等緊見醫生，然後有個病人唔知係等得耐唔耐煩定有其他原因喺度攪事，你媽咪見到就好惡咁鬧個病人鬧到佢淆晒底仲頭耷耷咁...

嗰陣我覺得你媽咪雖然好靚，但性格就好似好火爆成條辣椒仔咁，但當我地見完醫生走嗰陣，我竟然又發現你媽咪鬧完個病人後就帶咗佢去另一個無咩人嘅地方同佢傾偈想了解佢實際有咩困難安慰佢，原來佢實質嘅心地都好好。突然間佢比我嘅感覺就由辣椒仔變成咗一朵好靚嘅鮮花咁，於是我對佢就產生咗興趣然後開始諗盡辦法去認識佢。

不過當時佢已經有個感情好穩定嘅男朋友，本身就算我自問追女仔經驗已經好豐富都好，對佢始終都係一籌莫展無咩辦法... 好彩最後上天眷顧加上你Uncle Lee嘅幫助，我先機緣巧合有機會搶到佢返嚟~ 然後意外地，我同佢間中雖然都會鬧交，甚至會因為生氣而鬧分手，但我竟然破天荒可以同佢喺埋一齊超過半年時間我都仲會想繼續同佢一齊而無一個意欲真係要同佢分手，哩種情況係我自初戀後都未試過...

12.28

我開始諗，或者哩個女仔真係可以令我安定落嚟? 但同時間，我亦開始驚哩個女仔或者會令我重蹈覆轍，令我再一次受到當年果種錐心之痛。我開始猶豫到底我應該繼續比自己咁落去，定係襯自己仲可以抽到身同你媽咪分手?

不過或者真係天意啦，當我仲十五十六嘅時候﹐你媽咪有日突然同我講佢有咗你，之後我就知上天已經幫我諗好咗答案，然後我就聽個天話修心養性同你媽咪結咗婚仲好快生咗你出嚟喇...」郭非凡回憶著多年前嘅往事說。

「原來係我幫咗你...」郭子安聽完唔知應該為自己嘅貢獻開心定唔開心好。

「都可以咁講，所以多得你，之後我地咁就安安穩穩過左三十年lu…」郭非凡帶點懷緬同感觸地說。

「咁你可唔可以老實同我講，結咗緍後你仲有無出去玩過?」誰知郭子安突然話鋒一轉問咗個好尖銳嘅問題。

「...哩個問題對你好重要?」

「好重要!」

其實郭非凡係知道郭子安點解會問哩個問題，因為當日郭子安同黎浩明講完見過佢同女人上酒店後，黎浩明同李立仁好快就同佢講咗哩件事以及哩件事對郭子安嘅影響。不過或者基於對朋友嘅尊重或者係佢地根本唔想知，所以黎李二人只係通知自己而無問過自己關於哩件事嘅任何問題。

始終唔係一件光彩嘅事，郭非凡初初都有啲擔心如果郭子安問自己哩單嘢自己應該點應對。不過諗深一層其實時間都過咗咁耐郭子安都從無向自己提過哩件事，所以郭非凡亦決定以不變應萬變並無向郭子安解釋，繼續避得就避，亦因而解釋咗點解一開始郭子安話有問題想問佢嗰陣佢有過一絲嘅心虛。

本身佢仲心存僥倖以為郭子安只係想問自己同Eva嘅事，只但係依家佢知今日應該都無可能再避得到喇...

---------------------


哩次BBQ後，張啟光同李思柔繼續越走越埋，相反郭子安就越走越遠，大家都以為張啟光同李思柔正式一齊都只係時間問題，但偏偏等極李思柔似乎就一直都唔肯按下哩個”確定”鍵。

因為佢知道一旦真係同咗張啟光一齊，佢就要正式咁放棄郭子安，同佢真真正正咁劃清界線，佢唔捨得亦下定唔到哩個決心。

郭子安知李思柔下定唔到決心係因為自己，所以佢偷偷地下咗另一個決定。

12.29

「子安辭咗職? 點解呀?」有日李思柔喺郭依婷口中知道咗郭子安辭咗職。

「我都唔知佢呀... 佢淨係話好累想休息下先再諗仲繼唔繼續落去喎...」對郭子安哩個決定郭依婷都唔知原因。

「唔得... 我一定要親口問下佢先得...」對於郭子安嘅決定，李思柔好似有啲驚慌同焦急。

「你做咩好似好緊張咁嘅? 其實佢嗰份工又辛苦人工又唔係高，佢都捱咗咁多年都仲只係個PA仔，轉工都未必係一件壞事呀...」郭依婷有點唔明白李思柔為何好像很大反應。

「但你知哩個一直都係佢嘅夢想嚟㗎...」李思柔解釋。

「雖然咁講好衰，不過有時追夢都要有個限度識及時收手嘅，始終世界係現實同殘酷...」郭依婷無奈地說。

「唔只咁簡單㗎...」但李思柔就搖搖頭細細聲咁自言自言。


自從李思柔同張啟光行得越嚟越近後，郭子安就開始避開佢地，所以李思柔哩幾個月見郭子安嘅次數可以話係接近零。不過聽完哩個消息後，李思柔再忍唔住當晚就去咗郭子安屋企搵佢，可惜對方並唔喺屋企，打佢電話又無人電，然後李思柔就索性喺佢屋企樓下等佢返嚟。

等咗唔知幾耐，佢終於見到郭子安嘅身影，只係對方身邊仲有一個同佢正在卿卿我我嘅女人。雖然早已習慣，但見到哩幕李思柔心入面仍然有啲唔舒服，不過佢好快收起情緒主動走咗過去。

「郭子安，方唔方便講幾句?」

對於李思柔嘅出現，郭子安並唔算太意外，甚至好似早已預計到佢會出現一樣。

「你返上去先啦，我轉頭上嚟。」郭子安錫咗身邊個女仔一啖，交左張屋企匙卡比佢然後講。

個女仔輕輕嗲咗聲，望咗李思柔一眼然後就好乖咁自己上咗樓。

「搵我做咩?」見個女仔已經上咗去郭子安就講。

「點解要辭職?」李思柔單刀直入。

「覺得累咪辭囉...」郭子安就講出一早已經預備好嘅答案。

「但做導演唔係你一直嘅心願嚟㗎咩? 你做PA捱咗咁多年，讀過咁多書又去過咁多地方遊歷過，點解突然要放棄? 依家先嚟放棄唔可惜咩?」李思柔著緊地問。

「就係我捱咗咁多年都仲未得到任何機會，仲只可以繼續做PA幫啲導演執頭執尾買咖啡我先想放棄呀! 我已經好累喇，唔想再浪費時間同人生... 咁啱有個friend話會開間健身中心想搵人幫手，咁我咪辭職去試下囉。」郭子安心灰意冷咁講。

「付出咗咁多，依家就咁放棄，你甘心?」李思柔痛心地問。

「唔甘心又可以點? 做人最緊要學識止蝕離場呀... 明知無可能又有個更好嘅選擇點解仲要浪費時間同心機? 我地個人生有幾長可以咁浪費呀...」郭子安語帶相關咁講。

「因為嗰個選擇先係自己真正鍾意，最想得到嘅嘢呀! 」李思柔大聲講道。

「哩個世界有好多嘢我地都會想要，但同樣地我地應該都要明白，好多嘢唔係我地話想要就可以得到，亦無可能得到晒所有我地想要嘅嘢，所以人先要喺適當時候作出選擇。 」郭子安平靜地講道。

「咁我地個約定呢? 你係咪都諗住放棄?」李思柔望住郭子安問。

多謝你意見 以後會留意返

哩個外傳確實係想試下比較即興嘅寫法無正文諗得咁完善，發覺原來係有啲吃力不過等完咗先share多啲，多謝支持

12.30

「柔柔，唔好咁傻啦... 你寫咗咁耐小說都無一個故事可以得到出版社認同幫你出書，而我亦無一個導演欣賞我比機會我。我地已經努力咗咁多年，咁咪正正係話緊比我地聽我地唔適合去做哩件事囉。你都係專心做記者，寫好啲專欄啦...」郭子安灰心地說。

「我雖然係做緊記者同寫專欄，但我自己一直都仲有寫小說，甚至我做依家嘅工作都係為咗增加自己嘅閱歷同經驗希望可以幫到我寫出更好嘅故事而做，我可以好確實咁講咁耐以嚟我從來無放棄過自己嘅夢想...」李思柔堅定地說。

「依十幾年我都好有堅持㗎，我花咗幾多時間喺電影同拍攝你應該最清楚，但十幾年嚟我就算不斷咁付出，我都從未見到過希望，咁不如及早放棄去追求其他嘢好過啦...」郭子安不為所動。

「子安，容易達成嘅就唔係叫夢想啦... 唔係因為見到希望我地先去堅持，而係因為我地堅持先會見到希望呀! 正正因為佢難，所以先更值得我地付出所有去爭取，你睇啲奧運選手付出咗幾多年嘅汗水先可以踏上奧運個舞台? 我地繼續一齊努力呀，我真係相信我地會有成功嘅一日㗎...」李思柔繼續勸說。

「係呀，你喺電視見到嗰啲奧運選手好似好叻好耀眼咁，但你又知唔知背後有幾多選手窮一生嘅精力但最後連踏上個舞台嘅資格都無只可以黯然引退? 我唔想到我五十六歲嗰陣先後悔自己花咗成世心機最後都係一事無成呀...」郭子安搖頭說道。

「將來嘅嘢無人知係點，我淨係知試就仲有希望，唔試就一定咩希望都無，所以我點都唔會放棄㗎!」李思柔仍然堅持。

「咁你叻囉... 加油呀，我都希望你得，不過我唔得喇，我要放棄喇...」郭子安沒再勸苦笑道。

「我問多你一次，你真係要放棄? 就算係我勸你求你你都唔會改變主意?」感覺到難以接受，李思柔眼眶開始濕潤再問多次。

「係...」郭子安艱難地說出。

「郭子安，我對你好失望呀!」李思柔講完就擰轉面跑走咗，直至跑咗唔知幾遠再跑唔旭佢先停咗落嚟，而哩個時候佢已經係滿臉淚痕。

佢好嬲好唔開心，但到底佢係嬲郭子安放棄咗自己夢想?嬲佢放棄咗同自己之間嘅約定? 定係嬲如果連約定都無埋咁佢地之間就再無任何嘅connection?

佢自己都唔知道...

12.31

「柔柔，你又寫緊故仔呀?」

「係呀，老師今日讚我文筆有進步呀~」

「你真係叻~ 加油呀，我都覺得你寫啲故仔好有趣好吸引，將來你一定可以做個大作家啫~」

「嗯! 我一定會努力㗎! 咁你呢? 好似都無聽過你大個想做咩嘅?」

「我鍾意電影， 你見我成日睇戲就知啦~ 我希望總有一日我可以做個出名嘅導演，可以用自己嘅方式去演繹唔同嘅故事比人睇!」

「好似好犀利咁! 你都要加油呀，我好想睇你拍嘅電影~」望見眼前哩個少年眼裏閃爍著耀眼嘅光茫，小女孩不自覺間被佢所吸引。

-----------

「柔柔，恭喜你贏咗學校個小說創作比賽喎~ 我都話你得㗎啦， 我睇完你個故事都比你感動到呀~」少年向少女豎起手指公講道。

「多謝你呀! 不過我覺得贏唔贏都係其次，多人鍾意我嘅故事先係最重要!」少女向少年報以甜甜一笑說。

「無錯呀，得到人嘅認同先係最開心，藝術其實係唔應該著重輸贏亦唔應該有輸贏之分~」

「認同~ 咁你呢? 近排有無努力呀?」少女向少年問。

「當然有啦~ 見你之前咁努力寫故仔參加比賽，我都預備緊拍部微電影去參加比賽試下呀~」少年興奮說道。

「微電影?好犀利呀... 好想快啲可以有得睇! 我一定要做第一個觀眾先睹為快~」受少年影響少女亦同樣感受到興奮。

「無問題~ 拍好實比你做第一個觀眾! 柔柔呀，不如我地做個約定呀，你努力寫小說我努力拍電影，然後等我地開始成功嘅時候，我要將你寫嘅故事拍成電影，比全香港甚至全世界嘅人觀賞，到時大家都會認識李思柔同郭子安，仲有我地嘅作品! 你話好唔好?」少年突然忽發奇想說道。

「好呀! 但... 好似好難咁，我地真係得?」少女受少年感染，但同時又有點擔心。

「我信我地得㗎! Aim high and we will reach high， 條路雖然可能好難行，但只要我地堅持唔放棄就總會有成功嘅一日，所以我地大家都唔可以放棄呀! 」少年堅定說道。

「咁勾手指尾，一言為定! 」這讓少女都同樣變得堅定和有信心。

兩隻小手指尾勾在一起代表兩個少年一個承諾和兩個堅定嘅夢想。



(對唔住呀柔柔... 但我知咁對你先係最好㗎，忘記我啦...) 當李思柔走咗後，回想起從前嘅往事，郭子安坐咗喺自己屋企樓下邊回憶邊哭。


同時間喊完一輪嘅李思柔返到屋企樓下，見到一個熟悉嘅身影正等緊自己。

「啟光? 點解你係度嘅?」李思柔驚訝地問。

「見send咗咁多message比你都無應擔心你咪嚟搵你囉~ 你無事嘛? 隻眼咁腫嘅? 你喊完嚟?」張啟光見到李思柔就即刻上前問。

「唔好意思，啱啱有啲事無留意電話...」李思柔抱歉地說。

「到底發生咗咩事?」張啟光擔心地問。

「無事呀...」李思柔擰擰頭望著地下講。

「咁等你想講先同我講啦~」張啟光見李思柔唔想講並無逼佢，臉上仍然掛住佢嗰副殺死人嘅陽光笑容溫柔說道。

「多謝你... 陪我周圍行下?」對張啟光嘅體貼，李思柔心懷感激。

「好呀~」

之後二人就咁喺附近閒逛，但就一直無出聲。張啟光知李思柔心情唔好都好合作只係靜靜咁喺佢身邊陪住佢。

支持作者

12.32

「啟光呀?」人非草木，啟光嘅溫柔同貼心李思柔唔會感受唔到，行咗段時間後佢就突然停低叫張啟光。

「係?」

「你...其實都仲未話我聽點解你會鍾意我嘅?」李思柔帶點面紅咁問。

「你終於問我喇? 記唔記得細個嗰陣，每次長假期完結前你都會監我地做功課?」張啟光笑住問。

「記得，嗰陣你地個個都好曳，唔到最後都唔肯做功課...」李思柔帶住懷念苦笑道。

「係呀，到到依家我都仲記得好清楚你嗰陣搓住腰鼓埋泡腮好嬲咁逼我地喺你嗲哋間公司到做功課嗰個樣，嗰陣你真係好有一個大家姐嘅感覺...」張啟光同樣懷念地說。

「因為你地太曳! 不過依家諗返起都覺得目己有啲瘀... 但咁同我問你嘅問題有咩關係呀?」諗起以前自己成日為佢地發惡成個管家婆咁李思柔都不禁莞爾。

「當時我已經覺得你好型好吸引，唔知點解就係鍾意見到你嬲嬲地鬧我嘅樣，所以細個嗰陣我會成日專登激嬲你就係為咗睇到你個嬲樣，唔知點解見到你嬲我就會有啲開心...」張啟光溫柔又帶點唔好意思咁講。

「我嬲你就開心? 你戀態㗎? 你唔好同我講你鍾意我就係因為咁呀? 咁係咪即係我日日都要對住你嬲先得?」但李思柔聽落就有啲唔太滿意。

「哈哈，咁又唔係...嗰陣應該只係一直蘊釀緊對你嘅感覺啫~ 到到我真係淪陷，都係因為我小六嘅一件事。」張啟光立即安撫李思柔講。

「咩事?」

「唔知你記唔記得當年有一次，你同子安哥有個同學攪生日party，你地見好玩又熱鬧，就帶埋我同依婷思賢一齊去。去到我見你地有個同學有部手提遊戲機好好玩我就係咁話要玩，但偏偏佢就唔肯借比我玩，結果攪到我又喊又發脾氣喺度大吵大鬧，然後你地用咗好多精力同時間先氹得掂我...

本身件事都完結，點知喺食完蛋糕同玩完集體遊戲後，哩位同學突然話佢部遊戲機唔見咗，然後矛頭就直指話係我偷咗...

因為我之前真係為咗部遊戲機嘈咗好耐，所有人包括啲家長同子安哥佢地都覺得我係最大嫌疑唔信我。當時我好驚好擔心比人屈，但就淨係識喊同講自己無偷... 依個時候，你突然嗚低身兩隻手搭住我膊頭同我講

「啟光，你老實話比我聽你有無偷? 你講無我就信你無。」

我好肯定咁同你講無，然後你就真係完全信任我企咗喺我前面幫我辯護同佢地據理力爭。見你一邊拖住我，一邊為咗保護我同佢地拗到面紅耳赤，我感動之餘亦慢慢唔再驚。

最後因為喺我身上搜唔到部遊戲機無証據，你又堅持信我死唔認輸，佢地雖然一直話我再唔認就要報警處理但最後都無咁做到，不過就攪到大家不歡而散，你仲為咗我同個同學反晒面...

雖然之後因為一直搵唔返部遊戲機所以証明唔到我嘅清白，但你當日嘅信任同保護真係令我好感動，然後突然間我就有個想娶你做我老婆嘅念頭，等我可以好似你保護我咁保護返你哩世都唔可以比你受到任何傷害...」張啟光一口氣說道。

12.33

「原來係咁，你唔講我都唔記得咗哩件事了..」李思柔就有少少恍然大悟嘅感覺。

「其實我一直想問，當時個個都覺得係我偷，點解你會咁信我嘅?」張啟光問。

「因為我係你大家姐囉~ 我由細識到你大，雖然你平時係好曳又百厭，仲成日激我，但我了解嘅你喺哩啲大是大非嘅事情上你從來唔會呃我，你亦唔會咁壞去偷人哋嘅野，所以你話無我就信你。

事實上你可能唔知，你走咗後有年我喺街撞返哩位同學，然後佢同我講對唔住，話當年幾日後其實佢地就搵返部遊戲機出嚟，但佢父母因為面子問題就唔比佢講返個事實我地聽...

所以當年我係無信錯你㗎~ 不過當時你都走咗一段時間我以為你都可能唔記得就無專登再同你講返...」李思柔答。

「唔緊要啦，對我嚟講，重點其實唔係我有無做過，而係你一直都信我無仲好落力咁保護我。」張啟光堅定有力咁講。

「但就係咁你就一直鍾意咗我咁耐?」對此李思柔有啲意外同驚訝。

「係呀，因為我真係覺得你好好囉，好想你可以好似以前咁一直照顧我，仲要係專屬我一個淨係特別照顧我，而我就負責保護你同疼惜你...」張啟光誠懇地說。

「但我又惡又易嬲㗎喎!」李思柔講笑道。

「無問題呀，我就係鍾意你哩個樣嘛~」張啟光亦笑住講。

「我大你幾年第日好快我就又老又殘到時你會嫌棄我㗎喎...」李思柔又講。

「我一定唔會嫌棄你...就算你真係變得又老又殘，我都只會更加愛你疼錫你唔會比你唔開心...」張啟光繼續誠懇說道。

「我...」

「好喇，唔好再搵藉口喇... 你要拒絕我可以搵千百萬個理由，但要接受嘅其實一個理由就夠...」見李思柔仲想講張啟光就阻止咗佢。

「我... 只係想問多最後一個問題... 你...肯定? 將來唔驚會後悔?」李思柔深受感動問。

「思柔姐... Celia，哩十年我從來都無變過呀，一直就係等緊你接受我，你話我會唔會後悔呢?」感受到李思柔嘅改變，張啟光都改咗對佢嘅稱呼然後講。

「真係一齊咗就無得後悔無得退貨㗎喇喎...」諗多咗陣後李思柔講。

「我點會後悔同退... 咦，即係你肯應承我?」講到一半張啟光突然心頭一喜。

「再唔應承你我驚我就嚟比我班同事孤立同排斥㗎喇!」李思柔裝作委屈道。

「好嘢!」

張啟光控制唔到心入面嘅喜悅即刻俯前攬住咗李思柔。

而感受到對方嘅心跳同溫暖，李思柔雖然腦海好快閃過咗啱啱郭子安同個女仔攬住親熱嘅果個情境，但好快佢就將哩啲畫面從腦海中抹走，然後鼓氣勇氣舉起雙手慢慢回抱返張啟光。

哩一晚，李思柔終於下定決心同張啟光一齊，正式告別咗30年A0嘅單身生活。


「多謝你話比我知。」

同一晚，張啟光懷住興奮嘅心情返到屋企後就喺電話send咗哩個message出去。

多謝你呀！

12.34

不用多久，郭子安就從佢個妹口中知道咗李思柔同張啟光終於一齊哩個消息。雖然自己都算係求仁得仁，但佢都仍然感受到內心有一種刺痛嘅感覺，之後就更加瘋狂咁搵唔同嘅女人去麻醉自己，希望可以忘記對方減輕自己心入面嘅盇，結果亦成功將自己同李思柔嘅距離越拉越遠。

見愛女終於出pool同張啟光發展又似乎十分順利，李立仁終於放下咗心頭大石，而佢亦信守承諾試下將間輔導所交咗比黎浩明繼續經營。黎浩明不負所托憑佢自己嘅努力同能力亦將間輔導所繼續攪到有聲有色。


轉眼間，兩年光景又過去。

哩段時間張啟光見同李思柔發展十分穩定，雖然當初李思柔其實喺同張啟光正式一齊後嘅第二日一起身就已經有啲後悔，覺得自己係因為之前受咗郭子安嘅打擊而意氣用事接受張啟光。不過既然已經應承咗對方如果第二日就反口佢又覺得自己好衰，對張啟光嘅傷害亦好大，所以佢決定將錯就錯，嘗試同張啟光一齊當真係比個機會大家。

一開始李思柔確實並唔習慣亦有點兒難投入，不過一個超級charming，陽光靚仔，心地好又有教養同禮貌，日日真係會瘋狂比女圍嘅男仔有女唔要偏偏睇上自己，仲要對自己無微不至嘅照顧，百般寵愛同呵護自己，李思柔實在諗唔到自己有任何嘅理由說服自己唔要對方將對方推開。

由以前習慣只係自己付出對方懶理，到到張啟光出現後一切就調轉晒變咗對方不斷為自己付出而自己甚少回應，李思柔確實需要一個適應期。但當真係習慣同適應咗後，李思柔先明白被人寵愛喺一件幾咁幸福嘅事。

對住張啟光，佢發現好多時自己根本唔需要出聲，只係一個眼神或者動作，張啟光都會知自己想點或者想要啲咩，然後佢就會完成件事或者下次見面就會見到自己鍾意嗰件嘢出現喺眼前。面對一個如此完美嘅男朋友，試問世間上又有邊個可以唔感動唔被佢所溶化?

而當你習慣咗比人寵，開始越嚟越依賴佢嗰陣，你發覺哩種幸福嘅代價就係你會失去咗單身同獨立嘅能力。

對於郭子安，李思柔當晚起對佢已經徹底死心，而喺放低咗對郭子安嘅執念再加上張啟光不斷嘅努力下，佢嘅心漸漸被溶化，開始全心全意咁接受咗張啟光，二人真真正正咁成為咗一對情侶。

12.35

經過兩年嘅甜蜜相處，張啟光見同李思柔發展穩定，知道李思柔並唔想離開香港，於是佢就決定返英國攪掂返啲手尾再正式移居返嚟香港，然後就同李思柔拉埋天窗結婚。

喺臨返英國前，佢為李思柔精心策劃咗一個世紀浪漫嘅求婚儀式，向全世界宣佈佢哩世只會愛李思柔一個。而當得到李思柔嘅”yes I do “哩支定海神針後，佢就啟程返英國處理埋移居前嘅手尾。


兩年時間，郭依婷已經由新婚人妻演變成為咗孩子的媽，而哩日李思柔就嚟咗佢屋企探佢同BB。

「嘩，一個月無見佢已經好似大咗double size咁嘅!」望住BB喺BB床上面滿有生命力咁跩下跩下，李思柔讚嘆道。

「係呀，小朋友真係大得好快， 所以啲衫好似著得一次然後轉眼間就唔啱著要換咁...」郭依婷既苦惱又滿足咁講。

「咁你係咪仲係日日無覺好瞓要餵夜奶呀?」李思柔再問。

「係呀... 不過慣左都ok嘅~」郭依婷望住BB微笑住咁答。

「人母真係唔簡單...」看見郭依婷個黑眼圈同時又見佢臉上流露出溫柔嘅笑容，李思柔忍唔住講。


“叮噹”

「有人嚟?」聽到門鐘突然響起李思柔就問。

「應該係阿哥啫，佢每隔一兩日就會嚟送物資同買嘢比BB㗎喇，以前真係睇唔出原來佢咁鍾意小朋友~」郭依婷一副”無佢乎”但又好窩心咁嘅樣。

「係囉，睇唔出佢係廿四孝舅父喎~」聽到郭子安哩一面李思柔都不禁會心微笑。

「咁你知佢一直都好錫我，係一個好阿哥嚟㗎啦~」郭依婷去到門口臨開門前對李思柔笑住講。

“咔嚓”

郭依婷一開門來人果然係郭子安。

「啲奶粉樓下藥房賣晒喇， 好彩隔黎站嗰間仲有啫...」郭子安一見郭依婷就呻。

「都話仲有唔駛咁急買咯...」郭依婷沒好氣道。

「買定安全啲呀，一陣突然無貨咁BB無奶飲就煩喇...」郭子安則堅持。

「好啦辛苦你喇舅父，係喎，思柔都嚟咗呀~」見阿哥一番心意郭依婷都無再講啲咩。

「Hello~」李思柔見郭子安望向自己方向就同佢打聲招呼。

「Hello...」郭子安則有少少意外喺度見到李思柔，略為生硬咁同佢打返聲招呼。