<我嘅職業係專溝人地個女朋友>

睇咗咁多個都係你最有意義

都係，其實有時自己有d心急想推快d劇情
出左又好難改返 處理得唔太好

多謝讚賞 不過好多位其實可以再detail d 但有時驚寫太長寫得唔好變左悶

希望你指係好評可以多d 負評可以少d而唔係調返轉

故事中很美好
現實卻很骨感

壞人。。。好想享用你嘅服務

好好，寫得又快又好。

至於視角方面，可以參考「冰與火之歌」
每個章節一個人名，以呢個人為中心，以佢視角進行故事。
本身章節名已經提示咗邊個視角，唔需要再不停寫明。
期望你下一個嘅作品。

巴打似乎有苦惱喎

多謝你意見！

11. 外傳

2050年 香港

「黎伯，因為我地想搵d釋囚人仕聽佢地分享下自己嘅心路歷程同感受，所以冒昧今日就邀請左你黎接受我地訪問，好多謝你肯黎呀，始終我都明白好多人未必想再提返以前嘅事，所以真心好多謝你…」一個胸前掛有一個寫住”Celia”名牌，大約二三十歲左右嘅女記者講。

「唔緊要... 人做錯野就係要面對，我都好希望衣個世界唔會再有人犯錯…」回答佢嘅係一個目測已經五六十歲，感覺飽瀝桑嘅老年男人黎伯。

「岩嘅，但唔係個個人都可以好似你咁有勇氣肯去面對~ 首先想問下你呢，係監獄坐左30年監，出返黎後有咩感受? 係咪覺得好多野都唔同晒?」Celia向黎伯微笑住問。

Celia係真心感激黎生肯接受自己訪問，因為喺搵人過程中佢已經受過無數次嘅拒絕同粗口問候，無諗過搵到衣位黎伯果陣佢竟然一口答應。

「我… 無咩特別感受，坦白講出返黎後我亦根本無點特別留意衣個世界… 因為就算世界點變，有d野永遠都仍然係唔會變… 其實可以嘅話我寧願衣世都繼續喺入面生活…」老年人彷彿望住遠處傷感地說。

「點解? 係咪擔心出返黎後適應唔到或者維持唔到生計?」Celia好奇地問。

「唔係，只係我覺得喺入面自己會舒服d，心安理得d…」黎伯道。

「黎伯係仍然為自己當年犯嘅事耿耿於懷?」黎伯嘅答案令Celia有左咁嘅推測。

「係…無論喺入面坐幾耐，我犯嘅罪孽永遠都唔會清洗得到，衣世我都唔會原諒到我自己…」黎伯帶點顫抖咁講。

「跟據資料顯示你當年係因為謀殺而被判終生監禁，然後因為咁多年黎行為良好再加上特首特赦所以可以提早出獄。即係你仍然為當年殺左人而感到好後悔原諒唔到自己? 」Celia喺訪問之前睇過黎伯嘅資料所以問。

「唔係，我完全無後悔過殺佢，因為佢係死有餘辜。法律制裁唔到佢，就只好由我自己黎…」但黎伯嘅答案卻令Celia感到意外。

「咁佢到底做過d咩事? 如果你唔後悔殺佢，咁頭先話好後悔犯嘅錯又係d咩?」Celia追問。

「小妹妹，你有無試過為自己做過嘅一件事好後悔?」黎伯無正面回答。

「嗯… 我以前有個best friend因為一d小事而嘈大交結果就無再聯絡，到到大d想搵返佢果陣先知道佢原來已經移左民然後就因為咁無得再聯絡… 我好後悔當年因為d咁無聊嘅野而就咁無左個best friend…」Celia諗左陣後答。

「我…其實除左殺左果個人渣外，之前仲殺過一個人…」聽完Celia講，黎伯諗左陣後就突然語出驚人。

「下? 殺左邊個?」Celia自然反應咁問。

「我女朋友，或者應該係話我前女朋友先岩…」黎伯帶點艱難咁講。

「… 咁你有無去自首?」Celia被衣個消息嚇親，開始有d驚眼前嘅衣個老年人。不過見到佢眼中嘅悲傷，Celia又覺得對方唔係危險人物唔會傷害自己。

「自首都無用，正如我岩岩所講，衣個世界好多壞人係法律制裁唔到架…」黎伯只係擰擰頭咁講。

「我越聽越唔明，或者你可唔可以分享下到底30年前你犯左咩事同點解犯事?」Celia都開始放棄再咁問落去，索性直接希望黎伯講晒成件事出黎。

「唔介意就等我講個故仔比你聽啦…」

大家好，抖左個幾星期終於決定開始寫依個外傳，今日出住個引子先～

不過因為世界盃關係，所以出嘅速度唔會好似原故咁快，但我都會盡量希望可以每日至少出到一篇。
希望大家繼續支持

期待期待

11.2

我叫黎浩明，英文名Leon。

唔知大家有無曾經遇過自己心目中嘅女神呢?

每個人眼中嘅女神都可以唔同，但無論係邊個，如果你覺得對方係女神，咁對對方應該都會一樣有種發自內心嘅讚嘆同敬畏感覺。

女神之所以有個”神”字，就係因為對方比到一種神聖嘅感覺你令你自慚形愧，係你高不可攀以及不可褻瀆嘅一個存在。

對方嘅完美令你直覺自己衣世都唔配擁有對方而只可以站喺遠處欣賞而已。

衣個就係人同神嘅分別。

如果你覺得自己同對方係有可能發展，咁佢就唔會係你嘅女神而極其量之係一個條件好好嘅女仔。

而喺我中學果陣，我就曾經遇上過我嘅女神。



初中時我有一位女同學，不論樣貌、才華同性格，都可以話堪稱完美。

外表上，佢長著一張漂亮嘅臉蛋，充滿住靈氣水汪汪嘅一雙大眼睛，高鼻子再加上一張櫻桃小嘴。

身材雖然唔係話玲瓏浮凸，有前有後果類豐滿型嘅女性，但窈窕嘅身形再配上佢一條長長嘅馬尾，就更加突顯出佢成個人獨有嘅果種仙氣，整個人都散發出一種令人心動嘅氣質。

才華上，佢除左讀書叻之外，文藝上嘅表現亦都十分出色。

好記得中二果年音樂考試，每個人都輪流要表演一樣野，女神揀左彈琴，果次亦係我第一次聽佢彈琴。當時佢只係彈一首大家都耳熟能詳嘅Canon in D，但我就比佢嘅琴聲深深咁吸引住，腦海中不自覺浮起新娘步入教堂嘅畫面，然後有刻，女神嘅樣貌出現左喺新娘嘅臉上...

當時不其然會問，唔知邊個咁幸福會係果個新郎呢?

又有一次，中三果年學校舉辦左個小說創作比賽，我亦因而有幸睇到佢嘅作品。一睇之下，我就被佢嘅文筆所吸引，雖然最後因為黑箱作業佢輸左比賽，但喺我心目中佢先係實至名歸嘅冠軍。

仲有次英文朗誦比賽，聽住佢悅耳同一口流利嘅英文，震憾人心嘅朗誦，我真係覺得佢好耀眼好了不起，而我就只可以係台下默默咁仰望住佢。

至於性格方面佢更加係無得頂。雖然又叻又靚，但佢從來都唔會睇唔起其他人相反仲好平易近人完全無架子唔會比人一種高高在上嘅感覺。而且佢份人本身都好活潑好動又幽默，對朋友仲好好，好有義氣。

記得中七果年我地學校有個女學生因為疑似懷孕同埋同好多男生發生過關係因而引起左好大嘅風波。但當全世界都避開衣個女仔果陣，係得佢仍願意企喺個女仔身邊支持佢陪伴佢。為此，佢自己都曾經受過唔少攻擊同屈委...


所以喺我心目中，佢真係好完美嘅一個女仔。由初中開始，我對佢就已經心生愛慕，一直都單戀著佢。

衣個女仔叫鄺善柔，人如其名，佢係一個好善良溫柔嘅女仔。

可以返學見到佢，就係我每日會想返學嘅最大動力泉源。

11.3

至於我呢?

自少父母對我嘅家教都好嚴，好多野都要循規蹈矩，容不下我犯半點嘅錯。只要我犯左少少錯又或者講錯半句說話，雖然未必次次都會打同鬧，但佢地就會黑晒塊面話比我聽佢地對我嘅不滿意。

所以一直以黎我都戰戰兢兢，努力跟足佢地嘅期望同要求去生活。雖然咁令我唔敢怠慢努力讀書，喺學校嘅成績一向都係名列前茅果班，但同樣地亦因為咁陪養出我比較內向怕醜、缺乏自信、木獨、唔算好善於同人溝通嘅性格。

一般人應該會覺得我係好悶同好古板嘅果類人。


試問一個咁嘅人，又邊有可能可以高攀得起鄺善柔衣個女神?

我從來唔覺得自己同對方喺係同一個層面上。

所以雖然鄺善柔明明好平易近人，但我就因為咁反而為自己加左層隔膜喺我地中間令自己唔敢太接近對方。

我並唔覺得活潑完美嘅善柔會有鍾意我嘅可能，我只可以一直將衣份心意收埋係心入面，一直遠遠咁欣賞同愛慕著佢。

但衣個世界就係有人好好彩。


我有另一位同學，同衣位女神係由細玩到大嘅青梅竹馬。佢地唔單只同年同月同日生，據我所知，衣位男同學由細個開始每日放學都會上女神屋企玩直至佢媽咪放工先黎接佢走。

所以佢地真係由細玩到大感情仲非常之好。基本上每日返學放學只要見到佢地是但一個嘅身影，咁好自然喺衣個身影嘅側邊就會見到另一個嘅身影。

衣位幸運男生叫李立仁，每次見到佢我都會問個天到底李立仁前世做左咩好事今世可以咁好彩同女神咁close，而自己偏偏就做唔到衣個lucky one。

只係我無諗過到到最後，原來自己先係最lucky果個。


單戀左鄺善柔幾年，我一直都覺得當我中學畢業果陣，就代表我嘅初戀會正式完結。因為當我地上到大學，就會連可以好似衣家咁每日返學都可以見到佢衣種咁簡單嘅幸福都無埋，然後好快佢應該就會連我係邊個咩樣都唔記得...

點知，無諗過中七後期一次偶遇到嘅意外，竟然令一切都改變左。

11.4

其實嚴格黎講都唔叫偶遇，因為自從有次放學後我喺一個公園撞過善柔知道左原來個公園係佢放學返屋企嘅必經之路後，我不時放學都會喺果個公園一個高處位置徘徊。因為果度向下俯瞰就可以望到下面條路，我希望可以離遠咁望下我嘅女神。

初初其實係諗住可以偶遇下佢然後有機會扮撞到同佢打聲招呼，不過隨住次次見到佢嘅同時亦都見到李立仁，慢慢我就無再出現喺條大路上而係揀左係衣個高位諗住離遠望到佢就算。

中七時期有日我又見到佢喺下面經過公園返屋企，但難得地果日李立仁並唔喺佢身邊。而當佢經過離開左我視線範圍後我就落返去下面大路，點知落到去就突然見到善柔好驚青咁沿路跑返返黎。

見勢色唔對我即刻衝過去叫住佢問佢咩事，原來佢岩岩喺前面遇到個露體狂，於是就即刻向返後面逃跑。

見到我後善柔鬆左口氣，不過當我地想返去捉返果個露體狂果陣就已經再搵唔返佢。

衣次之後，我同善柔嘅關係就開始變得唔同。

就好似一直喺地下凡間嘅我突然間可以有條橋通往住喺天上嘅佢，將我地兩個連接起黎。

起初其實我都仍然唔敢點主動同善柔接觸，反而佢自衣件事後對我就好似突然好好奇咁不時會主動搵我傾偈，令我好多時都興奮同開心到訓唔著覺。

隨住我地開始多左交談同了解，我感受到善柔開始對我開放左佢個心窗嘅同時，女神衣個我自己加比自己嘅阻礙同枷鎖亦隨之而慢慢瓦解。

我開始敢主動搵佢，如果有日我地無傾偈，我個心就會成晚都”lor lor亂”。

然後好快我就覺得自己已經唔可以再離開佢。

如果有日佢唔肯再同我傾偈或者對我好冷淡，我一定會好失落唔知自己可以點算好。

慶幸衣個負面轉變只係我杞人憂天並無發生。相反，我地開始越黎越交到心，了解大家更多嘅過去同價值觀等等。喺艱難嘅A Level 考試時間，我地又常常會互相鼓勵同支持，感情可以話係每日都穩定上揚。

然後隨住A Level完結，大家都放下左心頭大口多左好多時間開始日日過著百無聊賴嘅日子。

不過雖然話考完A Level令大家鬆一口氣，但我知咁亦代表距離我地中學畢業嘅日子越黎越近，我開始擔心我同善柔咁close嘅日子好快亦隨之會完結。

咁難得可以同善柔friend，如果之後入大學又疏遠返，咁點算好?

又或者如果佢喺大學識左男朋友，咁之後都實唔會再點理我架喇…

每次諗起，我都會感受到萬分沮喪，而衣種沮喪，就同其他為考完A Level日日都為假期而狂歡嘅同學顯得格格不入。

11.5

雖然我份人係比較悶同呆板，但我當然都有自己嘅好朋友，而佢亦當然知我一直都單戀愛慕緊鄺善柔。

佢見我考完試後都悶悶不樂咁就問我咩事，然後我就向佢吐苦水講出自己所擔心嘅事。無諗過講完後佢竟然同我講覺得善柔對我可能都有好感。

從未幻想過衣個可能嘅我根本唔能夠相信佢衣個講法。一直以黎我都覺得鄺善柔只係份人好nice好好人所以肯同我傾咁多偈，始終佢喺學校一直都好多朋友，同個個都好friend好親近咁，而我亦只係其中之一。

跟住佢又同我講如果我真係咁擔心升上大學之後大家會疏遠乜都無，咁不如試下直接同佢表白。

如果我唔把握衣個可能係最好亦係最後嘅tming表白，將來失去果陣就一定會後悔終生。

得，我就可以夢想成真，有左名份後亦唔駛再擔心之後會同善柔逐漸變得疏遠。

就算失敗，咁其實都唔會有太大負面影響，因為升左上大學後我地見面嘅機會本身就唔會多，始早都係會慢慢fade out。而且表白失敗，都唔代表之後一定會連朋友都做唔成。

聽下聽下又好似搏得過喎…

於是我本住會被拒絕去送死嘅心態，熱血上腦就決定要約善柔出黎然後同佢表白。


我膽粗粗咁約左善柔出黎食晚飯，然後就打算飯後同佢去海邊散下步果陣再同佢表白。

好彩善柔並無拒絕我嘅邀請，反而係我成餐飯都好緊張，成日心不在焉咁...好唔容然食完餐飯後我地就去左尖沙咀海邊散步。

然後我終於忍唔住要講出我喺心底隱藏多年嘅秘密...

「善...善柔...」

笨拙嘅我諗左好耐自己應該點表白，但原來就算諗得再多背得再熟，我發覺當望住善柔真係要講果陣，其實都係一個字都講唔出口…

「善柔…其…其實我… 我由識你開…開始… 就…就一直都… 都… 都…鍾…鍾…鍾意你架喇!」

終於，雖然艱難但我都可以順利咁講出左我嘅表白宣言。

本身其實我仲諗好晒後面講自己點解鍾意佢，自己一直以黎嘅感覺係點，但頭先衣句說話已經用盡晒我所有嘅勇氣，之後我發覺自己真係一隻字都再講唔出口。

善柔聽到後一直眼仔碌碌咁望住我，我覺得佢本身應該都期待緊我會繼續講多d，但見我似乎無野想再講，佢就用左一個問題回應我。

「點解你會鍾意我嘅?」

竟然唔係”對唔住”同好人卡? 女神竟然無直接拒絕我而係問我問題 ?

果刻我由預左比人拒絕開始變成左有少少期望，然後都慢慢無再咁驚。

11.6

「由我認識你開始… 我就覺得你係一個好完美嘅女仔… 你靚，叻，性格好心地好，對朋友有義氣又毫無架子，喺你身上我根本搵唔到任何唔好嘅地方... 所以由初中識你無耐開始，好快我就對你心生愛慕，然後認識得你越耐，就越覺得你更好，不知不覺就單戀左你咁多年…」我深呼吸左一口氣然後答道。

「咁...你覺得同我夾唔夾?」無諗過善柔又問左另一個問題。

「本身我真係唔敢想像自己可以同你熟到，諗住可以默默喺遠處欣賞你就已經足夠，真係無諗過我地會可以好似近衣幾個月咁成日同你傾偈變熟，今晚仲可以同你咁單獨食飯添…

但自從同你真係熟左後，我覺得我地其實有d興趣都幾相似，一樣都鍾意睇小說同埋話劇，又同你探討左好多唔同嘅哲理。衣幾個月同你好似永遠都有無盡嘅話題，好想可以一直不斷咁同你繼續傾偈傾落去… 如果係你，我覺得同你傾偈真係傾一世我都唔會厭架…」

「咁你覺得我地如果真係一齊，可唔可以一生一世永遠唔會分開，大家嘅生命中都只係得彼此?」

女神嘅問題，比左更大嘅希望我似乎自己唔係無可能，於是我用左最真摰嘅感情比左我嘅答案佢。

「其實就算決定左今晚同你表白，我都從無諗過你會接受，只係唔想自己將來會後悔無向你表達過自己心意先有咁嘅決定。所以你衣個問題，我之前真係無諗過….坦白講我唔敢講我地係咪真係可以一生一世永遠唔會分開，因為我自問自己咁普通根本就高攀唔起你，所以雖然我深信自己對你係永遠都唔會變，但我就無信心自己可以留住你吸引到你令你一直都鍾意我…

不過如果真係有機會，我一定會盡力令自己可以成為一個襯得起你嘅人!」


「原來喺你心目中，我係個咁唔專一咁易會變心或者放棄嘅人?」不過善柔聽完後個樣好似有少少嬲。

「唔係呀!我唔係咁嘅意思… 只係對住你我真係有種自慚形愧嘅感覺覺得自己根本襯唔起你…」而佢衣個樣立刻就嚇到我魂不附體咁，好驚自己講錯野令女神不快再斷送埋自己可能一生一只得一次嘅機會。

「傻瓜… 比d信心自己啦，你其實都好好，一d都唔差架~」好彩我嘅答案令善柔臉色一緩，然後有返笑容咁講。

「我…會努力架!」腦袋喺果刻其實已經唔太可以正常運作我只可以好似傻仔宣誓咁講。

「咁你好好記住今日你講過嘅野，如果你將來反口你就知死!」

「下? 即係... 你肯接受我?」


無諗過自己表白會成功，本能令我聽完善柔嘅回覆後一直都只係呆左咁質疑自己係咪發緊夢。直至善柔主動將佢隻手拖住我隻手，感受到佢手心傳黎嘅溫度，我先可以開始有返思考嘅能力。

我竟然真係追到我女神，追到我暗戀左咁多年嘅女神?佢真係肯做我女朋友?

「我... 係咪發緊夢?」我懷疑人生咁問。

「係呀，咁你自己繼續發夢啦，我當無聽過你頭先果嘅野~」善柔見到我傻左咁就笑住講，再作勢想收返隻手。

「發夢都比我發多陣先啦!」我下意識將佢隻手捉實。

「傻佬~」感受到我用力捉實佢善柔亦都無再縮手。

「我追到我女神呀，我真係追到我女神呀，女神肯做我女朋友呀!」

突如其來嘅喜訊同幸福瞬間將我淹沒喺無盡嘅喜悅當中，然後我就好似失心瘋咁邊舉起我同善柔拖住緊嘅手邊係街上面大叫，彷彿要向四周嘅人炫耀自己嘅幸福。

11.7

頭一個月彷彿都仍然置身喺夢境之中，一切都好似好唔真實，好驚有刻突然就夢醒，然後善柔就會離我而去。

而到到我開始習慣左衣個身份，清醒自己唔係發緊夢，我先明白自己到底有幾幸福。因為善柔真係好好，佢除左係一個完美嘅女仔，仲係一個完美嘅女朋友。


點為只一個完美嘅女朋友?

其實都無明確一個答案，但簡單講，我估就係你根本無野可以挑剔到佢。

同佢一齊你永造都會覺得好開心。

佢會主動關心你，樂意聽你講，同時佢亦好樂意分享自己嘅野比你聽。

你會感受到佢需要你，但佢又唔會令你覺得好大壓力同覺得chur，會比返適當嘅私人時間同空間你。雖然果刻熱戀中嘅你可能更加希望佢可以24小時都陪住你chur住你，但這無疑是一種體貼亦可以令這關係走得更長遠。

當你唔開心同失意果陣佢會陪住你安慰你鼓勵你；當你開心果陣，你又會感受到佢都真係由衷咁替你開心同著緊，好樂意分享你嘅所有感受。

你可以感受到佢相信自己，唔會懷疑你任何野。同時間佢亦會令你好信任佢，每日都會同你講佢黎緊嘅活動同計劃，又會同你分享返佢當日發生過嘅事。

所以同佢一齊嘅時間，我真係好開心好幸福，好有戀愛嘅感覺。

當然我估最重要嘅原因其實係因為我真係好鍾意佢，所以自然覺得佢做咩都係好好，同佢一齊亦一定好開心。

而係佢嘅薰陶下，我漸漸亦產生左改變，個人變得有自信同活力，唔會再好似以前咁悶，同時亦越黎越識同異性相處。


不過如果要講我地之間真係有咩心結或者係唔完全完美嘅地方，就係每次見到佢同李立仁果種親匿嘅關係，我個心都會有d唔舒服。因為我知喺佢心入面，我唔係最重要，同佢最親嘅異性朋友，但偏偏我係標誌住佢男朋友衣個suppose應該係同佢最親近嘅身份。

但因為我都想做過完美嘅男朋友，唔想顯得自己好小氣，所以我只好裝作大方同善柔講我完全唔介意佢同李立仁嘅關係，佢地完全可以好似以前咁繼續咁friend，因為我對佢係無比嘅信任。事實上我亦真係百分百信任佢，只係有時會為自己並唔係對方心目中嘅no. 1而有d唔開心同唔舒服。

不過其實自從我同善柔一齊後，我就察覺到李立仁望我嘅眼神同態度都唔同左。我感受到佢嘅敵意，甚至可以話係視我為敵人... 所以我相信佢對善柔其實並唔係單純嘅青梅竹馬咁簡單，衣點或者連佢自己都一直無為意。

只係始終佢地真係識左好耐感情好深，我知衣家嘅我根本無得同佢比，所以我都只可以努力同善柔培養好感情，做過好好嘅男朋友，希望慢慢將衣個差距縮窄。

慶幸我嘅努力並無白廢，衣段稍為令我不適嘅時間維持左並唔算真係太長… 一方面係我同善柔嘅感情越黎越深，另一方面似乎係佢地兩人之間喺果段時間反而出現左d問題影響左佢地自己嘅感情。

善柔無特別講發生左咩事而我都無特別問，不過作為佢男朋友，或多或少都感受到佢地嘅異樣，而直覺亦話我聽我佢地嘅問題應該係同我有關。

至於到到我真係可以完全放低晒再無衣種唔舒服嘅感覺，都係要等到果一日，我永世都唔會忘記嘅果一日…

11.8

果一晚係發生喺我同善柔一齊大概一年後嘅一晚，為左慶祝考完試，善柔就提議一齊去camping玩返日。

我地去到個camp site就開始設置帳蓬然後就一齊欣賞日落，之後再打左個豐富嘅微型邊爐享受左頓別有豐味嘅晚餐。

執拾完所有野時候都唔早我地就坐左係帳邊傾偈睇星星，到咁上下就入返帳蓬一齊攬住咁喺ipad搵左套戲黎睇。

睇睇下見ipad就黎無電，善柔就主動起身走去我個背囊拎個尿袋出黎。不過突然間我醒起d野想阻止善柔同佢講等我去拎嘅時候，卻發覺佢已經好快咁拎左個尿袋出黎。

見無咩異樣我鬆一口氣後我地就繼續睇戲，然後去到有情侶間親熱嘅情節時，善柔就突然攬得我更實然後主動送上香吻。

一齊左咁耐，衣個當然唔會係我地初吻，但就應該係第一次大家訓係度攬住咁錫。而血氣方剛嘅我加上對方係善柔一個咁靚咁吸引嘅女仔，又點可能咁易做到發乎情止乎禮真係就咁錫下就算?

無耐我不自覺咁就越黎越主動，然後雙手開始試探性唔規矩咁伸左入去善柔件衫入面。

「嗯...」

觸碰到善柔衣服下神聖嘅肌膚，佢好似有d吻感微微咁呻吟左一聲。

衣下嬌聲令我腎上腺素飆升得更高，而見善柔似乎並無制止同反感，我就越黎越大膽開始向更深入嘅地方探索。

果刻真係既緊張又興奮，隨住氣氛越黎越熾熱同投入，我地嘅動作同本能都更趨激烈。

不過當我試探夠終於忍唔住想開始除善柔衫果陣，佢卻突然捉實左我，亦令我即刻冷靜同膽怯起黎。

「你... 係咪想左好耐?」善柔望實我咁問。

「唔...唔係呀... 對唔住我一時控制唔住，我無心架...」以為善柔嬲同介意，我即刻講對唔住同拎返自己剛剛不斷喺善柔身上作惡嘅雙手出黎。

「咁點解你喺背囊會有盒condom嘅?」善柔仍然目無表情咁再問。

果然頭先善柔去拎尿袋果陣就已經發現而只係無出聲!

不過講開衣盒condom，佢嘅出現其實本身真係唔係我嘅原意黎架...

事源係當我之前同我d friend講我同善柔會去camping果陣，班豬朋狗友就死都話我一定要帶，最後仲驚我自己唔敢買夾錢買左盒再格硬塞左比我。

佢地話情到濃時無套真係好尷尬同掃興喎...

其實當時大家都已經係大學生，好多朋友早已經有唔同嘅性經驗，只係我未有仲係一個青頭仔啫，所以佢地講衣d都毫無避忌，仲係咁叫我快d破處。

經過再三猶豫同掙扎，我最後都係張佢放左入背囊，然後就造就左衣家咁尷尬嘅一個畫面。

11.9

「呀... 佢地話帶定有備無患，如果唔係需要時無就會好掃興喎...」我只好出賣朋友系列如實作答。

「所以你承認你早就有衣個諗法同預謀啦?」善柔並無就咁放過誠實嘅我。

「咁... 你咁靚我邊有可能唔想呢? 不過我絕對尊重你唔會格硬黎架，你唔想我一定唔會逼你!」我誠懇咁講。

「傻瓜... 我知你忍左好耐喇，其實我都想試下同深愛嘅人... 結合...係咩感覺...」點知善柔似乎並唔係真係嬲，而講到後半句仲突然面紅露出一個害羞嘅表情，再用近乎微不可察嘅聲線咁講。

「下? 即係... 其實你都想?」無諗過善柔會咁講，我有少少反應不過來，然後仲好白痴咁問。

「喂呀! 你唔想就算!」善柔聽到我咁問塊面就變得更紅更加怕醜，然後擰則左塊面好似想即刻搵個窿匿埋咁。

見到善柔咁可愛咁靦腆嘅表情同反應，彷彿就係一種無聲嘅邀請，我仲邊有可能再忍得住，直接就耷低頭錫落佢塊面，頸同耳珠度... 然後雙手又再開始唔規矩起黎...

「啊...」

伴隨住善柔衣下嘅嬌啼，結果衣晚，我真真正正咁得到左我夢寐以求嘅女神。


「浩明，經過今晚你以後都可以放心啦?」事後善柔攬住我講。

我有d驚訝咁望住善柔。

原來佢一早已經知道我內心嘅不安，然後選擇用衣個方式去比信心我令我安心。

事實上衣個方法亦真係好有效，自此我就再無介意過李位仁嘅存在，就算佢地一齊去睇演唱會又好去玩都好，我都再無任何嘅hard feeling。

因為我知李立仁衣世都已經無可能再超越我，善柔嘅第一個男人永遠都只會係我。


「柔柔，多謝你呀... 我以後一定會對你更加好全心全意去愛你令你成為最幸福嘅女人!」我嘴唇輕輕印一印善柔個額頭然後攬實返佢講。

果刻我真係發自真心咁講。

Lm

恭喜晒！ 咁要分享下故仔喎！

11.10

戀愛會令人成長。

同善柔一齊後，我其實亦漸漸變得唔同。

善柔知我木木獨獨份人比較悶，所以都花左好多時間令我個人可以幽默d，又會幫我教我襯衫，加上佢自己嘅身教言教，所以喺佢嘅潛移默化下，我慢慢都變得唔同。

我開始會主動同人傾多左偈，無咁內斂，而且年紀大左父母嘅監管同影響都漸漸減少，同時間喺得到左善柔後亦令我對自己嘅自信心飆升，我感受到內心有個真正嘅自我開始慢慢甦醒。

善柔當然樂於見我變成咁，而我地嘅感情都越黎越好，我感受到對方對我毫無保留嘅信任。

至於我對善柔又有咩影響?

其實我都唔敢講，因為喺佢面前，我永遠都仍然覺得自己係高攀果個，所以唔覺得自己可以令佢再有咩進步。真係要講，或者就係令佢証明自己除左係一個完美嘅女仔外，仲係一個完美嘅女朋友，同埋喺愛情嘅嗞潤下，佢好似變得更加美艷動人。

而仲有一樣唔同，就係我發現佢好似都幾鍾意同人放下閃然後用我地嘅例子去比意見佢一d拍緊拖嘅朋友。佢話佢好希望其他人都可以好似我地咁恩愛同幸福，所以佢希望自己將來可以做一個感情輔導員去幫助其他情侶解決難題。

對此我無咩特別感覺，只要佢開心，我就無所謂，反正其他人每次見到我地都係用一種羨慕嘅眼光望住我，而衣種感覺永遠都令我嘅自我感覺變得更加良好。

就係咁，我過左人生最開心幸福嘅兩年多時間。


不過當時間耐左，我都係遇到愛情嘅天敵，犯左一個好多男人都會犯嘅錯，我背住左善柔出軌。

其實我會出軌，某程度上都同善柔有d關係，因為我會受到引誘，都係多得佢嘅完美。

係大學果陣，我有個同學叫Kelly，外表幾靚身材又好，所以都好受大學男同學歡迎，唔少男同學都會藉機埋佢身。不過雖然狗公眾多，但佢又好似無話對邊個特別有好感真係接受左對方一齊拍拖而只係收兵為主。

而對我黎講，雖然佢係幾靚幾索，但對於見慣女神嘅我吸引力自然並無對其他男仔咁高。

本身我地其實都算係河水不犯井水，只係咁岩我又遇到d都唔知係好彩定唔好彩嘅事，惹起左佢對我嘅好奇心同好勝心。

雖然話d女人收兵，d兵一向都會循規蹈矩，驚自己太猴禽會惹女神不快或者留下唔好嘅印象從而斷送左自己嘅機會。不過就凡事都總會有例外，特別係一d 比較無耐性或者都對自己有少少自信嘅男性。當佢為你付出左唔少，但就一直得唔到佢expect嘅回應，往往就會老羞成怒。

而咁岩，又比我遇到一次。

11.11

果晚應該係Kelly咁岩同隻兵食完飯，隻兵埋完單想更進一步，但Kelly就拒絕話想返屋企，結果隻兵心有不甘就索性揭去偽裝行行下見無人就想用強抽Kelly水拎返d利息，攪攪下咁岩就比我衣個路人甲經過見到。

雖然唔熟，但始終同學一場相識，路見不平又好似無理由唔拔刀相助，於是我就去睇下發生咩事。

「Leon?」Kelly見到我就好似遇溺中見到救生圈咁即刻想搵我救命。

隻兵見到高大嘅我就明顯開始有少少淆底。

「先生，你邊位呀?」佢硬住頭皮咁問。

「佢同學。」我目無表情咁答。

「我地都係耍下花槍啫，無事架你唔駛理我地。」而佢就咁解釋佢頭先嘅行為。

「唔係呀，佢唔係我男朋友黎架!」Kelly聽到佢咁講驚我真係信就即刻澄清。

「賤人，我送左咁多野比你又請你食飯，你同我講我地乜都唔係? 」可能被當面拒絕又飲左d酒，見Kelly咁急向外人同自己撇清關係衣隻兵嬲到都唔想再扮。

「無人叫你咁做架喎! 係你自己主動話要送野比我同請我食飯咋嘛!」Kelly再解釋。

「老友，阻人溝女尤如殺人父母，你扮睇唔到離開，我KC就當交左你衣個朋友!」衣名叫KC嘅兵先生見再隱瞞唔到就開始想利誘勸我扮睇唔到大家交個朋友。

「CK，格硬得黎嘅又有咩意思呢?不如都係及早止蝕離場留返d面子比自己啦。」而我當然唔會為左交佢衣個朋友而就咁走左去。

「係KC! 即係你唔會走啦?」見我唔走佢又想凶我。

「佢始終係我同學，唔理佢有咩事我第日會內疚。」但我唔驚，仲好冷靜。

「你好野!」見我完全唔驚，反而令佢有少少驚，衣個CK啤左我同Kelly兩眼最後就死死地氣咁走左。

「好彩遇到你咋...多謝你呀…」見CK走左Kelly就向我道謝。

「無事就好，下次小心d啦...」見危機已經解除講完衣句我就打算離開。

「下你咁就走喇?」見我急住走Kelly似乎有d意外。

「唔係呢?」我停低反問。

「難得有機會你唔同我傾下偈或者送埋我返屋企?」或者Kelly從未試過被異性咁冷淡對待，所以唔太接受到我嘅反應。

「我地又唔係咁熟… 你屋企好遠?」調返轉我同樣都對佢咁嘅反應有d意外。

「…沙田」Kelly有d唔好意思咁講。

「咁… 我送你去搭車啦…」始終天色都唔早，本住男人就要做個gentleman我只好提議。

聽到我無再急住走肯送佢去車站佢臉色先好返d。


「你有女朋友?」一齊行左陣後佢又突然問。

「係呀~」我自信滿滿咁答。

「好靚架?」佢再問。

「堪稱完美~」我再答。

「咁誇張? 有無相睇下呀?」

見佢一臉懷疑咁我就比左善柔幅相佢睇。

「哦… 係唔差嘅，不過都未到完美啫...」佢望左兩眼就有少少不屑咁講。

「我覺得佢好靚呀，不論內在同外在都係咁完美~」諗起善柔我臉上不禁露出甜甜嘅笑意。

或者因為從未遇過一個對自己零興趣嘅男人，加上我臉上露出左個幸福嘅笑容，結果令Kelly感到很不是味兒。而自尊心同好勝心令佢覺得自己丟唔起衣個架。

結果衣晚後，我好似就被佢視為左要征服嘅對象。或者佢覺得如果可以令我變心鍾意佢，咁就代表佢係比善柔更加優勝。

11.12

之後Kelly不時都會主動message我，上堂間中又會專登坐去我隔黎d位置撩我傾偈，有時仲會想約我一齊食飯。

起初其實我都無特別點理佢，只係簡短嘅冷淡回覆。不過有時見佢比唔同嘅男仔圍住果陣，如果見到我佢都會專登同我單一單眼示意佢留意到我，話我聽我係特別的，我心入面都不禁有少少飄飄然。

就好似”眾人看上她，但她卻唯獨看上我” 嘅一種優越感。

始終Kelly嘅外貌同身材都確實好好，同善柔係好唔同嘅類型，面對住一個靚女嘅主動，就算明知佢可能係別有目的，你都唔會太捨得對佢決絕完全唔理會佢。

當然，肯同佢傾下偈主要都係因為當時我對自己好有信心，覺得就算對方有其他意思，只要自己唔接受，繼續維持喺淨係傾偈做朋友，咁都無傷大雅唔會有咩問題發生。

其實如果係以前嘅我，我估我真係唔會點理Kelly。但比善柔改造完加上自信心大增，我都唔會再點怕同女仔傾偈溝通，己經習慣覺得係好習以為常嘅一件事。


於是隨住每日嘅交談同上堂多左近距離見面，慢慢我地都真係開始變得熟絡左，但都仍然只係限於私下message同上堂見面。

直至過左段時間之後咁岩有個星期善柔同佢屋企人去左旅行，而Kelly知道左後就不停咁煩我話想約我出去。敵不過佢嘅死纏難打加上無左善柔有晚我都確實係有少少悶，最終就答應左同佢去飲杯野。

雖然成日有message，但唔計救左佢果次，衣次其實先係我同Kelly真正第一次嘅單獨接觸同約會。

唔知係咪因為得我地兩個，衣晚嘅Kelly同平時有d唔同，講野直接又大膽，脫去左少少佢平時喺其他人面前偽裝成女神嘅形象。

而當我地飲左兩杯後，佢塊面開始出現淡淡嘅紅暈，再喺酒吧昏暗燈光嘅襯托下，確實散發出一種獨突嘅魅力。

加上唔知係咪因為酒精嘅加持，佢開始不自覺咁越貼越埋。就好似周圍環境太嘈咁，我講野果陣佢會將隻耳朵貼近我嘴邊，到佢講野又會主動將佢個嘴貼近我耳邊。有時講起d好笑野佢仲會搵隻手拍下我或者成個人挨近我個膊頭度笑。

本身佢嘅身材就已經好好，加上今晚仲著左條短裙再加一件露膊嘅冷衫，令佢每一個身體動作都顯得加倍性感，將佢惹火嘅身材表露無遺。

當佢不時藉意挨近，感受到佢半邊充滿彈性嘅北半球貼近自己胸口，令我都不得不產生生理上嘅反應，開始有時會有少少想入非非。

再諗多兩杯我亦開始有d意亂情迷越黎越放開自己，唔介意自己同佢有越黎越多嘅身體嘅接觸。

無可否認，衣晚嘅體驗係我從未感受過，同Kelly嘅相處真係比左種同平時善柔相處果陣好截然不同嘅感覺比我。

善柔平時係活潑但乖巧，Kelly就大膽直接同狂野。

善柔外表係含蓄內斂嘅天使，而Kelly則係身材火辣嘅魔鬼。

然後我發現，原來新鮮感衣樣野係善柔無論幾完美都唔會比到我。

我開始好奇同善柔以外嘅人一齊甚至上床感覺會係點?


好奇心會害死貓，結果衣種好奇心一點燃起上黎加上Kelly嘅熱情主動，令一切都一發不可收拾。