<我嘅職業係專溝人地個女朋友>

4.22

「都唔係你嘅錯，始終你真係受過傷會咁諗都唔出奇… 不過未遲架，你仲咁後生實會搵到另一個真心對你嘅人，到時唔好再犯相同嘅錯就得喇。」我安慰加鼓勵佢說。

「你咁講… 即係其實你對我都係假唔會同我一齊?」不過佢聽到後反而臉色一變。

「我對你唔係假，但我唔可以做你男朋友...」我為難咁講。

「你唔覺得自己講嘅野好矛盾? 定係其實你已經有女朋友?」感受到Maggie嘅憤怒加哀傷，佢認定我只係狡辯想呃佢。

「唔係… 只係我個心衣世應該都好難會再為另一個人心動，而我亦唔想自己可以過得幸福… 我衣世都唔會再拍拖架喇。」我解釋。

「點解?」Maggie當然會問。

「Sorry，現階段我唔講得比你聽…」但我唔講得。

「咁幾時講得?」Maggie失望地繼續追問。

「可能等有一日你真係得到左幸福，咁我會同你講…」我好老土咁講。

「哈，先唔講唔知有無衣一日，就算有，你肯定到時你仲係度?」Maggie苦笑反問。

「只要你有需要我就會係度。而當有日你真係搵到幸福，自然就唔會再需要我，咁我亦可以安心咁講你聽。」

「…咁其實點解你一開始又要撩我? 既然唔會同我一齊，我唔明你嘅動機係d咩…」Maggie仍然難以明白我嘅行為。

「我想幫你，想糾正返你嘅價值觀証明比你睇男人唔一定因為性而同女仔一齊，亦唔會因為有左sex兩個人嘅關係就會被破壞。只有咁你將來先會容易搵到幸福…」我再嘗試好誠懇咁解釋。

「咁所以為左証明比我睇，就算唔一齊你都會一直陪住我?」Maggie再作出試探。

「嗯… 直至你唔再需要我。」

「然後到時你就會將你嘅故事講我聽等我可以解惑?」聽到我話唔會走Maggie表情終於放鬆落黎，臉上亦有返淺淺嘅笑容咁問。

「無錯。」我亦微微笑住咁答。


其實由我黎酒店開始，我就知道我今次唔可以好似以前咁完成左委託就消失，唔係嘅話Maggie一定會繼續偏激落去。所以我只可以喺佢有下一段關係前繼續陪住佢，用行動証明比佢睇性並唔會催毀兩個人之間嘅關係。

我唔知衣個聽落有d令人難以順服嘅解釋可唔可以令Maggie相信，不過或者佢都感受到我講嘅野係發自真心，所以佢最後選擇左相信，始終時間係會証明一切。

之後一段時間，我同Maggie間中都會見面。有時我地會淨係坐喺公園或者海邊傾下偈，有時我地會就咁攬住大家一齊好平靜咁訓一晚，有時當佢好有需要時我地亦都會過一個充滿激情嘅晚上。

佢話佢衣段時間都再無搵過其他人ONS而只有我一個，因為佢雖然有需要，但同時都厭倦左再要成日搵唔同嘅陌生男人。衣家有我一個解決晒佢生理上嘅需要同心靈上嘅陪伴其實都已經好唔錯。

就係咁，Maggie成為左第一個任務完結後我並無需要消失大家仍然有保持聯絡嘅對象。我地嘅關係，俗d咁講，係咪都算叫FWB?

或者有人會疑惑，咁Maggie其實會唔會慢慢都依賴左我然後鍾意左我?

坦白講，我都唔肯定到底Maggie係真係信我唔會再對人動心所以佢好明大家關係係點唔會諗多，定抑或佢其實都有暗地裏嘗過試希望用時間感化我令我有日會對佢動心然後接受同佢一齊。

不過無論係前者定後者，其實結局都唔會變，因為事實就係我唔會再對任何人動心然後比自己過得幸福。而隨住我地接觸越多對大家了解越深，總有一日佢會理解衣點接受現實。

然後，佢亦會明白我地衣段關係，總會一日係會劃上句號。


喺大概一年後，佢終於有左新男朋友，而我地自此當然亦再無滾床單去，最多都係好間中大家出黎傾下偈，聽下佢同新男朋友嘅點點滴滴，成為左一對普通但特別嘅朋友。你可以話我地嘅關係由FWB變成左FWOB。

到到佢結婚前邀請我去飲，我話唔適合，於是佢就話如果我唔去就要還返我欠佢嘅野比佢。

於是喺佢結婚前一日，我同佢見左最後一次面，而佢亦成為左知道我故事嘅極少數人之一。

之後雖然我地再無見面，但喺每年嘅一個日子，佢都會習慣送個加油同攬攬嘅sticker比我。

為左一氣呵成完埋衣個小故事比大家 原來又衝左5000字

好好睇

多謝支持

好睇好睇

多謝你呀

加速加速

等你大結局

幾好睇，甜度適中，留名支持！

Hi 樓主

其實黎緊應該就快未必可以每日都4000字以上... 劇情開始有d趨向複雜要諗多d

咁快想個故大結局喇

多謝多謝 不過有心理準備衣個第4章應該係最甜架喇

hello 好耐無見
守承諾出左新故喇～

依家一炮追

基哥聽眾？

估唔到有人發現
以前都有聽過幾集咁岩聽到

5. Vienna 與Joe

我一開始講我嘅職業係專溝人地個女朋友，其實仲有個隱藏嘅意思喺入面。

講得係人地個女朋友，就代表我目標嘅對象就只限於女朋友嘅關係，其他關係例如老婆或者男朋友等等我通通都唔會接受。

點解男朋友我唔會接受，好簡單因為我唔係gay，你要我幫個男仔令佢男朋友移情別戀我自問勝任唔到亦過唔到自己果關。

至於老婆關係，事實上其實都有唔少結左婚嘅人夫嘗試過搵我幫手。

不過一來結左婚後我覺得義意係唔同左，二來係咁亦可能會牽涉到類似贍養費或者撫養權衣d比較複雜同麻煩嘅問題，我唔想有日自己為左佢地需要上庭作供或者上報紙，加上人妻唔知係咪因為通常年紀大d成熟d，離婚後出事輕生嘅比率好似都少d，所以對於人夫嘅委託我一律都會拒絕。

不過講開又講，雖然我唔接結婚後嘅生意，但其實臨結婚前先黎搵我幫手嘅準人夫都有唔少數量。

「壞人，我想搵你幫手，我想同我未婚妻分開…」

「點解?」

「我頂佢唔順喇…有d野原來真係可能要去到結婚前先知大家原來係唔夾或者忍受唔到…」

「可以分享下?」


---Joe視角---

我叫吳世祖，英文名Joe。
雖然個個都叫我唔駛做，但事實就偏偏事與願違，我唔單之要做，而且仲算係天生一副勞碌命。

因為屋企環境唔好，中三我已經要開始幫低form學生補習以便賺取自己平常嘅生活費，而到讀大學我亦要一直出黎做part time先夠錢交自己嘅學費。所以細細個我已經養成左凡要都應該係要靠自己無得靠人嘅價值觀，對金錢亦看得比較重。

好彩到畢業後捱左兩年我就遇到個好老闆搵到份收入同付出都算掛勾成正比嘅工，只要勤力瘋狂OT都叫搵到舊錢。所以喺燒左幾年命後我嘅生活都尚算過得去，可以開始諗下人生嘅下一步。

於是過左陣我就喺交友app上面識左我衣家個未婚妻Vienna。其實喺遇到Vienna前，我都有見過唔少其他女仔。不過一係就外表唔太討好，一係就無咩感覺，一係就感覺好港女feel好似expect我理所當然咁要為佢地比晒所有錢咁，而衣樣野係我好反感。

不過就係我開始有d厭倦衣種dating嘅時候我遇到Vienna。


Vienna比我嘅第一個印象係幾清純嘅靚女一名。雖然佢唔高亦無玲瓏浮突嘅身型，但個樣再配上佢嘅長髮就比我一種清新甜美嘅感覺。

望見佢嘅第一眼我就有d心動嘅感覺。

而同佢相處左一段時間後，我發覺佢都幾節儉。或者係因為佢喺公屋家庭長大，屋企經濟環境唔算特別好，所以佢平時都比較慳，唔會成身名牌。

順利成章我地見左幾次面後大家都覺得幾有feel就一齊左。

5.2

一齊後我地嘅關係一直都算幾穩定，無咩大問題同大拗撓。可能因為我個人本身都屬於無咩所謂果類，平時佢鍾意食咩去邊我都會比佢話晒事。因為知佢搵唔多，我亦唔介意一般大家拍拖嘅費用由我出，我會寧願佢自己儲多個錢傍身，只要佢心態上唔係老馮就得。

雖然鍾意食野嘅佢間中都會想食好西，不過一般情況下佢都會錫住我個荷包，而間唔中一次半次嘅揮霍我亦覺得無傷大雅，所以我地一直都算相處愉快。

雖然我係慳，但都唔係unreasonable過晒火果隻，特別係當自己嘅儲蓄都越黎越多果陣。

而喺大家一齊左大槪3年後，因為有感大家年紀已經唔細所以我地都有結婚嘅打算。而有左共識後我落左少少血本book左間酒店買左隻戒指再加少少心思就完成左衣個人生大事前嘅過場儀式。

只係我無諗過喺籌備婚禮嘅時候，我卻好似突然間見到Vienna另外嘅一面。而喺衣一年內，我地拗撓嘅次數比之前三年加埋都仲要多，冷戰唔開心嘅時間亦遠比之前長。


「反正我地都諗住生小朋友，我想結婚後都同媽咪一齊住呀，仲有小白佢都要同我一齊架，咁佢平時都可以有阿媽幫手睇住照顧，佢地又唔駛咁悶! 」

結婚後原來我唔只要同老婆住，隨老婆仲附送一個阿媽同埋一隻狗。我本身當然排斥，同佢講完唔想後我地就嘈左次大交。

三日後我諗通左，反正將來都諗住生小朋友，咁有外母幫手湊都可以係一件好事黎嘅，於是我妥協。


「住大圍或者油尖旺區啦，去邊都方便，將軍澳太遠市區喇!」

因為人數多左，間屋自然都要大d，所以要搵d位置偏d呎數平d嘅單位，而對本身住九龍東嘅我黎講將軍澳區算係幾好嘅選擇，不過一講就比人ban左，對佢黎講，佢新居係非果兩個市區不可。於是我地又吵左一輪。

三日後我諗通左，雖然我不論返工同舊居都係喺九龍東，不過大圍或者油尖旺區係去邊都算方便亦都保值嘅，於是我妥協。


「結婚我要去日本影pre-wedding! 我有個friend係果度影d相超靚呀~ 你唔好諗住求其返大陸或者香港hea影呀!」

人嘅慾望係無限，但人嘅荷包係有限。由於要住大屋又要市區樓，唔夠錢咁就只好喺結婚budget上面略作修整，而pre-wedding影相係本身其中一項大支出，不過都未講出口已經再度比人封鎖左。

三日後我又諗通左，算啦，一生人一次，影得靚同開心都值嘅，最緊要佢開心同滿意，於是我妥協。


咁不如間屋裝修整少d野，傢俬買多d現成? 慳返果筆可以用去遠d影pre-wedding呀~

「裝修我要現代奢華風，全屋都要好似酒店咁Grand咁靚! 全屋都要有果d靚燈，再加埋幅特色牆，諗起都靚~ 我地搵果d design house幫手設計呀~」

對於佢嘅要求，衣次我真係企硬，因為我唔想清袋…

由於細個窮，所以我戶口需要有一筆錢傍身我先可以安心。如果戶口無晒錢，我個人會好無安全感。可惜Vienna唔肯，於是我地又吵大鑊。

今次過左一星期後，我終於忍受唔住冷戰果種唔開心嘅感覺，於是我妥協。


一係唔好擺酒，拎埋d錢黎裝修同週轉啦…

「其實擺唔擺酒我個人都無所謂，但我係獨生女，所以點都要擺呀…」

最後當然都係失敗收場。

5.4

我同善柔由我地各自嘅父母喺我地出世果日咁岩截的士撞到果刻開始就已經註定有一種特別嘅聯繫。

衣種聯繫令我地成為左大家有血緣關係嘅親人以外最親密嘅外人，而衣種關係亦一直維持左十幾年都從無變過。

當時嘅我因為早已經習慣根深柢固，所以真係無特別諗過衣種關係會唔會有改變嘅一日。

直到有一日，一個男人嘅出現介入左喺我地兩個之間，然後一切都真係開始慢慢開始產生左改變。

我仲記得果日係我地考完AL無耐，因為夜訓我同善柔訓醒已經係第二日嘅下午過晒食晏時間，於是就同佢行去附近嘅茶餐廳下午茶。

點知行行下佢突然同我講佢已經正式出pool告別A0同左個男仔一齊。

個男仔叫黎浩明，係我地中學同學，都算高高大大但就木木獨獨成舊飯咁。

雖然一睇就知佢係乖仔，但我心入面真心覺得佢襯唔起善柔。

雖然善柔大部份時間都比較文靜，但我知佢心底入面都其實都好調皮，唔會鍾意悶人，加上佢凡事都追求完美，令我一直有個錯覺覺得善柔唔會鍾意佢。

所以就算之前善柔有同我提過佢嘅存在，我都無點為意，點知最後發展竟然令我大跌眼鏡…

「點解你會鍾意黎生架? 你明明有一顆活潑嘅心而佢又咁悶…」我忍唔當講住笑咁問。

「其實本身我都無諗過呀，不過有時人嘅感覺真係好奇妙，佢比到一種好踏實好安全嘅感覺我…或者見佢等左我咁耐，衣家真係比佢感動到掛~」善柔帶住甜甜嘅心意咁講。

「安全嘅感覺? 」但我就一d甜嘅感覺都無仲有d苦咁問道。

「係呀，即係女仔好需要嘅三個字-安全感。同佢一齊佢比到一種好安心嘅感覺我。」

「同我一齊果陣無架?」我下意識咁衝口而出問。

善柔聽完我問後有d”嗟異”咁望左我一望，諗左諗

「完全無... 仁仁你係我細佬黎架嘛，安全感衣d係都係等姐姐比你啦~」然後就笑笑口咁講。

「啊柔柔，你幾時先肯接受我先係你大佬衣個事實呀… 」對佢嘅答案我有少少失望，但咁多年黎嘅慣性習慣又令我即刻宣示返自己先係最大果個。

「唉…今日唔拗喇，或者就係因為衣樣野，令我一直唔覺得你似阿哥囉…」不過善柔難得就咁由佢無繼續同我拗。

果刻我個心其實有d唔忿氣，明明我對佢都好好呀，點解喺我身上就無安全感?不過既然佢唔拗咁我都唔想再為衣樣野拗落去咁小學雞，只係我個心又有另一樣野唔舒服。

「仲有呀，點解咁大件事決定前都唔同我講問下我意見先呀? 攪錯!」就係佢決定拍拖前都唔同我講聲，仲話青梅竹馬...

「對唔住囉~ 因為有d野發生得比較突然...而且我地琴日先正式一齊今日都已經即刻話你聽啦~」善柔feel到我好似真係有d嬲就想氹返我。

「哼，費事睬你呀!」我當然無咁易氹然後就急步扔低左佢自己行先。

果刻，其實我係用生氣去掩飾自己心入面唔舒服嘅感覺。如其話係嬲善柔，其實我更覺得自己似係嬲緊自己多d...

心入面嘅不快，令我逃避左善柔差唔多兩個星期。然後，當我終於見住柔柔比另一個男人拖住隻手果陣，果種莫明奇妙嘅心痛，令我首次意識到或者我最想善柔做嘅，從來都唔係我阿妹而係另一種身份。

雖然只有細個果陣我地先會拖住手行，但唔計親人曾經衣個只有我嘅專屬權利，衣家原來已經比另一個人搶走左。

後知後覺…

突然間，我好似終於知自己衣兩星期到底嬲緊自己d乜。

點解我咁遲先發現?

點解明明自己衣十幾年咁多機會，領先對方咁多，但我最後都可以眼白白咁睇住佢比人搶走?

後悔?

只係一切都已經太遲…

5.5

安全感... 最虛無縹緲但又影響深遠嘅三個字。

到衣家，我都仍然唔明白點解當年善柔話對住我無安全感，但對果個黎生就有。

所以潛意式我好討厭衣三個字。

如果唔係衣三個字，我地最後嘅結局可能就唔會變成咁…

不過如果Vienna一直缺乏安全感，咁佢之所以咁霸道，會唔會都同衣三個字有關係?

而如果我想溝到佢，似乎就一定要比到衣三個字佢。

但係比到佢之前，我首先要解決點去接近佢繼而可以開始同佢溝通衣個煩惱。

Vienna係做普通文職工作，平時都無咩特別興趣同嗜好，放工如果無約朋友就多數返屋企睇電視同做狗奴，所以一時間我都諗唔到有咩方法可以好自然咁接近佢。

以上嘅野其實都係Joe同我講，所以佢都知道我嘅難處。

「我會制造一個機會比你，等我消息。」最後佢諗左陣後同我講。

「好，不過我想問如果Vienna突然肯改變唔再咁霸道，肯接受你嘅意見，咁你會唔會改變你嘅決定?」

其實除左令Vienna變心衣個方法，仲有另一個方法解決問題，就係Vienna肯改變，咁原本嘅問題應該就可以解決。

「我會考慮，不過佢真係咁易改變到我地就唔會攪成咁啦...」沉寂左段時間後Joe答。

「我會嘗試了解下。」

三日後嘅一晚，我去到清水灣嘅海灘，然後見到一個女仔正自己一個人坐左喺廣闊嘅沙灘度抱膝喊緊。

我無出聲靜靜咁行左去一個距離佢幾個身位嘅側邊坐低左，而當佢意識到我嘅存在後就即刻用手抹一抹走自己臉上嘅淚水，然後輕輕擰側左個身想背住我唔比我見到佢喊緊個樣。

衣個女仔就係Joe個未婚妻Vienna。

衣晚Joe同佢吵大鑊吵得好甘，跟住Vienna就自己一個走左出去。

Joe知Vienna次次好唔開心果陣都會自己一個人黎衣個沙灘，佢相信今次都唔會例外，因為佢知Vienna心入面總係希望自己過一陣就會識黎衣度搵佢然後氹返佢，而事實上喺佢未決定放棄前佢都有黎過衣度搵佢唔少次。

不過今次佢就叫左我黎衣度試下approach Vienna。

5.6

「小姐，你無事嘛?」過左陣見Vienna開始完全冷靜後我先問。

「…無事…」佢有d唔好意思咁答。

「睇你頭先咁喊法，同男朋友鬧交呀?」我明知故問。

「嗯…」佢有少少驚訝我估中，但應該潛意識有d抗拒我衣個陌生人唔想理我。

「其實仲有得鬧交，某程度上都算係一件好事黎…」所以我只好講一d可以惹起佢好奇心嘅說話希望可以延續大家繼續對話嘅可能。

始終如果佢唔理我，我都好難有機會同佢繼續交流。

「下?鬧交有咩好?」好彩佢果然唔明白即刻開口問。

「至少佢都要個人仲係度先可以同你鬧交呀，而且有時鬧交都係一種可以令大家更了解大家真實諗法嘅途徑，只要唔好太過火識及時收口就得。唔係有d野可能到後悔果陣就已經太遲…」我帶住種淡淡嘅哀愁咁講。

「你女朋友同你分手所以無得再鬧交?」佢追問。

「佢...唔係我女朋友，而且， 佢已經唔係衣個世界…」我偽裝著平靜咁講。

有時為左令對方肯放下戒心講秘密比自己聽，特別係唔熟嘅人，首先你就必需要交出自己嘅秘密，因為講秘密係拉近兩個人距離嘅其中一種捷徑，所以我只好咁做。

「oh sorry…」知觸起我傷感嘅往事Vienna唔好意思即刻道歉。

「唔緊要... 所以如果對方仲係度，如果你仲想同佢繼續一齊，咁就要好好珍惜... 同佢心平氣和咁好好地傾下啦，唔係到到真係無左先後悔，就再喊幾多次都無用架喇…

其實輸贏好多時並唔係睇場交，而係最後嘅結果開唔開心。比你贏左場交但原來大家都唔開心或者有條刺留左喺個心入面，咁其實最後大家都只係輸家。

但相反如果大家最後可以坦誠相對解決問題，最後兩個都開心返，咁就係雙贏衣個最好嘅結果。」我開始拋磚引玉。

「其實我都唔知自己仲應唔應該同佢一齊…」Vienna諗左陣後終於開始講。

「咁嚴重?」我有少少愕然原來Vienna都諗緊放棄。

「你覺得兩個人一齊如果無左信任，成件事仲有無可能work得到?」Vienna問。

「坦白講無左信任嘅兩個人一齊都唔會開心，仲會產生好多拗撓同問題。所以係佢比唔到信心你?」我問。

「嗯… 不過衣樣野其實可能都同我自己成長環境有關…」

5.7

--- Vienna視角---

我係Vienna，中文名係衞奕蘭。

由我細細個開始，屋企對我黎講並唔算係一個和諧嘅地方，因為我從未感受到父同母之間嘅愛。父親喺屋企嘅時間並唔多，間中都會關心下我，但對母親，佢就總係冷言相向，漠不關心，有時當我入左房後，都可以聽到佢地係出面鬧大交嘅嘈吵聲音。

而隨住我年紀漸長，我都開始知道佢地兩個之間發生緊咩事。原來喺我細細個開始，父親喺出面就已經有第二個女人。佢初初當然想呃住我媽咪，但作為一個女人，我估老公個心仲喺唔喺自己度，自己或多或少都會感受得到，更何況隨住時間飄移，我父親都將越黎越多嘅時間放喺另一個女人度。

所以我母親並唔係唔知道真相，但佢就選擇扮唔知道。因為由結婚開始，佢一向都以丈夫為尊比我父親話晒所有事。不論係錢，層樓個名等等全部都係喺我父親名下。

而生左我之後佢為左照顧我亦無再工作，所以佢為左我同為左自己就選擇左啞忍扮唔知，佢無勇氣變成一無所有咁離開我父親，但自己就日日都好唔開心…

對於母親的啞忍，父親嘅回應係有持無恐，越黎越明目張膽。除左喺屋企嘅時間越黎越少，我有時喺佢地鬧完交後嘅第二日就會喺母親手上見到一d清晰嘅瘀痕。

我有問母親係咪父親打佢，但佢就否認仲叫我唔駛擔心唔好問父親。

不過有d野並唔係你選擇忍耐就可以留住… 到到我中學果陣，我父親終於都決定左要離開衣個家庭，選擇左果個第三者同佢嘅私生子而要同我母親離婚，但就只係留左一筆好少嘅錢比我地。

果陣我母親好傷心又咩都唔識，自己又慣左咩都係我父親話事，所以突然嘅巨變下佢六神無主都無爭取d咩就只係識逆來順受… 不過為左養我，佢知佢要堅強，然後就逼住要出返黎做野。

好彩之後我地申請到公屋，母親又好辛苦咁日日都打兩份工，我地之後嘅生活都叫勉強維持到… 好唔容易捱到我大學畢業出黎做野，我地嘅生活先終於叫好返d唔駛日日都要計住只可以有幾多錢買餸煮飯。

有時我都覺得自己母親都算係不幸女人嘅典範… 佢衣家唯一嘅倚靠同生存動力就係我，所以我都好想好好孝順佢唔想佢自己一個。但始終我都要工作，所以屋企環境好左d後我就專登買左隻狗去陪佢，而小白亦好快融入左我地成為我地家庭嘅一份子。

我好慶幸當日我帶左小白返屋企衣個決定。

有次假日母親突然喺屋企暈左，但我就係房訓死左，好彩係小白發現係咁喺度吠求救我先識醒然後即刻叫白車…

最後好好彩母親無事，但自此我就同自己講過以後我地三個都要一齊生活落去，永遠都要好好陪住大家。

之後我喺交友app識左我衣家嘅男朋友。或者因為母親經歷嘅關係，我好想搵到一個可以有能力照顧我屋企又比到安全感我對我好嘅男人。而喺見過唔知幾多人後，我遇到阿Joe。

或者因為出身於窮苦家庭細細個已經要開始出黎做野，Joe比我嘅感覺好成熟亦好識照顧人，加上同佢出街佢都好聽我意見我話去邊食咩佢都會照單全收順晒我意，所以我覺得佢照顧到我之餘亦好尊重我意願會聽我話，我覺得佢係我想搵嘅男人，同佢一齊我有一種安心嘅感覺。

5.8

安安穩穩咁一齊三年後，佢終於同我求婚，而我亦樂於應承。

不過有時有d野真係好奇妙… 我都唔知係天網灰灰，定抑或係個天想你知果陣佢總會有方法令你知道。

求婚無耐後有次同佢喺屋企訓覺果陣我唔小心踢左佢個電話落地，點知當我幫佢執返果陣，就見到有個”好掛住你”嘅message 。

我個心即刻有種刺痛嘅感覺，然後即刻叫醒佢質問佢。

佢見到都嚇左一嚇，然後就即刻喺我面前覆左個女人。

“你係咪send錯左message呀? 我唔係你老公喎….”

“咦，係喎! send錯唔好意思…”而好快我地亦收到對方嘅回覆。

之後佢又好快開左果個女人張profile pic我睇，係一個上左年紀又好肥嘅一個大媽樣。

「衣個我同事黎架，我估佢應該飲醉左想send message比老公點知send錯左比我啫…」佢解釋。

因為果個大媽女人外表真係一d都唔吸引，所以我都信左阿Joe並無再懷疑d咩。

不過幾星期後，又發生左另一件事…

事源係有晚我同朋友食完飯後因為都見夜同埋地點又近阿Joe屋企就諗住去佢果度訓。本身我其實一直有佢屋企鎖匙，仲串埋係自己屋企抽鎖匙度，點知去到佢屋企門口先發現自己今日原來唔記得帶鎖匙。

因為阿Joe有同我講過果晚佢會同同事食飯，所以我襟鐘無人應門都好正常，而咁岩佢仲要之前係公司打過比我話自己果日唔記得帶電話，於是我只好直接打比佢同事去搵阿Joe想問下佢大概幾點返黎。

點知電話通左後佢同事就一直支吾以對，又比唔到個電話阿Joe聽，於是我就有左唔好嘅預感。

兩個鐘後我終於等到阿Joe返黎，而因為佢無帶電話佢同事應該通知唔到佢我搵緊佢所以佢仲係唔知發生緊咩事，又好驚訝咁見到我係度。

結果喺我質問下佢咩都答唔到，只好承認自己果晚講大話並唔係同同事食飯而係同另一個女仔朋友食飯，但就堅稱自己只係食飯並無其他野。

我從來無唔比佢同其他女仔食飯，所以我唔明佢點解要呃我。而佢就解釋係因為上次個message事件後佢驚我誤會又唔開心所以就決定呃我。

果刻我唔知應唔應該信佢亦好嬲，所以最後就自己走左返屋企，之後亦完全無再覆佢理佢差唔多兩星期。

果段時間我除左嬲我仲好驚，我好驚阿Joe好似我父親咁係一個花心男會出軌，好驚結婚後我會步我母親後塵。如果我同Joe結婚後佢又有左第二個，咁我會唔會好似我母親咁之後咩都無晒一無所有?

但自己年紀都唔細，同阿Joe又一直都唔錯，如果分手，咁自己又仲搵唔搵到第二個? 萬一果個如果真係只係普通朋友我怪錯左佢，就咁分手咪好冤枉?

我唔知點算好…

不過果兩個星期阿Joe都keep住message我講對唔住，仲發晒誓以後唔會再呃我咩都會向我備案。有感於佢嘅誠意，我最後都原諒左佢，婚亦會照如期咁結。