<我嘅職業係專溝人地個女朋友>

多謝支持

早更完今晚夜d應該趕到個深宵間找數

其實eva衣段我本身寫左二三千字，不過寫完又驚影響讀者體驗所以結果決定刪晒重寫，將佢大幅縮短。

始終都只係想表達下價值觀對情侶嘅重要性。

另外，故事去到衣度，唔知大家有無少少緊張？

到底主角應該去拎本日記定係去機場搵善潼呢？？

唔吊大家太耐癮 今晚會加個深宵間找數

會唔會考慮將果斷加個外傳？

去機場！

等 寂寞到夜深

8.32

其實就算善柔因咩原因選擇左另一個，選擇左結束生命，一切都已成事實無法改變。事實就係當日佢選擇左另一個人而唔係我，然後佢離開左衣個世界。

相反，善潼由細細個果陣原來已經一直鍾意自己，默默咁安守喺果個位置，到到現在佢都仲係等緊我希望我最後可以選擇佢。

我點可能仲因為過去而選擇放棄未來?

無論過去原因係咩，悲劇已經發生左改變唔到。但另一方面未來嘅幸福卻仍然等緊我願意踏出第一步去將佢捉緊。

如果我由佢溜走，我知佢一定會成為我生命中另一個遺憾…

我已經錯過一次，無理由再比自己錯第二次。

將來嘅野本身就唔係自己可以控制，咁點解自己仲要顧慮咁多唔go with the flow?

我地要信每個人都有自己既定嘅路要行，一切本身就已經係最好嘅安排。

跟隨自己嘅心，唔再諗咁多顧慮咁多，決定左就勇往直前。


跑緊既途中，我發覺我好掛住善潼，好想將佢抱入懷中話比佢聽自己已經唔再迷茫。

因為衣刻我確信我鍾意果個，想同佢一齊果個，係善潼。

不論佢係本身嘅善潼定係好似善柔嘅善潼，其實佢地都係善潼，何必咁執著?

善柔對我好重要，對善潼亦好重要，要消除佢令佢消失其實根本就無可能，所以我相信以後佢都會繼續用唔同方式纏擾喺我地嘅生活當中。

之但係咁又點?

係咪咁就代表佢一定會係我同善潼中間嘅障礙? 我發覺好似從來其實都只係得我自己咁諗…

如果我唔排斥佢，坦然接受佢喺我地之間嘅存在，佢其實會唔會反而係我地之間另一種嘅覊絆同祝福?

因為佢對我同善潼都係一個好特別嘅存在，我地都唔會捨得拋棄佢忘記佢。

因為我地將佢好好記住，所以佢雖死猶生。

我唔再迷茫，直接衝左落樓下截左架的士就趕去機場。


喺的士上面，我雖然趕急但都逼住自己冷靜落黎，思考著自己之後落黎應該要點做。

不過面對香港繁忙嘅交通，我亦首次心中咒罵點解政府要將個機場由市中心搬左去赤鱲角咁鬼遠嘅地方….

好唔容易我終於去到機場，然後一路跑一路跑，去到差唔多最遠果個zone，我終於見到我想見果個人…

8.33

「潼潼!」

因為太害怕再次失去，我完全無理到善潼身邊嘅鄺生鄺太直接衝左過去攬實左善潼。

善潼初初有少少愕然，但好快就回抱返我，一樣無理到已經有d目定口呆嘅鄺氏夫婦。

「咳嘿…」過左唔知幾耐鄺生終於忍唔住咳左兩聲。

「鄺生鄺太…」而我都唔好意思即刻放開左善潼然後好有禮物又好尷尬咁同佢地打招呼。

「可唔可以同我地兩位老人家解釋下發生咩事?」鄺生一臉正經咁講。

我見善潼想出聲回應，但我制止左佢。衣個時候，男人就應該要承擔返男人該有嘅責任。

「鄺生，對唔住呀唔知你地要移民所以我黎得有d唐突又咩都無預備… 不過另一方面因為透過咁我亦終於知道左自己嘅真正心意，就係我好鍾意你地個女好唔想放棄佢… 所以… 頭先因為太驚失去佢先會一時激動，唔好意思…」我講出自己嘅心意再道左個歉。

「移民? 仁仔你講咩呀? 邊個同你地講我要移民?」但鄺生就有d黑人問號喺個頭上面。

聽到鄺生嘅說話，我一臉愕然咁將我個頭擰向善潼並投以一個詢問嘅眼光，而佢見到後比我嘅回應係一個尷尬加調皮再伸住脷嘅笑容。

「梗係阿妹玩你啦…」鄺太見到咁就大概估到咩事笑住講。

場面有d尷尬但我都仍然唔知發生緊咩事…

「仁哥哥對唔住呀呃左你… 只係見你過左半年都咁苦惱，而我地咁岩又去旅行，所以今朝突然收到你個message我咪諗住將計就計幫你認清自己個心點諗囉… 我地唔係移民呀，只係去旅行，兩星期後就返架喇，你唔好嬲我啦~ 你講過以後無論點都唔會嬲我架...」善潼笑得好甜但又有少少驚咁講。

我終於知道左發生緊咩事。

不過果刻我完全無嬲，只係有種如釋重負嘅感覺…

「太好喇… 你唔係真係移民，我以後都仲可以見到你…」我竟然有d想喊嘅感動。

「傻瓜…」見我無嬲仲為左佢唔係走而喜極而泣，善潼都開始有d眼濕濕。

「好喇，誤會解決左就好，我地要入閘喇，有咩返黎先再講啦。潼潼你一陣好好咁解釋比我聽到底發生咩事，仁仔你都返屋企啦，黎送我地有心喇…」鄺生好似有少少唔滿意咁講。

「咁好啦，你地一路順風玩得開心d…」感受到鄺生有d不友善我只好尷尬地笑住咁講。

「仁哥哥，我好快返黎架喇，到時我地再傾啦， 如果到時你嘅決定仲係未變嘅話…」善潼臨走前轉頭走過黎細細聲同我講。

「好…」

望住佢地入閘後，我就渾渾噩噩咁開始返屋企。


「飛機起飛喇就，你衣兩星期無人陪嘅得閒就返屋企食下飯啦~」過左段時間我就收到善潼嘅message。

「知道，你都玩得開心d，得閒就send下message比我啦~」

「我實會嘅~」

8.34

幾日後，我真係返左屋企食飯。

不過食完飯後，阿媽無啦啦就拎左個盒比我然後講

「衣盒野係幾日前潼潼叫我去垃圾房度執返然後比你架喎，古古怪怪咁都唔知佢做咩...」

聽到最後，我就估到盒入面到底裝住左d咩。霎時間隻手拎個盒果陣都忍唔住有d手震。

好想開，但我唔敢開…


「所以其實無論我點揀，你都會選擇比本日記我睇?」我即刻message善潼。

「你終於發現喇? 果本係我家家嘅日記同遺物黎架，我邊有可能真係扔左佢呀… 如果你果日真係揀左佢，咁比你睇都無可厚非呀。但如果你揀左我，咁調返轉諗其實比你睇都無所謂啦~ 我都唔想你一世帶住個心結呀…」善潼覆道。

「所以我真係可以睇?」驚佢唔開心我想再三確定。

善潼:「嗯，希望你睇完會更加可以諗得通啦… 不過如果你要改變主意，我都會明白…」

「唔會啦…」衣刻無論入面講咩我都唔覺自己個心意會改變。

善潼:「咁你睇完好好冷靜沉澱下再等我返黎啦~」


結果衣晚，我係床上面緩緩咁打開左善柔嘅日記，然後回顧左佢短暫卻精彩嘅一生…

要大家久候了

明天就會開始最終章，應該兩三日後就會大結局

請大家繼續支持

應該唔會喇 如果真係寫外傳或者後記我都諗好左係咩內容 不過未決定寫唔寫

吓就咁？ 就咁完？😑

好期待想知

又係呢啲位斷

9. 關於我嘅新職業

三年後

「李生李太，其實你地個問題主要係時間耐左，你地都忘記左對方嘅優點同以前吸引到你嘅地方… 試下諗返初初一齊果陣鍾意對方d咩，多d欣賞同讚美對方，咁你地相處就會開心好多架喇。

而且除左欣賞對方優點之外，不妨都欣賞多d對方為自己嘅付出呀~ 好似李生你咁，不妨諗下李太每朝都煮早餐你食，又處理晒屋企大少嘅家務省卻左你唔少麻煩呀，衣d都係好辛苦嘅勞力黎架。

至於李太，李生其實每日除左返工仲要揸車接送你同小朋友返工返學同放工都好辛苦架，而且知你唔想請工人，為左近你屋企佢仲專登由市區搬到去屯門住，衣d都係犧牲黎架…」 喺一個會客室入面我對住兩公婆侃侃而談。

兩公婆聽完我講後大家對望左一陣，然後從中我見到佢地嘅眼神漸漸變得溫柔。

「你講得岩… 對唔住呀老婆，衣段時間係我忽略左你嘅好，成日淨係識抱怨…」李生首先講道。

「我都有唔岩，成日習慣左後就覺得所有野係理所當然，忘記左衣d都係你嘅付出…」李太有d眼濕濕咁講。

之後我見佢地兩個隻手已經不自覺咁搭埋左一齊，我知佢地個問題暫時應該得到解決。

「咁咪好囉~ 兩個人相處，識得互相欣賞同體諒會開心過互相抱怨多好多，但人好多時一耐左就變左將對方嘅好當成左係理所當然，然後就淨係見到對方唔好嘅地方，結果大家關係就越黎越差…所以我地真係要不時提醒自己，唔好習慣左對方嘅好就忽略左衣d付出~

咁我都識做離開衣度先，你地可以繼續係度傾下偈，有需要隨時可以襟鍾搵我，無事嘅之後就咁離開就得架喇~」見佢地無事我亦主動離開。


「3號房已經ready~」一出門口我就見善潼拎住個folder同我講。

「好，唔該晒，衣pair應該攪掂唔駛再follow up架喇~」我笑笑口講完接過個folder 就邊行去3號房邊睇個folder入面嘅內容。


去到3號房門口我並無急住入去，而係喺個folder入面拎左支煙出黎點著放入口，再從房門側邊嘅窗望向入面。

因為特別嘅設計，我望到入面而入面係望唔到出面。當我望住入面嘅一男一女一陣之後，我就弄熄左個煙頭扔左去門口隔黎個煙灰缸然後再開門走入3號房入面。

9.2

「Doris，Raymond，你地好~」我同房入面嘅一男一女打招呼。

「Ryan你好…」佢地見到我都同我打聲招呼。

「大體嘅情況我睇完你地d資料都理解… 就係你地一齊耐左感覺好似越黎越淡，但又唔捨得唔想分手唔知點算好，係咪?」我問。

「係呀…」Raymond答道。

「我想問平時你地拍拖通常有咩節目?」我續問。

「其實都無咩特別架，有時佢會陪我去行下山游下水做下gym，我又會陪下佢去coffee shop坐下，遊下車河去下書店睇下書或者展覽等等…」Raymond答。

「就咁聽你地d興趣好似都幾唔同喎…」我回應。

「你都可以咁講，但其實我地都好樂意咁陪大家去做對方鍾意做嘅野架…」Doris想解釋佢覺得衣個唔係一個問題。

「以前曾經有人同我講解過何謂”陪伴”。真正嘅陪伴，其實唔應該係單純講個人physically咁係側邊陪另一個人去做一件事咁簡單，而係大家都要共同拎個心出黎發乎真心咁enjoy去做同一件事，如果唔係其實大家唔會有真正嘅connection同共鳴從而長遠增進到大家嘅感情…

所以如果你地陪對方果陣純粹只係諗住為左陪佢先做而自己唔係真正享受，咁時間耐左其實問題都係會出現。所以不妨試下一齊發掘一d共同興趣大家都鍾意做嘅再去做? 唔係嘅其實一段關係好難會長久架…」見到佢地個case我就諗起Connie然後講。

「但我地性格好似真係好唔同咁，我地都唔太搵到有咩係大家都會一齊鍾意做架…」Raymond為難咁講。

「衣個我未必幫到你地喇… 不過既然舊嘅活動唔work，咁會唔會試下發掘一d大家都未試過嘅野? 話唔定有呢?」我提議。

「嗯… 咁我地試下諗下啦…」Raymone仍然一臉苦惱咁。

「我都係頭先聽你地講自己嘅興趣時忽發奇想，例如Doris你鍾意游水， Raymond你鍾意揸車遊車河，咁會唔會考慮下Raymond學下揸船然後Doris喺Raymond船後玩下surfing? 又或者去浮潛咁咪又可以遊水又可以欣賞下風景?」我諗左陣後提議。

「聽落又好似幾有趣喎~ 你覺得點呀?」Doris聽完有d興奮咁講。

「我都覺得好玩可以試下呀!」Raymond亦一樣。

「總知記住，兩個人一齊要行嘅路係好長，如果可以有一d大家都鍾意嘅共同興趣，咁對維繫一段感情長久係好有幫助架~」見佢地都蠢蠢欲動，我諗衣個方法可能會幫到佢地。

「明白… 唔該晒你呀，我地會再嘗試努力一排架喇~」Raymond稍為有返信心咁講。

「加油! 有咩問題隨時可以再返黎搵我架，不過希望你地唔駛啦~」我笑住祝福佢地。

之後我又離開左3號房。


「5號房，今日最後一個喇~」見我出黎善潼又比另一個folder我。

「終於最後一個， 真係忙死我喇…」聽到就快可以收工我呼出左一大啖屈係心入面嘅濁氣。

「鬼叫你咁好生意咩~」善潼笑住講。

「初初開衣度果陣真係無諗過只係過左年幾就會忙成咁…」而我就苦笑道。

「咁係因為”壞人”大師你口碑好，好多搵完你嘅情侶之後都可以挽救到段感情，一傳十十傳百結果生意咪越黎越好囉~」善潼笑笑口又帶住驕傲咁講。

「我地生意好都唔知係好事定唔好事呢? 生意好即係好多情侶都有問題，但唔好我地又無工開要等食穀種…」

「唔好諗咁多啦，都唔到我地控制嘅，唔記得我講過每個人都會有自己條路要行? 而且兩個人一齊實或多或少點都會有問題避唔到，但有問題又唔代表一定會分開。 所以我地唯一可以做嘅都係當佢地有問題果陣比意見同advice佢地希望可以幫佢地渡過難關~」善潼認真咁答。

「知喇~ 講開食穀種我都有d肚餓，等我攪掂埋衣一pair我地就去食野啦~」我笑住講。本身都只係呻下，唔係真係有咩迷茫諗唔通。

「咁等我衣家去搵定食咩好先，你快d攪掂~」

望住善潼一支箭跳跳下咁彈走左，我就又點著左folder入面支煙然後望向房入面。


(唉，又係衣個問題…)

我皺一皺眉頭，整熄左支煙後深呼吸左啖氣然後就開門走左入去。

9.3

「Bobo，Bryan你好，我係Ryan呀。」

「你好…」佢地一齊答道。

「你地個問題似乎比較複雜，我需要同你地單獨傾一傾先… 或者Bryan你介唔介意出去等一陣等我同Bobo傾下先? 」

「好…」Bryan應左聲就行左去出邊。

「 咁Bobo你介唔介意講我聽到底發生左咩事?」見Bryan出左去我就微笑住咁問Bobo。

「好… 我同Bryan其實係由細玩到大嘅鄰居，佢比我年長三歲，對我黎講一直都好似個大哥哥咁。喺我心目中佢一直都好叻又好照顧我，個人仲好幽默風趣成日都可以氹到我開懷大笑，可以堪稱為一個完美嘅大哥哥。所以當我年紀漸長，對佢嘅感覺亦慢慢由仰慕變成為愛慕。

但因為大家一直都好熟，雖然我鍾意佢，但要將大家關係由半對兄妹變成為情侶咁，我覺得好似無咩可能所以亦一直都無爭取要改變大家嘅關係而只係將衣份心意受埋喺心入面。

到到我中四果年，父親因為要去澳洲做野，於是我地就成家一齊移民左去澳洲，之後我同Bryan都無再見面，只可以間中email大家溝通下。而衣一別，就要等到我讀完大學，父親又返返黎香港做野結果我地成家又由澳洲移居返黎香港後我先再有機會見到佢。

其實當時經過左7年時間，我對佢愛慕嘅感覺本身都已經淡左好多，但無諗過當我返到黎見返佢後，所有感覺又好似好快就返返晒黎咁。而或者因為大家之前真係疏遠左太耐，本身friend zone甚至好似兄妹感覺嘅枷鎖亦因而得到解放，結果我地對大家都有左感覺然後就正式一齊左。

一齊後我地嘅感情一直都好好，佢比我嘅感覺仍然係當年完美嘅大哥哥，所以順理成章，我地一齊左幾年後都預備好結婚步入人生另一個階段。

點知… 近排我無意中發現左佢一個秘密，原來我一直以為完美嘅大哥哥並唔完美，然後突然間，我覺得對佢一切嘅感覺都唔同左…」

9.4

「 可唔可以講我聽你發現左佢咩秘密?」我問。

「有次我無意中喺佢同佢個friend嘅對話中發現佢原來以前有… 叫過雞…」Bobo尷尬又心痛咁講。

「所以你接受唔到?」

「我… 我都唔知呀… 我問佢果陣佢話都係以前嘅事，係細個唔識諗… 就算未同我一齊前佢都無再咁做過… 原則上我其實覺得自己係偏向信佢無再咁做，但我接受唔到佢衣個過去，我覺得佢好污漕，我接受唔到本應係我心目中完美嘅佢原來都有咁污穢不堪嘅一面... 」Bobo後尾開始有少少失控喊起上黎。

「咁你覺得自己仲鍾唔鍾意佢?」

「鍾意，唔係我就唔駛咁痛苦啦… 正正係因為太鍾意我先咁介意咁辛苦… 明明心入面都想同佢親近， 但每次當佢想錫我甚至… 我都會諗起佢曾經掂過出面唔知比幾多人掂過嘅女人覺得佢好污糟然後就推開佢…

衣個行為其實傷害性好高，當一次係咁兩次係咁我地嘅關係亦變得越黎越差… 我唔想咁，我亦知每個人有可能做過錯事，但我就係控制唔到自己，甚至有時我都仍然會懷疑其實佢仲有無去做衣d野，特別係我咁耐無比佢掂﹐然後自己就開始係度疑神疑鬼…」

「明白…」坦白講，衣個case有d難處理，牽涉嘅層面亦比較多。

首先Bryan係Bobo 心目中由細個開始一直都係一個完美嘅哥哥，而到左衣一刻，衣個完美光環突然破碎，仲要係碎得好嚴重果種，咁對Bobo嘅衝擊好大，特別係佢本身就有少少完美控同哥哥控，所以先一直咁鍾情於Bryan。

第二就係安全感，其實衣樣都同第一樣有少少關係，因為佢係完美哥哥控所以大哥哥type嘅男仔可以比到安全感佢。但當完美唔再係完美，大哥哥亦因而唔再似大哥哥，而且仲會成日擔心佢繼續做衰野，咁令Bobo對Bryan完全失去左安全感衣樣野。

「我地係咪已經無得救? 襯仲未結婚我地係咪應該及早分開?」Bobo好緊張咁問。

「衣個問題我都答唔到你… 其實我平時主要都係幫情侶搵出佢地之間嘅問題或者潛在問題然後再盡力比少少意見佢地希望可以幫佢地解決到個問題。但你衣個case其實你自己都已經好清楚問題出左喺邉度，所以我都唔太駛補充。

至於建議… 我唔知幫唔幫到你，但如果你有時間，或者我講一個關於我朋友嘅故事你聽?」

「好…」

「我有個朋友叫鄺善柔…」我深呼吸左一大啖氣然後開始講。

請體諒我一日寫五千幾字已經就快變人乾

同埋都仲要有d故事編排去講大家想知嘅野

push

期待家家日記

原來有上過熱門？ 多謝G持 應該好快可以追到live

明天就開始了

夠鐘更新喇! BETWEEN原來過咗90正評