<我嘅職業係專溝人地個女朋友>

7.23

---回憶---

「最衰都係你呀! 都話再早d黎排隊架啦，衣家買唔到喇… 仲白白排左5個鐘隊…」

同善柔約定左下年一齊睇五月天演唱會後，第二年嘅五月前我地就一齊去排隊買飛，點知我都係低估左粉絲們嘅熱情同埋黃牛黨嘅威力。

果日善柔本身提議零晨四點開始去排，但我就覺得太早想訓耐d於是反提議返六點先去，結果去到已經見到條長龍。

當時科技並無衣家咁發達，你亦永遠唔知d飛幾時會賣晒。

結果四個鐘後由十點正開賣到到差不多十二點，懷住緊張同忐忑嘅心，眼見終於見到售票處個櫃位前面仲有大概十多個人左右就到我地，諗住應該趕得到，點知衣個時候無情嘅工作人員卻突然宣佈所有門票已經售馨….

無情嘅宣佈令我地最後只能失望而回同沉澱喺深深嘅後悔之中，而我亦因此被善柔責怪同嬲左足足三日。我最後只好應承佢下年我一定會買到飛同佢一齊睇，唔係就承認佢做大嘅佢先無再嬲我。


一年後


「各位香港的朋友你們好! 我們回來喇~」

第二年為左唔駛做細，我決定零晨兩點就擔凳仔去排隊，終於成功買到飛同善柔睇左我地人生第一次嘅五月天演唱會。

只要聽過五月天嘅live，就會明白現場氣氛到底有幾熾熱同震憾，整個熱唱會我同善柔差唔多企足全場同唱足全場。睇過咁多次演唱會，果次亦係我感覺最興奮最難忘同投入嘅一次。雖然隔黎果個唱歌真係有d難聽… 但熱血係可以overcome所有嘅野!

自此每年五月天演唱會都成為左我同善柔每年嘅一個例行約定，就算黎生出現後，衣個約定都並無改變。



「各位朋友，我好希望你們現在可以望一望站在你們四周的朋友，跟他們問聲好，給他們一個擁抱和祝福，然後我們拿著大家的手，手牽著手跟我們一齊唱完這一首歌，可以嗎?」主音阿信唱到一半嘅時候同現場嘅所有觀眾講。

我同善柔互相望住大家，笑左笑，然後就比左個擁抱對方。

「希望你以後都可以開開心心，幸福快樂~」

「你都係呀~」

我地用力咁抱緊對方，講完對大家嘅祝福然後就放開左對方，之後我再拖住佢隻手同佢一齊大聲咁跟住全場一齊唱。

傷心的 都忘記了
只記得這首笑忘歌
那一年天空很高風很清澈
從頭到腳趾都快樂
我和你 都約好了
要再唱這首笑忘歌
這一生志願只要平凡快樂
誰說這樣不偉大呢

Lalalalalalalalala lalalalalalalalala lalalalalalalalalalala~


唔計細個兩小無猜果d時間，衣次應該係我地大過後第一次嘅擁抱同拖手。果刻，我覺得大家之前嘅不快都隨住衣首歌而隨風飄散。

只係無諗過第二年，善柔就結束左自己嘅生命離開左衣個世界，而衣次亦成為左我地最後一次擁抱，最後一次睇五月天嘅演唱會。

我地講好左以後每年都要一齊睇，如果無左你，我一個人睇又仲有咩意思?

7.24

「咦，果度係咪有人浸親?」

「好似係喎! 有無救生員呀?」

周圍燥動嘅聲音令我又從演唱會嘅回憶返返黎現實，而聽到身邊嘅人咁講我亦下意識望向海中心，依稀好似見到有人係水面掙扎緊。

我拎起相機用鏡頭zoom埋去果邊，就發現掙扎緊果個人係善潼，佢正係遇溺當中。

「潼潼!?!」

見到衣個情況我即刻放低相機，拎左褲袋d貴重野出黎同除左件衫後就立刻衝出去跳落海遊向善潼。

「潼潼! 潼潼!」

我真係好擔心潼潼有事，拼盡力咁游去佢個位置。而衣個時候腦海中我又浮現返當年趕到去醫院，打開白布見到善柔臉色蒼白嘅面孔…

我唔可以比潼潼有事，我真係唔可以再承受多次衣個打擊…

於是我用左人生最快嘅速度游向潼潼，雖然可能只係幾十秒嘅時間，但我就覺得好似有成十幾分鐘咁漫長…

游到去果陣潼潼已經陷入左昏迷狀態開始沉入水底，我即刻將佢捉返上水面，然後拍左佢兩下見佢都唔醒就用返我之前學拯溺時學過嘅知識將佢面向天空用手夾住佢個下巴再拖住佢游返去岸邊。

好唔容易上返岸後，我見佢仲係唔醒，我就開始用手壓佢個肚希望佢嘔返d水出黎，同時間我亦亳不猶豫咁同佢做人工呼吸。


「咳咳…」

好彩經過左四五個cycle後潼潼終於吐左幾啖水出黎，然後就慢慢打返開隻眼。

見佢無事我忍唔住即刻將佢拉左入自己懷中，然後又輕輕推返佢出黎問佢有無事。

「無事喇唔駛擔心…」潼潼微笑住但有少少虛弱咁答。

「點會突然浸親咁唔小心架?」見佢無事我不得不開始埋怨。

「可能無熱身，頭先游游下突然抽筋，我一驚之下就…加上突然一個浪cum埋黎我就唔小心吸左幾啖水入肺…」善潼邊回憶邊講。

「對唔住，我係應該同你一齊出去游睇住你唔應該扔低你一個…」仍然心有如悸我自責地說。

「傻架咩，邊關你事呀… 無人會諗到我咁叻都會浸親架嘛…」潼潼見我自責就想安慰返我。

見佢清醒返無咩事，我個心總算冷靜返落黎，然後突諗返起頭先佢認叻d野。

7.25

「所以話你都係細路女，無人睇住你就浸親喇，你都係繼續做小妹妹啦~」我為了一吐之前落敗嘅烏氣於是取笑返佢講。

「喂呀，唔制呀! 我唔係細路女呀!」見我笑佢善潼果然唔制。

「無架喇，鬼叫你浸親呀，明明我地之前一齊去過學拯溺架嘛~ 好好休息陣我地之後就走去醫院檢查下啦。」雖然仲係有d擔心，但我笑住咁講。

「唔駛啦，我唔想走住呀… 話時話，點解無救生員嘅?」善潼想轉移線視。

「係囉… 唔知係咪去左廁所定偷懶呢..」我衣個時候先醒起點解到衣刻救生員都仍然未出現。

「好彩果陣捉住你求你陪我學拯溺啫，估唔到因為咁救返自己一命… 都話你有機會用得著救返條生命架啦!」善潼諗起d野後又講。

「哈你仲記得! 都唔知你係咪專登架… 今次都真係好彩咋， 或者有d野真係冥冥之中自有安排啦~ 不過我地最後都無考救生章做唔到救生員… 好喇，著返件衫我扶你去搭船啦。」我無完全比善潼轉移視線。

「我唔走住呀… 信我啦，我真係無事喇，我唔想咁快走呀…」善潼哀求道。

「但你咁嘅狀態我真係唔放心你再去玩…」我仍然猶豫。

「咁我應承你唔再落水淨係係度休息啦~ 我地仲要一齊等睇日落架!」善潼一邊”炆”住我隻手一邊求道。

「但…檢查下安全d呀…」

「休息多陣無事架喇… 衣家聽話即刻休息! 」之後佢竟然就咁挨住我膊頭然後就合上左眼睛休息。

見佢咁我都唔好意思再出聲，然後就由佢挨住我小休一陣，而我就繼續望向海灘遠處嘅風景。


突然間，我醒起我頭先好似同潼潼嘴對嘴左…

心虛咁望一望側邊好似真係訓著左嘅佢，再唔爭起咁望住佢嘅櫻桃小嘴，我心入面突然間竟然有少少甜絲絲嘅感覺…

我嘗試拼開衣d唔知係咩嘅感覺努力放空個人，但就仍然感受到自己個嘴角始終係有少少向上落唔返黎，而個心亦比平常跳得快左唔知幾多倍…

不過可能有少少累，頭先又衝左個人生最快嘅短途賽，加上陽光射落黎真係好溫暖好舒服，過左一排我都忍唔住不自覺咁合上眼開始休息。而當時嘅我並無留意善潼塊面都有少少紅，嘴角亦展示出一個微不可察嘅笑容。

#225

小妹妹 not 少妹妹

又想睇到好既結局但又唔想故事完
人生就係咁矛盾

我會嘗試理解為好好睇所以停唔到

多謝糾正

絕對明白
我有時都唔捨得太快完...

不過如果以現在速度 我估應該仲有兩星期左右就會到結局
定係我應該減下速？

唔減速但係寫後記
Thanks

加速啦

幸運四葉草🍀咁最後中意個妹

lm

7.26

過左唔知幾耐，太陽開始落山，我地不約而同都打開返眼睛，望左對方一眼確保對方醒左，然後大家就好有默契咁無出聲，只係靜靜咁欣賞住衣個畫面。

突然間，一陣微風吹過，善潼輕輕咁撥左一下自己側邊微微吹亂左嘅頭髮。似曾相識嘅一幕，令我不其然咁拎出我部相機按下左一下快門。

雖然明知唔係佢，但衣刻我真係有種感覺善柔仲係度陪住自己…


日出日落，潮汐潮退，每一日其實都不停重覆咁發生緊，但我地又有幾多日會真係停下來細心欣賞佢嘅美麗?

到到欣賞完日落，我地就去返碼頭搭船出返西貢。


衣晚我發左個夢，夢見返我細個同善柔一齊學游水。果陣佢比我快學識，然後就不斷喺側邊鼓勵我。

「仁仁，試下游過黎我衣度啦，大膽d唔好怕水，個頭離開左水面就大啖d咁吸氣，加油呀!」

善柔企左係大前方概3米左右嘅位置然後叫我嘗試游過去。然後我深呼吸左一啖氣後就努力向佢嘅方向進發。

游呀游，游呀游，最後我終於捉到佢隻手，然後又因為害怕順勢攬住左佢再借力一扯伸左個頭上水面大大啖咁吸氣。

「你睇，肯游就游到架喇，你成功左喇!」善柔向我報以一個鼓勵嘅笑容。

突然間，善柔個樣又慢慢被善潼所取代。

「仁哥哥呀，陪我去學拯溺啦，家家衣家成個文青咁實唔理我架，你都唔陪我就無人陪我架喇…」善潼突然撓住我隻手係咁lur我陪佢學拯溺。

「無啦啦學咩拯溺呀，識左游水咪得囉… 定係你想第日做救生員?」我唔明善潼點解要學。

「唔知架，咁學定無壞格，第日如果真係無野做果陣必要時都可以多個謀生技能搵食嘛~ 而且你永遠唔知將來發生咩事，話唔定就係因為學左衣個技能令你將來救返一個生命呢~」善潼落力遊說我。

「咁你都講得出，說服力唔夠喎…」但我就興趣不大。

「咩喎… 咁係呀嘛，你點知將來唔會啫!」善潼堅持。

「陪你唔係唔得嘅… 岩岩上左龍珠超劇場版，你請我睇我就陪你啦~」縱慣左善潼最後我都係心軟就應承左佢。

「成交!」善潼即刻笑到見牙唔見眼咁爽快應承。


一個個重疊嘅畫面令我開始越黎越混亂。

到底衣家嘅我，係只係因為想解救善潼出黎所以對佢好，定係真係對佢有左心動嘅感覺?

而如果係後者，咁我係對佢真係有左感覺，定抑或只係因為現在嘅佢太似善柔?

我開始越黎越迷失…

不過好彩無論係點，我暫時都只可以繼續全力以赴去令佢鍾意自己，等佢無痛咁離開Tony。其他野暫時都唔重要亦唔駛諗太多，等將來解決左Tony嘅問題先再算啦…

7.27

去完西貢後我同善潼嘅發展就更加順利，大家好似都不自覺咁更加靠近向對方。我地傾偈見面嘅時間比之前更頻密，而且感覺亦好似開始有少少曖昧嘅氣場，不過所有野都好自然無任何嘅違和感或者係好特登造作嘅感覺。

只係唔知係咪因為大家真係一早已經係一家人咁，好似無論我地幾close都好，我地都仍然只係停留喺衣個stage，而佢對佢男朋友亦完全無點改變過，佢依然好似好鍾意佢不時都會講下佢，從來無對佢變淡諗過同佢分手。咁對於我原本嘅目標黎講可以話係完全唔達標…

我嘗試冷靜分析。感覺上，我覺得善潼係完全唔抗拒同我親近，雖然可能只係因為我地由細玩到大本身就好似屋企人咁，但我嘅感覺又有d覺得唔單只係咁，佢對我應該唔完全只係對阿哥嘅果種感情。

但佢對Tony堅固嘅感情加上對我似有還無嘅火花又令我好confuse，讓我不得不對自己嘅直覺產生懷疑。

隨住時間不斷咁流逝又苦無進展，我都開始越黎越焦急。

慶幸嘅係Tony可能都知我有d難度，所以並無特別逼迫我，仲話可以比多個月時間我，令我嘅壓力相對上可以稍為緩解一點。

只係又過左段時間後有日，我竟然係街上面見到Tony拖住左另一個女仔。

我無即刻上前質問佢，但果晚就打比佢。


「我今日喺街見到你拖住左第二個…」

「下，係咩?」佢語氣中帶著點心虛。

「我明你好心急，亦係我自己問題唔可以喺本身限期前完成到個任務。不過你可唔可以睇在唔想傷害到善潼嘅原因下忍耐多陣，至少唔好係公眾地方同另一個拍拖? 如果比其他人甚至善潼自己撞到，我驚佢受唔住呀，你知佢有幾鍾意你架啦…」我用略帶哀求嘅語氣講。

「…好啦，我會收斂… 不過我講明，衣個月係最後限期，過埋衣個月我就唔理架喇…」Tony答道。

「好…」


得返唔夠一個月時間，為左挽救善潼，或者我真係唔可以再諗咁多，要再加把勁更進一步…

而當我之前已經用盡我所有方法去提升我地嘅親密度但都未見成效，我諗到仲可以做嘅就只係得返最後一招 -表白。

我唔敢講我一定會成功，我亦知喺未確定對方都有意思嘅情況下表白係一種好大嘅賭博，而賭輸嘅代價可以係直接宣告自殺身亡。

不過既然已經技窮，時間又唔足夠比我繼續慢慢部署，我諗嘅係就算最後搏輸左善潼唔接受，但至少喺Tony同佢講完分手之後，或者佢會醒起仲有我衣個備胎係度因而唔會選擇結束自己生命。

我唔介意佢搵我做水泡，但我介意佢唔搵我做水泡然後自己獨自承受所有嘅傷痛。

至於點表白，沉思嘅同時我突然又諗起善柔以前曾經同我講過佢覺得點嘅表白係最浪漫。

或者都係天意，當年我意識到自己對善柔嘅真正心意後並無同佢表白過，而到到佢離開人世後就更加唔會再有機會。

如果衣家我可以藉衣個機會將當年未講出口嘅說話向善潼講一次，咁某程度上會唔會都算彌補左自己當年嘅遺憾?

我討厭自己有咁嘅想法，好似調返轉變左係我想搵返善潼做水泡咁對佢好唔公平，但我控制唔到自己唔咁諗…


(其實我都係為左避免悲劇再一次重演啫…)

我咁安慰自己。

7.28

一星期後嘅一晚，我問朋友借左架車然後就約善潼一齊去遊車河。


「嘩，靚車喎~ 做咩突然咁好帶我去遊車河呀?」善潼見到架X5就顯得好興奮同雀躍。

「搵d我地無咩做過嘅野一齊做下嘛~ 不過由細玩到大要搵樣我地無一齊做過嘅野其實都幾難…」我笑著講。

「仲有好多呀，一齊跳降落傘，一齊出海，一齊去旅行我地都未試過呀~」我覺得難嘅野但善潼竟然好快就諗到一堆。

「嘩，你個腦有無轉得咁快呀? 定一早諗定架? 除左旅行，其他睇下將來有無機會啦~」

「好呀~ 不過如果有日我咁不幸回復單身，我地都可以一齊去埋個旅行嘅…」

「你咁愛佢，難d實現喎…」無諗過善潼會咁講我乘機挖苦下佢。

「我愛佢啫，但佢可以有日唔再愛我架嘛，邊有得寫包單架衣d野…」估唔到善潼都幾清醒無愛到失去理智天真以為自己愛就可以一生一世。

「就算真係有咁嘅一日，都要過你爸爸果關… 你唔記得上次佢態度有幾決絕?」

識左咁耐，我同善柔善潼都有一齊去過幾次旅行，但當然係同埋各自父母兩家人一齊去啦。到到接近高中，有次我地三個都有諗過一齊去台灣玩返幾日，不過就遭到善柔父親強烈反對，任佢兩姐妹點勸點求都無用。

都明嘅，雖然話親如兄妹，但一個血氣方剛嘅男仔同兩個如花似玉嘅寶貝女一齊去旅行，無人睇住天知道我地會唔會一時把持唔住發生d咩唔應該發生嘅事? 所以最後雖然我地都有去到，但就多左鄺太全程陪住我地。

「衣家我地都大個啦，到時暪住佢佢都唔知啦~」善潼頑皮地講。

「嘩，我唔想死住喎， 比uncle發現我以後唔駛旨意再入你去屋企呀…」但我就真係唔太敢，始終鄺生唔係真係我親生老豆，未必可以寛怒我七十個七次。

「咁一係你到時做我男朋友光明正大咁帶我去囉~」善潼又笑住咁講。

「哈，咁等你真係變返單身我再考慮下啦~」

之後我地就係車上面一路傾偈一路聽歌然後我就將佢車到去我預定一個隱閉海灘嘅位置。

7.29

衣度架車可以駛到海灘上面嘅石屎路，然後下面就係一個沙灘。雖然燈光比較微弱，但依稀到見到前面漆黑一片景像嘅輪廓加上聽到滿有節奏嘅海浪聲，應該就係一望無際嘅大海。

我地並無落車就咁係車上面聽住歌望住個海灘。

「嘩，咁浪漫夜晚黎海灘嘅? 衣度隱秘得黎又幾好feel喎~成日帶女仔黎架你?」善潼帶住懷疑嘅目光望住我笑住咁問。

「點會呀，專登問朋友有咩地方好介紹先識黎架，所以你係第一個同我黎嘅女仔~」我故意用略帶flirty嘅語氣講。

「咁好? 好野!你終於有d第一次係屬於我嘅~」善潼好開心咁講。

「傻妹，來日方長可能我仲有好多第一次比你呢~ 不過係你無咩第一次比返我啫…」我繼續保持曖昧嘅氣氛。

「唔知呢~ 其實衣幾年，你仲有無拍過拖?」善潼迴避我問題然後突然問。


「可能有幾次散拖啦…」我胡亂作答，唔敢講自己曾經濫情嘅事實。

「點解呀? 性格不合? 要求太高?」善潼追問。

「唔知呀… 感覺總係唔強，覺得唔係果回事咁…」

「可能係因為之前一直有個太好嘅標準係你身邊…」

「可能係兩個呢~」

善潼get到我意思知我讚佢就對我報以一個微笑。

「咁希望你好快會搵到個可以長久嘅另一半啦…」停頓左陣後佢講。

「其實… 我可能有對象喇，係唔知佢對我係點啫…」過多陣我又講。

「竟然! 咩人黎架? 有無相呀?」善潼好驚訝咁即刻捉住我問。

「你睇你幾八掛… 」我苦笑道。

「關心你嘛~ 快d講我聽啦! 」佢繼續”炆”住我講。

「呀…好似有d頸渴添… 除非有野飲下唔係講唔到喎…」我裝作故然拖延時間。

「喂呀! 衣度咁偏僻邊度搵野飲比你呀!」善潼即刻抗議道，覺得我專登為難佢。

「車尾好似有幾支水，一係你幫我去拎?」我說道。

「好!」心急嘅佢即刻開門落車衝左去車尾箱嘅位置。


「咔嚓」

打開車尾箱，映入佢眼廉嘅係一堆汽球突然從車尾箱慢慢飄左出黎。佢潛意式一避堆汽球就喺佢眼前越升越高，然後佢見到堆汽球下面有d絲帶綁住左個遙控制，上面再貼左張紙仔寫住” Press me!”。

佢拎住條絲帶防止d汽球再繼續升高，然後拆左個搖控制落黎，望左陣就襟左落個制度。

突然間佢見到前面”黑媽媽”嘅沙地上突然綻放出一陣金黃色嘅光芒。

“I ❤ u”

衣堆光芒形成左以上幾個文字同圖案，右下角仲有個代表我嘅”仁”字係度。

你咁樣講又好似有啲似

7.30

我見到善潼比眼前嘅景象嚇呆左，而衣個時候我都落左車。

「Surprise?」我走去佢側邊望住前面嘅燈光問道。

「…點解嘅?」佢隔左兩秒後稍為收斂返心神問。

「原因前面唔係寫得好清楚咩?」我微笑住答。

「你…係認真嘅?」佢帶有少少口震震咁問。

「嗯…衣兩個月同你一齊嘅時間我真係覺得好開心呀~ 」我努力保持輕鬆淡然嘅情緒以免對對方造成任何壓力。

「我… 真係完全無諗過…」善潼嘅眼神仲有d迷茫。

「我唔係要你比答案我，我亦知你衣家有男朋友，不過我都係想話比你聽我嘅心意…」

「多謝你… 」

「有無少少感動呀? 」我笑住問。

「哈，你咁有心思點會無呀? 」善潼臉上終於有返個淺淺嘅笑容。

「嗱，你岩岩又扲多左我個第一次喇，我嘅第一次表白。 」

「下? 咁你之前d女朋友點追返黎架?」善潼一副唔信嘅樣子。

「有feel咩都唔駛講就咁拖佢隻手就得架啦~」

「咁都得?」善潼覺得有d匪夷所思。

「可能我魅力夠掛~」我自信滿滿咁講。

「係咪咁勁呀? 不過Sorry… 衣刻我唔可以接受…」善潼露出一副難受同唔好意思嘅樣子。

「因為你男朋友?」我問。

「嗯… 」善潼為難咁點頭。

「唔緊要呀，我預左亦真係唔係要勉強你做d咩，只係想話比你聽將來就算發生咩事都好，你背後都會有我… 」我非常真諴咁講道。

「知道… 不過雖然我衣刻唔可以接受你，但我都唔抗拒可以繼續比機會你嘅~ 你真係鍾意我就比d心機令我移情別戀啦~ 」善潼又突然笑住咁講。

「你咁鍾意佢難度好高喎…」我面有難色回應。。

「係架~ 但調返轉講，我地都有廿幾年嘅感情喎， 好似都未必一定輸蝕?」善潼竟然鼓勵我。

「咁我就即管努力一下，順其自然啦~」

其實頭先見到善潼眼框似乎有d濕潤，我知佢並唔係完全無感覺，咁對我就已經足夠。

之後我地都無再觸及衣個話題，就咁坐左落沙灘喺美麗燈光嘅陪伴下繼續談天說地。

7.31

返到屋企沖完涼攤上床，諗返起頭先嘅場面，不其然諗如果頭先對方係善柔，唔知佢見到自己嘅表白會有咩反應呢?

坦白講，為左預備衣次表白，我都真係下左唔少功夫。先唔講果堆汽球相對比較簡單，沙灘上嘅燈光其實係我搵左好多膠樽再每一個都幫佢塞左粒LED喺入面等搖控制襟制後就會著燈，然後再將d膠樽一個一個插入沙咁砌左果幾個字同圖案出黎。

至於點解有衣個idea，其實都係因為善柔…

---------------------

「嘩仁仁，你睇下人地表白得幾浪漫?」以前有次同善柔係屋企睇緊唔知邊套劇集佢突然講。

電視入面見到個男主角用某種有顏色飲品嘅樽一個一個咁插入沙砌左個”Would you marry me?”出黎，然後外圍再用蠟燭圍住所以就算夜晚都睇得到中間d顏色字。

「嘩，幫飲品賣廣告喎… 好靚咩?」我嘅眼神從我部手提遊戲機上移望向電視後講。

「表白其實最講係心意，只要你花心思同心機去預備，對方就一定感受得到… 你睇佢攪咁大壇野實用左唔少時間預備啦~ 有時一個浪漫位就感動到女仔架喇~」善柔帶住點憧憬咁講。

雖然果陣我看似並無上心，但暗地裏我都記住左佢所講嘅野。所以如果今晚果個係善柔，我相信佢都實會諗返起頭先嘅畫面，然後意外發現原來我都會記住佢講嘅野。

某程度上衣次衣個表白，可能對我自己都係一種遺憾嘅補償。

至於善潼，衣家嘅佢同善柔咁似，我估佢都會鍾意掛?

---------------------

之後善潼都真係如佢所講，並無因為我嘅表白而迴避或者疏遠我，我地兩個不時都繼續有唔少獨處嘅機會。

咁絕對係件好事，因為見我多左，某程度上應該代表佢見Tony少左，亦即係佢好可能開始將對Tony嘅感情轉移落我度。

就算移唔晒，只要佢對Tony感情少左，咁之後Tony對佢嘅傷害亦會減少。


不過又過左段時間後，有日我係街又撞到Tony，而今次佢又拖住左個女仔，然後我發現今次衣個女仔竟然係一個我認識嘅人。

7.32

「Hi Mandy~」

Mandy係我大學嘅師妹，認識佢係因為有次畢業後我受邀返去大學嘅Open Day幫手同d 中學生傾下偈介紹下我地衣一科再遊說佢地Jupas揀我地。當時Mandy係該屆庄員而亦係佢負責聯絡我。

因為Open Day完左後我地都無咩再接觸過，所以要搵返佢個電話再message佢都用左我少少時間。

「Ryan哥? Hello~ 好耐無見喎。」

「哈哈，係呀，今日咁岩喺街見到你所以咪hi下你睇下你近排點囉。」我一開始寒喧一下。

「見到我? 喺邊度呀?」佢問。

「旺角呀，仲見到你拖住左條仔添~」然後我就乘機入正題。

「哦! 係呀，同男朋友行街嘛~」

男朋友?身份得到確認，我唔算好愕然，亦估計Mandy應該唔知善潼嘅存在。

「你地一齊左幾耐呀?」於是我試探問道。

「都年幾喇~」

(年幾? 咁咪即係Tony 一腳踏兩船左好耐，而唔係佢所講”近排”嘅事?)

Mandy無必要對我講大話，咁所以講大話嘅應該係Tony。

「但點解以我所知，你個男朋友同我半個妹好似都一齊左接近兩年?」我決定如實提出。

「你半個妹?」Mandy問。

「嚴格黎講係我街坊，一個由細睇到佢大嘅妹妹。」我再略作解釋。

「佢係咪叫潼潼?」點知Mandy嘅回應令我愕然。

「你點知架?」我即刻問。

「因為Tony有同我講過… 話潼潼要佢幫手扮係佢男朋友呃另一個人，果個會唔會就係你?」

「你識潼潼? 可唔可以講多少少detail到底係咩事? Mandy嘅message一個比一個令我愕然。

「識呀，因為佢同tony係中學同學識左好耐亦真係好熟，所以間中我地都有一齊出黎玩。

至於咩事詳情佢地唔肯講呀，淨係知話關乎個唔知咩計劃…因為我本身都識潼潼，又見所謂扮男朋友只係打幾個電話同出一次街之後就唔駛再做d咩，所以我都無點在意，你唔講我都幾乎唔記得左衣件事lu~ 只係估唔到原來要呃果個對象就係你… 」

「我明白喇…唔該晒你 」聽完Mandy嘅講解我要d時間冷靜一下。

「死喇，我係咪同你講左d唔應該講嘅野? 不過我又唔想你誤會Tony…」Mandy意識到自己可能講錯野。

Mandy嘅說話令我諗返起另一樣野，上次見佢拖住果個係另一個女仔而唔係Mandy黎架喎，咁果個女仔係咩身份?唔會又係要佢扮男朋友掛?

「咁除左潼潼佢仲有無講過話要幫另一個女仔扮係佢男朋友?」於是我問。

「無喇~」Mandy乾脆答道。

「咁我應該都無誤會，因為我前排喺街都見過佢拖住另一個女仔…」

果刻我覺得既然Tony有份呃我，咁我都唔需要顧慮d咩去幫佢保守秘密，相反仲要好好送佢一程以示報復。

「… 幾時同喺邊度?」Mandy即刻問。

「上個月喺荃灣西。」

之後Mandy就無再應我，而到我冷靜返後都有d後悔就咁講左比佢聽。一陣原來佢好鍾意Tony接受唔到做傻事咁點算? 咁我咪又間接害死人?

只但係果刻一時嬲得濟都確實無諗咁多，或者之後先再諗下點補救啦，直覺話我聽Mandy應該唔會因為咁做傻事嘅…

「真係有咩事唔好睇唔開做傻事呀，衣個世界仲有好多美好事物等緊你架。」不過我都係再補多個message希望有需要時會幫到佢。


好彩兩日後佢終於覆我同我講返原來Tony真係有第二個，仲多謝我話佢聽唔係佢都唔知幾時先會發現Tony出軌嘅事，總算令我暫時放下心頭大石。

知道左衣件事後我無再搵善潼，我諗唔明佢點解要咁做。不過隨住佢知道自己嘅詭計被掲穿，我相信好快佢就會主動搵我。


「今晚方便去你度dinner?」

果然再過多兩日佢就主動搵我。

「ok」

劇情預計我就唔回覆喇，大家繼續睇落去就知

我都係咁覺得，突然間喺度諗，如果個故事突然由愛情故事變左懸疑故事，之後個發展會係：

1）俾主角揭穿嘅善潼開始黑化
2）主角發現其實善柔一直到鐘意自己，但礙於善潼都鐘意主角，所以冇一齊，不過喺善柔分左手之後，其實想真正同主角一齊
3）善潼知道之後，兩姐妹爭執，善潼錯手殺死善柔，然後偽裝成善柔自殺
4）善潼利用幾年時間開始扮善柔，然後接近主角
5）主角發現自己有呢個超能力，原來係因為善柔嘅靈魂一直喺自己身邊
6）主角唔想俾其他人發現善潼殺死善柔，最後決定自殺，同善柔嘅靈魂喺埋一齊