<我嘅職業係專溝人地個女朋友>

又會變成咁，如果後面冇咩奇蹟收尾。
會破壞晒前面嘅故事。

11.26

兩個月後香港一間酒吧入面

「無諗過咁多年後我地仲會有機會見面...」

「係囉， 我都無諗過我地仲有相見一日....」

「思柔已經同我講晒你嘅事， 坦白講，我對你嘅感覺仲係好複雜...」

「唔緊要啦，反正我地其實都從無成為過朋友，好同差又有咩所謂?」

「哈哈，你岩，不過都要多謝你，做左我想做但做唔到嘅野...」


衣兩個交談中嘅阿伯就係李立仁同黎浩明。

做完Celia嘅訪問後過左段時間，黎浩明就聯絡Celia話想見下佢爸爸。所以當李立仁同鄺善潼環遊完世界返到香港後就有左衣次世紀會面。當然，李立仁肯見黎浩明，主要原因都係Celia同佢講左黎浩明之後發生嘅故事。

「唔駛，我咁做其實都只係為左可以等自己好受d... 不過j真係殺左佢後我先發現原來感覺都係無分別...」黎浩明講。

「雖然我都想殺左佢，但你咁做真係好傻，我知善柔都一定唔會想你咁做...」李立仁搖頭咁講。

「但衣樣好可能係我當時唯一仍然可以為佢做嘅野...」

「雖然我好難完全唔怪你，但其實我心入面好明白，衣次只係一個不幸嘅意外，你係犯左錯，但唔代表你要為善柔嘅決定負全責，真係要講責任，我要負嘅責任可能更加大...」李立仁仍然有d心痛同內疚咁講。

「唔同架，你係蠢，我係錯...」但黎浩明並唔認同佢嘅說話。

「其實如果出軌就要搵條命或者用整個人生黎還，咁我估衣個世界嘅男人可能有7成人都要拉去坐監... 善柔當年嘅決定，都真係有好多唔同嘅因素湊合而成，所以你唔好再攬晒所有責任上身啦...」

做左咁耐感情輔導員，李立仁見過好多人接觸過好多故事，因此對好多事都睇得好化，亦明白善柔嘅死真係只係一個不幸嘅例外，唔應該要黎浩明用整個人生去贖罪。

「但果個係善柔，一個咁好咁完美嘅人... 每次我諗起佢因為我犯嘅錯咁後生就離開左衣個世界，我都仍然會覺得好內疚同好難受，原諒唔到我自己...」不過黎浩明就始終唔可以釋懷。

「咁我都明你感受，有d人，係我地用一生都唔會忘記，有d錯，係我地用一生黎還我地個心都仍然會不斷受責備... 不過衣d大家都明嘅野就唔好再提啦... 咁你想搵我係咩事?」知道大家再講其實都唔會釋懷，所以李立仁決定轉返正題問。

「思柔點醒左我，如其仲為過去懊悔失去生存動力浪費時間，咁倒不如襯自己仲有時間同能力，做多d有意義嘅野去努力同補救....我聽聞你地退休可能會執左間輔導所，所以我諗緊或者我可以幫手，頂替你地繼續做落去?」黎浩明滿有期待咁望住李立仁講。

「但你覺得自己勝任到衣份工作?」李立仁有d意外黎浩明嘅提議，亦有d懷疑佢係咪真係可以勝任到。

「坐左咁多年監，我知我可能已經同時代完全脫節，但我好願意邊做邊學。而且唔好唔記得，其實我先係善柔嘅嫡傳弟子，果兩年係直接接受佢嘅教導... 加上發生過咁多事反省左咁耐，我有信心可以代替佢將佢教嘅愛情觀同道理傳承落去...」黎浩明有d懷緬咁講。

「咁你咁講又好似有d道理... 不過衣份工作，除左價值觀同道理，其實仲好需要觀察力先得，唔係睇錯野比錯advice就可能會反而害左d情侶...」李立仁仍有d擔心，因為佢知衣份工作其實好靠佢嘅”能力”。

「係喎，你講開衣樣野，我有個問題想問你。」黎浩明突然問。

「咩問題?」

「你係咪真係做過”專溝人地個女朋友” 衣個職業?」醒起Celia嘅推測，黎浩明於是問。

11.27

李立仁有少少愕然無諗過黎浩明突然會咁問，因為衣個職業已經係好耐之前嘅事，耐到連佢自己都已經差d唔記得左自己曾經做過衣份工。

不過諗深一層，醒起自己個女之前搵Winnie做嘅果篇訪問，加上佢從黎浩明口中知道左自己同善柔嘅事，所以唯一合理解釋係...

「係思柔估到?」佢問。

「即係真架啦? 你個女唔做偵探真係浪費晒...」得到李立仁確認後黎浩明更加佩服思柔。

「咁思柔細細個確實就已經好聰明嘅...」聽到人讚自己個女，李立仁都不禁露出個慈父嘅笑容。

「但佢愛情路上就似乎唔太好喎...」黎浩明見佢個樣笑得咁開心就忍唔住要攪一攪破壞。

「咁連衣d野都有同你講? 唉... 其實都係我嘅錯...」果然慈父嘅笑容立刻就變成左慈父嘅擔心。

「又關你事?你今次又衰咩呀?」今次又到黎浩明有d愕然無諗過思柔情路上嘅坎坷原來又關李立仁事。

「你記唔記得邊個郭非凡?」李立仁諗左陣後問。

「記得，本身中學果陣明明係戇直男乖乖仔一名，但失戀後聽聞上到大學就變左做player玩女人玩到傻左... 不過我坐監之後都無再聽過佢d update 喇，你同佢果陣好熟架喎...」黎浩明反問。

「係呀，失戀後佢就變左做player，但最後就遇到個可以令佢定落黎嘅女仔仲有埋小朋友添...」李立仁講。

「咁聽落都唔差呀?」

「你都知我地熟，然後大家結婚後又咁岩住得近，所以思柔同佢個仔都由細一齊玩到大可以話係青梅竹馬...」李立仁講到衣到個表情有少少老尷。

「所以思柔之前講話比青梅竹馬偷左個心果個就係郭非凡個仔?」而黎浩明諗起李思柔之前講嘅野就突然明白。

「係... 本身見佢地感情一直咁好，我諗住自己同善柔青梅竹馬但一齊唔到衣個遺憾可以喺佢地身上完成，所以咪放任佢地發展... 點知子安個衰仔，即係非凡個仔，大大下竟然遺傳左佢老豆d衰野係個花心蘿蔔，無接受思柔但就成日換女朋友，而思柔就偏偏對愛情好認真同死心眼，鍾意左一個人就好難改變，結果就攪到衣家都仲未拍過拖囉...」

講到衣度李立仁有d心煩氣燥就係衫袋拎左包煙出黎食。

「有無攪錯呀李立仁，你自己唔得就唔好強加你自己嘅遺憾落你個女度啦... 不過唉，其實要發生嘅始終都係要發生阻止唔到嘅... 喂，你做咩食煙呀? 你唔係乖乖仔黎架咩?」見李立仁食煙黎浩明有d驚訝。

「職業病黎，一言難盡呀... 本身諗住退休後終於可以戒左佢，點知一無得食先發覺自己會周身唔舒服，所以結果都係無戒到... 不過有時食住煙望下身邊嘅人都仲係我一種樂趣黎嘅...」李立仁意有所指咁講。

「你... 食煙果陣有無咩特別感覺?」黎浩明聽到衣度突然問。

奇蹟收尾應該就唔係，不過衣個外傳我係有少少野自己想試下.. 我都唔敢講最後會唔會破壞左成個故仔，希望唔會

支持加速!

11.28

「做咩咁問?」李立仁有d奇怪黎浩明嘅問題。

「你話係職業病，即係你係因為份工所以成日食?」黎浩明無直接答李立仁而係作出左個試探。

「... 你明我講咩?」李立仁亦一樣無答然後作出左個反試探。

「當年我為左接近個人渣，曾經有段時間都接觸過煙同草衣兩樣野，然後有日我突然發現喺我隊草同食煙果陣，我好似會睇到一d平時睇唔到嘅野...」唔再無了期loop黎浩明終於肯透露一二。

「睇到d咩?」李立仁立刻追問。

「... 你食煙係咪都係因為一樣原因?」黎浩明唔再答反問返李立仁。

「係...」衣刻李立仁都越黎越肯定黎浩明應該係同自己一樣所以答。

「每次當我食煙果陣再望住d情侶，我好似都會感受到個男仔對個女仔有d咩不滿同埋佢理想中嘅另一半係點... 你都係一樣? 」得到確定黎浩明終於全盤托出唔再隱瞞。

「好類似，不過似乎我係睇到女方而你係睇到男方...」李立仁極力掩飾自己心入面嘅震憾裝作平靜答道。

「咁我就唔會再奇怪點解你可以做到之前同衣家兩份唔同”壞人”嘅工作喇...」黎浩明亦一樣。

「所以你覺得你可以幫我繼續run間鋪落去係因為你自己衣種能力?」李立仁再問。

「都有關係嘅，必要時衣種能力確實係可以幫到手... 不過我無可能成日食住煙咁去見d客架嘛，而且我覺得太部份case唔駛靠個能力自己都已經可以，所以衣個能力對我黎講只係一種比較穩陣嘅補底方案啫...」黎浩明滿有信心咁答。

「咁你應該搵日黎參觀下我間輔導所，基本上我就係每次見d客前都會食支煙再偷偷望下佢地先所以我先中尼古丁毒咁深... 始終純憑自己經驗我都驚自己睇錯害左人。」諗起自己間輔導所聰明嘅設計李立仁笑左一笑然後講。

「咁你個肺仲未有事都幾好彩喎...」而黎浩明就報以聲苦笑講。

「都真係多得上天庇佑...」衣點李立仁唔否認。

「咁點呀? 衣家信我可以繼承到你間鋪未呀?」黎浩明再問。

「照計問題係唔大嘅，不過就咁就話信你勝任交間鋪比你好似兒戲左d，我諗點都應該要有個正式測試睇下你嘅表現我先可以對你有信心... 」始終係自己多年心血，李立仁對黎浩明得唔得都仲係有d保留。

「咁你想比個咩測試我呀?」黎浩明問。

「嗯...不如就試下幫我攪掂思柔同子安衣單野? 如果你可以令佢地順利開花結果，又或者可以令我個女死心願意去搵第二個，咁我就信你有做我衣份工作嘅能力!」李立仁諗左陣後講。

「咁高難度? 你自己都攪唔掂喎...」黎浩明有少少不滿題目難度太高。

「易就唔駛考你啦， 而且始終係自己個女，我好難好客觀咁對衣件事，加上佢地兩個又唔係情侶，我個能力根本就無用武之地... 你自己岩岩唔係好有信心講話覺得大部份case唔駛靠能力都ok架咩? 衣家咪比個機會你証明囉...」李立仁半副睇你點死咁嘅樣講。

「.... 你咁多年黎有無隊過草?」聽到李立仁嘅說話後，黎浩明望住李立仁一陣後突然問。

「無啦，無啦啦點會掂草呀? 煙都係因為當年善柔件事先會食... 做咩咁問?」李立仁有d不解黎浩明點解突然咁問不過都照答。

「 無，見你食煙所以問下啫... 但就算我想接受你個測試，Celia話佢衣家連郭非凡個仔係邊都唔知喎，搵唔到佢咁我可以點幫佢地呀?」黎浩明提出疑問。

「衣點你唔駛擔心，我唔會比d不可能嘅任務你咁衰嘅... 岩岩其實郭非凡比左張帖我，佢個細女依婷黎緊結婚喇，子安好錫佢個妹，所以佢一定會飛返黎出席佢個妹嘅婚禮，當然我同Celia都會出席啦~ 咁個考場初步仲唔係set好晒比你?」李立仁一副早已經安排好咁嘅樣。

「咁我即管試下啦，如果真係可以幫到Celia，咁都叫為善柔做返d野幫左佢個外娚女...」黎浩明同意嘗試幫思柔，某程度都仍然係因為善柔。

「唉，何必下下都要咁呢? 不過你鍾意點諗舒服就點諗啦... 你加油喇，我個女嘅終生幸福就交比你喇~」李立仁有d無奈，但亦希望黎浩明真係可以幫到思柔。

「但... 我可唔可以有個不情之請? 」黎浩明有d唔好意思咁講。

「咩不情之請?」

「可唔可以當衣個係一個正式委託，比住少少訂金比我先? 你知我岩岩出返黎無耐，無乜錢旁身 ...」黎浩明尷尬地講。

「... 嗱，拎去。」李立仁無語左幾秒鐘後就喺銀包拎左疊錢比黎浩明。

「多謝， 我一定會盡力幫Celia嘅~」黎浩明伸手接過錢後露出左一個微不可察嘅詭異笑容。







----------


作者備註:

本身一開始構思衣篇外傳，其實都係諗住用另一個角度去補完返黎浩明同鄺善柔嘅一d畫面。不過無諗過寫寫下，最後又突然有個新idea，就係李立仁個女李思柔衣條線。

糾結左好耐，到底應該就咁完左個故佢算，定抑或再寫多個新篇章? 諗左兩日最後都係決定再寫一寫，所以衣章外傳嘅結尾就留下左衣條伏線。

不過因為係忽發其想，實際上我仲未諗好點寫同寫得幾深入，會寫短篇定長篇，所以第二篇外傳應該要過些日子先會繼續連載，希望大家多多包涵~

就好似日劇結局後果d SP咁，SP1完左黎緊仲會有SP2，敬請期待!

恭喜晒，都會架啦～

樓主呢

係度呀
哩家諗諗下衣個sp2 應該定係中篇長度嘅故事
所以無咁法出到

同埋樓主諗緊好唔好學其他作者整個ig，但又驚無咩人follow成件事會好柒

好耐無見大家，同大家講聲新年快樂先!
襯住假期我終於下定決心開左個IG喇，鍾意睇我故嘅朋友可以follow下~

https://www.instagram.com/sshadow_story/

嚟緊暫時應該主要會慢慢post返以前啲故仔為主，而且係修訂左嘅版本，因為重新睇一次先發覺原來都好多錯字同埋有啲語法問題，所以同原版會有少少唔同。

至於哩個故嘅外傳2我都開始寫緊，今個星期內應該就可以開始繼續連載，希望大家繼續支持!

12. 外傳(二)

一間傳統嘅酒樓裏正洋溢著喜氣洋洋嘅氣氛，從台上背景貼有<林郭聯婚>四隻大字，不難推想衣度今日正係一對新人嘅婚宴場地。

陸陸續續開始多賓客入場，而衣個時候，三男兩女喺接待處簽完名交低左人情後就徐徐步入會場內。

會場上一位疑似主婚人嘅男仕見到衣五位來賓後就即刻上前同佢地打左聲招呼，然後好快捉住左其中一位拉左佢去另一邊暗角。

「李立仁，上次問你又唔肯講，其實我同佢完全唔熟，點解要我請埋佢? 仲有，點解你地會有返聯絡?」疑似主婚人問。

「此事說來話長... 至於點解要請佢黎，實不相暪，其實都同你個寶貝仔有關囉...」李立仁答。

「子安? 關佢咩事?」疑似主婚人問。

「你唔好同我講你唔知你個仔同我個女d野呀下?」李立仁反問。

「我知佢地感情好好，我亦知思柔對子安好有好感，只但係子安唔接受佢我都無辦法架? 而且咁又關黎生咩事?」疑似主婚人唔明白。

「咁我都唔係要你幫我個女做d乜... 得架喇，遲d再解釋你聽啦，你當衣個係我比黎浩明嘅一個測試，你咩都唔駛理就得架喇...」李立仁無直接答佢。。

「古古怪怪咁... 不過只要佢唔好發顛係度攪破壞，咁多佢一個又無咩所謂嘅...」基於同李立仁嘅情份，疑似主婚人都無留難。

「放心啦，我會睇住佢架喇~ 佢成晚應該都只會自己坐埋一邊唔會點蒲頭。」李立仁拍一拍對方膊頭藉此安對方心。

「Okok，咁我地一家同你地一家一齊影張相先啦~ 」疑似主婚人唔再糾纏衣個話題提議道。

「當然要啦~」


衣位疑似主婚人就係今日新娘嘅父親郭非凡，而同李立仁一齊到場嘅就有佢老婆鄺善潼同一對仔女李思柔以及李思賢，同埋一位係佢同郭非凡嘅中學同學黎浩明，亦即係佢地岩岩討論緊郭非凡話同佢唔熟亦唔明點解李立仁今晚要請埋佢黎果位。

12.2

“咔嚓”

照片上，除左李立仁一家四口外，仲有郭非凡一家，即係郭非凡夫婦，今晚新人郭依婷以及佢老公，仲有郭依婷哥哥，郭非凡大仔郭子安。


「柔柔，好耐無見喇~」影完相後郭子安就走到李思柔旁邊同佢講。

「係囉，你粒聲唔出又突然消失左幾個月喇...」李思柔見到郭子安就略帶少少怨氣咁講。

「咁你知我鍾意周圍去影下相同拍下片架嘛~」郭子安知李思柔只係表面上不滿就笑住解釋。

「今次又有咩收獲影左d咩呀?」李思柔已經習慣左對方咁就轉而問。

「比你睇下~」郭子安拎左自己部電話出黎比李思柔欣賞自己嘅傑作。

「嘩，真係好靚喎!」李思柔見到後忍唔住讚嘆一番。

「你可以繼續慢慢掃落去睇架~」見到對方嘅表情，郭子安好滿意地講。

「好呀，真係影得唔錯喎~ 咦，衣個女仔係...邊個黎架?」掃掃下李思柔發現照片上開始多左個女仔成為照片中嘅主角。

「哦，佢係我去到巴西果陣遇到嘅一個女仔，係咪好靚? 我第一眼見到佢就比佢嘅獨特韻味所吸引，然後忍唔住搵佢影左幾張相...」郭子安解釋。

「咁佢真係好靚嘅...」李思柔雖然心入面有點唔開心，但都不得不承認個女仔好漂亮。

「係呀，之後我地開始傾偈認識佢仲帶左我去好多唔同好靚嘅地方影相同拍片添~」但郭子安就好似完全留意唔到對方嘅不快繼續講。

「咁你實玩得好開心啦...」李思柔流露出淡淡嘅酸意。

「開心呀~ 講真唔係依婷個婚禮我都唔會咁快返黎...」郭子安就好似略帶不甘咁講。

「好唔捨得人呀?」李思柔醋意更盛。

「哈哈，無喎~」郭子安笑住咁講。

「咁好? 對方咁靚女你會無唔捨得?」聽到對方嘅答覆李思柔心頭一喜但又唔太相信。

「因為緣份有時真係好奇妙，當我同佢講我要返香港果陣佢竟然話佢都想黎香港睇下，所以...」郭子安一副奸樣咁講。

「所以你帶埋佢返黎?」李思柔幫佢講埋。

「咁又唔好講咩帶唔帶返黎，咁岩一齊結伴同遊黎香港啫~ 一講曹操曹操就到，佢話想見識下香港人嘅婚禮所以我今晚就邀請埋佢黎喇~ Hey Sandra，here~」郭子安突然舉高隻手面向前方搖擺。

「Hi Aaron! This is ?」一位身有著model高挑身型嘅南美裔女子見到郭子安後就好興奮咁走埋去佢身邊然後問。細心一睇，衣位女子就係剛剛郭子安手機入面好多照片中嘅主角。

「This is my best friend Celia, we knew each other since we were very small. Celia, this is Sandra, a friend I met in Brazil.」郭子安見到Sandra就好開心咁同佢介紹李思柔。

「Hello, nice to meet you~」Sandra對Celia報以甜甜一笑。

「Nice to meet you too~」而Celia亦勉強對返Sandra報以微笑。


「思柔，過一過黎幫手呀~」衣個時候遠處傳黎李立仁嘅呼喚傳召李思柔過去。

「Oh my father is finding me, let’s talk later~」李思柔聽到父親傳召就好有禮貌咁同Sandra講一聲告辭然後就去左搵佢父親。

而頭先發生嘅衣幕畫面，就全部都收錄喺遠處某一位坐低左嘅男人眼中。

12.3

「個衰仔又有新女朋友?」李立仁見到遠處自己個女同郭子安本身傾得好地地，點知突然有個似係南亞裔嘅女人走左埋去，然後思柔嘅面色就變得有d難睇，大概估到無事就叫走左李思柔諗住幫佢解圍。

「係掛... 話去旅行果陣識架喎...」李思柔答道。

「旅行識都唔駛帶埋返香港掛?」李立仁有d不滿咁講。

「個女仔話咁岩又想黎香港旅遊下喎...」李思柔苦笑住再答。

「... 咁唔好再過返去喇，係度陪下爹哋啦...」知愛女唔開心李立仁就講。

「放心啦，我都慣晒架喇，無事，我去搵依婷傾下偈先~」知父親好意不過李思柔唔想接受顯得自己好無用又好似真係好在意郭子安咁所以就求其搵個原因閃走左。

「好啦好啦... 」李立仁明白亦無阻止，見愛女走左自己就走到遠處黎浩明果度。



「你頭先應該見到啦?」佢問黎浩明。

「嗯...」黎浩明答左聲。

「有無頭緒呀? 我真係唔想再見到我個女咁呀...」李立仁再問。

「如果我最後真係幫到Celia，你會點?」黎浩明無答佢而係問。

「咪話比你接手我間鋪囉，仲唔夠?」李立仁答。

「你覺得善柔喺上面會唔會肯原諒我?」黎浩明又問。

「... 其實以我了解嘅善柔，由你殺左果個人然後坐監果日開始，我估佢已經原諒左你...」李立仁開解道。

「係就好喇...」黎浩明稍為有少少釋然。

「不過如果你真係攪得掂衣單野，我估佢就由九成肯原諒你變成十成喇...」李立仁不懷好意又再補充句。

「真係? 咁我就更加有動力出手喇~」黎浩明果然精神為之一振。

「好似好有信心咁喎? 咦... 點解你身上好似有陣味嘅... 你...隊完草黎?」李立仁突然察覺黎浩明身上好似有陣怪味。

「你唔好理啦...」黎浩明答道。

「你入面坐左咁耐都戒唔甩? 定出返黎後又開始食返?」李立仁問。

「重要咩?」黎浩明不為所意咁反問。

「我驚你神智不清一陣係度攪破壞咋! 大佬，你唔好亂黎呀，一陣攪左d咩事出黎我真係唔知點面對郭非凡呀...」李立仁有d擔憂同哀求咁講。

「放心啦，我控制好份量唔會有事...」黎浩明解釋。

「你果次問我拎錢就係為左買草?」李立仁問。

「你真係好多問題喎...你要唔要都試下? 可能有以想不到嘅收穫架喎~」面對李立仁嘅問題同不信任黎浩明開始有少少不耐煩。

「唔駛喇... 戒唔到煙善潼已經好嬲，如果我再掂埋衣範野我驚我家變呀...」李立仁立刻搖手拒絕。

「哈哈，咁都岩嘅，你又確實無咁嘅需要...」

「總知你睇場合唔好發顛攪事啦... 我去搵返佢地先喇。」李立仁再度叮囑。

「知喇... 快d走唔好阻住晒啦。」黎浩明求之不得佢快d走。

12.4

「黎伯，悶唔悶呀?」

過左段時間李思柔同郭依婷傾左陣後見對方要開始換衫就出返黎，然後見黎浩明自己一個坐好似好悶咁就走左過去同佢傾偈。

「Celia? 我睇左你篇專欄喇，寫得好好呀，多謝你...」黎浩明見到李思柔就唔再係頭先對李立仁嘅黑面而係露出一副溫柔嘅笑容講。

「我多謝你先岩，肯接受我訪問~ 我都係做返份內事同埋應承過你嘅野啫~」李思柔亦笑住咁回應。

「你真係乖，之後又肯幫我約你父親見面...」黎浩明一副長者寵愛後輩咁嘅樣同語氣。

「不論你同爹哋都好，我都唔想你地再為以前嘅事受罪喇，咁多年，咩都夠啦... 所以佢今日話會帶埋你黎我雖然驚訝但都替你地有種如釋重負嘅感覺架~」李思柔對自己非常滿意咁講。

「呵呵，不過佢之所以帶我黎並唔係因為你所諗咁架...」不過黎浩明就為潑一潑冷水。

「咁係因為咩?」李思柔疑問。

「唔重要啦... 果個靚仔就係偷左你個心果個偷心賊?」黎浩明無答佢而係望住遠處一男一女問。

「我果次係咁二提下咋喎，你竟然仲記得? 係呀...」李思柔有d驚訝黎浩明仲記得自己講過嘅野，然後臉一紅答。

「果然幾靚仔喎，唔怪得溝咁多女啦，果個係佢女朋友?」黎浩明又問。

「我都唔知佢地係咩關係...」又提起Sandra李思柔有d失落。

「成日係咁你一定好難受喇...」黎浩明眼神充滿住憐惜咁望住李思柔。

「都慣架喇...」李思柔又苦笑住咁答。

「咁佢真係仲值得你繼續咁等落去?」黎浩明問。

「其實我唔係專登等佢架，我亦知佢唔會係一個好男朋友好老公，只係鍾意就係鍾意，我個心有左佢之後就真係好難再有位置去容納其他人...」李思柔答。

「咁點解你咁鍾意佢? 有無咩原因?」黎浩明又問。

「我都唔知呀，或者因為由細到大佢真係一直都喺我身邊同我好close? 本身我都唔知自己對佢係點，直到有日見到佢同另一個女仔行得好埋我就發覺自己心入面會好唔舒服，好擔心自己喺佢心目中嘅地位不保，然後再到佢真係同我講佢有左女朋友後，我個心就好似比人吉左一刀咁，之後我先知我對佢原來唔係青梅竹馬咁簡單...」李思柔邊回憶邊說。

「你同你父親都係一樣，都係要無左先知自己心意... 」黎浩明一副有其父必有其女咁嘅樣。

「或者係啦,,, 但佢好彩d，因為佢之後遇到媽咪，而我就咩都遇唔到，到衣家都仲係咁...」或者因為黎浩明好詳盡咁同李思柔講過自己嘅故事，加上受Sandra影響情緒有d低落，所以李思柔都好信任黎浩明無掩飾自己內心嘅失望同佢講自己嘅心事。

「到底你好彩定佢好彩都仲係言之尚早...」黎浩明就別有深意咁講。

12.5

「不過之後佢就keep住成日換女朋友，起初佢每次同我講分左手我都會諗自己係咪有機會，可惜次次都只會見到佢好快又同另一個一齊然後自己再次唔開心，試多幾次後我都漸漸麻木左lu...

有時我都會諗，或者咁都好嘅，如果佢同我一齊然後又變心或者分手，咁我地就可能連青梅竹馬都唔再係...」李思柔繼續講。

「所以衣家嘅你，就算有日有機會真係同佢一齊，你都會寧願同佢保持返朋友關係?」黎浩明問。

「我都唔知呀... 其實安於現狀除左間中會唔開心外都唔差呀，不過一日未試過同佢一齊過，我一日又好似好難心息死心咁...」李思柔苦惱地答。

「咁如果佢今晚同你講佢聽日要結婚呢? 你會有咩感覺? 甘唔甘心?」黎浩明又問。

「咁... 我除左祝福佢我仲可以做d咩?」李思柔幻想完後苦笑左一下講。

「咁如果我同你講我有方法令佢鍾意你同你一齊，你又係咪真係想先?」黎浩明繼續追問。

「我... 可能唔想...」李思柔諗左陣後答。

「點解?」

「因為我接受唔到佢有其他女人，就算一齊到，如果最後睇住佢出軌，咁我估我會崩潰，然後同佢應該連朋友都再做唔成，咁好似仲sad過衣家...」李思柔帶點害伯地說。

「所以你寧願一世都繼續咁單戀住佢?」

「但我知我又唔想咁... 所以係咪好矛盾好似完全無解咁? 其實我諗黎諗去唯一可以走出衣個困局嘅方法，就係可以有另一個人出現然後救我出去，就好似我嗲哋之後有我媽咪咁，不過衣個人應該永遠都唔會出現喇...」李思柔灰心地講。

「世事無絕對，話唔定個男仔會變，又話唔定下一個出現喺你眼前嘅人就係衣個人呢?」黎浩明笑住咁講。



「軒爺，好耐無見喇!」衣個時候遠處嘅李立仁突然好大聲咁講然後急急咁行左去一個仲好靚仔嘅阿伯面前比左個擁抱對方。

「係呀，對上一次返黎香港好似都差唔多六七年前?」衣個叫軒爺嘅阿伯邊回抱佢邊回應道。

「所以我幾驚請唔到你返黎呀~」衣個時候另一個阿伯郭非凡亦加入左佢地。

「點會呀，你再結婚我就唔黎啫，依婷結婚點都要比下面嘅~ 啟光，有無叫人呀?」軒爺笑住講。

「Uncle Lee, Uncle Kwok你地好~」一個本身企左喺軒爺後面嘅年青人踏前左幾步同兩個老人家打招呼。

「嘩，啟光都咁大個仔喇，盡得你真傳喎軒爺~」兩個阿伯見到衣個叫啟光嘅後生仔就一副長者笑容咁笑住講。

「過得去啦~ 佢以前同依婷咁好感情，依婷結婚佢梗係要返黎見証衣刻啦~」軒爺明顯都好滿意自己個仔邊笑邊答。


衣位阿伯就係當年李立仁大學嘅老死軒爺，而因為鄺善柔件事之後成日一齊陪李位仁落酒吧所以佢同郭非凡亦都熟絡左，成為左曾經嘅三劍俠。

12.6

當年軒爺同Nicole分手後頹左好一陣子，然後因為工作關係認識左個英國女人Tiffany。Tiffany覺得軒爺好吸引就對佢展開左熱烈追求，最後成功感動到軒爺，二人好快拉埋左天窗仲有左張啟光。

不過有左小朋友後，軒爺同Tiffany因為好唔鍾意香港嘅教育制度就開始生出左移民嘅念頭，所以到張啟光中三嘅時候，佢地就一齊移民返去Tiffany故家，間唔中先會返下香港。

今次受郭非凡邀請，軒爺就帶埋個仔啟光返黎香港出席郭依婷個婚禮。

不得不講，張啟光除左完美繼承左軒爺嘅樣貌外，仲因為係mix嘅關係令佢顏值上甚至比顛峰時嘅軒爺更加優勝，加上高大又ABC，如果佢去到蘭桂芳絕對係會比女圍死果d嘅存在。


「思柔/子安，你地快d過黎同你地個Uncle Cheung打聲招呼啦，啟光都返左黎呀~」郭非凡同李立仁各自叫左佢地d仔女過黎。

因為軒爺仲喺香港果陣三家人住得近不時都會約埋一齊聚會，而移民後每次返香港佢地亦都會見下李立仁同郭非凡兩家人，所以幾個細路之間並唔陌生，相反仲玩慣玩熟。

只係佢地對上一次見啟光對方雖然都好靚仔，但就仲係稚氣十足果種𡃁仔樣，無諗過過左幾年後今次一見，對方竟然有左咁大轉變。雖然都仲好後生，但就開始散發出一種男人嘅魅力。

「Uncle Cheung你好，好耐無見~ 啟光你好~」郭子安同李思柔過到黎後就一齊同軒爺打聲招呼。

「思柔姐姐，好耐無見!」張啟光一見到李思柔就精神為之一振主動上前。

「幾年無見，啟光你真係大個仔左好多喎! 」見到張啟光衣家咁靚仔咁型李思柔亦都不禁眼前一亮。

「思柔姐姐你都越黎越靚啫!」張啟光就笑住咁賣口乖。

「淨係理你個思柔姐姐唔駛理我啦?」郭子安見張啟光淨係掛住理李思柔唔太理自己就有d不滿。

「子安哥你好~」張啟光見郭子安不滿都立刻”耍冧”同佢打招呼，不過雖然表面上好有禮貌，但張啟光嘅嘴角卻帶有少少不滿同不屑。


按照幾個人嘅年齡排序，最大係郭子安，之後就到李思柔，張啟光，郭依婷同埋李思賢。因為郭子安同李思柔最大，同張啟光郭依婷又差左幾年，所以佢地都以大哥同大家姐自居。

12.7

「張啟光!」衣個時候新娘郭依婷見到張啟光就大叫一聲然後衝左埋黎。

「新娘子，恭喜晒喎，你今晚好靚呀~」張啟光見到郭依婷就好露出一個既陽光又溫柔嘅笑容恭賀佢。

「多謝~ 你都完全唔同晒喎... 早知你衣家生得咁型咁靚仔我就唔揀我老公直接嫁比你算啦!」郭依婷見到張啟光後就係咁邊抽佢水摸佢邊講道。

因為年紀相近問題，細個果陣郭子安同李思柔會比較熟，張啟光同郭依婷又會比較玩得埋同投契。

「哈哈，咁一係你衣家唔好結一係今晚靜靜雞黎搵我好唔好?」張啟光裝作細細聲咁同郭依婷講。

「好呀，咁今晚你喺酒店房等我? 不見不散架喎~」郭依婷又細細聲咁同返張啟光講。

「但我同老豆一間房喎，你唔介意?」張啟光笑住咁悄悄講。

「衰人! 我你都玩~」郭依婷唔再玩就一掌打落張啟光度講。

「哎哋! 又係你自己講先嘅...」張啟光邊捽自己隻手邊講。

「算啦，我都係講下啫! 我知你個心一早已經唔再係我度啦，你個負心漢~」郭依婷笑左笑然後眼角就睄左一睄旁邊嘅李思柔。

「點會呀，知你今日結婚你都唔知我喺英國喊左幾多日...」張啟光繼續裝作傷心咁講。

「... 咁快d同我影張相留為紀念然後等你以後可以望住佢後悔一世啦~」郭依婷就笑住咁伸手撓住張啟光隻手講。

幾個唔再喺細路嘅細路之後就圍埋一團你一句我一句咁好不熱鬧。



「估唔到半路原來仲有個程咬金，不過咁又會唔會係另一條出路呢? 有d複雜添...」

衣個時候已經完全被忽略仍然自己一個坐左係遠處嘅黎浩明望住衣幾個年輕一代不禁搖搖頭自言自語。

12.8

「李立仁，Celia嘅情況有d複雜喎...」第二日黎浩明主動聯絡李立仁講。

「攪唔掂想投降呀?」李立仁聽到後就笑住咁寸一寸黎浩明。

「投降又未至於，不過想問下你你會想佢係同到郭子安一齊定抑或想佢死心多d?」黎浩明不以為然答。

「其實點我都無所謂，我只係想佢開心同唔會受傷...」李立仁收起左笑容認真咁答。

「你覺得張啟光個人又點?」黎浩明突然問。

「啟光? 外表就唔駛講啦，至於個人... 佢細個雖然有少少頑皮，不過人品就同佢阿爸一樣都好唔錯嘅~ 但佢去左英國咁多年唔知有無變呢? 無啦啦做咩咁問?」李立仁邊諗邊答。

「你知唔知佢其實鍾意你個女?」黎浩明問。

「啟光鍾意思柔? 你點知?」李立仁有d意外，然後再問。

「記唔記得我之前問過你有無隊過草?」黎浩明無直接答而係問。

「好似係有，做咩?」李立仁不解。

「我估有樣野你一直唔知... 其實除左食煙，我隊草果陣會有另一種能力...」黎浩明講。

「咩能力?」

「食煙我可以睇到情侶間男方嘅不滿同喜好，至於隊草，就可以睇到非情侶間嘅野，我會感受到個男仔對另一個女仔有無感覺同有幾深感覺。當年，我都係隊草果陣知道個人渣睇中左一個女仔，然後就收賣左個女仔同人渣happy完後要趕佢出街唔比佢過夜，我再襯佢夜麻麻一個人走果陣落手...」黎浩明略帶沉重咁講。

「竟然有d咁嘅事?」李立仁聽完覺得好意外。

「如果我無估錯，跟據你之前所講，你隊草果陣應該都會有類似能力，但就係睇女仔果邊...」黎浩明再補充。

「咁真係要試下先知... 但無啦啦邊度搵草?」無食開草李立仁當然唔知窿路。

「嗱，衣度有d。」黎浩明即刻喺衫袋拎左包野出黎。

「嘩，你真係隨身攜帶架喎?」見住包草李立仁有d目定口呆。

「以備不時之需嘛，而且今日搵得你就預左會需要佢啦...」黎浩明平靜咁答。

「你上次問我拎錢先就係為左買佢?」李立仁諗起上次黎浩明要求佢先比訂金於是問。

「梗係啦... 你估衣包野平咩?仲要識搵窿路...」黎浩明就沒好氣咁講。

「唔怪得琴晚你身上突然有陣味啦，原來你用左個能力... 咦，咁你除左發現啟光鍾意思柔，子安呢?」李立仁突然醒悟。

「衣part我遲d 同你講啦，衣家最重要應該要試左你有無衣個能力先...」黎浩明又唔答佢。

「咁點試好?.」李立仁問。

「我其實已經有個idea...」黎浩明一副智者咁嘅樣講。

睇錯咗林鄭聯婚

支持

12.9

兩日後喺”壞人輔導所”一間consultation room內，坐著郭子安，李思柔同張啟光三個人。

「柔柔，知唔知你嗲哋無啦啦叫我地三個上黎做乜呀?」郭子安問。

「我都唔知呀，佢淨係講左句”有你著數”就咩都唔講然後逼我黎...」李思柔帶點無奈咁講。

「唔緊要啦，一陣咪知囉~ 我都好多年無黎過喇，衣度都無咩點變... 仲記得小學果陣每逢暑假最後兩日我地父母都會帶我地黎逼我地一齊做晒d暑期作業，到到中學大時大節我地又會喺度開party玩board game同TV game果d，然後依婷同思賢玩親輸左都喺度喊，真係諗起都懷念...」張啟光望住四周有d感觸咁講。

「哈哈，係呀，但你好似唔記得左自己都係其中一個常輸份子然後喺度喊喎~」郭子安笑道。

「果陣你烚我地年紀細啫! 衣家我唔會再輸比你架喇，咩都唔會!」張啟光就立刻意有所指咁抗議。

「轉眼間都過左咁多年... 當年嘅喊包依婷衣家都做左人老婆啦~」見好似有少少火藥味，李思柔就轉移話題。

「係啦，果日睇住佢做新娘，真係有種恍如隔世咁嘅感覺...」張啟光和應道。

「以前佢最鍾意痴住你，仲成日話大個左要嫁比你架喎，果日有無好傷心呀?」郭子安又忍唔住襯機挖苦下張啟光。

「童言無忌啫~ 我一直當佢係阿妹，同埋我鍾意d比較成熟嘅女仔架~」張啟光笑住講，然後眼尾又望一望李思柔。

「係喎，咁你喺英國有無溝女或者比女溝呀? 以你衣家個look應該好受歡迎架喎~」郭子安見張啟光無咩情緒波動又問。

「我先無你咁濫呀，咁耐以黎我都係拍過一次拖咋...」張啟光有d不屑又有d尷尬咁答。

「咁浪費? 唔通你...受過情傷?」郭子安追問。

「唔係... 只係試一次我就終於清楚自己真正想要嘅係咩咁解啫...」張啟光答。


窗外

「點呀，feel唔feel到?」黎浩明望住正聚精會神望住窗內情況嘅李立仁問。

「我竟然一直都唔知自己有個咁嘅能力...」李立仁有點痛心疾首咁答。

「都正常嘅，其實無啦啦我地邊會隊草或者食煙呀...」黎浩明安慰道。

「但奇妙嘅地方係，我地會掂衣兩樣野，某程度上都係因為佢... 或者冥冥中其實都係佢指引緊我地咁做?」李立仁有d感觸咁講。

「佢? 你指善柔?」黎浩明問。

「係呀， 我一直覺得我地有衣個能力，都係因為佢...」李立仁答。

「點解咁覺得?」

「因為煙同草係佢尋死前最後做嘅兩樣野，而我地嘅能力，無疑係好適合幫我地做好感情輔導員衣個工作，亦係佢嘅心願，咁仲唔夠?」李立仁解釋。

「聽你咁講又好似確實係咁... 」聽罷黎浩明表示認同。

「所以就算佢走左，其實都仲好努力咁影響緊我地嘅生活... 」李立仁再講。

「我地衣一世都唔會擺脫到佢架喇，當然其實我都唔想擺脫... 」黎浩明苦笑道。

「佢就係一個咁令人難以忘記嘅人...」李立仁同樣苦笑道。

12.10

「咁感受完你個愛女嘅感情，有咩感覺同睇法呀?」知唔係懷緬嘅時候黎浩明轉問。

「好難攪呀.... 我感受到佢真係好鍾意子安，而衣個鍾意，應該係無原因純粹因為大家由細玩到大感情好好，佢慣左自己嘅情緒一直都係受子安所牽動...」李立仁面有難色咁講。

「其實...我知郭子安都係一樣。」黎浩明講。

「你指子安都鍾意思柔? 咁點解佢... 要咁對思柔?」李立仁聽到後有d緊張咁問。

「我都想知道答案，但我真係感受到佢其實都同樣好愛你個女，原因同你個女鍾意佢係一樣...」黎浩明同樣表示不解。

「咁我又真係無諗過事實會係咁...既然大家都鍾意大家，咁事情會唔會易辦好多?」李立仁滿有希望咁問。

「如果知郭子安個心結係咩然後解得到，咁照理就應該係嘅...」黎浩明答。

「咁啟光呢? 你話佢都鍾意思柔?」李立仁醒起另一樣野就又問。

「係，我感受到佢都好愛你個女，原因係佢係一個姐姐控而Celia好比到姐姐嘅感覺佢... 當然，我估佢地之前應該係發生過一d事啟光先會咁。」黎浩明再講。

「咁又係估唔到架喎... 不過如果佢走左咁多年都仲咁鍾意思柔，應該都係真心?」李立仁問。

「係掛... 但真心咁又點? 憑你頭先自己嘅觀察，你應該都知你個女對佢暫時完全唔係果回事，所以佢幾鍾意你個女都無用啦...」黎浩明答。

「咁我地點算好?」李立仁問。

「淨係知感覺無用，我地一定要多d information先可以做決定... 暫時最重要應該係要知道點解郭子安唔肯接受Celia先，另外都要睇下張啟光可以為Celia做到咩程度，同埋你個女實質諗法又係點...」黎浩明分析道。

「你講得岩，但有咩方法可以拎到衣d資訊呢?」李立仁同意但亦覺得苦惱。

「嗯... 一齊玩個真心話大冒險?」黎浩明諗左陣後提議。

「...咩年代呀阿伯? 而且我唔覺得思柔係度子安會肯講真心話囉...」李立仁反左一反白眼然後先醒起幾十年監真係令黎浩明同社會完全脫節左。

「咁你有咩高見呀?」不滿李立仁咁寸黎浩明反問。

「要聽到真話就一定要單獨處理仲要靠你幫手，因為佢地知我係思柔嗲哋實唔會講真話... 」李立仁邊諗邊講。

「但要佢地對個陌生人講真話咪仲難?」黎浩明質疑。

「唉... 如果我地個能力係可以讀心咁就好喇...」李立仁有d頭痛咁講。

「讀心? 你估你有無可能可以灌醉晒佢地?」黎浩明突然靈機一觸。

「咁高難度? 咁好似係挑戰緊我喎... 但灌醉佢地有咩用? 酒後吐真言?」李立仁諗左陣後答。

「醉左佢地嘅判斷力同意志力會減弱，咁我就可以用我喺監獄入面睇書學返黎嘅方法令佢地講真話。」黎浩明答。

「咩方法?」李立仁問。

「催眠。」