上身是格子外套搭配白色短袖圓領衫,下身是黑色寬鬆直筒褲與長筒帆布鞋,這穿搭特顯韓湘的腿長,散發不一樣的清新氣息,又不失她的酷酷的性格。
「最好就放埋頭髮落嚟。」看著長鏡的瓦禮建議。
韓湘照辦,伸手把髻解掉。
一縷自然的秀髮垂下,造就渾然天成的氣質。
「嗯,咁樣嘅話,應該唔會有人懷疑你有不軌企圖,點睇都係一個嚟自貴族區大家閨女。」瓦禮認可了造型。
「你覺得點。」韓湘透過鏡子,看著背後的我。
我出神半秒:「幾好。」
瓦禮負著手,行到我背後輕聲說:「唔好咁吝惜啲讚賞。」
「依到幾多錢?」我身上沒有艾幣,但有些焦糖。
「大家係朋友,無諗過收你錢。」瓦禮微微一笑。
「但你最近生意應該唔係幾好?」我續問。
「咁都無計。」瓦禮望出櫥窗外,來回巡邏的官兵:「喺條街見到咁多士兵,都無人會有閒情出嚟買衫。」
「生活仲頂得住?」
「兩、三個月唔成問題,但我屋企人有啲資產,因為王政府廢除面值嘅政策而變咗廢紙……都唔係太樂觀。」
「你有冇諗過離開艾寶琳。」
「依個時勢走到更係好,但都已經封咗境。」
「我可以帶你出去。」
我之前給瓦禮收留過一段日子,現在就當作報恩,儘管她不是大本營居民。
「你有辦法?」
「嗯。」
「咁緊係好!我喺依個倖存區完全放鬆唔到。」
「你喺到等我通知,走得個陣我會叫你。」
「咁我喺到等你哋。」
「鈴──」我和韓湘推門出店子。
營救行動事不宜遲,每過一日情況越危險。
我只能把韓湘帶到茵怡花園外頭,因為單是屋苑外的看更亭,已經有個犬學派鎮守,讓我無法踏入該區域中。
「之後交俾你同佢哋交涉。」我停在豆漿大王店舖前。
韓湘點一點頭,逕自行入茵怡花園。
果不其然,那名犬學派偷偷瞧了韓湘一眼。