迪路獸/聖龍獸本命﹐數碼暴龍VB Vital Bracelet活力手環資訊平台

【專用app維修完畢】

最新版本：Ver.1.1.0

更新內容
1. 活力手環轉移指示嘅顯示畫面
2. 修正部分活力手環轉移數碼精靈嘅問題
3. 新加刪除數碼精靈嘅功能(喺保存室嘅畫面可以選擇直接刪除數碼精靈)

【FAQ1】包裝內容、著機方法、叉電方法、日期時間設定

問：任何情況下，如果想返去主畫面可以點做？
長撳下掣就可以返去主畫面，同時好多情況都可以用嚟退出。

問：點解叉電要用電腦插USB綫？
純粹爲咗安全，因爲活力手環感覺好化學，加上本機同dim咭難買，壞咗就唔抵。如果牆身溼電電流比較唔穩定同高，用電腦嘅USB-A插頭充電比較保險。如果唔見咗條叉電綫可以用普通叉電綫(唔好用快充綫同唔好直接插USB-C/Thunderbolt插口)，同埋可以用比較舊款電壓較低嘅尿袋(行動電源)。

問：點解隻數碼精靈養咗咁多日，日數顯示都係0？
活力手環設計要數碼精靈喺主畫面時通過23:59到00:00時先會加一日，所以建議每朝時間較做23:59，等佢自己過00:00(進入設定頁面嘅第一版，設定時間頁面會顯示時鐘圖案，撳下掣開始設定。設定順序：年→月→日→時→分(24小時制)，過咗00:00之後再用同樣步驟較返正確嘅日期同時間)。呢個方法可以解決好多其他問題。

問：護理活力手環有咩需要留意？
活力手環嘅透明膠比之前嘅暴龍機更加脆弱容易有花痕，建議買mon貼保護顯示器。
DM標誌係油溶，唔好搽太厚hand cream或者酒精搓手液，如果唔係會抹甩個標誌。
由於活力手環唔防水防滴防塵，記得去洗手時間前、進行會流大量汗嘅運動前必須除低隻活力手環放喺安全嘅地方 (事前可以將隻精靈放喺backup或者轉移去專用app度)；時刻確保叉電口同dim咭插口有用附屬嘅蓋搇好；清潔時唔好用太多水，亦要記得唔好用酒精清潔本機，可以用冇酒精成分嘅(殺菌)溼紙巾輕抹表面。
叉電最好用電腦USB-A口同附屬嘅叉電綫。
活力手環錶帶屬於硅膠材質，容易積埋死皮同角質造成黑色污跡，記得要每日抹乾淨以免有污跡，有需要時可以扭開螺絲拆落嚟，用中性洗衣液用水稀釋或者熱嘅泡打粉溶液浸泡一晚以上，再用軟毛刷清潔。如果唔會戴隻活力手環一段時間﹐建議放喺日光照唔到嘅地方﹐例如櫃桶﹐可以避免變黃。

【FAQ2】首次Dim咭登記、數碼精靈出世

問：第一次插dim咭時有咩需要留意？
記得檢查個mon係著住先好插dim咭，如果唔係張dim咭會廢咗，情形好似已經登記咗第二隻活力手環咁樣。
由於第一隻數碼精靈未出世之前都唔可以進入設定頁面較靜音，所以第一次插dim咭時要確保環境可以容許隻活力手環發出聲響。

問：數碼精靈出世後有咩可以玩？
只可以等佢進化做成長期。遊戲內容暫時要進化到成長期開始先有嘢玩，幼年期進化到成長期需要嘅時間爲1+3個鐘，如果好急想玩可以用專用app新登記獎勵嘅脈搏獸轉移到活力手環(傳輸時可能需要脈衝都市dim咭，截至2021年4月爲止專用 app都仲有新登記禮物)。

【FAQ3】主畫面、數碼精靈心情、Menu、數碼精靈瞓覺

問：數碼精靈心情有咩用？
數碼精靈心情會影響攻擊力，不過唔一定係心情好就上升。不過，心情唔好時會較容易受傷。
心情同獲得活力值嘅關係：心情好兩倍、心情普通一倍、心情唔好一半。

問：點樣可以令隻數碼精靈心情好啲？
惟一通用嘅方法就係不停喺戰鬥入面打贏，其他因素每隻數碼精靈嘅情況唔一樣，唔可以一概而論，不過只要活力值有持續上升都唔會太差。另外可以喺專用 app買特殊道具改善心情一段特定嘅時間。

問：如果喺menu想返去主畫面可以點做？
可以長撳下掣，就會返去主畫面。

問：數碼精靈會幾點瞓覺？
數碼精靈瞓覺嘅時間都唔同，無論係同一張dim咭或者係所謂正統進化，都要睇數碼精靈嘅運動類型。活力手環嘅數碼精靈總共分成5個運動類型(運動タイプ)，有活潑類(アクティブ)、自律類(ストイック)、懶惰類(レイジー)、普通類(ノーマル)、室內類(インドア)。活潑類同自律類嘅睡眠時間係20:00至08:00，普通類嘅睡眠時間係21:00至09:00，懶惰類同室內類嘅睡眠時間係22:00至10:00，時間以活力手環嘅顯示時間爲準。類型可以喺專用 app度檢查，或者倒返轉喺呢3個時間點睇下數碼精靈會唔會瞓咗覺。

問：數碼精靈瞓覺時應該熄機？定係應該做咩？
由於數碼精靈瞓覺時唔會扣活力值，亦冇得玩任何嘅遊戲內容，而且過咗深夜12點就會重新計過里數，所以建議可以熄住機叉電。反正每朝其實都好建議將時間較做23:59，等佢自己過00:00(進入設定頁面嘅第一版，設定時間頁面會顯示時鐘圖案，撳下掣開始設定。設定順序：年→月→日→時→分(24小時制)，過咗00:00之後再用同樣步驟較返正確嘅日期同時間)。熄機叉電同時都對電芯壽命有好處。當然如果瞓覺時你好想繼續玩，你可以改做一個數碼精靈唔係瞓緊覺嘅時間繼續玩。

【FAQ4】數據（活力值、心跳、重新計算心跳、里數）

問：活力值有咩意義？
影響進化結果、戰鬥時嘅HP量。

問：咩情況會扣活力值？
超過5分鐘度唔到心跳、3分鐘內里數唔夠30、提供唔到適合拍檔精靈運動類型嘅活動條件(活潑類(アクティブ)、自律類(ストイック)、懶惰類(レイジー)、普通類(ノーマル)、室內類(インドア))、拍檔心情唔好時運動量高。

問：點解拍檔精靈嘅活力值會由0開始計過？
啱啱進咗化嘅拍檔精靈活力值會由0重新嚟過。

問：有咩方法可以有效提高度到嘅心跳？
就算靜心度一次會度得好啲，由於心跳每5分鐘會自動重新計算一次，所以重新計算心跳都只可以維持5分鐘。

問：隻活力手環好似度唔到心跳？
有幾樣嘢可以檢查下：

重新計算心跳時睇下上下數值係咪都係65，如果係可以當隻活力手環度唔到心跳，可以重新計算心跳直至數值高於65。

除低活力手環，喺心跳頁面長撳上掣+下掣就會進入重新計算心跳嘅頁面，呢個時候睇下活力手環嘅感應器爲止有冇閃綠燈(唔好直視)，如果冇嘅就代表感應器壞咗，可以重新開機再睇過。

可以試下飲杯水再重新計算心跳，因爲身體比較缺水時心跳會減慢，所以可能要飲夠水。

問：里數嘅意義？
實際意義真係唔係好大，不過喺特別任務同埋冒險任務都有里數目標，而且每50里數會加1活力值。

問：點解啲里數會由頭計過？
每次進化或者設定時間後啲里數都會重新計過。

【FAQ5】數碼精靈、任務

問：一隻活力手環最多可以養到幾多隻數碼精靈？
最多可以一隻，拍檔精靈一隻同backup精靈一隻。不過只有換咗喺主畫面嘅拍檔精靈可以進行遊戲內容，兩隻精靈可以隨時互換。

問：點先可以刪除數碼精靈？
可以將唔想要嘅數碼精靈放喺活力手環裏面，然後洗機。或者可以喺專用app嘅保存室畫面揀自己唔想要嘅精靈，轆到最底撳「デリート」。

問：一日最多可以攞到幾多獎盃？
正常總共21隻：普通任務1日1次1隻共1隻、越級任務1日4次2隻共8隻、特別任務1日4次3隻共12隻。越級任務要得到「GREAT」先會有2個﹐如果「GOOD」就只會得1個。特別任務只要完成就一定會有3個。由於任務每日會重新計過，只要將時間較做23:59，等佢自己過00:00(進入設定頁面嘅第一版，設定時間頁面會顯示時鐘圖案，撳下掣開始設定。設定順序：年→月→日→時→分(24小時制)，過咗00:00之後再用同樣步驟較返正確嘅日期同時間) ，就可以重新挑戰任務，攞超過21個獎盃。

問：點解啲獎盃數目少咗？
每次進化後都會重新計過啲獎盃。

問：點解過咗一日啲任務都未重新計過？
只要將時間較做23:59，等佢自己過00:00(進入設定頁面嘅第一版，設定時間頁面會顯示時鐘圖案，撳下掣開始設定。設定順序：年→月→日→時→分(24小時制)，過咗00:00之後再用同樣步驟較返正確嘅日期同時間)，就可以解決。

問：越級任務(Hard Mission)點先可以做到「GREAT!」？
每次聽到活力手環響一下先代表計一次，活力手環錶面向前前後揈比向側前後揈有效，不停揈至時間結束就可以穩定攞到「GREAT!」。

問：點解明明裝咗特別任務(Special Mission)入到活力手環特別任務頁面都冇顯示？
特別任務由專用app轉移到活力手環時就會開始計時，唔會有顯示。當每個任務達成後就自動進入下一個任務並開始計時，完成後就會自動顯示「MISSION CLEAR!」然後顯示得到嘅獎盃數目(3個)。每個任務係獨立進行，戰鬥場數唔會共用。中間可以將精靈轉移返去專用app睇下任務進行情況。

問：有冇特別任務(Special Mission)嘅完成技巧？
特別任務有4種：「60分鐘內達成6000里數」、「60分鐘內達成360活力值」、「60分鐘內戰鬥10次以上」、「60分鐘內贏6次以上」，唔可以重複。
建議裝任務應該分至少兩次，「60分鐘內達成6000里數」應該獨立進行，其餘3種一旦完成就唔使等60分鐘，可以短時間內挑戰完；而「60分鐘內達成6000里數」要搵1個鐘不停行路，最好停低嘅時候都錶面向前前後揈下隻手，大概第45至50分鐘左右就會完成。

問：冒險任務(Adv Mission)打嚟做咩？
惟一用處就係解鎖隱藏進化，所以如果冇好想解鎖隱藏進化可以直接跳過。

問：點解拍檔精靈同backup精靈嘅冒險任務進度唔同？
如果佢哋係嚟自兩張唔同嘅dim咭，進度唔會同步。不過如果佢哋係嚟自同一張dim咭，要將兩隻數碼精靈喺backup換兩次，或者將兩隻數碼精靈轉移落專用app再轉移返去活力手環。

問：點樣退出冒險任務？
長撳下掣可以退出冒險任務，返去主畫面。

【FAQ6】戰鬥、受傷治療、死亡通知、數碼精靈進化、Backup

問：點先可以進入NFC戰鬥？有咩需要留意？
NFC戰鬥可以喺主畫面時直接將活力手環嘟落NFC裝置﹐就可以開始戰鬥。如果見到敵人覺得打唔贏﹐可以喺敵人嘅插畫出現嘅畫面長撳下掣逃走﹐逃走係唔會有任何懲罰。不過打贏打輸同平時暴龍機原理一樣都係靠運氣﹐有時唔需要對戰果太認真﹐除非拍檔精靈輸咗並且受咗傷。

問：見到隻嘢打唔過，可以點樣走佬？
要注意退出戰鬥只有一個畫面，就係顯示敵人精靈嘅插畫，呢個時候要馬上長撳下掣直至見到拍檔精靈逃走嘅畫面爲止先至係成功。如果見到插畫等太耐會自動開始戰鬥，呢個時候就走唔到佬，雖然都會有機會打贏。

問：戰鬥時可以點樣提高贏嘅機會？
戰鬥輸贏有運氣嘅成分，所以每場戰鬥都係運氣。不過總括而言打嘅敵人儘量搵返啲同自己同級或者低級啲嘅精靈都會有較高嘅機會打贏，鍾意都可以撞下運氣挑戰高一級嘅敵人。

問：如果隻活力手環上面兩隻精靈係嚟自兩張唔同嘅dim咭，拍檔精靈會唔會遇到backup精靈嘅進化綫敵人？
唔會。所有情況下拍檔精靈只會遇到屬於自己進化綫嘅敵人。

問：點解明明贏咗不過敵人未輸？
因爲每邊都會攻擊一次先會結束一個回合，一邊打中另一邊就會唔中。由於成功命中，所以敵人都會唔中一下，回合結束先會顯示敵人打輸。

問：點樣知道隻拍檔精靈有冇受傷？點樣知道佢有冇治療緊？
受傷時拍檔精靈頭頂會有個骷髏頭圖案﹐治療時拍檔精靈頭頂會有十字圖案閃下閃下﹐通常擺喺度十字圖案就會自動出現。不過要留意如果進入咗冒險任務﹐會見唔到拍檔精靈受傷或者治療緊嘅狀態﹐要記得間中長撳下掣返去主畫面檢查下拍檔精靈嘅狀況。

問：如果拍檔精靈受傷點算？
一般情況都可以等佢自己好返﹐不過由於官方最近補充原來數碼精靈一日受傷次數唔可以超過4次﹐所以建議將時間較做23:59，等佢自己過00:00(進入設定頁面嘅第一版，設定時間頁面會顯示時鐘圖案，撳下掣開始設定。設定順序：年→月→日→時→分(24小時制)，過咗00:00之後再用同樣步驟較返正確嘅日期同時間)，咁樣受傷次數就可以重新計過﹐大大減低死亡嘅風險。

問：數碼精靈點解死咗？
以下4個原因會造成死亡：連續24個鐘冇戴活力手環/度唔到心跳、喺受傷嘅狀態下打輸3場戰鬥、1日內受傷4次(就算好返都照計)、喺受傷狀態下維持1個鐘運動量Lv.2或者以上。不過要留意如果進入咗冒險任務﹐會見唔到拍檔精靈受傷或者治療緊嘅狀態﹐要記得間中長撳下掣返去主畫面檢查下拍檔精靈嘅狀況。建議受傷後將時間較做23:59，等佢自己過00:00(進入設定頁面嘅第一版，設定時間頁面會顯示時鐘圖案，撳下掣開始設定。設定順序：年→月→日→時→分(24小時制)，過咗00:00之後再用同樣步驟較返正確嘅日期同時間)，咁樣受傷次數就可以重新計過﹐大大減低死亡嘅風險。

問：數碼精靈死咗會點？
死咗就會變成蛋然後重新出世，所有資料會從頭嚟過而唔會有之前嘅紀錄。

問：咩時候先會計進化需要嘅時間？
進化需要嘅時間只會係喺拍檔精靈喺主畫面而唔係瞓緊覺嘅時候先至會扣，其他情況一律唔會扣。

問：點樣可以取消進化？
喺佢要進化嘅時候長撳下掣就可以取消進化並返去主畫面。

問：點樣知道有冇解鎖到隱藏進化？
可以入去冒險任務頁面，如果見到紅色「GOAL」字眼，就代表i已經解鎖咗隱藏進化。

問：隱藏進化一定要過關嗰隻先可以進化？
首先要確認拍檔精靈可唔可以進化成隱藏進化嘅路綫，由於進化路綫唔同，過關嗰隻甚至係進化唔到。
如果你想畀另外一隻精靈進隱藏進化，首先要同步大家嘅冒險任務進度，你要將兩隻數碼精靈喺backup換兩次，或者將兩隻數碼精靈轉移落專用app再轉移返去活力手環，再進入冒險任務頁面確定進度已經同步並且有紅色「GOAL」字眼。

問：解鎖咗隱藏進化係咪等於其他dim咭嘅隱藏進化都解鎖埋？
唔係，每張dim咭係獨立咁計。

問：聯展進化原理係點？可以點樣預測進化結果？
聯展進化分爲兩種聯展進化，一種係隨意聯展進化，另外一種係固定聯展進化。將可以聯展進化嘅拍檔精靈同埋backup精靈放喺活力手環3個鐘就會開始聯展進化，取消進化可以長撳下掣，返去主畫面。
隨意聯展進化結果取決於拍檔精靈同backup精靈﹐拍檔精靈限制進化綫﹐backup精靈限制屬性(疫苗、資料、病毒)。拍檔精靈嘅進化可能係受限於拍檔精靈自己嘅dim咭，例如脈搏獸嘅成熟期/完全體就不過就唔受限於本來普通進化嘅路綫；backup精靈就唔一定要係同一張dim咭嘅精靈。
固定聯展進化就唔受限於精靈自身嘅屬性，即使同屬性都可以聯展進化，不過就必須係官方指定嘅兩隻精靈。

好快我就會寫好聯展進化表，請大家期待。

【FAQ7】專用App連綫、馴獸師等級

問：由專用app轉移數碼精靈時，插咗dim咭然後嘟第2次電話，點解會顯示「ERROR」？
因爲嘟完第1次之後應該插咗dim咭，等佢load完，跟指示拆走dim咭然後放好dim咭，先至撳專用app嘅「Dimカードチェック」，再嘟第2次電話。

問：由專用app轉移數碼精靈到活力手環時，點解第2次嘟部電話落去嘅時候等完活力手環「WAITING」load到後會顯示「FAILED」同埋傳送唔到數碼精靈？
因爲喺第2次嘟完電話後活力手環顯示「WAITING」時，應該馬上撳專用app嘅「転送」然後直接嘟個電話落去活力手環。成個過程需要嘟總共3次。

問：如果有兩隻活力手環連去同一個專用 app﹐可唔可以由一隻活力手環將精靈轉移去另一隻活力手環？
可以﹐不過由於一張dim咭只可以登記落一隻活力手環﹐所以另一隻活力手環必須要有另一張一樣嘅dim咭。轉移步驟同普通轉移大同小異。

問：點樣可以繼承唔同手機嘅專用app資料？
首先要申請BNID(可以喺專用app入面喺設定頁面選擇「バンダイナムコID連携」)，然後喺舊嘅電話專用app入面登入，將專員app同BNID連結。之後喺新嘅電話嘅專用app入面喺設定頁面選擇「データ引継ぎ」，再登入BNID。

問：馴獸師等級點樣升？
完成專用app入面嘅任務、包括活力手環嘅特別任務，就會提升經驗值。

問：點樣可以攞到唔同款嘅馴獸師獎牌？
當到咗Lv. 20就會開始每級有唔同款式嘅馴獸師獎牌。

【FAQ8】 Dim咭、對戰Dim咭

問：Dim咭喺洗機後可唔可以登記去另外一隻活力手環？
唔得，就算洗咗機，dim咭都係登記咗同一隻活力手環。

問：唔小心插錯對戰dim咭點算？
無論點樣插錯都好，其實隻數碼精靈都仲喺隻活力手環裏面，係冇顯示出嚟咁解。只要過10分鐘左右，隻數碼精靈就會自動出現返。

【FAQ9】活力手環設定（日期時間、wallpaper、熒幕光度、聲音、洗機）

問：點樣有新嘅wallpaper？
只要插咗新嘅dim咭就會有新嘅wallpaper，不過每次重新開機都要重新揀wallpaper。

問：隻活力手環有冇得較細聲啲嗎？
如果設定就冇得設定細聲啲，不過可以貼張膠紙喺活力手環底部嘅喇叭位置，可以令聲音細啲。

問：點樣可以解除活力手環同專用app嘅連綫？
只要洗機就可以。

想問下就咁熄機，會唔會無咗啲數碼暴龍？

今日進完戰暴，backup有鋼鐵加魯魯
點進奧米加

等三個鐘

唔會，晚晚叉完電2359>0000之後熄錶未走失過

唔該晒！

【速報】活力手環專用app維修

由於要新增dim咭資料﹐將會喺2021年4月14日(星期三)香港時間13:00至16:00維修server。維修時間有機會延長或者提早結束時間。

會送返5個「活力值UP密碼plus」﹐維修結束後會自動喺道具箱入面出現。

想問下有無巴打知道亞古獸卡嘅Adv Mission 12-14係邊幾隻？15知係嗰隻但丁惡魔

戰暴電光奧米加

好嘅thx 唔知隻機械暴龍可以打到幾多

我之前用機暴最盡打到奧米加，輸左兩次就無再打等進戰暴

其實最尾都係想整奧米加，但諗緊用鋼鐵加魯魯定戰鬥暴龍進好 睇吓邊隻可以clear到就用第二隻黎進，因為都想unlock晒兩隻hidden，就算唔進都好

戰暴輕鬆clear, 全程無俾人剋屬，最多都係疫苗打疫苗

因為加布就進鋼鐵加魯魯資料種打病毒種好似麻煩d，咁如果戰鬥暴龍搞掂晒就可以留返俾加布張卡進？

係

我都係咁進

【速報】正式版暗黑咆哮&魅影嚎叫：Dim咭套裝第0.5期「怒・暗黑咆哮&真・魅影嚎叫」將開放預訂

預訂網址：https://p-bandai.jp/item/item-1000157532/
接受預訂開始：2021年4月16日香港時間11:00
接受預訂結束：2021年5月31日香港時間23:00
派貨日期：2021年9月

收錄特點
完全體：《數碼暴龍：重啟之戰》登場嘅機械暴龍獸換裝模式、獸人加魯魯射手模式
究極體：勝利暴龍獸、究極加魯魯