迪路獸/聖龍獸本命﹐數碼暴龍VB Vital Bracelet活力手環資訊平台

呢度會有活力手環嘅資料﹐同之前嘅post風格唔同﹐主要整合並翻譯資訊﹐如說明書/官方情報/新聞等。希望一次過解答討論區有關基本操作嘅問答。

說明書內容(一)

包裝內容(各一)：
活力手環(錶面+錶帶)
Impulse City Dim咭
(如適用)特典Dim咭
叉電綫(USB-A/micro-USB)
對戰Dim咭

着機方法
活力手環背面開關掣向左邊凸點方向啪掣。着機時請勿直望感應器嘅光綫﹐以免造成不適。
☆使用前請叉滿電﹐而且必須使用附送嘅叉電綫。如果開唔到機﹐可能因為手環冇電。

叉電方法
1. 手環電量低時﹐或者顯示電芯交叉標誌時﹐請即叉電。(叉電時請除低隻手環。)
2. 打開手環側面micro-USB叉電口蓋﹐小心駁好叉電綫micro-USB嗰頭。(micro-USB口容易變鬆﹐請每次都輕手處理)
3. 叉電綫另一頭請駁向電腦USB-A嘅插口(呢個時候會顯示叉緊電嘅標誌)。
☆請勿駁向唔係電腦嘅USB-A插口﹐以免出煙、着火等危險。
4. 叉滿電後請即拆走叉電綫。
☆如果開始咗差電都冇顯示叉緊電嘅標誌﹐或者叉咗4個鐘都唔滿電﹐請立即停止使用手環。

日期、時間設定
着機後撳上掣設定日期同時間﹐撳下掣確定選項﹐設定順序：年→月→日→時→分(24小時制)
☆當顯示「OK」時﹐可以撳上掣換成「NG」﹐撳下掣確認並從頭由年份開始設定。時鐘誤差為前後10秒內。

Dim咭登記(第一次)
由Dim咭套拆Dim咭落嚟﹐插入手環Dim咭口(唔可以用「對戰Dim咭」)﹐Dim咭裏面嘅資料輸入手環嘅時候會顯示「Waiting」字眼同郁動嘅省略號畫面﹐畫面大概會維持50秒﹐直至顯示「Dim ACCEPTED」字眼同代表嗰隻Dim嘅標誌。最後會顯示移除Dim嘅提示畫面(底部冇「FAILED」字眼)。

顯示「Dim FAILED」/「FAILED」字眼原因及解決方案
1. 用錯「對戰Dim咭」﹐請檢查清楚係咪用緊精靈Dim咭
2. 資料輸入失敗(請拆走Dim咭﹐等10秒再重複以上步驟)
3. Dim咭已被其他手環登記﹐請嘗試重新設定手環
4. Dim咭已經損毀﹐請補購新Dim咭

注意
1. 未充滿電切勿進行Dim咭登記
2. Dim咭資料輸入時切勿熄機
3. 顯示移除Dim咭提示畫面前切勿拆走Dim咭﹐以免Dim咭損毀

數碼精靈出世
將活力手環戴上手腕﹐畫面會出現「WAITING」字眼同相應Dim資料嘅數碼蛋﹐load完後「WAITING」字眼會變成「COMPLETED!」字眼﹐幼年期數碼精靈亦會孵化咗﹐自動變成主畫面。

說明書內容(三)

主畫面
由上至下順序顯示內容：
電量
時間
活力值
里數(步數)
拍檔精靈

數碼精靈精神狀況
精神狀況分為3種﹐精神狀況影響攻擊強弱同活力值等數據﹐每隻精靈變好心情嘅條件(運動量)都唔同。

由於每隻數碼精靈外表唔同﹐所以會用文字簡單描述一下
1. 心情好：數碼精靈會起身會表現活潑
2. 普通：數碼精靈會起身不過冇特別活潑
3. 心情唔好：數碼精靈會坐喺度表情冇精神而且頭頂會有舊雲。不過亦可能代表手環感應唔到你嘅心跳﹐建議試下戴緊少少

隨住心跳同里數增減﹐數碼精靈亦會改變運動狀態。

Menu
撳上掣進入menu﹐再撳一下上掣進入下一版﹐撳下掣確定。以下係menu嘅順序內容：
1. 數據(ステータス)
2. 數碼精靈(デジモン)
3. 任務(ミッション)
4. Backup(バックアップ)
5. App(アプリ)
6. 設定(設定)

數碼精靈瞓覺
唔同數碼精靈會有唔同嘅瞓覺時間﹐主要係夜晚9-12點開始(唔排除日後會有其他瞓覺模式)。

☆瞓覺時活力值唔會改變、唔可以進行任務、里數會喺每日夜晚12點從頭計算。因為唔會因為感應唔到心跳而扣活力值﹐所以推薦喺數碼精靈瞓覺時除低活力手環叉電。

說明書內容(四)

數據
數據頁面可以順序確認(1)活力值、(2)心跳、(3)重新計算心跳、(4)里數四個項目。撳上掣去順序瀏覽。

(1)活力值
進入數據頁面嘅第一版，上方數字代表活力值。活力值由「心跳」、「里數」、「戰鬥輸贏」等因素增減，上限分別係2500(成長期)、5000(成熟期)、7500(完全體)、9999(究極體)，下限係0。唔同嘅數碼精靈有唔同嘅增加機制，以下係基本增減活力值嘅準則：

心跳：心跳基準值越高，獲得嘅活力值越多。
里數：里數每升50就會獲得1點活力值，每三分鐘會判定一次。
戰鬥輸贏：以下係每次戰鬥嘅增減圖表，例如自己嘅成長期打贏敵方嘅成熟期，就會獲得500點活力值。

數碼精靈嘅精神狀況亦會影響增加嘅活力值，可以參考樓上「主畫面」嘅說明
心情好：以上增加嘅活力值2倍
心情唔好：以上增加嘅活力值減半

如果數碼精靈喺非瞓覺狀態除低手環每5分鐘會扣50活力值。3分鐘之內未滿30里數或者5分鐘之內未感應到心跳，都會當除低咗手環。用對戰Dim咭傳輸數碼精靈時活力值會維持唔變。

(2)心跳
進入數據頁面嘅第二版，會見到有個心心，下方會有兩組數字。上面嘅數字係代表基準值，即係數碼精靈嘅運動量跌至LO範圍嘅最低心跳(每分鐘)；下面嘅數字係代表現在值，即係最近5分鐘嘅心跳(每分鐘)。

心跳只屬遊戲數據，並非精密醫學。心跳65以下都會表示65，如果長期維持65可以嘗試將手環戴緊少少。

(3)重新計算心跳
喺心跳頁面長撳上掣+下掣就會進入重新計算心跳嘅頁面，畫面會出現「WAITING」字眼、心電圖圖案、數碼精靈。重新計算心跳會更新心跳頁面嘅兩組數字。

(4)里數
進入數據頁面嘅第三版，會見到有腳印圖案，下方嘅數字就係里數。

里數只屬遊戲數據，並非反映實際步數。

(5)返回主畫面
進入數據頁面嘅第四頁，會見到一個倒頭箭嘴，撳下掣會返回主畫面。

說明書內容(五)

數碼精靈
數碼精靈頁面可以睇到(1)數碼精靈基本資料、(2)數碼精靈數值、(3)戰績、(4)獎盃四個項目。撳上掣去順序瀏覽。

(1)數碼精靈基本資料
進入數碼精靈頁面嘅第一版，會見到三行文字。由上而下順序爲：名稱、屬性、飼養日數。撳下掣會見到數碼精靈嘅進化紀錄。數碼精靈屬性基本分爲3種：Va疫苗屬性、Da數據屬性、Vi病毒屬性。

(2)數碼精靈數值
進入數碼精靈頁面嘅第二版，會見到DP(能力)、HP(血量)、AP(攻擊力)三個數值。

(3)戰績
進入數碼精靈頁面嘅第三版，會見到「BATTLE WIN」字眼嘅上方及下方兩組數字。上方係勝率，係由下方嘅分數乘以100%所得；下方分子爲打贏嘅盤數、分母爲總共戰鬥盤數。

(4)獎盃
進入數碼精靈頁面嘅第四版，會見到獎盃圖案，下方有組數字。數字代表數碼精靈累積獎盃數目﹐完成唔同任務會攞到唔同數量嘅獎盃。

(5)返回主畫面
進入數據頁面嘅第五頁，會見到一個倒頭箭嘴，撳下掣會返回主畫面。

任務
任務頁面可以睇到(1)普通任務、(2)越級任務、(3)特別任務、(4)冒險任務四個項目，完成任務可以攞到獎盃。撳上掣去順序瀏覽。

(1)普通任務
進入任務頁面嘅第一版，會見到「NORMAL MISSION」字眼，撳下掣開始挑戰。一日只會有一次試嘅機會，任務內容係里數、活力值、戰鬥、贏數嘅目標，必須喺數碼精靈瞓覺之前過關，只要過關就會出現「CLEAR」字眼並攞到1個獎盃。

(2)越級任務
進入任務頁面嘅第二版，會見到「HARD MISSION」字眼，撳下掣開始挑戰。越級任務有四種訓練任務，每種訓練一日只會有一次試嘅機會，順序係深蹲、仰臥起坐、打拳、跑步，要完成一種先可以進入下一種，下方會附上限制嘅時間/次數。過關條件主要係心跳，過關時顯示「GOOD」字眼會攞到1個獎盃，顯示「GREAT」字眼會攞到2個獎盃。

(3)特別任務
進入任務頁面嘅第三版，會見到「SPECIAL MISSION」字眼，撳下掣開始挑戰。特別任務要同app連綫先會更新，模式同普通任務類似，不過可以逐一過關後再連綫app，最多可以做4次任務。

由於特別任務取決於app嘅發展，有可能喺冇預告嘅情況下唔再更新或者開放。

(4)冒險任務
進入任務頁面嘅第四版，會見到「ADV MISSION」字眼同路標圖案，撳下掣進入。首先會見到Dim咭嘅標誌，下面有第幾關，然後再下面可以撳上掣選擇想挑戰嘅關數。決定好挑戰邊關後，可以撳下掣開始挑戰，會顯示「GO!」字眼同拍檔精靈。跟住會顯示主畫面，不過活力值就變成任務要你達到嘅目標里數，只要達到目標里數，就可以展開BOSS戰。如果打贏就可以解鎖下一關，如果輸咗依然可以再次挑戰。

放棄冒險任務方法
長撳下掣，會顯示「STOP?」字眼，再撳下掣就可以放棄任務。3秒後會自動返去任務頁面，可以返去冒險任務再次挑戰放棄咗嘅關數。

說明書內容(六)

戰鬥
當手環錶面喺冒險任務途中嘟落NFC機，就可以展開戰鬥。(NFC機例如自動販賣機八達通讀取器、入閘機車票讀取器、智能電話NFC功能等，請確定NFC機係開着，而且有部分NFC機未必對應活力手環)只有成長期開始先可以參與戰鬥，幼年期(I&II)都唔得。

當主畫面閃下閃下就代表成功嘟到NFC機，就會顯示充滿「WARNING!」嘅畫面同埋敵方精靈嘅插畫，呢個時候撳上掣(建議)就可以開始對戰；長撳下掣就可以逃走。敵方精靈係隨機出現，戰鬥亦全自動化，每盤互相攻擊一次，最多5盤。HP多嘅一方就贏，當然HP畀對方扣到0嗰方就即輸。

上面圓圈係HP計，黃色係自己嘅HP，紅色係敵方嘅HP。如果戰鬥中途出現自己拍檔精靈嘅插畫，代表拍檔精靈要使出必殺技，唔同精靈使出必殺機嘅時間都唔同。

如果打贏打輸會顯示活力值嘅改變(可以參考樓上嘅活力值個表)，打輸有可能會受傷甚至死亡。更新完活力值之後會自動返去主畫面。

戰鬥嘅輸贏受到數碼精靈嘅4方面影響，DP會影響攻擊準確度、屬性相剋會增減攻擊效果(疫苗剋病毒、病毒剋數據、數據剋疫苗，Fr係第四種無相剋屬性)、活力值影響HP、數碼精靈嘅精神狀況會影響攻擊力。

受傷治療
受傷時，拍檔精靈個樣會同心情唔好嘅時候一樣，需要唔同嘅時間去治癒唔同嘅傷。
第一次受傷：10分鐘
第二次受傷：30分鐘
第三次受傷：60分鐘
療傷時拍檔精靈頭頂會有加號標誌，資料完咗活力手環會響同埋見到拍檔精靈活躍幾下，之後會自動返去主畫面。如果受傷嘅狀態再連續三次打輸，拍檔精靈會死。

死亡通知
如果拍檔精靈死嘅時候，畫面會變成黑色並顯示心電圖同坐低咗嘅拍檔精靈，心電圖慢慢變成一直綫。撳下掣可以領取拍檔精靈嘅成績表，然後拍檔精靈會投胎成新嘅數碼蛋。

除咗受傷嘅狀態再連續三次打輸會死之外，連續唔戴活力手環24小時都會死。不過，熄機或冇電24小時唔會令到拍檔精靈死。當拍檔精靈死咗，就唔可以繼承活力值、里數、輸贏、獎盃等落去下一隻拍檔精靈。

數碼精靈進化
拍檔精靈嘅進化型由活力值、獎盃數目、贏率、進化所需時間控制，以下係唔同進化階段進化去下個階段需要嘅時間表，成長期開始先可以參與戰鬥同任務。幼年期外，進化後活力值、數碼精靈嘅精神狀況、贏率、獎盃、受傷狀態會全部重新計過。

由孵化/進化完成後就會開始計下一個進化階段進化需要嘅時間，如果到達咗時間不過未滿進化條件，進化需要嘅時間會從頭計過。

聯展進化
聯展進化由兩隻已公佈可以聯展進化嘅精靈觸發，一隻放手環上做拍檔精靈、另一隻數碼精靈放手環backup，進化後只有拍檔精靈會進化，backup嘅數碼精靈會維持不變。必須成熟期或以上嘅進化階段先會發生(說明書個表可以直接無視，因爲之後可能會出唔跟個表進化嘅聯展進化)，如果唔想觸發聯展進化，就必須確認backup嘅數碼精靈未滿進化條件。

取消進化
喺進化畫面出現心電圖時長撳下掣，就會取消進化。

Backup
Backup頁面撳下掣後會顯示「BACK UP」字眼，然後會見到拍檔精靈，上方有「OK」字眼，撳下掣確定backup數碼精靈；撳上掣「OK」字眼會變成「CANCEL」字眼，再撳下掣取消backup。Backup進行時會顯示「WAITING」字眼同準備backup嘅數碼精靈，直到「COMPLETE!」字眼出現，代表backup成功，會自動返去主畫面。

如果本身已經有backup嘅數碼精靈，backup動作會將拍檔精靈同backup嘅數碼精靈互換。

lm

epic

而家仲邊到有黄錶連特典現貨

Omg 巴打好用心。。

叉電洗唔洗熄機

點解我任務嗰個掣冇反應嘅

每次熄完機 重開又要重set日期時間係咪正常

Btw樓主好有心

訂左都要等5月先有錶

lm

說明書內容(七)

App連綫
活力手環menu嘅App頁面撳下掣後會顯示「TOUCH!」字眼同波紋，呢個時候就喺電話開數碼暴龍VB個app打開「デジモンをアプリに転送する(將拍檔精靈轉移過嚟app)」嘅頁面，喺app度撳「転送(轉移)」，然後將活力手環嘟落電話NFC感應嘅位置，連綫過程大概3秒。畫面會出現「WAITING」字眼同郁動嘅省略號﹐load完後「WAITING」字眼會變成「COMPLETED!」字眼，代表拍檔精靈已經成功轉移到app。之後活力手環會自動返去主畫面，而主畫面會冇咗拍檔精靈。

如果出現「FAILED」字眼，代表轉移失敗，請試過。

app下載網址：https://toy.bandai.co.jp/series/vb-digitalmonster/app/
個網轆落去有測試過可以行嘅機種，不過唔代表個表冇你用緊嘅電話就唔支援，個表冇都可以至少download試下。

每隻活力手環只可以配對一個電話app，如果要配對第二部電話，請先洗機；而一個app可以冇限制配對手環。

注意
1. 未充滿電切勿進行app連綫
2. App連綫時切勿熄機
3. 冇提示畫面出現之前切勿中斷活力手環同NFC感應位置嘅接觸，有可能會冇咗隻拍檔精靈。

由App過返隻拍檔精靈去活力手環(需要準備Dim咭)
活力手環menu嘅App頁面撳下掣後會顯示「TOUCH!」字眼同波紋，呢個時候就喺電話開數碼暴龍VB個app打開「デジモンをバイタルブレスにもどす(將拍檔精靈轉移返去活力手環)」嘅頁面，喺app度撳「Dimカードチェック(檢查Dim咭)」，然後將活力手環嘟落電話NFC感應嘅位置，連綫過程大概3秒。畫面會出現「WAITING」字眼同郁動嘅省略號﹐load完後「WAITING」字眼會變成插入Dim咭嘅提示畫面，呢個時候將對應嘅Dim咭插入手環Dim咭口(有啲情況未必需要檢查Dim咭)。

Dim咭裏面嘅資料輸入手環嘅時候會顯示「Waiting」字眼同郁動嘅省略號畫面﹐畫面大概會維持50秒﹐直至顯示「Dim ACCEPTED」字眼同代表嗰隻Dim嘅標誌。跟住會顯示移除Dim嘅提示畫面(底部冇「FAILED」字眼)。

拆走Dim咭後再入活力手環menu嘅App頁面撳下掣後會顯示「TOUCH!」字眼同波紋，呢個時候就喺電話開數碼暴龍VB個app度撳「Dimインストールチェック(檢查Dim嘅安裝)」，然後將活力手環嘟落電話NFC感應嘅位置，連綫過程大概3秒。畫面會出現「WAITING」字眼同郁動嘅省略號﹐load完後「WAITING」字眼會變成「COMPLETED!」字眼，代表拍檔精靈已經成功轉移到app。之後活力手環會自動返去主畫面，而主畫面會有返拍檔精靈。

如果出現「FAILED」字眼，代表轉移失敗，請試過。

注意
1. 未充滿電切勿進行app連綫
2. App連綫時切勿熄機
3. 冇提示畫面出現之前切勿中斷活力手環同NFC感應位置嘅接觸，有可能會冇咗隻拍檔精靈。

馴獸師等級
喺主畫面撳下掣，會顯示以下畫面：

已經同app連綫：會顯示馴獸師獎牌圖案，隨等級總共有15款，獎牌下方會有馴獸師等級；如果冇升過馴獸師等級，會顯示空白獎牌圖案，獎牌下方會有三條橫綫。

未同app連綫：會顯示「CONNECT APP」字眼並冇獎牌圖案。

馴獸師等級唔會因爲玩活力手環而升跌。

勁詳細

未收到錶先推

lm

未睇先推

實用

推