出沒於 Area 072X
我們緊急剎停步伐,瞪向文字倒抽一口涼氣!
配合位置編號的轉換,畫面切換至另一條走廊,那該死的走廊眼熟得要命⋯⋯熟識得⋯⋯
不正正就是我們房外的走廊嗎!
鏡頭還拍到指示牌,寫著「第七座大樓二樓」!
天!有沒有如此巧合啊!
我抱住內心一絲希望問道:「其實會唔會係地鐵公司整蠱我哋咋,邊會咁多鬼鬼怪怪呀?」
我的聲線沉鬱得幾乎連我自己也認不出來。
「係啦係啦,」Angus罕有地附和我道:「地鐵公司啱啱先殺完 Jean、我哋又未開始下一輪去搵乘車指南,邊有咁快知我哋做唔到指南而要捉我哋呀!佢哋都係怕買家悶,先搵啲餘慶節目⋯⋯啫?」
此刻我的神經極之繃緊,他簡單一句話便能使我有點惱怒,我說:「喂你講得肯定啲得唔得呀!」
「噓!」彥曦把食指放在嘴巴前,「血腥公主應該唔驚一般物理攻擊,我哋打唔贏佢!」
她正焦急在思考對策,不斷在房裡下意識地走回走動。
Angus搬起書桌前的木椅,斜斜放在房門前面,調較角度剛好利用椅背扣緊門把,手法相當純熟。
他炫耀般指指「傑作」說:「每次去旅行喺酒店房,如果得我一個人訓就會咁整。咁樣出面就算有瘋狂 Fans垂涎我嘅美色,點入都入唔到嚟!」
我馬上嗆道:「血腥公主開唔到門,都可以穿門入嚟囉!」
彥曦吐槽道:「重點係無人會垂涎你嘅美色囉,因為你本身就無!」
我衝去窗台,嘗試打開窗,結果跟剛才被肢解的職員一樣,窗被鎖上。
而另一個逃生出口,即房門更是試都不要試,因為血腥公主已經現身於走廊上!
她經樓梯慢慢一步步地走上二樓,然後佇立在走廊最前頭。可惡,千萬不要過來!