Miya補充道:「留你哋有用㗎。」
彥曦怔住,「咩叫有用呀?」
Miya答道:「 我哋之所以救你哋,最大原因當然係人道救援啦,其次,係你哋唔可以死,要幫我哋捉晒組織所有人。」
見我們一頭霧水,她解釋:「越高級嘅人,喺虐殺活動越接近尾聲嘅時候先出現。等埋組織首腦 X嚟到,我哋先出手一次過捉人,如果唔係會打草驚蛇。
你哋三個走晒或是太早死晒,地鐵公司一定會提早結束活動,咁我哋又點拉人呢?」
「哦哦!」Angus也不客氣,「咁即係用我哋做餌啦!有無搞錯呀,會死人㗎!」
原來如此!打從一開始,我們八個已經注定被淪為工具!
以組織主導的「地鐵公司」視我們為被獵殺、虐殺的生財工具;Miya她們則利用我們來引大蛇出洞!
剎那間有種被出賣的感覺,雖然 Miya他們確實又沒有義務要救我們離開。
「咁即係點?你要我哋返去搵地鐵公司?」我憤然道:「你唔救我哋就算!我哋既然走到嚟呢度,自己識搵路避開地底人走,無必要再為你哋冒險返去搵咩垃圾乘車指南!」
她早已預料到我們不肯回去,擺擺手,「其實你有無諗過點解列車車窗玻璃唔似車站出口門嗰種,而係畀你哋打得爛?點解地鐵公司咁容易俾你哋走到?」
彥曦詫異,「咩俾我哋走呀,係佢哋唔敢入嚟、驚咗地底人先唔敢追我哋咋嘛!」
「驚地底人只係其中一個原因。」Miya微笑著搖搖頭,「地底隧道起到好似迷宮咁,當你哋一嚟列車走落去隧道,地鐵公司會打開機關,令你哋不斷兜嚟兜去,最終一係入去地底人巢穴,一係行返去車站,你哋點都走唔到出去⋯⋯」
「唔講太多喇,」她故意賣關子似的,「等陣我指條路你哋行啦。講太多俾你哋知,地鐵公司可能會 Feel到你哋唔同咗。
嗱講明先呀,依家我哋係做一單交易,你哋要確保地鐵公司唔知我哋存在,而我哋就盡量幫你哋留住條命仔,OK ?」
「唔夠,」彥曦握緊拳頭,「地鐵公司搞到我哋咁,我要報仇!」尤其對梅督維尼和迪米納議員。
Miya按按彥曦的肩膀,語重深長道:「無錯,所以你哋更加要保住條命,唔可以咁易死。信我,一時三刻係未得住,你哋要堅持落去!」
我們三人已經消完毒、塗好藥膏,Miya開始領我們往反方向走,全然不理會身後的戰事,似乎很信任自己的隊友,「放心啦,我哋只係擋住地底人一陣,唔會殺死佢哋。」
Angus啞然,「下,我哋啲傷口咁深起碼包下紗布啦,萬一我留疤點算呀?」這難道不是彥曦該問的問題嗎?