[腳痛勝景美食團]用12日獨遊關西 (山陰‧琴平‧天橋立‧京阪)

萩之茶屋

google map 好似係會用返當地人嘅速度去計，而日本人步速好似係全世界最快

我估佢應該係用咗日本返工計速度去計掛

東京d社畜真係行得好撚快
快過香港果d一截

萩之茶屋
第一次去日本嗰陣諗住行動物園
但之前搭夜機訓得唔好
一去到心齋橋酒店放低行李就過去
點知個人唔夠訓呆呆地出錯咗
行咗陣已經覺得氣氛唔對路
個GPS又壞壞地
唯有亂行
最後行咗去萩之茶屋

下晝食飽番酒店訓一陣嘅時候
搵一搵先發覺自己行咗入飛田新地

朝早品川出站人潮係勁誇張
好似步操咁 好有規律 企得密過香港好多

Day 11
前10日既JR Quota已經用完
今日開始就剩係搭私鐵
用番係KIX買既京阪 + Osaka Metro觀光乘車券一日券
包全日京阪電鐵同大阪地鐵無限上落車
而且係磁飛，唔駛人手入閘，插閘機就得

為左食你可以去到幾盡？
就係專登6點起身去母雷公咁遠食麵包
未夠7點我已經係淀屋橋上特急



係中書島落車轉宇治線係黃檗站落
之後轉左再轉左一路直行
中間會經過京都大學宇治校區


再行5分鐘就會聞到少少焗麵包味
就會見到麵包店前既停車場


たま木亭 [Tabelog評分：3.76]
京都長期都係全日本麵包消費量頭幾名
所以麵包店好多，款式都好多
但呢間麵包店有乜咁特別呢
就係長期都係京都麵包排行榜頭幾位
亦係Tabelog西日本麵包百大名店
咁啱我又去開宇治，咁就順便試埋佢
但呢間野都好串既，剩係開星期四至日
如果撞埋Golden Week就直頭幾個星期唔開
7點鐘開門，賣哂就早收
而我8點鐘未到就踏入呢間舖



一入去就已經見到10個人買緊麵包
大部分睇落似係街坊同學生
梗係啦，除左我之外邊有遊客咁早專登走去食麵包
就咁望落都起碼有30種麵包俾你揀
仲有凍櫃放啲有cream既麵包
因為我早到所以接近每一款都齊
每個包都有個牌介紹佢既特色
但你可以見到其實啲麵包一啲都唔平
大部分都要250yen或以上
今次我剩係買左4個，都要成千yen


店入面冇位俾你食
所以我做左一樣係日本好無禮儀既行為
就係邊行邊食
首先食既呢一個係博多 (210yen)
呢舊野係法包既質地再加脆米去焗
所以咬落去跪跪地又帶有少少韌
本身佢用左好多明太子以為佢會好鹹
但係個包有少少辣同甜
中和左明太子個鹹味，反而帶出個香味
不過因為佢都幾濃味下，都要飲下水


行番去黃檗站見到上低音號poster
因為京都動畫總部係宇治
另外上低音號故事背景都係宇治
所以呢啲Poster周街都係
btw京都動畫RIP


好快又到左宇治
但天氣不似預期


之後行左去久美子成日練上低音號嗰個位度坐
專注食埋啲麵包

ベーコンハース (200yen)
呢個煙肉包入面既煙肉唔係一塊塊
而係一舊舊，所以好滿足
而且咬第一啖係脆口，入面就軟
果然新鮮出爐真係正好多


クリームクロワッサン (260yen)
牛角包一咬落去就粉碎
證明佢啲酥皮好薄
Custard好濃好香甜但唔滯
加埋一齊食好夾


黒豆のクリームパン (240yen)
呢個係奶油麵包+黑豆Custard
咬落去好軟熟，仲有麵粉既香味
而且包入面仲有幾粒黑豆
加埋custard一啖食落去好滿足

食飽飽就去第一個景點 - 宇治上神社
當年古京都遺址成為世界遺產
宇治其中兩個建築獲得左古京都遺址既認證
第一個係平等院
作為古代日本對極樂世界想像既具現化
而入面既鳳凰堂亦認定為日本國寶
所以好多人一去宇治都必定去呢個景點


但另一個被人忽視既就係宇治上神社
其實都只係係宇治川平等院既對岸
但佢本身都係日本國寶
甚至FC到係現存最古老既神社建築
大約建於1060年


既然去到宇治上神社
就順便訓練下體能上後面既大吉山睇風景
我既步速就大約20分鐘行到上去
如你所見，斜就唔算斜既
但係都係keep住同一斜度冇平路
上到山都有啲索氣



一上到去就見到成堆老人家上黎晨運
因為而家都只係朝早9點
佢地見到我心諗，做乜有個後生仔係度



係呢個大吉山觀景台可以睇到宇治川西岸全景
左下角就可以高空望到鳳凰堂


上到山呢度都只係20度


今日天氣麻麻
睇完一陣風景就行落中村藤吉本店
未到10點已經有一堆人等開門




不過我今日既目標唔係呢間
因為之前食過
而係對岸既伊藤久右衛門 宇治本店
[Tabelog評分：3.68]
要行番1.1km返去
過左宇治橋之後仲要係暗斜


因為位置比較遠離火車站同遊客區
所以真係好少人，行得好舒服
到我坐低既時候間舖都係得3個客


抹茶パフェ (よくばり) + 冷抹茶 (1380yen)
係宇治食抹茶本身比較貴
但係杯野擺得靚都算係值回票價
冷抹茶就係冰+抹茶
飲落好清涼，茶味好濃但唔苦
如果冰溶左或者唔夠味佢亦有抹茶粉俾你加
主菜就係呢杯抹茶芭菲
上層既料比較豐富
有抹茶餅，抹茶團子，蕨餅同白玉
蕨餅比較突出，好煙韌好香
中層就係紅豆，抹茶雪糕同抹茶粟米片
加埋一齊食口感好豐富
甜度啱啱好既紅豆同抹茶起到個好好既中和作用
令到食極都唔會覺得滯
下層就係抹茶蜜，雲呢拿雪糕同抹茶啫喱
本身以為抹茶蜜會好甜，但其實唔會
因為上面啲抹茶雪糕溶埋落去撈埋唔會太甜
成杯抹茶芭菲各種既材料都做到好好既平衡
最後飲埋冷抹茶做收尾
口中既甜味一掃而空，感覺啱啱好
搞到我想叫多個set，不過少食多滋味
留番下次去關西再食多次

食完抹茶芭菲先11點幾
之後又返大阪Hea
今次去天神橋筋商店街
因為聽講啲野好平
行番去京阪宇治站搭番去中書島站
之後搭特急去北濱落車
轉Osaka Metro係南森町落
本身天神橋筋商店街好撚長
有6丁目，橫跨3個地鐵站
係南森町就會係2丁目中間
就算行埋1丁目都唔駛行咁遠回頭路
行到去6丁目就有地鐵站返梅田



天神橋筋商店街最多人係第4至6丁目
因為4丁目有JR環狀線天滿站同Osaka Metro扇町站
6丁目就係天神橋筋六丁目站
有阪急同Osaka Metro堺筋同谷町線
其他段都係冇乜人


玉出超市係4丁目，出名平
但係呢間野係好似比我之前去開既更加多平野
買滿1000yen + 1yen就有泡芙
所以keep住好多人幫趁




行完天神橋筋商店街就返梅田行
因為都未真正行過嗰頭
不過人實在係太多都係冇乜癮
不過靚女都幾多，始終係大城市


HEP FIVE呢舊裝置藝術真係唔太識欣賞


之前係姬路食なか卯送左張coupon送炸雞
呢晚就食なか卯用左佢
炭火焼き親子丼 (並) + とん汁 + 唐あげ
親子丼係なか卯其中一個招牌菜
呢個炭火焼き親子丼就係啲雞肉有用炭火燒過
啲雞好有炭香同好滑，但有雞皮我就麻麻地
蛋就真係好有蛋味同好滑，好多蛋汁
配埋佢淋上面個甜甜地既汁十分之送飯
豚汁淡過松屋但都幾多菜
送既炸雞炸得乾身但多汁，但鹹左少少


之後返酒店執行李準備第二日返香港了
.........

Day 11 完

果一帶真係夜晚唔敢去

Day 12
唉話咁快就Last Day
作為交通魔童既我都係用番Day 1個方法
係地鐵售票機買關西機場地下鐵特價通票
可以係難波停一停行一行，臨去機場先搭南海電鐵
同埋當啲fd聽到我講我住梅田
佢地會叫我搭JR特急去KIX好方便
但其實呢個唔係事實
はるか係唔停大阪站架
はるか離開新大阪之後
會經梅田隔離既梅田貨物線駛入環狀線去天王寺
因為中間會望到梅田堆高樓
所以會有人有錯覺覺得有停大阪
而大阪站得關空快速去KIX
仲要唔係總站又要停好撚多站
我都係搭南海電鐵有位坐好過


係難波站放完行李之後
就去今日唯一一個行程 - 黑門市場


每次黎親都幫趁呢間舖飲豆漿
好香豆味又好濃


本身想去黑門三平睇下有乜正野食
但今日啲大拖羅質素麻麻
反正又唔係平，不了


之後就去食章魚燒
たこ焼道楽 わなか [Tabelog評分：3.21]
因為時間尚早，佢仲未整得哂啲章魚燒
所以每一舊都係新鮮整好
都等左佢10分鐘先有得食




賣相就唔駛講
啲木魚花因為熱力飄下飄下咁
好似引緊你過黎「食我啦食我啦」咁
質感上就係同日本食既章魚燒一樣
雖然係軟林林但係起碼係粉粉地
唔係上次係姫路咁
對比道頓堀Donki隔離既あっちち本舗
我覺得冇乜分別，但呢度坐得舒服啲



食完就行左去道頓堀Donki最後掃貨
同埋見到佢整好左個摩天輪之後真係有人排隊


臨去KIX前都係要屌番個松屋
カルビ焼肉定食 + 沙律 + 豚汁
今次個燒肉煎得過左火少少
雖然唔係燶到苦但係韌左少少
調味上就偏向濃味所以好好送飯

因為我走嗰日係星期六
所以都好多人搭南海電鐵



本身我買左30kg行李回程
今次29.2kg，蝕左800g


入到禁區又係買手信既時候
我次次都會買個LeTao急凍芝士蛋糕返去孝敬老母


連續3架因航
香港人真係好鐘意去日本


返到香港搭巴士，架車


用12日獨遊關西，完。

一次過寫左2個日本遊記有啲滯
之後我會寫番上年10月去台北4日既遊記先
再之後先寫13日全日本之旅
(因為同屋企人去，所以同前2次遊記有大量重覆景點)
但係俾我搵一搵啲相先

[文青勝景美食團]獨遊台北4日 (野柳‧九份‧總統府) - 製作預定
[帶住父母去旅行]13日橫越日本列島 (札幌 ~ 鹿兒島) - 不日上線

期待樓主下個遊記~

次次一個人去東京都係住南千住

大家可以過黎呢度過下冷河
[文青勝景美食團]獨遊台北4日 (野柳‧九份‧總統府)
https://lihkg.com/thread/2009433

LeTao急凍芝士蛋糕
好食？

京都深度遊
啲寺院同和菓子