[高中][純愛] 《如陽光伴我》 有關我和兩個女孩一隻貓的故事
尋羊冒險記
980
回覆
144 Like
6 Dislike
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
第 18 頁
第 19 頁
第 20 頁
第 21 頁
第 22 頁
第 23 頁
第 24 頁
第 25 頁
第 26 頁
第 27 頁
第 28 頁
第 29 頁
第 30 頁
第 31 頁
第 32 頁
第 33 頁
第 34 頁
第 35 頁
第 36 頁
第 37 頁
第 38 頁
第 39 頁
第 40 頁
尋羊冒險記
2019-05-21 18:18:11
多謝支持
尋羊冒險記
2019-05-21 18:22:35
十六,
我也有爭取幸福的權利啊。
「可能之前你覺得同我唔係好熟,我同你相處嘅時間都唔多,我純粹只係一個朋友或者路人甲。不過依兩個月,我發現自己嘅感覺冇錯到,講到咁...或者可能你已經估到感覺到。係,我鐘意你。」我認真地說。
「好,我願意。一陣去邊間酒店?」邦笑得好像中了頭獎一樣。
「邊有可能一答應就話去酒店...」傑說。
「應該係話邊有可能咁爽快答應...」我無奈地說,抓抓頭皮,坐在3樓近廁所的樓梯。
「你兩個,一個就毒不可耐,鍾意人又唔夠膽講。另一個都唔知係咪鍾意男人,從來冇聽過你有任何戀愛感覺。好心你哋聽我講,阿叔我食女多過你食飯。」邦說:「一句講晒,打蛇隨棍上!」
「你個腦除咗呃女仔之外仲識啲咩?」傑生氣的說。不知為何,他最近對邦這些兒戲的態度很惱火。
「你兩個唔好嘈啦...講真,唔好話示愛,我連佢願唔願意出嚟我都唔知。」
「你誠懇啲,擺個懇樣出嚟。一定得。」邦說。
「本身已經係啦,使咩擺出嚟。」傑攤開雙手。
「我覺得你地兩個恥笑多過幫忙。唉,唔理咁多,死就死。」我說罷便走回5D班房,決定來一個破釜沉舟。
五時半,補習班已經完結,心如坐在教師桌上等着我,小腿優雅而且自然地在半空搖曳着。
「你地三個去咗邊啊,啱啱忙到癲啊!琳琳同埋小雯嗰面都踢晒腳。」她一半責備一半說笑的說。
「冇啊...我哋去傾啲嘢。」
「古靈精怪啊你地!」心如說。
「其實都冇咩特別...不過...」
「吞吞吐吐咁,仲話冇嘢!」
「都係有關學會既事,人手安排嗰類。」我說謊。
「係咪嫁…不過如果幫到手既隨便開聲啦!」
「當然,你都係我地一分子。」我說。
「我係一分子?」她有點意外。
「緊係啦,我係主席,傑係會長,邦係垃圾,雯係未來主席,琳係未來會長…吾,你係總務!」
「點解你地個個都有高級職位,但我就要係總務?」
「因為總務既意思係『總括而言,處理所有既事務』。所以呢個職位先係最高級,要你先可以做到。」我又說無聊笑話。
「好啦咁我由今日起就係陽光課後補習學會既總務,主席大人有咩即管開聲!」
她興奮地說,然後看看手錶,又皺起眉頭說:「我又要去練琴啦… 聖誕節嗰日有個表演,類似係義務幫教會演奏嗰啲,我要早少少去同人地夾下!」
「聖誕節咁忙...」我有點失望地說,也把信誓旦旦要約會她的事放回心中。
「每年都係咁差唔多,都習慣嫁啦。因為屋企人想維持喺嗰間區既影響力,所以參與度都要好高。除左捐款、表演、星期日參與教會活動,仲有好多林林總總既事要做。不過點都好,可以令小朋友開心既話,我都開心。」她呼了一大口氣說。
「辛苦曬啦。」我說。
「呢次做義工有份小禮物收返,算係唔錯嫁啦,雖然好似冇用咁。」
「係嗰啲好奇怪既紀念品?」
「係兩張迪士尼樂園嘅飛啊!你有冇興趣呀?」
「下?我?」
「係呀,不過我剩係得Boxing Day得閒...如果你嗰日唔得閒嘅話,你睇吓邊個可以同你去,又或者你俾阿邦?佢應該會好樂意約小雯去。」
「痴線,點會益佢個衰仔!我..我26號好似得閒。」事實上我整個聖誕節假期都是空閒的。
尋羊冒險記
2019-05-21 18:53:28
「咁就好啦!終於可以休息一日,而且我一直都好想去一次迪士尼樂園...」她鬆一口氣的說。
「但係點解你會問我?你唔約Jayden?」
「人哋有女朋友㗎,唔好諗到我份人咁衰啦。同埋我都無話鐘意佢!覺得佢叻姐!」她認真地說。
「就好似七孔流血還七孔流血,死還死,係兩回事。」我想起周星馳的對白,但她顯然沒有看過《回魂夜》。
「咁到時見㗎啦!」
「聽日23號聖誕聯歡你唔返學?」
「唔啦,雖然我都好想參加!不過總採排一定要聽日做...」她的眼睛稍為移開,然後又重新看着我:「總之Boxing day唔好失約啊!」
「點敢!」我說。
她說是時候要走了,雖然時間未到,但因為要去元朗大會堂,途程較遠。我也亂說有一點無謂事要去那邊,可以一起離開學校。
「你好鐘意小提琴?」我問。
「好問題…我都唔知。」她說,我充滿疑惑地看著她。
「…好細個媽媽就要我學小提琴同埋鋼琴。因為哥哥鋼琴既技巧好高,所以後來索性叫我專心學小提琴算,睇下我會唔會有少少成就,當然最終我都係令佢地失望。一直以來,學音樂學琴對我來講就好似好多人晚餐要食一碗飯一樣,唔會諗鐘唔鐘意,都唔會有鐘唔鐘意既分別,就好似係由一懂性就有既習慣咁、與生俱來既一部分。」她接著說。
「其實我…大家都覺得你真係好叻。莫講話彈琴,我連吹牧童笛都覺得好難…所以唔好睇少自己。」我說。
「大家咁話啦!你都要比信心自己啊!」
與如分別後,經過喜利商場,本來想要進去買幾隻最新推出的PS3獨佔大作聖誕節去傑家玩。只是想了想又作罷,還是到就近的書店買幾本參考書和文學小說,好好待在家過這個假期,為未來備戰一下。如果想要追逐如的影子,不可以再浪費時間。
尋羊冒險記
2019-05-21 20:17:53
橙輕輕一推
尋羊冒險記
2019-05-21 20:51:31
十七,胸圍的顏色
五月,春季開始轉入夏季,在北回歸線以南的這個城市,如果要用形容詞描述春和夏,基本上也是討厭和討厭而已,沒有太大的分別。即使是晴空萬里的那些日子都不會讓人特別心曠神怡,只會是既熱且煩躁,
如果這個世界有神的存在,神在密密麻麻的石屎大樓中間看下去的風景,大概是一堆又一堆看起來像螞蟻一樣的上班族,在烈陽下穿著西裝汗流浹背的走進各種不同的大廈內,消失,在十多個小時後同一班人再拖著一個沒有靈魂的身體湧回街上,然後再消失。
如果祂是全能的話,祂一定能夠預視到製造人類、再灌輸人類邏輯的概念後,這樣的畸形社會是必然出現的最終產物。為甚麼還要這樣做?
我實在想不到這種風景有甚麼好看的地方,當然祂可能根本沒有在看。
自從那晚以後,橙就沒有回來過,我貼了街招,甚至破例在社交網站發了一個又一個尋橙啟事,都沒有她的消息。我致電過漁護署等機構,沒有回應。
我一直感覺橙還是在家附近的某個地方,一到晚上回家後,我就會用鐵碗㪣她最愛的罐頭。還是沒有回應。橙比其他所有的貓都要聰明。她不見了,大概是去了讓她更快樂的地方吧,我想。她的離開是我的責任。
在這個多月內,我又回到那種只有我一個人的人生。有時晚上工作回家後,總會慣性的叫「橙」,她的名字,只是沒有「喵」的一聲回應,也沒有她笨拙的從房內姍姍走到我身邊的聲音,原來一個人住可以靜得這樣可怕,沒有任何的回響,連那種靜起來的耳鳴聲音都沒有,所有聲音就好像吸進了牆紙內一樣。
只要是星期六就會見到晴,她總是找到方法讓我一笑。偶爾我會想起晴的隨筆,原來她有的絕對不是順境的生活,只是她好像永遠也不會受任何天氣、甚至其他事影響情緒,總是能笑臉迎人。
「你睇下你睇下你睇下!」她興奮地向我呈上統測成績單:「分數進步左好多啊,完全係多得你!你快啲睇下份卷啦,你教我既我記得曬嫁!而家我唔單止識搵直線方程,用你比我嗰張小攻略,圓形方程原來都係超級易嫁!」
「叻女。」我笑著對她說,「為左讚你同道歉上次無食到你煮既野,今晚請你食飯。想食咩?」
「道咩歉啊!又唔係你錯!不過你一定知我無約人嫁啦?」她鼓起鰓說。
「咁你係咪唔得閒?」我反問。
「講下姐!咁認真做咩!」她說。
「想食咩?西餐?日本野?」
「吉邊!」她想也不想說。
「有人請食飯,點解唔食啲貴啲既野?」我不解。
「因為想食囉!有人請緊係食想食既野啦,同價錢地點無關係嫁,明唔明!基本邏輯學!」她模仿我平常教她時的說法。
我輕鬆的笑著。
飛𨋢(歐陸)
2019-05-21 21:25:53
而家好似同時睇緊兩個故咁,雖然男主角係同一個,之後兩條線會唔會串連起來?
飛𨋢(歐陸)
2019-05-21 21:52:58
同埋第十七章個標題
好彩睇嗰陣隔離冇人
尋羊冒險記
2019-05-21 21:56:25
會啊,例如 屬於「詩晴篇」嘅篇章六,出現過「俊」呢個人,好快會喺「心如篇」出場,詩晴喺男主角屋企執到嘅獎狀到底係咩都好快會交代。
故事後半就會將兩個故事連埋一齊!
尋羊冒險記
2019-05-21 21:58:34
上次最終吃不成,這次可以算我第一次跟她吃飯。橙走了的那一晚,我基本上沒有甚麼心情吃,回到家中我只是呆了一樣坐在梳化上,晴就在我身邊,陪了我好幾個小時。當然她要趕尾班車離開,對於這件事,我又是感激又是抱歉,所以才決定要借故請她吃飯。
我們笑著說著,到了元朗千色廣場附近的那間吉野家。她說自己吃不了太多,着我只買一個火鍋,然後加一點其他配料,反正她最想吃的只是芝士竹輪,而我對這東西完全沒興趣。
等待的時候,她這樣問我。
「其實點解你成日都要自己一個?」她想必想問很久。
「點解我要自己一個。」我重覆她的問題。
「你唔覆WhatsApp、無Facebook無Snapchat、有Instagram但一張相都無,想知多你少少野都好似完全無可能咁。」詩晴雙手托頭,續說:「除非你自己講啦,但你又完全唔講!」
「我覺得無需要講。」
「你覺得無需要講…」她重覆,「你唔可以對身邊既人咁冷淡嫁!咁樣會無朋友!」
「我唔介意。」
「我介意!我想同你做朋友!」
「點解?」我問。
「無咩點解,想未想囉。諗咁多原因做咩喎,人與人之間好多野都解釋唔到嫁啦,但係關係既建立就係好自然既事。雖然你成日好似啞左咁,但我又會好想可以同你傾計喎。如果你可以唔好咁拒人於千里就好。」
「我無拒絕你。」
「嗯嗯,咁就好啦!咁由今日開始我就係你好好好好好朋友!」她興奮地說。
「嗯。」
我忘記了朋友的定義,又或許是不曾學過,但我肯定是願意花時間在這女孩身上,才會長期替她補習。這跟錢完全無關。
「咁好朋友就應該要互相分享開心傷心事,屈喺心入面會屈出病嫁!」
「或者會,或者唔會。」
「我知你一定好唔開心,不過我知道橙會返去你身邊。我知道。」
「你點知道?」我問。
「女人既直覺。」
「你只係一個16歲既小妹妹。暫時應該未可以叫做女人。」
「咁就女仔既直覺啦,我既直覺一向好準確。」她說。
「真係?」
「嗯嗯,細個既時候我會估中嫲嫲嗰晚煮咩餸、估中第二日會唔會落雨、班入面情緒好波動既肥仔會唔會喊,仲有…最近有時會估中Miss戴咩顏色既胸圍。你話我直覺準唔準?」
「點解你會去望Miss既胸圍…」我不解。
「唔知啊,純粹好想估。同食吉邊一樣,想估就去估。你中學既時候唔會對Miss有興趣嫁咩?」她笑著說。
「如果你唔係一個靚女,而係你口中嗰個肥仔,我肯定你會比人停課。」
「你讚我靚啊?」她很高興。
「我無。順口。」我說。
尋羊冒險記
2019-05-21 22:45:00
晚餐後,我偕她走到西鐵站,我看看左手上淺啡色的Fossil手錶,時候不早,禮貌上應該送她回家,也算是答謝她星期六總是千里迢迢的坐車過來。
「時間唔早,我送你返去。」我說。
「時間唔早,你應該返屋企休息至係啊!」她推說。
「屋企好靜。」我說。
「好啦好啦,等我陪下你啦…你有野想講可以同我傾下。」
「我無咩想講。」可能有,但對著甚麼人和事都開不了口,除了橙。
「可能你會覺得我好怪,但我好想可以有機會行入你個心睇啊...你唔好成日好似清朝咁封關鎖起自己啦。」她的選修是經濟和中國歷史。
「你喺入面會做咩?」我好奇的問。
「我會帶啲傢私俾你,因為入面一定乜都無...嗯嗯...仲有,換燈膽!你個心一定黑蚊蚊,咩野都睇唔到!」
「因為我黑心?」
「因為你寂寞,寂寞既人個心都係唔識發光。」
「你點知?」
「因為我都寂莫。」她回答。
「你唔似。」
「唔係個個人寂寞都鐘意好似你咁樣寫曬係塊面上面嫁大哥哥!」
「你有道理,小妹妹。」我說,想起她在隨筆本寫的文字。
「老竇係漁民,由我細細個開始佢就不停出海,留低我同嫲嫲兩個喺屋企。每年我都好期待休漁期,因為佢會帶好多好多好多禮物返嚟比我,仲有好靚好新鮮嘅魚。不過講真,其實我最想要嘅禮物只係佢嘅時間。除此之外我咩都唔想要。每次佢要走,我都會同佢講:『我好憎你!』」
詩晴若有所失的說,「所有同學都唔鐘意屋企人管,但我竟然想有屋企人鬧下我、管下我。係唔係好蠢?」
「唔係。」我說。
「大約兩年前佢決定退休。佢話想想陪我多啲,唔想我好似媽咪一樣咁憎佢。我好開心,好似發夢咁,以為終於有返一個屋企。佢用賣船既錢買左一層樓,同我同嫲嫲一齊住,起初一切都好順利,好似夢想成真咁,但老竇其實唔開心,佢成日話一個叫海佬唔出海,就好似打斷左雙腳咁。五十年來,佢未試過成年都喺陸地。」
「就好似蜜蜂唔採花蜜、雀仔唔飛咁。」我想起一個在歐洲認識的朋友說過。
「佢開始成日飲酒,滿口抱怨、對世界唔滿意、對年輕人唔滿意、對我唔滿意、對嫲嫲都唔滿意,一日到黑對我地打打鬧鬧。自己明明有肝病,醫生講到明唔可以飲酒,但係返到屋企就日日都飲到醉曬咁。結果日日除左鬧交外,我同佢完全無任何溝通,呢種家庭生活同我想像既完全唔同。」
「我明。」
「其實我知道點解佢會咁,幾十年佢從來都無長時間離開過個海,喺陸地無朋友無嗜好,佢既世界就好似停留左喺三十年前,唔識上網、唔識用電話、唔識同人溝通,但係就無人會停低等佢,連自己個女都無。然後有一日,佢就再無返過屋企。我有問過佢呢一年新識既酒肉朋友知唔知佢去左邊到。有人話佢返左大陸,有人話佢用剩低既錢買返細船出左海。我比較相信係後者,始終個到先係佢屋企。」
「你嬲佢。」
「我唔嬲佢,我嬲自己。係我逼佢落船,然後亦都係我逼佢上返船。我後悔,如果我可以識得體諒佢多少少就好。」
「你仲好細個。想要一個正常既屋企係好正常。我喺你既年齡比你幼稚大概一千三十五倍左右。」
「一直湊大我既係嫲嫲,我一定會好好好好咁對佢。就算時間唔長都好…」她感概地說。
「一定足夠。」
超級無敵洗衣機
2019-05-21 23:10:08
汽車推推
尋羊冒險記
2019-05-21 23:58:52
我和詩晴一路由元朗站坐到調景嶺站。她住在調景嶺,跟住在錦上路的我簡直是天南地北,我有點驚訝她竟然會喜歡到這麼遠的我家補習。
「係呢,你先前唔係話你仲有個細佬?」
「媽咪三年前同老竇離婚,再婚之後係生左一個細佬,當然我唔係同佢地住啦,好幾年無見過媽咪啦,我都係聽其他屋企人講先知呢件事。所以細佬喊只係藉口,有時係想出去透下氣,唔想成日留喺屋企。」
詩晴說,她上學期開始交了一個男友。她說原本覺得跟男生交往是驅除寂寞的好方法,因為擁抱、親咀是被愛着的體現。
「我知錯啦。我以為我同佢好夾。」
「點解?」
「因為佢都鐘意聽歌囉!」
「我都鐘意。唔係鐘意陳奕迅既人都代表可以做你靈魂伴侶。」我說。
「結果性格完全唔係同一回事,佢係控制狂,而且好暴躁。佢覺得我同任何異性有任何接觸,係任何,即使係問下功課都好,都係落佢面。你明唔明,佢唔係驚我會話:『你好蠢啊,我唔想要你啦。』,佢係話:『你同其他男仔講野就係落我面、你令我出醜!』」
「咁唔係唔夾,而係根本無人會鐘意控制狂,除左你。」
「你仲笑我!」
「唔笑。」
「我只想搵一個可以容許我任性既人,俾我去玩去闖,只要我想既話,我染到全頭白髮再染返做黑色都唔會鬧我既人,只要我一攰一痛,佢就會俾個膊頭我,唔使諗方法安慰我、整禮物送比我,一個膊頭就夠。咁我就會全心全意咁愛佢,將我所擁有既野都同佢分享或者送俾佢。」
她閉着雙眼說:「你覺得我會唔會搵到咁既人?」
「妳一定可以。然後你個心入面就唔會再係黑蚊蚊。」我摸摸她的頭。
「讀書越嚟越辛苦,咁樣出嚟玩吓食個飯真係開心好多!超級開心!」她說。
「平時都可以約多啲朋友見面。」
「吾…大家都有忙既事,偶爾可以咁放鬆下就已經好幸福。」她好像有難言之隱。
「總之一定要休息足夠,休息係為左行更遠嘅路。」我說。
「一路以嚟多謝你,冇你好多嘢我根本都唔知應該要點做點溫。」
「我有收你錢。」
「今晚呢餐冇喎但係!」
「我又唔係part time boyfriend,同你食飯點解要收錢?」我反問。
「好似你呢啲咁悶嘅人,貼錢都無租你啦 !」
「...咁你係唔係要比一粒星評價?」
「要啊!同你做朋友永遠都好似要求你咁。求下你開心啦,求下你笑啦,求下你覆我WhatsApp啦,『咯咯、咯咯』,『係我呀,羅詩晴啊,俾我入嚟你個心啦,我想同你飲杯茶、傾吓計呀』,跟住你就會好冷淡咁樣回應,『好。』、又或者『唔好。』,連多一句說話都好似唔想講咁。」
「我試吓唔咁樣。」我說。
「唔要。你唔使自己改。終有一日,我要令你自己打開道門,『喂喂,詩晴快啲過嚟,我想你參觀下我嘅內心世界。』,然後我就話,『不了,要返學!』」她說着,然後自己在笑。
尋羊冒險記
2019-05-22 00:01:45
從地鐵站走路回她家大概要五分鐘,夜晚時分這條路其實不比我家的那條熱鬧,但至少可以算是燈火通明。我們並肩的走著,途經The-i。
「我有啲同學話好想入呢間。返學近,又好似唔錯。」
「合理期望。」
「但我想入八大,邊間都好...吾,最好都係中大,同埋讀社工,話曬都喺嗰間大學駁過命留過腳毛。」
「我支持你。」
「身邊既人話我妄想,就算諗都係諗開大城大浸大,點會係中大...」
「我覺得唔係妄想。唔好限死自己既空間。中五上學期既我可能一世都入唔到大學,但中六就的確考到好成績。羅詩晴,你記住,你既人生係自己,唔到其他人指指點點。清唔清楚?」
詩晴突然向我步近,輕輕抱著我,耳側靠著我的胸膛,然後愈貼愈近、愈抱愈緊。
「多謝你。」
「…嗯。」
「我聽到你心跳。」她有點想哭的說。
我沒作聲。
「唔係鐘意我既心跳。」
「我...」
「對唔住,我亂講野。學校既事、讀書、屋企,好多野好大壓力,我只係想好好發泄下...」她強忍著眼淚。
「放心。放心喊,大聲喊。我唔趕時間,都唔會介意。」
「多謝你…你話如果我唔係你既學生、唔係細你五六年既小妹妹就好。我諗,如果可以做你既高中同學會好幸福,又可能你會有少少鐘意我,但可惜我永遠永遠都做唔到。」她說。
我不知應說甚麼。只是雙手輕輕碰著她,讓她好好哭一下,她緊貼在我心頭哭著。
夜深無人的道路,站在街燈下的她抱著我不知哭了多久、哭了多少公升的眼淚。眼淚掉落湖中會泛起漣漪。她的痛苦來源很多,我經歷過的有一堆,沒有經歷過的也有一堆,沒有任何人能完全明白另一個人的感受,除了默默的聽她說,我沒有其他可以做的事,有些路必須由她自己去走。
哭過後她看著我心口濕了一大片,又笑了起來。
「對唔住啊,好似幫你用眼淚洗左件衫咁…」她破涕為笑。
「你而係笑定係喊啊蠢材?」我摸摸她的頭。
走到她的家樓下,她重新把笑容掛在臉上的與我告別。那怕有一天她與我道別時沒有笑的話,我大概會介意好幾天。
送別她後,我坐上了Uber,然後發信息給明天的學生說自己身體抱恙,不能補習。閉起了雙眼,想起了她和她的臉、想起了剛才她剛才的淚水。
「送完女朋友返屋企啊靚仔?」中年Uber司機問道。
「唔係女朋友。」
「有故事咁喎靚仔。記住啊,感情野諗乜都假,左計右計無得計嫁,跟住個心行啦。」
感情野諗乜都假,跟住個心行啦。好像我中五時會說的話,但我已經不再清楚這是不是一個正確的人生哲學。在最深心處,到底我在想的是甚麼,我最想要的又是甚麼?連我自己也找不到答案。
雨粉開始散下,貨櫃碼頭工人凌晨便為明天的風暴做足準備。
我睡著了,在並非全黑的環境下。
尋羊冒險記
2019-05-22 00:09:27
十七章完
大約四萬字,故事都去左四分一左右啦,雖然唔多讀者,但好感謝大家嘅支持
仲有睇嘅歡迎留下言交流心得
高過高雅志
2019-05-22 00:57:47
pish
屌爐屌足三千年
2019-05-22 01:04:47
又留名
超級無敵洗衣機
2019-05-22 02:08:42
不如我地重頭黎過
2019-05-22 02:33:36
好好睇
Aimyon世界第一
2019-05-22 03:08:25
好睇
尋羊冒險記
2019-05-22 04:45:09
多謝曬大家既支持!
會post落去
斗轉星移
2019-05-22 08:43:22
一路有睇呀
凍檸茶走冰
2019-05-22 11:56:01
LM加速
超級無敵洗衣機
2019-05-22 12:53:17
尋羊冒險記
2019-05-22 13:39:52
多謝支持
3點再開連載
尋羊冒險記
2019-05-22 15:01:12
十八,只屬於我們的世界
沒有心如的聖誕聯歡沒有太多歡愉的感覺,我也沒有太刻意打扮,反正對我跟傑而言,23號一向只是一天不用上課的上課日。至於邦,老早就不知去了哪個班房跟哪個女生合照,這天的意義對他來說比對我們而言大很多,如果做這種沒有意義的事也算是一種意義的話。
「門口有兩個女仔搵你兩條契弟。」完全不客氣的同學阿明說。
我和傑走到班房外,看見琳和雯。
琳穿了一條搶眼的黑色短裙,配上淺灰色短tee,外面披上一件牛仔外套。雯則是一件純白長恤衫配上一條長度合適的墨綠色長裙。不知為何,在我們學校成績好的女孩子似乎都長得不差、也懂得打扮,這大概與主流的情況不太一樣。
「你兩個好搏盡喎…」我說。
「咩啊,好普通姐。你兩個到底係唔係成世人無同過女仔出街。」琳又說到了痛處。
「搵我地?」傑問。
「搵你地影相啊!今日咁難得,緊係要影張團體照啦!」雯說。
「但係心如唔喺到…」我說。
「唔緊要啦,聽晚平安夜我地debate team有聚會啊!到時我幫佢影返張相,然後key返佢落去呢張相未得囉!」琳興奮地說。
「…有聚會。」23號才是平安夜,24號大多都不平安,我想起邦說過。
「係呢,邦呢?」雯往課室內左看看、右看看,然後問道。
「佢俾老師叫左去有啲野做。好似幫手搬聖誕功課,唉,聖誕節仲要寫隨筆…」傑嘗試拉開話題。
我看得出來傑心底內是很緊張雯,他沒有告訴我,這只是我自己想的,他從來也不談這種話題,表現得就好像對愛情絕緣一樣。至於傑自己,我想他也感覺到雯在意的是邦而不是他,所以才不想讓雯傷心的說謊。
「咁唔緊要啦,我聽晚都應該見到佢。佢話佢無人陪,要我同佢去睇燈飾,到時我都同佢影,然後再key落去呢張相到!」雯微微一笑。
「佢無人陪?唔係啊話。仲諗住佢會約我。」傑說。
「不如一齊啦!」雯說。
「下?」傑有點困惑。
「人地叫你未去囉,下下下。」我推傑一把,我不知道這樣做是否正確,但肯定他那一刻是很想答應。
就這樣,如、琳、雯、傑、邦都在過一個值得想起的平安夜,只剩我一個人在家望天打掛。25號那天,雯更新了Instagram,男女男一個嬲字在天星碼頭的留影,天呀,這種麻煩事怎麼會發生在我們三兄弟間。
同日,如和琳也上載了照片在party room的合照,如和Jayden坐在一起,Jayden的女朋友沒有出現。心如是否會因為這晚而對Jayden更心動呢?如果會的話,想必是一種很心痛的感覺。又還是她由始至終都沒有喜歡過她的教練?
這些想法都令我煎熬得很。想起這幾個月和如的經歷、想起和她的關係,我有點迷失在這種五味雜陳的感覺內。
我知道12月29號是她的生日,特地精挑細選了一個唐老鴨的音樂盒做禮物,打開是一張自己畫的卡和Air Supply的All out of love音樂,好像有點老的點子和歌。
又準備了一件Jack Wills純白恤衫,Gap的牛仔褲,和近年較流行的H&M密綠色飛機外套,想在約會那一天她會覺得我長得也不太差。其餘也沒甚麼好做,惟有一直做試卷準備考試,靜候26號的來臨。
那天,心如說早上有點事要外出,所以不在元朗區出發,約了我直接在樂園的門外等,我在大門外老遠就看到了她的身影。那個聖誕不太冷,她把平時扎起的長髮鬆下來,只穿著一件粉紅色快及膝的鈕扣恤衫裙。
「唔好意思,遲左少少。」我說。
她看看手錶,說:「約你12點半,而家先12點15分,係我早左姐!」
她從手袋中拿出兩張送給教會義工的免費票,分了一張給我。「入場啦!」
「你食左野未啊?」我問她。
「食左啦,你呢?」她溫柔的問我。
「我食左,一陣肚餓再食啦。」我撒了謊,其實本來是想要等她一起午餐。不知道為甚麼,在喜歡的人面前,總說不了真的說話。
「你想去邊到先?」我看看手中的地圖,已經兩、三年沒來過,對上一次便初中的時候跟班中的一大班同學來過。「泰山樹屋?」
「我其實無嚟過...」她有點不太好意思的說。
「下?」我有點愕然。
「咩喎,而家做黎心如唔單止要考第一,要贏比賽,仲要去過迪士尼先得咩!」
「唔係,只係...」只是想不到你頭一次去這個樂園就是跟我去。
「你想笑我未講囉!」她裝着生氣,然後自己忍不住笑了,可愛得很。
我們先經過美國小鎮大街,她忍不住買了一個粉紅色的米奇耳朵頭飾。原來她也是個有童真的女孩,我想。
「我有無戴歪?」她皺着眉問。
「有少少...」我用手把頭飾弄得平衡一點,我緊張,而她又好像有一點面紅。「搞掂晒!靚女晒!」
這是我一直也想對她說的讚美。她又笑了。
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
第 18 頁
第 19 頁
第 20 頁
第 21 頁
第 22 頁
第 23 頁
第 24 頁
第 25 頁
第 26 頁
第 27 頁
第 28 頁
第 29 頁
第 30 頁
第 31 頁
第 32 頁
第 33 頁
第 34 頁
第 35 頁
第 36 頁
第 37 頁
第 38 頁
第 39 頁
第 40 頁
吹水台
自選台
熱 門
最 新
手機台
時事台
政事台
World
體育台
娛樂台
動漫台
Apps台
遊戲台
影視台
講故台
健康台
感情台
家庭台
潮流台
美容台
上班台
財經台
房屋台
飲食台
旅遊台
學術台
校園台
汽車台
音樂台
創意台
硬件台
電器台
攝影台
玩具台
寵物台
軟件台
活動台
電訊台
直播台
站務台
黑 洞