【奧捷斯匈】13日東歐四國遊記 (遊記資訊+歐遊你問我答) 7

一路打一路好想再去
巴打去果時有無落雪？

canon 500d + 10-18mm stm
天氣唔好，所以味精比較重

繼續推

幫推

非常詳盡，奧捷好多年前去過，睇你遊記好似去多次咁，留名支持

同意其他巴打所講，Salzburg 有趣過 Vienna 唔少，Cesky Krumlov 當時夏天去，陽光普照，照冒住炎熱天氣行上塔頂，風景世界級

多謝巴打 太好啦，我仲怕太多字會嚇走人
無錯，我都覺得咁多地方入面要放棄2個既話， 會係bratislava同vienna 我應該要去國王湖
我係ck有唔少遺憾

thanks巴打

【歐遊百幾日遊記】東歐四國篇（奧捷斯匈）（三）DAY 2 布拉格 老城區 OLD TOWN 一日遊（下）晚餐報告 一個奇特既素食晚餐體驗

晚上，我地係酒店附近食，我地揀左至今仍然好有印象既餐廳，佢叫Secret of Raws。點解咁深印象，並唔係因為佢特別好味，而係因為去到先知原來佢係食齋既誤變Vegan

餐廳名：Secret of Raws
種類：素食
詳情：https://www.tripadvisor.com.hk/Restaurant_Review-g274707-d3976073-Reviews-Secret_of_Raw-Prague_Bohemia.html

不過，原來佢而家已經執左但我見市內似乎有其他分店。
呢日入到去，店員非常nice咁同我地簡介佢地既menu，我地揀左佢推薦既tasting menu，基本上就係佢地既唔同菜式分成小份咁放成一碟。


（手機相）
介紹下，呢個目測就係sushi, chocolate pie（其實係mushroom pie）, panini, 意粉、薯條，以一個set黎講，真係相當豐富。有趣既就係全部都係用超級raws既手法造，就係素食啦。

個panini，佢唔用包，而用左脆口類似殼物造既餅做個面同底，下面就係生菜、蕃茄，食落真係有d dry 同淡好彩有片蕃茄，可以稍為有d juice。

個sushi roll都好搞野，佢唔用紫菜，用左d質感有d怪既野去卷，印象中係類似普通菜黎既入面就係一堆瓜菜既碎粒，總之係無一樣有特別出既味，非常青。

意粉都好搞笑，佢又係唔用意粉，而用幼既菜黎扮麵食落去expect係意粉結果係另一樣野，相當神怪真係超級試食大會。

薯條都係唔係正常薯條味，有生薯仔既味道終於明點解佢叫secret of raws真係好raw

全碟最有味既，係mushroom pie，真係超級濃味，濃味到over左所以我地都無法完成佢餅底一樣係穀物

以上就係呢一碟野既解說，對我地黎講呢個素食體驗真係相當新奇。你見到既野同你食到既野係好唔同一路食一路覺得好搞笑，又唔可以話難食，但絕對唔係好味，不過就超級自我感覺良好，因為呢餐絕對係係歐洲好難得既好清淡既一餐，仲好多蔬菜，可以話同之前餐餐扒做左個平衡作用。

因為無肉落肚，食完好似都仲有點唔知點咁。其實我ok既，不過男友就覺得個肚相當空虛於是我地食完後，去左搵熱狗食，至於成唔成功，我就唔太記得了。

聽日，我地就會去布拉格重點景點範圍既另一邊——城堡區。

感謝絲打支持
知道有巴絲打想睇即時更加有動力出文

push

留名

想問下樓主知唔知巴黎夜晚安唔安全
因為我可能10點零先飛到入去
怕太夜入市區唔安全
會唔會係機場附近Book一晚酒店安全啲？

上年2月去左budapest prague同berlin
本身想去埋ck但係唔夠時間已經決定要再去過捷克
睇完絲打分享更加掛住布拉格

巴打住巴黎邊區啊？
我試過行完羅浮宮都9點幾十點，一路返去酒店（16區），沿路都好多人下
一男一女咁行，無覺得特別危險
我地果幾日都係入黑後仍然係條街度 ，10點幾先返到酒店
所以如果你住治安好d既區同埋酒店個位唔係太入，近車站、係大街既我覺得都可以照去
除非話要行好耐/好多巷仔先到到酒店既，先考慮住機場
不過歐洲d機場酒店通常都唔係真係好近機場
分分鐘要行條無人既路先到/搭的士先到到，感覺無安全左
咁既話不如係車站搭uber/的士好過

btw 如果 6 7月，10點先啱啱天黑曬

咩都未Plan
6月10左右入去
我睇返班機入到巴黎原來差唔多十一點
計埋拎行李之類可能都11點半甚至重遲
都係住機場好似穩陣啲

咁夜 驚無車多d 住機場煩少樣野都好既 加上多數仲會省到錢，多數平d

我打住遊記黎ff自己去多次
幾時會去啊

我諗要下年先
本身諗住上年11月去最後去左芬蘭
今年又plan左去荷蘭同克羅地亞
冇試過咁念念不忘一個地方

絲打一年去兩轉歐洲 好爽

【歐遊百幾日遊記】東歐四國篇（奧捷斯匈）（四）DAY 3 布拉格 城堡區 半日遊（上）LENNON WALL 連儂牆 查理橋一帶 好睇唔好受既餐廳


黎到布拉格行程既第二日，我地今日行程係去城堡區，晚上就去睇Imagine Dragons既演唱會。

仲記得我地出發前係書店睇過一本遊記，相信因為個稿錯左，個行程連續三日早上第一段都話：「一清早，疾疾起床，到查理橋。」心諗有無咁鍾意去，要朝朝都去，不過結果我都兩日行程都真係兩日有去查理橋。

今日，我地第一個行程，正是「一清早，疾疾起床，到查理橋。」 不過，所謂清早，都係10點零了。

我地照舊慢慢行去古城區，再慢慢行去查理橋，沿途又係一片靚景，第二日睇同一堆景都係完全唔悶。


今日呢位creepy小丑依舊開工，繼續引到唔少目光。



呢個只係一個普通街角，但我覺得好靚。布拉格既屋既顏色真係好靚。



今日既查理橋同琴日唔差得幾遠，因為黎到呢度，個天陰陰地。

不過琴晚查理橋附近既建築變曬一pat野，今日光d睇算清好多。（無計，相機質素同我無咩耐性，一暗就懶影相）。呢度有好多天鵝，尤其果邊有個人，應該係餐廳職員黎，將D麵包碎倒曬落河順便當餵下佢地咁，成班鴨呀鵝啊即刻狗衝曬去食曬佢。

話說呢頭附近有間館係有廁所，當然要比錢啦，仲記得太急所以比左5蚊左右港紙左右去廁所，廁所質素一般，不過又未去到差既，起碼都唔覺話臭。


繼續狂貼查理橋相，可能會重覆琴日既相，因為真係狂貼。





天陰陰，又係呢個位啦。

話說今次我地黎到對岸既城堡區，有兩個主要目的地，第一係橋邊既Lennon Wall，位置就係正橋隔離。

呢個地方就係真既連儂牆啦，的確就係有好多塗鴉既一個牆，你會睇到一層疊一疊，基本上都係一堆色塊。

呢幅牆都幾長既，由八十年代起，就有年青人係度寫野同畫野，初時係寫佢地對政權既不滿，並畫上由Lennon所啟發既圖案，表達佢地既想法，佢一度因為政治敏感而引起過警民衝突。如今，佢既用途同好多其他歐洲既鴉牆一樣，都係用黎寫上同愛同和平有關既字句、詩同圖案。


個人其實唔太識欣賞凌亂既塗鴉。

不過呢個位既呢個John Lennon真係畫得幾靚，成塊牆即刻靚好多但竟然會有人照噴野上佢個鼻。


另外，呢個位多數都會有人係度賣藝，多數都係唱返Beatles d歌，而當時就唱緊Imagine。其實Beatles既歌我只係識幾首特別出名果d，反而我男友就係Beatles fans黎（所以Liverpool真係好多啱我地去既野）。

其實呢個地位你唔會用太多時間，望下個牆影下相就無咩野好做。
我地就係到此一遊後，就繼續前往城堡。

期間路過呢條河仔，個橋叫做Lovers’ Bridge，估都估到，又係橋上好多鎖果d。


見到一間睇落超有生活態度既餐廳露台位！見到已經覺得點都要入去飲杯野坐下扮下有生活態度啦。不過唔建議大家去。 下篇講點解