【奧捷斯匈】13日東歐四國遊記 (遊記資訊+歐遊你問我答) 7

好耐無上黎打遊記 之前上黎打過 【Exchange 歐遊百幾日系列】既Amsterdam篇、克羅地亞+希臘篇、意大利北部篇，仲有唔少歐遊資訊，整合左係http://mangotofufa.wordpress.com/ ，有興趣既巴絲打可以係入面睇返

而近來我開始打返之前Exchange（兩年前 ）第一個歐遊 Trip—冬遊東歐四國既遊記 都係照舊，多圖多字，對歐遊/exchange前準備有咩問題既巴絲打歡迎係度/FB inbox 我Facebook page http://www.facebook.com/mangotofufa/
我去過/知既都會幫幫手，當中既國家包括荷蘭、比利時、意大利中北部、西班牙中北部、法國巴黎同南部、摩納哥、盧森堡、德國、波蘭、捷克、奧地利、匈牙利、斯洛伐克、斯洛文尼亞、克羅地亞、希臘雅典同Santorini、波斯尼亞和黑塞哥維那 (Bosnia & Herzegovina) 既Mostar 等等；英國剩係去左利物浦 ，瑞士剩係去過日內瓦 總之就係北歐、最東既東歐、葡萄牙、瑞士及英國絕大部分同愛爾蘭無去




東歐四國即使名氣小於英法意等西歐國家，但佢真係一個美麗又浪漫既國度，精彩程度絕對不遜於西歐國家 。呢度唔單止充滿歷史色彩，而且夏有藍天白雲、橙色屋頂分明既景緻，冬有白雪覆蓋童話小鎮既畫面，所以唔同時節都適合黎呢度感受下歐洲古城小鎮既魅力。 當時我黎到東歐四國旅行正值雪季，有幸睇到東歐既白雪童話小鎮景，真係一世難忘 而係呢篇我會分享下當時十三日東歐四國之旅既路線圖，展開漫長既東歐遊記

DAY 1 – DAY 4 捷克 布拉格 PRAGUE, CZECH REPUBLIC


市際交通【巴士：Student Agency ( 7.6 EUR 65 HKD / 人) 3小時車程】

DAY 4 – DAY 5 捷克 庫倫洛夫 / CK小鎮 CESKY KRUMLOV, CZECH REPUBLIC


市際交通【包車共乘：Bean Shuttle (800CZK 250HKD/人) 3小時車程】

DAY 5 – DAY 7 奧地利 哈爾施塔特 HALLSTATT, AUSTRIA


市際交通【當地船 + 火車：OBB 奧地利國鐵 (19EUR 160HKD/人) 4小時車程 (有轉車)】

DAY 7 – DAY 9 奧地利 維也納 VIENNA, AUSTRIA

市際交通【巴士：Flixbus (EUR 7.5 65HKD/人) 1小時車程】

DAY 9 – DAY 11 布拉提斯拉瓦 斯洛伐克 BRATISLAVA, SLOVAKIA

市際交通【巴士：7EUR 60HKD/人 3小時車程】

DAY 11 – DAY 13 布達佩斯 匈牙利 BUDAPEST, HUNGARY

網上圖片@Lonely Planet
我去到大霧到剩係影到手指 唔想第一頁就嚇到大家唔去呢個咁正既地方，所以要借圖

匈牙利 布達佩斯 → 飛機 → 荷蘭 阿姆斯特丹

（行程完結）

呢個就係我地十三日東歐四國既路線啦 ，雖然十三日唔算短，但其實比起#2懶人包所提及既地方，都仲有好多值得去埋既城市未去，所以希望不久既將來可以再遊東歐啦


若果巴絲打plan緊東歐四國之旅，仍在起步點上，強烈建議先睇睇#2 東歐四國懶人必看整合， 初步了解下東歐四國有咩玩先，會更有參考價值 之後再睇下我呢個實戰經驗既分享（因為當中有D國家預多左日子中左伏，唔建議懶人跟足）

【攻略】歐遊預計每個城市逗留日數？計劃歐遊路線資訊大全及懶人包 V2.0 （東歐四國篇）

（呢篇我會照貼過黎，但極力推薦係wordpress睇，因為個排版會好D，同埋地方名直接有link睇圖，比較方便： http://bit.ly/2HxsLTp）

相信由買機票一刻起，除左去邊頭之外，另一個問題會即時彈出黎既就係：去歐洲預幾多日好？而呢個問題去到plan路線果時仍然會比唔少煩惱你，完全唔知買幾時走既車票好；完全唔知book 幾多晚酒店好……而係我既旅行post入面或者係我幫人執行程時，去幾多日都係最熱門問題黎。於是，呢篇係想分享下以個人經驗黎睇（包括中伏體驗），一個城市可以留到幾多日 / 值得留幾耐。

- 呢個只係一個初步懶人整合，四國絕對有更多值得去既地方可以慢慢探索，深度巴打高抬貴手 。
- 預計時間我會分冬天、夏天講既，因為日照相差成五個鐘，係plan行程上完全係兩個唔同玩法黎。
- 另外，我都會講我咁樣預法做左D咩比大家參考下，等大家加加減減D時間咁，因為我有去既地方唔係個個都想去，我無去既地方亦有人有興趣去。

利申：
1 – 如非搭車，我多數係訓到10點先出發，下面都係以呢個鐘數出發計。
2 – 無去北歐、葡葡牙、最東東歐、大部分英國、瑞士
參考：冬天 5 點幾開始天黑，夏天晚上 9-10 點天黑
定義：一日= full day，講緊中午前已經出現係個城市度，直至天黑，咁市際搭車就當前一晚/接住果朝發生既。

東歐四國篇
所謂東歐四國，係指歐洲近東邊（而我覺得似中歐多d）既四個熱門旅遊國家——捷克、奧地利、斯洛伐克同匈牙利。多數去得呢四國之一，都會連帶地一次過去曬呢四個國。當然，都有人會只揀一個黎深度遊啦，而以下講既懶人包，相信就對想一次過去曬呢四國既人比較有幫助。



以下呢張圖，可以一次過睇到東歐四國最熱門旅遊城鎮既位置，等大家對個行程有初步了解先。唔洗急住研究佢地乜黎，講得懶人包，當然下面會介紹啦！


呢度咁多地方，究竟有幾遠呢？要搭幾耐車呢、搭D乜？可以睇下下面呢張圖做個心理準備，但實際班次就要靠自己喇。放得係度既路線，基本上都係一程過、唔洗轉車既，除左Hallstatt > Vienna 同 Salzburg <-> Hallstatt。



所以玩得東歐四國，一定係不斷搬家遊走喇，起點、終站亦隨個人喜好決定，但從上圖你會見到佢地既路線並非一個圈，所以如果買到Open-Jaw開口機票，布拉格入，布達佩斯走，當然就最好啦。

但每地逗留時間又點預法呢？各地又有咩睇頭？而家初步了解下，再按個人喜好作篩選吧。

下面既地方名旁打*號地方=我無去，但我會咁預

奧地利（童話小鎮、博物館、建築）

奧地利其實幾大，靚既地方都有好多，最「必去」既地方相信係人稱最美小鎮既 Hallstatt啦。至於Vienna，就係個其實最悶（除非對音樂好有興趣）但偏偏大家都因為一場黎到不想錯過而安排既行程。其實佢仲有個可取之處，就係係度落腳黎即日來回鄰國既Bratislava啦。

Salzburg同Innsbruck就係二級熱門地點，Salzburg對我黎講，重點就係去國王湖（人人盛讚），而Innsbruck，相信就係個舒服既小鎮，想去南德都可以經呢兩度入既。點解我話相信呢，因為遺憾地，我當時無去呢兩度。

下面會分別簡介下各地預留日數同行程。

HALLSTATT

冬天建議日數 / 1日 /
夏天建議日數 / 0.5 日 – 2日 /

呢個小鎮其實真係好細小，基本上就係一條街黎，冬天可以做既就係行盡個鎮、玩下雪、去呢個postcard位睇景，如果想滑雪既，再自行預加時間啦～當時我冬天係度留左兩日，大部分時間都係玩雪（擲雪球、堆雪人），過左悠閒既兩日。如果時間緊逼既，預留一日就夠了。因為冬天好寧靜，係度Stay一晚都好好架：Hallstatt住宿攻略。

夏天如果純粹行下市鎮可以預0.5日，但因為夏天鹽礦、冰洞、山上既Five fingers觀景台開返所以可以玩耐D，咁就可以加返1-1.5日。

SALZBURG*（網上圖片 @FLIX.BUS）

冬天建議日數 / 2日 /
夏天建議日數 / 1.5 – 2日 /

大家可以在Salzburg內用0.5 – 1日市內漫遊同去Hallein 鹽礦 （冬天都開，詳情睇官網），然後預一整日去國王湖。國王湖 Königssee 其實係德國境內既湖泊，雖然都要花上數小時既交通往來，但從Salzburg去比從德國既Munich去方便架，黎到Salzburg，不如就去埋啦！每個去過既人都同我講到佢仙境咁，所以相信佢係值得一去既地方！

INNSBRUCK (網上圖片：@TISCOVER)*

冬天建議日數 / 1日 /
夏天建議日數 / 1日 /

有時間既，不妨黎市內漫遊一日，畢竟呢個睇到雪山山巒既歐洲廣場景都唔常見啊，仲有纜車上山上睇景添！不過如果行程緊逼既可以考慮放棄，因為佢位置都偏遠，以四國行程黎講都算唔順路。

VIENNA 維也納

冬天建議日數 / 1.5日 /
夏天建議日數 / 1 – 1.5日 /

維也納呢個城市，老實講如果你唔係要黎朝聖既音樂愛好者，又唔係想睇好多好多博物館既人，呢度真係無咩特別——古城唔夠布拉格美麗；亦無Hallstatt既童話小鎮感；湖光山色就更加唔洗講。除左名氣外，佢真係無咩突出，不過佢既建築風格上就比較Grand，的確係有種皇家既感覺既，有時間都可以黎一黎，當感受多一類型既歐洲城市，但若果你無時間想略過既，我並唔會覺得好可惜～

呢個四國之旅係我抵達歐洲後既第一個旅程，所有野對我當時黎講都好新鮮，我果時亦未行過歐洲既博物館，於是黎到維也納，我都可以好好心機地睇下博物館度日，未算話悶，未去到覺得浪費時間（日內瓦…），只係回想起既就覺得呢個城市整體上魅力不大。雖然講到好悶咁，但你要行既，其實佢都幾多景點架。



如果黎到維也納，有咩好做呢？第一日，你可以花一個上午欣賞下黃色地帶英雄廣場一帶既建築群（國家圖書館、自然史博物館等等），果度全部都係華麗既風格，我相信係維也納既重點黎，要逐個影既都有排影。有興趣既，可以係果度花個下午參觀下室內裝修到成個皇宮咁、會行到腳軟既自然史博物館，或者去埋又係裝修到成個皇宮咁既圖書館，可以行到勁耐。

之後就可以逛下紅框既Naschmarkt（一個有食物、手信店既Market，掃下街咁），接住晚上可以去橙框既國家歌劇院睇場歌劇，由於開演時間唔早，所以買完票可以先去市中心（粉紅色區域）行街、果度仲有好大既St. Stephen’s Cathedral參觀。

去到第二日早上，可以去寧舍遠既藍框位置 百水屋，其實佢可以做既只係出面影相、去佢手信店參觀，但就要專程搭去果頭，如果對古怪建築無興趣既，可以直接早上離開，出發下一站了。

捷克（古城、童話小鎮、博物館、城堡）


捷克真係一個美麗迷人既地方，佢首都布拉格比我預期中靚好多，色彩繽粉、典雅又熱鬧既老城景比左我深刻既印象，即使呢度實際上可以做既野未必多，但將來我都好想再去多次，影多D相，因為佢真係條條街都係影相位黎！捷克仲有個重點——佢物價比其他國家低！

布拉格 PRAGUE

冬天建議日數 / 2日 /
夏天建議日數 / 1.5日 /

布拉格好大，不過如果以熱門景點黎講，都係聚曬係上面黃色老城區，以及橙色城堡區。紅色查理橋就係連接兩者既橋樑，佢自己亦係個景點，從果度睇河畔景色當然就好靚啦。至於藍色圈果度，其實就好似維也納既百水屋咁，係一個寧舍偏遠既奇怪現化建築黎（而我只係搭車經過見到就算）。

正如上面所講，呢個地方真係好靚好靚，如果你鐘意影相既，係黃色Old Town Hall 古城區呢頭行足全日四圍影絕對唔過份，不過當然講緊冬天，如果夏天行到咁耐既話都真係好勁，但唔係講笑，呢個範圍真係兩步一景咁濟，有排你影。



呢帶度度都靚，而且好多手信店、餐廳等，要認真慢慢行既真係行到好耐下，而以上係特別有印象既地方，但景點絕不限於此。我地仲去左哈維爾市集，有D手信、食物睇下咁。另外，呢頭既街有好多小型博物館：朱古力博物館、糖果館……又有好多表演場館：雜技表演、歌劇表演、音樂劇等都有，你可以係度發掘到唔少節目，所以話呢度可以玩到差唔多一日架。當然，如果你唔係好影相、又對呢D無興趣既，係咁依行下可以好快就覺得無野做，我係有聽過人話行左半日覺得有D悶的。

第2日，你就可以經查理橋過對面，去橙色既城堡堡區啦。

雖然上面框左好多位，但有野睇既其實就係呢帶：


過橋後，首先可以去紅框果度睇下Lennon Wall ，連儂牆呢個名相信對大家黎講都不會陌生啦。接住，就可以去橙色框果度睇Prague既Skyline，觀景台就係係進入黃色區域既樓梯上面。而黃色區域，就係城堡果帶，入面有一堆古建築群，有聖維特主教堂、舊皇宮、藍色區域既黃金巷等，都係行下睇下既景點黎，我仲入左個玩具博物館 ，呢一帶可以用上一個半日左右。

因為我晚上睇左個Imagine Dragons既演唱會，係布拉格就過左充實既兩日喇。
如果夏天黎，早出晚歸（十點天黑），鐵腿人係可以一日就行曬、睇曬，但如果想慢慢行、慢慢影既，就預返一日半都差唔多。

CESKY KRUMLOV CK小鎮

夏天

網上圖片：@Prague Guide ↑
冬天：

冬天建議日數 / 1日 /
夏天建議日數 / 0.5- 1日 /

CK都係一個我想再返去既地方，我去既時候正值冬季，有幸睇到佢童話般既雪景（真係超靚），不過佢夏季既橙、藍、綠分明既小鎮景亦係我好想親眼見到既，所以真係好想再返去！黎到捷克，落奧地利時真係一定要係呢個美麗小鎮行返日！

其實CK好細，可以做既都好少，真係預半日黎行一圈都可以徙步行曬，佢主要既景點係：

仲有去影相位睇高空景（因為我當日唔舒服，係酒店入面hea左全日，晚上先出去行，所以無時間去影），仲有其實我真係好鐘意座彩色塔！
順帶一提，呢度冬天好多店都唔開，有D似死城架，可能會比較悶，千其唔好預太多日留係度，一日真係夠，不過雖然話少野睇，但就更加寧靜，係度抖下、慢活下都好啊。

KARLOVY VARY 卡羅維瓦利 （溫泉小鎮）*

網上圖片@EASYVOYAGE.COM
冬天建議日數 / 1日 /
夏天建議日數 / 0.5- 1日 /

Karlovy Vary 係捷克西北部一個以溫泉聞名既城市。呢個城市真係幾有特色——唔同既溫泉泉口遍佈呢度每一個角落，路人可以用溫泉杯斟呢D泉水飲用。以前既歐洲皇室、貴族都好鐘意溫泉水，因為覺得溫泉係有神奇既療效，因此呢度以前已經係好受歡迎既旅遊城市，有唔少名人既足跡，例如莫扎特。如今，佢依然係個美頭既溫泉城市，黎到捷克，如果從德國入捷克，不妨花一日係度行個圈，遊覽下！你亦可以從布拉格即日來回呢個城市。不過，睇過咁多遊記，佢出名既溫泉似乎主要都係飲用既泉水，如果要係東歐呢邊浸溫泉既話，我都係比較推薦匈牙利。


呢個地方唔算好多，係由沿住Telpa河而建既建築物組成既，所以主要景點都係曬呢個細小既範圍，全部都係行街、影相，徒步可到，所以唔需要用太多既時間就可以行完，當中亦無理想地浸個溫泉既行程。

其實我未黎過呢度，不過順道做個綜合。呢個城市出名既景點，主要都係迴廊，每個都有唔同既溫泉口，有唔同礦物既泉水，但全部都係非常難飲既（我係匈牙利飲到既亦然），就係鐵味，係直頭覺得飲完會中毒既水：

以上MILL COLONNADE(磨坊迴廊)、MARKET COLONNADE(市場迴廊)、PARK COLONNADE(德弗札克公園的公園迴廊)都係長廊入面有幾個特色泉口，而且內外裝修都幾靚，係影相既地方。而最後一個既溫泉迴廊入面就有名副其實既噴泉啦——一個會噴溫泉水既噴泉。

以下圖片左邊既階梯都係呢個城市既重點，果度係一D電影既拍攝場景黎架。

網上圖片@historickasidla.cz

斯洛伐克 （古鎮建築、城堡）

斯洛伐克幾大，如果你要深度遊呢度，你絕對可以去盡呢度不同既山洞、冰洞等，亦可以行山，不過如果你唔係呢方面既愛好者，係四國遊入面既熱門行程就多數都係去一去佢既首都Bratislava——一個都幾細、無咩好做既小鎮。

如果你係維也納如果無野做，不妨即日來回斯洛伐克既Bratislava黎個半日遊，亦可以係去匈牙利之前係呢個城市停留返半日行個圈，佢既古鎮都幾彩色，唔錯既。

BRATISLAVA 布拉提斯拉瓦

冬天建議日數 / 1日 /
夏天建議日數 / 0.5- 1日 /

Bratislava真係幾細，你係入面亦唔會有咩好特別既野做或有咩可以睇好耐既博物館，但佢有個令我好回味既餐廳係令我係果度食左兩、三餐。以下係你係呢度可以做既事：



除左以上頭三項既搵銅像、藍色教堂、德文城堡，我仲去左個Museum of Trade [極迷你，只有一間店仔咁細]。基本上，除左德文城堡要搭幾十分鐘車出去之後，其餘既地方都係集中曬係古城範圍內，所以唔會需要太多時間。食野方面，絕對推介LOFT Hotel Bratislava入面既酒店餐廳Fabrika the beer pub！

其實我係呢個城市留左兩日，真係悶到發霉！千其唔好重蹈（我地既）覆轍！留一日、半日都好夠架啦。

匈牙利（古城、博物館、建築、城堡、夜景）


匈牙利最出名既一定係號稱多瑙河上明珠既布達佩斯 (Budapest) 啦，唔少人去完都好鐘意呢個城市，而我亦覺得呢個城市幾精彩，都幾多野可以去做下！黎得東歐，一定一定要黎呢個城市留返幾日啊！

BUDAPEST 布達佩斯

網上圖片@Lonely Planet

冬天建議日數 / 3日 /
夏天建議日數 / 2 – 2.5日 /

其實布達佩斯多瑙河一帶既景色相信真係好靚，點解我話相信呢，因為我去果時正值極濃霧既幾日，可以話伸手不見五指…所以咩靚景都睇唔到啊！所以呢部分既相好多都要用網上圖片了…不過，就算不幸睇唔到景，呢度亦有好多精彩事可以做，依然不枉此行啊。當時我得2個Full day，D行程pack得好實，好chur，以下會詳細講下你係呢度可以做既野！



布達佩斯其實多數景點都係沿河兩岸，仲有一部分係東邊岸既內陸D既位置，所以可以分為上圖紅（漁夫堡一帶）、黃（國會一帶）、綠（中央市場一帶）、藍（塞切尼溫泉浴場一帶）四區域。



第一日早上，你可以先集中黃區，去多瑙河畔行下，睇下國會大樓Parliament（可網上預約進入參觀）同去河邊放左紀念猶太人既靴子（Shoes on the Danube Bank 多瑙河畔之鞋 ）果度參觀下。

接住，你可以去綠區 中央市場一帶 Central Market行個圈掃下街輕鬆下，呢度有成行成市既小食店，全部都係匈牙利特色菜！可以係度揀到午餐架。佢出面就係叫做自由橋 Liberty Church既綠色仿鏈型大橋樑，係呢度最著名既大橋之一，沿住佢行，對面就係山洞教堂 Cave Church (Sziklatemplom)，係個幾有特色既教堂，因為係建於中洞中，從外面睇都覺得幾壯觀！果度山頂仲有個解放紀念碑，果度可以睇下高空城市景。但如果對佢地無興趣，就可以直接搭巴士去漁夫堡果區（紅區）。


漁夫堡係山上，山腳有Lift上山頂，而重點係山腳有個好值得去既戰時岩石醫院博物館 Hospital in the Rock，故名思義，係戰時呢個岩石山洞係個醫院，而家改建成博物館，但仍保留大量當時既設施，黎呢度參觀係必定要參加佢為時一小時左右既導賞團（需要預約），所以可以預留定時間參觀。參觀過後，就可以上漁夫堡。漁夫堡係個外型好特別，好值得去既城堡，呢度仲有座教堂馬加什教堂。漁夫堡除左本身已經好靚，堡上亦可以俯瞰飽覽多瑙河畔既景色，如果鐘意既可以逗留耐D，睇曬佢既日、黃昏、夜景。（冬天四點幾開始就天黑；但夏天可能去到九點先天黑架，所以夏天想睇山上夜景建議上堡前放多個行程。）

晚上，你就可以參加遊船河，係船上食個晚餐，一路食一路歎夜景！
（如果對歷史有興趣，夏天可以係上堡前去埋恐怖之屋，佢唔係鬼屋，果度係有關於20世紀匈牙利既法西斯主義同匈牙利共產主義時期既展品，亦係制度底下受害者既紀念碑。不過如果冬天去應該唔夠時間做咁多野了，因為睇曬D館先上到漁夫堡就一定會剩返夜景，所以就話冬天要比夏天預多日。）


第二日，早上首先可以去藍區，英雄廣場一帶，其實果頭就係有D雕塑，無咩好特別既野要逗留，除非你想參觀果度既美術館。呢度睇完就可以去附近既動物圖，途中係冬天時你會見到結冰既湖仔變成溜冰場（City Park Ice Rink and Boating）夏天就係坐下艇仔啦，可以係度玩下先架，仲會經過一個餵鵝機，幾蚊就會出好大堆食糧出黎比你玩下（唔止上圖咁少）。然後就可以去參觀動物圖——呢度好多動物，不過冬天時熱帶動物會收起曬唔知去曬邊，而我幾鐘意度，因為D動物真係好鐘意望住D人，對你好有反應，唔會無視你！

而動物園隔離，就係著名既塞切尼溫泉浴場（呢度最大既浴場，有露天及室內溫泉），絕對係必去體驗既地方！佢係呢個城市既重點啊！你唔好錯過啊！！！一定要去！！！當時我就係0度底下係度玩盡曬呢度每個池！可以花上數小時架，詳情、玩法後補啦哈哈。

晚上，你可以自由搵下自己鐘意既餐廳，都可以去New York Cafe 歎個晚餐或食完野行下河邊睇下多瑙河一帶既夜景先去NYCafe飲下野，食下甜品（開到12點！），呢度環境真係幾靚，值得黎打個咭！

第三日，夏天行程若果無咩特別其他地方想去，可以去下個城市了，或將前兩日既地方打散黎呢日，可以休閒D。冬天亦都係，前兩日既行程最好打散過黎第三日，因為日落較早，係黑夜中係街留太多會覺得好攰架，不如提早休息下啦 。



以上，就係芒果豆腐花遊記既東歐四國懶人包（v.2.0）啦。
比多好多心機同時間整，如果大家覺得有用既，歡迎支持下Facebook page ，
留意最新資訊同遊記： 芒果豆腐花遊記 http://www.facebook.com/mangotofufa/
黎緊，我亦會打返東歐四國既遊記架！

我希望可以整到更多國家既懶人包，但由於懶人包整合需時，會陸續再更新，
接住會講：德國、西班牙、比利時、荷蘭、盧森堡、波蘭、希臘、斯洛文尼亞、克羅地亞、波斯尼亞和黑塞哥維那、瑞士、英國等國家。

好靚啊 一生人好想去次呢D地方

lm

多謝巴打 實有機會架 grad trip去啦

留名先
7月去德國奧地利捷克
要參考下

lm

呢3個國家幾順幾好plan

好期待
如果到時有咩問題再問你

絲打又見到你了
之前去exchange 問過你捷克物價架
留名 五月尾去Budapest

想問下呢4個國家治安點 多唔多扒手
黎緊5月都去以上幾個國家 有少少驚

呢四個國家點睇都係叫中歐喎
Geog U?

地理上我都覺得佢地係中歐/以東南西北計就東歐偏西，但歐洲分法又唔係得地理因素既，仲有歷史、政治等，正如德國都係中部，但平時叫一樣好多人會當埋佢西歐國家

歐洲分區界域並無國界咁清楚，有多種係唔同因素底下既講法，而我就比較膚淺，我只係跟聽開咁叫同埋d旅行團既叫法

thanks絲打

正啊

好的

好嘢仲見到舊post巴絲
你exchange緊？定已經返左黎再去？

點解咁高質既post 冇人睇

我地經驗就覺得歐洲黎講呢四個國家治安都唔算特別差，比起希臘法國意大利感覺好
不過d的士就小心d，有需要盡量叫酒店book，我地求其截中過黑的 屈錢
其實都ok既，行大路無咩問題

我地果時唔係旅遊旺季，好少好逼，所以feel唔到有人借d依湧埋黎果d，都幾正常，係會有d乞衣無啦啦同你講野，無視就得，
夏天多人就要比較小心

如果一個女仔去會唔會危險