SZECHENYI BATH 實際體驗 遊記
黎到呢度，我地已經即時改變（齋睇既）主意，要黎浸個浴，不過手上HUF唔夠，只得大量歐元。但係呢度貼心到連找換店都有！！而且個rate都唔算差，所以我地即場唱錢、即場比錢入場。
我地租左個Couple Cabin，基本上一個Cabin既大細就同去時裝店既試身室差唔多大，你租一個Cabin就等於租左個私人更衣室+Locker，可以換完衫將你個人物品鎖埋係入面。如果一個Cabin覺得逼既，你絕對可以一個換完衫再比另一個入去咁樣。至於租Locker就係無個人更衣室，不過更衣室都會分男女，相信入面同你平時去泳池時情況差唔多。因為我地要成套衫除出黎換泳衣，唔似平時去游水一早著定係入面，所以租cabin方便d，唔洗當眾裸體換衫——就算你一早著定黎，走果時換衫都係要除曬，當然，lockers 果層都有d沖涼房果d，你都可以拎曬d衫去換既。
話說我地大鄉里去到Cabin area，就係度搵有無吉房，而其實係唔需要
，因為搵到你都用唔到——你鎖唔到門
。正確做法係，先去搵果部機係可以一次過睇曬邊度有吉房，然後係部機度揀房、之後好似係set密碼/用個有電子感應器既手帶嘟一嘟，就會私有化左間房，總之就係一個step就可以令你鎖到同開到指定cabin既門。
租既男裝泳褲係貼身短褲，租既女裝一件頭游泳選手果種泳衣印象係中無胸墊，所以係要著埋你內衣係入面，最好都係自己帶泳衣啦。
入到場，熱鬧到呢，仲好鬼凍
，因為你要係0度底下行去個池，身上只有泳衣同毛巾，所以我地彈下彈下咁一野求其放低毛巾後就彈左入求其一個溫泉池（對腳版底吉死左！
）。
我地落左下圖最主要果個溫泉池，就係有個圓圈係入面果個，個圓圈中心可以浸，而個外圍其實係急流黎，你一走入去，就自動會順住水流好快咁同d人圍圈咁flow，速度幾快，好好玩，如果你要出返去，係要做d預備，諗定路線，一陣衝過去捉住邊個柱爬返出去
。
有d人（其實係一班香港人）會帶埋go pro入黎玩，都無問題的，呢度可以影相的。
（但我一張相都無影，因為我剩係見到一片白霧，加上我d器材唔防水，浸完天都黑埋，就無再去影咩相）
其實係度浸個feel係似泳池多過溫泉，不過係幾過癮，望住個咁既景浸池，好有皇室feel
！而0度玩呢d簡直係癲，不過一落到水又好鬼爽，因為膊頭以上凍既，浸水入面既就係暖既40度，其實係最理想既浸溫泉溫差
，浸溫泉5度以下真係好正，所以夏天黎可能會無咁爽——當然上水後既情況就比冬天就爽好多啦
。
我地浸到咁上下，就轉池，個個人都用緊租既毛巾咁濟，其實好易被人拎錯，我地被人拎錯左一次，不過被人拎左既就「拎錯」返另一條就得
，因為大家都只係用黎褸住自己，印下水，所以都無乜野，大家亦可以瘋狂拎錯人地果d
，因為成個場都係毛巾
。
（最後你一定要還返一條比場地去拎返按金）
每次轉池都係一個折磨
，因為又要經歷一次腳版底既大懲罰
，而呢個又凍又痛既感覺足以令我地無視左我地身上既凍，如是者我地玩完出面3個池後，就進軍室內
。
呢度室內池好多，有15個，你都唔會知每個有咩礦物上既分別同療效，只會知有溫度上既分別，起碼係20-50度都有，20度簡直玩命，凍到
，但我bf走去挑戰，仲叫我落埋去
，當然唔會理佢
，之後佢話猜包剪dup，輸左要落一格樓梯（落下落下就會落曬）結果我連輸，但當然落左一、兩格後就唔肯再落
，好彩佢無掉我落水（其實佢都想，不過未掉我已經準備大叫，為免全場望住佢放過我
）隔離而個呀叔睇到成個過程係度笑
。
如是者我地行下浸下，室內比出面「舒服」，因為對腳唔洗大懲罰
，不過爽就出面爽好多，因為溫差夠大同有feel d 。呢度d池細，無咩特別，不過都幾得意既。
話說呢度有時有d泉口佢會寫住話飲得，就有個水喉仔咁比你飲下，玩左咁耐我地都口乾就想飲下，諗住係礦泉水咁，大啖放落口，點知哇我屌，真係礦啊
，但係係生鏽果種礦
，成陣鐵鏽味，好似飲左污水咁，一放落口已經一野噴返出黎，點解會飲得
。好好奇有無人真係能夠吞到。結果我地用d咩去除返口入面呢陣鐵味呢，我都唔知，因為呢度應該每樣水都係呢d味。
呢度仲有桑拿房，我地就當然係一打開門就立即關返門啦
。果陣熱氣攻出黎立即一野閂左佢，好佩服入面d啊叔坐咁耐。
奶盡曬呢個場所有池後
，都天黑，可能5點了，我地決定係走之前落多次室外池，於是又大懲罰式彈落池，一落去真係完全唔想再上返去
。
真正玩到夠曬皮後，我地返返Cabin area，果度得cabin，無得沖涼，其實我地想沖個身，不過呢層完全唔覺有花灑，但後來聽巴打講原來下層更衣室果層有d花灑
。
晚上臨走前影多幾張…劣照
。
抹完身換返衫後，我地就出發去河邊，因為我地幾日前網上book定左係多瑙河遊住船河食燭光晚餐。
聽落好正呢？不過其實呢個係錯誤決定……因為黎到先發現好大霧啊！！
景呢？夜景呢？嗚哇！！！
（待續）
：
我記得好似係果度metro問過人野都好似係西西地
瘋狂睇你遊記止下渴先
好神秘，因為有幾位巴打/絲打，我估唔到係邊一個
