【奧捷斯匈】13日東歐四國遊記 (遊記資訊+歐遊你問我答) 7

我煮左好幾餐 超市物價都ok
btw我以為hostel一定有kitchen？
可以食果d kebab呀果d，或者四圍都有的nordsee，好多飽肚的薯類食物

咁慘 Vienna 物價貴
我果日閒日去可能無人睇
匈牙利國劇院有興趣既話
上官網直接買票揀位就得

我都係租cabin
有沖涼位 係咁e花灑沖一沖果d

你指cabin有沖涼？ 定係其他位 唔知點解見唔到 雖然無去搵過

其他位 有個花灑沖身

下次啦
絲打記唔記得我
上次去意大利都有睇你post同問你野

緊係記得 絲打好似果時係有打算去米蘭近郊果個湖

仲有個80度桑拿

一打開門，即刻關門

【歐遊百幾日遊記】東歐四國篇（奧捷斯匈）（五）DAY 3 布拉格 城堡區 半日遊（中）布拉格城堡俯瞰老城風景 布拉格玩具博物館 第一次見雪 ｜ 關於歐遊在餐廳如何叫清水…


上回提要：我地行完Lennon Wall就亂入左間餐廳（唔係上圖）。

呢間餐廳叫做 Restaurace Černý Orel （不推薦 ）Link: https://www.tripadvisor.com.tw/Restaurant_Review-g274707-d4209790-Reviews-or10-Restaurace_Cerny_Orel-Prague_Bohemia.html

我地因為出面門口個menu睇落好似價錢正常就入去。入面環境都唔錯，感覺類似地窖餐廳，印象中店員帶左我地落地下室果層，感覺幾得意。點知入到去，set好曬枱，先發現入面個menu同出面個價有d唔同，平均每碟野貴2-3歐…但因為都知附近無咩野食，又覺得都set好曬佢又企定定望住曬，而家走唔多好意思…就算啦硬食。

首次歐遊 關於在餐廳只想飲唔洗錢既清水 你要知既事

係歐洲入餐廳點餐時要知道既一樣係，店員好鐘意問你飲咩，如果想飲水，好容易會中伏搞到比左幾十蚊HKD買支細水。

話說歐洲餐廳係會問你要咩餐飲，有時你都未睇menu就一野問左你想飲咩先。之前幾餐我地都會叫可樂飲，但因為頭先先飲完野，於是呢次係我地第一次唔想用錢買野飲，於是就想要水。對於大鄉里黎到歐洲，易中伏既位就黎啦。

除左希臘會自動送冰水比你之外，你係歐洲大部分地方，當你講要水，店員實會問你still water定sparkling water。Sparkling water就係有氣既水，你可以當係完全無味既7喜，所以係汽水咁既產品，當然要收錢啦。而如果你諗住答Still water可以唔洗比錢買水就錯啦，佢會拎支玻璃樽裝普通水出黎，有時再加隻有冰既杯，好好服務咁同你開蓋再倒少少落去比你享用（下圖個可樂杯…）最後就盛惠3-5歐啦。3-5歐一支300ml都唔知有無既清水…太奢侈了，正常人都唔會咁叫。

我地見佢一黎就拎支靚水都有d驚喜，大鄉里心諗真係得意啦，咁有feel既，唔知洗唔洗錢呢，最後就緊係要，之後我地就唔敢再係餐廳叫水，想飲都士多買定先。不過到開學讀書跟外國同學出去食飯就知，你只要好似佢地咁，
人地問你飲咩，你清楚講要tap water就唔會中伏，唔會再需要答still定sparkling water，只要講tap water你就會得到正常免費既水喉水（歐洲可以直接飲）一杯。
會唔會唔好意思/好似唔跟人文化咁呢？至少連鬼佬自己友都咁叫，我地照跟就得啦。

除左水，我地照舊每人叫左個扒餐，基本上我地多數都係一豬扒、一牛扒咁叫，每扒配d薯菜咁。下圖係bf亂影的

右邊果d包極乾…聽聞捷克野黎，咁睇似餅多d…係佢夾硬送又夾硬收錢既野黎，原理類似意大利既Coperto咁 而呢兩碟野，我頂佢個肺，好乾啊！！乾哽硬扒咁，一d都唔好味，無肉汁既，近鏡果個都話有d醬，對面果塊…無架！！
竟然要100幾蚊一碟，食到黑都面曬，最後每人只食左一半（早知只叫一個啦）。

係歐洲亂入餐廳真係又浪費盤纏又浪費食好野既quota！第一個trip就係中唔少呢d伏，所以最好都係點都係事前上tripadvisor，係沿路mark定幾間餐廳，睇下食評先好入。我地之後靠佢食左好多超級好味既野，當然都中過一兩次伏（但機率遠低於亂入）。

頹皮地走出餐廳後，都唔知話入面暖導致有個反差勁定點，總之一出到黎，完全覺得係凍到傻左，個天色都變埋。


痴線個天變得咁快。

就算著住好保暖既大褸都凍到打曬冷陣，彈下彈下，要賽跑黎保暖。
不過因為跑黎保暖對我地呢d唔做運動既廢柴黎講太chur，我地決定用另一個方法——買杯hot wine暖暖胃。琴日講過，呢度興飲杯暖酒暖胃，你唔洗入餐廳，求其一個stall仔已經可以買到，就係直接一個紙杯仔咁比你。 拎上手都暖 好似下圖咁。

印象中唔貴，仲要比頭先支still water平，但實際幾錢真係唔太記得，我估20HKD左右甚至有找啦，仲要係都幾多，唔係用試食果d迷李杯，係正常紙杯size，仲超級有效，一飲即暖，唔單止d飲品本身暖，仲會搞到個人自動識製造暖氣，即時舒服好多。

講真對唔飲酒既我地黎講，杯酒都算幾重味，唔算好易入口（又好過啤酒既）。但因為太有效又唔想浪費，我地不禁飲呀飲，我都飲左半杯有多。



就係飲住佢，不知不覺終於捱到去城堡山腳，而去到呢度，d酒意就開始黎啦，明明係上圖呢d好闊、一d都唔斜既樓梯，我地行到好似要行上珠峰咁chur，行得勁慢，一路覺得好攰好無力，好想抖下。

初頭我地都未知點解咁虧，之後醒起一定係因為d酒！！對於呢d得隻紙杯無名無盛既酒，我地真係唔多知亦無諗過幾多%酒精就飲，到而家我都唔知個答案，剩係知食飽左飲幾啖仔都己經整到我地好想沉睡。


話說由餐廳行起，就係一條順既直路行，毫無難度。到到上圖紅點位，就係城堡梯上既觀景台啦。


我地好不容易終於爬到上城堡出面（其實正常係無難度的），呢度就係個觀景台，可以睇到布拉格既天際線。今日天氣其實唔好，睇到既都唔鮮色，呢d相我已經落足味精，十足假相。或者咁講，真係假相黎。係度hea影左幾張就走了，連搵個好位都廢時，勁多枯樹。


如果天色好，你絕對會見到藍、橙分明既景緻，大可以影一千張相。可惜因為天色太差，加上我地飲中伏完酒只想訓覺
都幾可惜，我見到人地天氣好果時好靚，嗚哇。我見到既景並無呢度d相所見既咁鮮色tim。


唔怪得城堡咁鐘意建山上，要國王要日日出黎望下，感受返大地在我腳下。

睇完、影完後，我地就入到去城堡區。首先我地被一間寫住玩具博物館既牌前面隻雕像吸引左，

係一隻擁有金色JJ既男仔銅像。佢個名叫做Youth，上網search下睇唔到咩大道理，剩係見到一段幾頂癮既文字：

有無咁重要，要講到most important
再睇…越睇越多痴線佬…

how to properly handle the golden penis…

side track完其實，除左個銅像，我地都真係被個玩具博物館吸引既一黎玩具館好似會幾有趣，二黎博物鐘多數有椅坐，被d酒整到懵左既我地好想坐下呀！！！！！

布拉格玩具博物館 THE PRAGUE TOY MUSEUM


嗚哇，係幼稚園d玩具農場

布拉格小城區既玩具博物館樓高2層，原來係全世界第二大既玩具博物館（呢點我好懷疑，雖然唔細，但都唔係話特別大，可能世界上太少玩具館，又可能佢亂講，因為個網都話「was said to be the 2nd largest」）入面展出多個年代既珍藏既玩具，講到古代古希臘時期都有…而我地太醉太眼訓…可能見到都無為意… 總之係你會見到幾十年前既人既玩具，有d都幾creepy，而你細個玩既都會有，就係呢個年代既無，因為而家好似已經唔興玩玩具了。

如果有興趣去，要注意以下呢個資訊，因為城堡區維修，連個館既展品都暫時搬埋，去左古城區中心啊。

資料來源：http://www.myczechrepublic.com/prague/toy-museum.html

During renovation work at the Prague Castle (expected to last into 2018), the exhibition has temporarily moved to the Clam-Gallas Palace on Husova street.

Address: Husova 20, Prague 1
Getting there: Metro A to Staroměstská
Hours: 10:00 a.m. – 6:00 p.m.
Admission: Adults 70 CZK, students 50 CZK

黎到呢度，我地真係醉到瘟瘟燉燉，呢d相可能都係係好想訓覺既情況下影。


絕對係我細個極想要既玩具！！好好玩！！！但隻bb會唔會太恐怖。

港女tea道具都有，原來玩玩具都有貴族風格。

D bb坐曬係樓梯不過講真，d玩具真係造得幾靚。

一路睇，真係越黎越眼訓，絕對唔係因為悶，我地係可以一隻公仔都笑一輪既無聊人黎。我地係因為杯酒，一路係好想快d行曬睇曬既感覺，只想快d搞掂快d返酒店訓覺。而有趣既係，呢個館係一張椅都無，你只能一直行行行，我地唯有係樓梯附近挨下牆抖下，期間直頭想即刻返去訓，訓到晚上去睇演唱會為止。

不過好彩好彩，再捱多陣，我地好似同時又開始精神返，真係同步，終於可以精神d咁睇館，四圍影下相。


我小學小期最愛既玩具 barbiessss不過我果d靚d


成堆barbie入面，小矮人完全有亂入feel 痴住個女巫王后都係咁話


呢個仲搞野無啦啦整個愛恩斯坦 睇黎佢有好多老婆


中學時期最愛 最右邊果隻好得意


又有亂入玩具呢隻黑熊完全唔啱風格


本來d船好型，加左d bb 落去成件事又搞野左重點係中間d外星人……


呢個真係當玩具？


玩老師


痴線乜黎其實呢個館真係好搞野


我最鐘意呢個，真係超正，完全係細個既dream toy，有張postcard係呢個玩具，我地買左黎做紀念。不過講開又講，佢又要係度放3條大魚係出面搞笑


賣玩具既掌櫃熊。我地見到怪物就會去扮佢黎影相。

無聊到，但我真係好鐘意呢d屋仔玩具！！！

呢張手機相黎，玩具中既玩具左邊間屋d細路玩緊玩具


做乜鬼，all屎都有玩具

最高果層係手信店，我地係度買左張postcard，上面正正係上面有張圖果座山，我話最鐘意既果個玩具。我地去旅行鐘意儲postcard同磁石，用黎紀念我地去過既地方，當係比自己既手信。

離開玩具博物館後，出到黎行多幾步發現，嗚哇無啦啦落雪啊！！
我地兩個都第一次見到雪，所以都覺得好新奇。人地可能係一野到左個好多雪既地方，一見到哇一聲，而今次我地係本來完全無雪，睇住d雪花慢慢落，感覺真係有d似以前海洋公園冬天果d泡泡假雪當然，d雪花既detail多好多。


你見到雪，但佢地一落到你身上好快就好快會消失，同埋你唔會見到積雪。
不過第一次見到雪真係好開心！


呢張相有雪架，見唔見到。
呢個時候，當然瘋狂影相，留低呢個自己成身白雪點點既時刻。好彩d雪只係好細，你唔會被佢搞到眼鏡一達達，比毛毛雨更輕鬆。

防雪褸用黎防雪，checked。
而家終於明點解頭先食完野凍左咁多，天氣又多左咁多雲，原來係因為就黎落雪！


城堡區一帶既建築都比較大型。唔再係一間間細既排埋一齊，係另一種風景黎。


一路向前行，就係城堡上面既教堂同廣場位置，亦係城堡區既重點啦。

（待續）

推~

Lake Como無去呀，因為上次歐遊去左國王湖
我去左Cremona 睇小提琴

打左大佬
原來是咁

我好鍾意樓主



























條頸巾

未打晒
上次去係11月，無開放入面個obersee，所以留返下次再去～

淨係個城堡區都夠玩一日
有無去交響情人夢城堡區場景果到影相？

多謝小港女老豆
等睇小港女歐遊記

vvd果然有品味

果頭我都要再去了 天鵝堡天氣差又睇唔到最靚個角度
國王湖又無去

淨係個城堡區都夠玩一日
有無去交響情人夢城堡區場景果到影相？

我無睇交響情人夢
係咪即係呢個位？

呢度似係上城堡條梯，我地果時醉曬爬住上 無力影

推~

係呀

慕尼黑要再去啦
要睇埋波