走出街道，見到既行人並不多，但並冇好似Brussels咁帶比我一股不安感，我反而覺得呢度好祥和，令我心境異常地平靜。
「呢度好靚。」我輕聲讚歎走過既風景。
「行到市中心你會覺得仲靚，不過我地等陣未必會經過Market Place。」
「Market Place？乜原來比利時都有呢間超級市場架？我以為淨係亞洲有添。」我唔覺意用左「港女Tone」，聲線都飆高左差不多八度。
「你唔好咁低B啦，我講緊個市集廣場，係Bruges最出名既地方。」
哈，出醜了。
比著以前強悍，死要面既我，連小小事都要拗贏，無論係對錯都好。
但喺Nick面前，我不知不覺中連自尊心都漸漸拋開。
我發現自己每次投放感情喺另一個人身上時，連性格都會變得柔弱。
柔弱得，根本唔係原本既我。
我好討厭咁樣既自己，好討厭呢種一廂情願既感覺，但我知道，好多野一旦講出口，就永遠返唔到轉頭。
*
我地行過左一條細細既運河，當然唔似阿姆斯特丹般壯觀，但符合返呢個小鎮既形象，兩旁都係中世紀設計既古舊小屋，仔細望既話睇到外牆有好多特別既裝飾品，非常有心思。
微弱既街燈令沿途既景色開始變得黯淡，夜間既涼風吹過黎我地既方向，但身體卻沒有絲毫的抖顫，因為布魯日比到我地足夠既溫暖感。
我好快就留意到呢度既街道都係用鵝卵石鋪砌，古色古香，望遍周圍都冇高樓大廈既蹤影，就如置身於與世隔絕既安穩小鎮。
我行喺Nick既後方，佢冇一如既往咁企喺我旁邊，我只可以加快腳步。
「其實你帶緊我去邊架？」
「見你好似餓餓地，帶住你去食野先。」
唔知係Bruges啲路容易認定係點，佢好似裝左個GPS喺腦入面咁，喺完全冇蕩失路既情況下，穿過一條條外形相似既巷仔，到左一個角落位。
「間餐廳喺下面架，係咪好隱蔽呢？」
前面有幾級石級，有個細細既木牌寫住”Entrance”，唔望真啲都唔會覺得佢係一間餐廳。
「啱啱經過既時候，無意中行過左呢度，我偷偷地裝一裝，原來係間餐廳黎，呢啲古靈精怪既地方，應該啱你？」
「你咩意思先？想話我好weird？」
「我唔覺得你奇怪，我覺得你好特別。」
「個個男仔都係咁講架喇，唔通話個女仔好平凡咩。」我唔想再對佢所謂既「甜言蜜語」有任何感覺，我怕我會越陷越深。
「唔好咁敏感啦，只係一個statement黎姐。女人好難捉摸啊！」
其實男人的心思更難捉摸，起碼多數女人都會將七情六欲擺曬上臉，而Nick，佢既表情永遠都係咁沉穩，好少顯露佢既情緒。
「言者無心，聽者有意啊。」
「我講每一句都係真心既，我好少會講大話。」
即是並非全無。可能佢唯一既大話，就係選擇左對我講。
我好倉猝咁做左一個決定，即使未必係最合適既時間。但如果依家唔問，我驚我再冇咁既勇氣。
「雖然咁樣問好奇怪…..但….我可唔可以拆穿你一個大話？」
我並冇擺出任何嚴肅既表情，反而係用最快既速度吐出每一個字，因為我唔想比自己內心有一絲既掙扎。
