***
喺辛德勒工廠既旁邊,仲有一間現代藝術博物館(MOCAK Museum),都係由工廠原址改建而成。
我當時見尚有時間,而且入場費非常平,就打算一場黎到,不妨都參觀埋。
入面展示左好多Contemporary Art 藝術品,但離閉館時間不遠,我無法詳細去睇每一件千奇百怪展品。
喺準備離開之際,我被卻一段名為《80064》既影片吸引左,當時博物館內既人已經所剩無幾,我戴起耳機,靜靜睇呢一條影片。
影片只有十分鐘左右,卻非常沉重。
80064,係屬於一個二戰猶太倖存者,當時被送到Auschwitz集中營時被刺上既編號。
佢依家年事已高,但一個紋身師主動提出為佢將編號刺青還原。
老人答應左,但呢個行為令到好多人都不解,點解佢要將一段人生入面最痛苦既經歷,再清楚地呈現自己喺眼前?
訪問期間,老人被問到,佢對呢個編號既感覺,佢既回答係:
“Do I like it? I never liked it because I could not like it, it was made in such circumstances… and for such reasons.“
到最後願意將呢個編號再次刻上自己既手,所需既勇氣並非常人能想像。
連一段十分鐘既影片都能令我眼角沾濕,我無法預想當我親身去到集中營時,所感受到既情緒會有幾沉重。
好多人會選擇逃避人生入面既陰影部分,但老人卻選擇大膽地面對自己最黑暗既時期,或者咁樣先真正代表佢能克服自身。
***
我趁住天色未黑前,就到左猶太區(Kazimierz)一逛,呢度相對起我從民宿一路走過來經過既老城區冷清得多。
周圍冇老城區令人目不轉睛既華麗建築,只有破敗平凡既舊建築物,卻顯得更有真實感,更能貼近同瞭解波蘭猶太人既生活,呢啲係一般景點唔會比到我既體驗。
我當日既晚餐,係一種捷克食物,但唔記得係乜黎
由於昨晚徹夜無眠,體力已耗支得七七八八,打算返到民宿就立刻沖涼訓教,預備聽日早起到集中營參觀。
回到房間,Nick已經唔喺度,大概係我出門冇耐後,佢都出左去。
以前臨訓前,佢總會與我談天說地一番,再亂發一篇佛經,話等我可以安心入眠,而佢永遠都比我早訓著。
整整一個月黎,我地幾乎都出雙入對,眨眼間卻突然只剩低我一人,好不習慣。
嗰一晚,我冇再收到Nick既晚安訊息。
待續
今日打左好多,聽日可能又要休息下