20230524
狼隊今季一度排英超包尾,上年底請西班牙名帥盧比迪古執教後,成績大躍進得以護級成功,不過呢位前西班牙國家隊主帥近日自爆,答應加盟嗰陣唔知球會有財政公平條例問題,據報佢喺聯賽煞科後將同狼隊高層會面,唔排除會辭去主帥職務。
狼隊喺近2個轉會窗用咗超過2億鎊(約19.47億港元)買人,最終亦成功護級,但盧比迪古最近同球會傾下季計劃,就有重大發現:「同主席開完會,我先知道球會有財政公平條例問題,呢件事我上任前完全唔知情,希望可以解決到,唔作出投資喺英超係好難生存。」
狼隊上年度財政報告錄得虧損4,610萬鎊(約4.49億港元),據報球會為整靚盤數,夏天將會賣走魯賓尼維斯、阿達馬查奧爾同摩天奴等主力,盧比迪古將喺煞科後再同狼隊商討,若果未獲保證有資金增強實力,佢會考慮辭職