(半live) 躺平旅居生活，獨遊泰國曼谷四星期

Welcome back!

宜家有冇去食碗牛腩麵先番屋企呀

真係畀你睇穿曬

我都係去咗啲粉麵店，只係今次叫咗雲吞河，依家先啱啱坐低

講真係香港搵泰國玩真係好撚爽
自己一個去完，治安又唔算特別差
重點係啲嘢平

正喎
我都鍾意食雲吞河

不過要加腩汁

整多碟腐乳通菜更好

Enjoy the supper, bro！

welcome back to 臭港

美元強 基本上依家去邊消費都比香港平

尋晚食完雲吞河之後，同我收銀講拜拜，但冇人理我，跟住坐的士返屋企又畀的士狗兜路，真係開心香港

我上次諗住食榮泰
企咗陣都無人理我
隔離榮泰重阿姐拉咗我入去
食完覺得正正常常
無話特別好食
見你講完睇下有無機會再試返榮泰

我以前去越南泰國照grab bike
又平又快又唔塞車
越南仲會比埋頭盔你戴
反而泰國無

有頭盔即刻穩陣好多
我之前係曼谷街頭穿梭，真係有少少搵命搏

香港人個種冷漠自私真係好難頂

個個都淨係識諗自己冇同理心

去親日本 泰國都好 都覺得人地nice好多 會互相尊重

樓主我而家先追返你19年獨遊鹿兒島個post，唔知點解覺得好有親切感尤其係沙浴同瞓公園睇星星嗰part，有時間會再追埋落去（竟然去到7！有排睇(///▽///)）希望今時今日生活嘅你生活愉快！我爬埋文再comment

繼續返個遊記先，繼續喺暹羅古城裏面週圍踩單車。


唔經唔覺時間都差唔多閉館了，即使我大部分景點都已經係走馬看花咁睇，都淨係睇咗三分二左右，裏面實在太豐富了。





踩入少少，見到一個風格又有啲唔同嘅建築，聽佢講話係印度教濕婆派嘅建築。






遠睇可能唔係好覺，其實佢係真係縮細咗唔少嘅，我唔知佢原本幾大啦，但依家我諗得小學生先行到入去。





雖然縮細咗，但真係冇hea你，認真望下佢啲雕刻，細節上都係下咗功夫，雖然我未見過實物，但我相信唔會差太多。




另外奇怪嘅係，佢都係好似真跡咁樣，充滿咗歷史痕跡，明明應該係近代起嘅
(定係純粹日久失修)

踩到返去售票處附近，有一條市集咁樣，但已經收曬舖，照入去隨便逛下啦。




我見到其中一個水牌寫住鴉片煙館 幾有興趣想睇下泰國人點樣食鴉片，可惜搵唔到喺邊度，淨係見到泰國華人嘅家居展示廳。





踩住一架冇brake 嘅單車，精神定係身體上嘅消耗比想像中大，成日就要就住慢慢踩，仲攰過全力踩


入去接待處附近嘅紀念品店，嗌咗一杯chocolate smoothie，坐低休息一下，但杯嘢都幾難飲，又貴

終於行完暹羅古城，跟住去下一個景點，Bang Pu Recreation Center。




可以見到，佢就係一條向住外海延伸嘅橋，我諗對曼谷人嚟講，係一個幾好嘅睇海景點。


但我都相信應該得當地人先會去多，始終遊客想去睇海嘅話，都會直接走曬去芭提雅，事實上我去嗰陣，都真係見唔到外國人。




其實我係純粹碌google map見到 我見又幾順道就順便去埋，由暹羅古城門口出發，一條直路，5km左右就到達，坐著電單車一條直路咁樣衝，好鬼爽


見到佢google map有成萬二個評分，意外地係一個好熱門嘅景點。另外睇佢啲圖片，都已經可以預料到，佢係一個出名有海鷗嘅地方。

多謝電單車大哥安全送我過嚟 門口位有好多攤檔，但都開始收緊攤。



呢個閘口後面，就到達我哋嘅目的地。






Suk Ta Bridge，畀我嘅感覺似係香港嘅大尾篤水壩，但係要短好多。


望下上圖兩張相，天色以肉眼可見嘅速度入黑，我本身係想過嚟睇日落，要加快速度了。





週圍都有啲海鷗相關嘅物件，但係我當時一隻海鷗都冇

行到嚟大橋嘅盡頭，有一座咁嘅建築物，雖然我唔知乜嘢嚟，但我見大家都係照入，就唔理咁多喇，入去行下。





入面有一個食堂，其實成個風格，同香港嗰啲舊式碼頭都係好相似，有同一種吹住海風嘅懷舊味道。






繼續向入行，呢個建築外面又有一個平台，呢個位就係真正處於大橋嘅最尾端，亦係最近海嘅位置。


但事實係，呢度係睇唔到日落嘅，啲海水又混濁，唔算得係一種享受。最大獲係呢個位勁多蚊蟲，每隔幾秒就撞一撞你啲肌膚咁樣
最誇張係我離開嘅時候，撥一撥個背囊，仲整咗四五隻毛毛蟲出嚟，cls地方




喺呢個平台隔離，有一個似街坊酒樓咁嘅室內空間，入面都係有一張張大圓枱，而入面堆大媽喺度跳緊老舞





另外就係襯大媽跳舞期間，出嚟蛇王嘅夥記們。

完全入黑了，feel到呢度全部嘢都開始閂門，都係就早啲走算




離開嘅時候見到有架雙層巴士，入面正正就係頭先嗰班跳老舞大媽


其實幾好笑，好笑在個模式同香港好似，我當下就聯想到，好似啲民建聯搞嗰啲廢老一日團，車班人去近郊玩一日，最重要係有餐酒樓飯食!





今次交通必須要提一提，由呢一個景點，返到去最近嘅bts kheha站，完全就係一條直路，七公里左右，沿途一個燈位都冇，就咁向前都得。


呢一程我call咗電單車，成日體驗真係爽到不得了，首先唔會成日行下停下，唔使喺車同車之間穿梭，唔使體驗嗰一種膽戰心驚，純粹係感受，只要望實前方，感受住強風同埋速度

你見到只係62 thb，正啦









話咁快就七公里，到達 kheha bts站

都唔係嘅，喺香港有時都會撞到好人嘅，有時去餐廳食飯都會幾好招呼，只係個機率畀日本泰國低好多

今日週圍走嚟走去都攰呀，喺屋企附近間小餐館食嘢算，唔週圍走了

呢一碟炸豬頸肉，普普通通，但醉翁之意不在豬，今日我係嚟食魚嘅




事緣我每一日行過嘅時候，都會見到店主喺門口燒緊魚，經過得多就有啲好奇，想試下佢手勢


其實我間唔中係啲夜市，都會見到有人整呢一道菜，就係搽一大堆鹽上去，再擺上去炭爐，即係鹽燒。但平時喺街上面，冇咁好心機成條魚慢慢食，趁今日試下。




燒魚到了

店主見我成碌木咁坐喺度，就走過嚟教我點樣食，夾啲魚，用生菜包住，點啲醬，再夾少少粉入去，就食得。




呢度菜名為miang tilapia，唔好問我miang係乜嘢意思，tilapia就係羅非魚，咁大條魚只要160 thb





我實在睇少咗佢，真係非常之好食今次執到寶了，有時好嘢就係喺你自己附近，但你卻發覺唔到，只係望向遠方，卻忽略自己身邊嘅嘢。



入面啲魚肉係焗到淋曬，好似魚蓉咁樣，好滑好重魚味，就咁咬幾啖就可以直接吞落口，好撚正 魚皮都唔可以睇少，香脆又充滿碳味。


佢就係好普通嘅鹽燒魚，喺魚肚裏面塞咗少少香料闢腥味，但基本上都食唔到香料嘅味道，就係純粹嘅鮮魚味同埋鹽味。我平時都係食開重口味多，估唔到呢一道菜可以滿足到我



而且好似上圖咁，你見到中央條魚骨好容易起咗出嚟，淨返嘅魚骨都好容易挑出嚟，最方便我呢啲懶人

由於今晚早咗食飯，深夜有啲肚餓了，落去7仔買咗啲嘢食。



繼續食有巴打推薦嘅雪條，係幾正




日式蒸蛋，配啲泰式肉碎，唔錯唔錯






芝士味爆谷，呢包嘢係垃圾嚟 一打開之後見到咁淺色，就知出事，明明你見到包裝上面嗰種深黃色，好似好重口味咁樣


一打開，完全圖文不符，我要嘅嗰種深黃色呢？！就係冇咩沾上芝士粉嘅原味爆谷




唔錯可以encore



食完垃圾食物，瞓覺了。
今日，完！

未食之前以為會好乾好柴
食過之後好驚喜
當然都有食過難食嘅
不過都有食過好似蒸魚咁滑
基本上非遊客區燒定嗰啲之外都冇乜伏
同埋最緊要熱，凍咗就腥
我鐘意點返佢魚皮啲鹽嚟食

非曬命真係畫龍點睛