《三澤屋》
黎到大内宿食野,最出名一定係「大葱蕎麥麵」
9成餐廳都有提供...(其實個度無乜餐廳)
講到當地大葱蕎麥麵,就不得不數三澤屋呢間專食大葱蕎麥麵嘅佼佼者
「三澤屋」座位唔多,亦都同平時日本餐廳一樣唔會搭枱
所以等候時間都比較長
建議大家可以先去排隊攞籌,天氣凍就可以坐係暖爐邊取暖
我12點半到,大概等左半個鐘就入得
但我有朋友11月中去係等左個幾鐘
比大家望下menu先
基本上全部人都係揀圖片有條大葱嘅「高遠蕎麥」
對腳可以塞入去電暖桌下暖一暖,好爽啊
店員會係係你坐低後送上熱茶、漬物同一舊柿
柿甜得黎係爽
碗「高遠蕎麥」麵到左
只見一條大葱係入面,湯底係濃郁木魚湯底,上面鋪滿木魚碎同冰
無錯,碗蕎麥麵係凍食的
至於點樣食呢碗麵呢
雖然枱面有提供筷子,但既然比得你一條大葱,呢條大葱就係你進食嘅餐具!Follow me!
味道方面,蕎麥麵幾彈牙
湯底都好濃,唔會淡而無味
大葱你可以一路食麵一路咬葱,大葱辣味同攻鼻感都幾強
不過話大葱辣味同蕎麥麵係咪真係絕配,我又覺得兩者並唔係相輔相成
而且進食方式真心唔方便囉,好難撩麵
總括而言我會形容係有特色食物,好適合打卡用
反正大家黎到大内宿都無咩選擇,不妨一試
另外其實仲有一壺紅色壺裝住嘅煮麵水
有人話煮麵水會盛載住好多蕎麥麵烹煮過程中釋放嘅蕎麥營養,所以日本人都會飲埋
我飲左少少,好淡,但飲唔出啲乜
另外我仲叫左條「岩魚の甘辛」
表皮炸到好酥脆,醬汁係少少甜甜辣辣
魚肉我略嫌老左少少
但青椒不得了,係我食過數一數二甜嘅青椒,好好味
烤蒜頭都係,蒜味好香,但又好軟綿
食完行出黎已經有積雪