[多圖多字] 獨遊5日仙台+大内宿休閑之旅

《仙台商店街》

食完野其實都3點幾
太耐無去日本，好多野都想買要買
所以呢次短trip我都抽左2個半日係shopping之用

我分左兩個環節，呢日就係負責買手信、藥妝、屋企人野
聽日就買自己野
首先我就去左商店街買藥妝先

仙台商店街絕對係非常繁華，而且好長
由仙台車站開始「名掛丁」、「CLIS ROAD」、「Marble Road Ohmachi」一路延伸
到盡頭個陣仲有一條打橫延伸「SUN MALL一番町」、「VLANDOME一番町」、「一番町四丁目」
Total 6條商店街組成

每條商店街各有特色
「名掛丁」、「SUN MALL一番町」就比較多野食
「CLIS ROAD」就有比較多藥妝店
「Marble Road Ohmachi」、「VLANDOME一番町」就比較多時裝同名牌

我就集中先行左「名掛丁」、「CLIS ROAD」、「Marble Road Ohmachi」先



仙台市有2間Donki，其中1間就係為於「名掛丁」
樓高幾層，都不妨可以去買下野
但零食/藥妝等，個人認為種類比較少


之後都係商店街周圍遊蕩下
之前聽人講話仙台買藥妝會平過東京，但今次去到又唔覺得真係特別平



商店街真係越夜越多人

超好味鯛魚燒《鯛 きち》

係Donki對面馬路有間叫「鯛 きち」，專賣鯛魚燒
真心要推薦大家食


有好多款餡：紅豆、黑芝麻、吉士等
連仙台名物枝豆都有！
都係￥150-200就有交易
而且所有都係新鮮熱辣整架

我買左小弟最愛紅豆餡


攞上手熱到爆
紅豆蓉塞滿成個鯛魚燒，用左小倉紅豆，而且唔會過甜
外皮好脆！！！

鋪頭門口有凳，可以坐係度食埋先走

上午去呢如果？？
其實上午定下午去好啲？

好sad, 本身plan咗想去狐狸村
但我星期二到仙台星期五走
完美miss哂有巴士嘅個幾日
唯有俾機會自己下次再去

而家應該會跟樓主去松島個日咁玩

仲要個表情好頂癮

上午咪要多半個鐘轉車，大約去程同回程要白等一個半鐘多D
下午去就慳半個鐘

星期五有巴士呀，玩半日走趕唔切？

可能有啲忟水 上午玩完 係1337先有新幹線落東京 落到都3點半

不過我鍾意上午去 晏晝時間好用啲

勾起我d回憶。 2015秋。

二月每日都有巴士

ching, 想問下狐狸村個場大唔大味??

我個日去唔大味呀
可能隔住個口罩 唔係好聞到

燒牛舌名店 - 《閣》

經過一輪出血後就用一餐晚餐作為停頓
呢晚絕對係我最期待嘅一餐牛舌

「閣」係仙台市内非常出名牛舌料理舖，本店係Tabelog係仙台牛舌舖排No.1！
有3間分店，主要集中係商店街附近

我無刻意去本店，選擇最近自己嘅電力ビル店


比大家望下menu啦
https://gyutankaku.in/menu/

「閣」嘅牛舌定食同「司」一樣，都係無刻意分咩等級厚薄
只有分4 / 5 / 6枚，售價￥2288 - 3388
其他食物，好似炊飯、前菜、咖喱飯都好經濟實惠

孤獨精就坐孤獨位啦
右下角個牌仔係比你食完攞住櫃面埋單


圍欄好高...我乜都睇唔到


落完單無耐店員就送左份前菜比我


大家唔好以為係蘿蔔炆牛腩
其實個舊望落好入味嘅圓形狀係蒟蒻，咬落去好爽彈，入曬味
反而隔離舊牛腩就相對平凡，肉質未到好嫩，少少鞋口
但醬油汁就夠曬濃

第一樣送到我面前而係我親自叫嘅食物係呢樣粉紅色一件件
睇賣相有Wasabi 有檸檬 有蘿蔔絲，相信大家都知係刺身
但究竟係咩刺身呢？


答案就係牛舌刺身(￥3300)！

無錯，牛舌都可以做刺身

小弟我都係第一次食牛舌刺身，本身都15 16緊叫唔叫
但牛舌刺身真係唔多地方有，既然一場黎到就挑戰下啦！


同生牛肉一樣，牛舌刺身肉都係呈粉紅色，筋位顔色會紅少少
開頭我以為牛舌會因為平時用得多而無油脂，但大家見到個雪花已經知充滿油份！

口感你會覺得似食緊厚切爽脆版托羅
咬落去個下你會先覺得爽脆，然後中間油份會慢慢滲出黎
咬多幾下舊牛舌已經慢慢化開
牛味仍然保留到

講真，初頭要擺入口個下真係要啲勇氣
我本身好擔心會好難咬、有腥味之類，但一試就知我擔心係多餘
真係好似食緊托羅，但口感扎實少少
不過其中有1舊充滿筋，我就真係咬唔到啦，但其餘7舊都好正

如果你地都係1個人去 或者 求試驗心態，你地可以試下問店員有無半份賣
Menu我可以肯定係無半份
但坐我隔離個男人食完1碟之後，同店員講左幾句，轉頭就送上左半份
所以我懷疑係可以做到

另外，唔係3間舖都有牛舌刺身，得我去個間同三越前店先有

然後燒牛舌定食都陸續送到

定食就包左飯、湯同牛舌
我就叫左4枚就夠

先講大葱牛尾湯同大麥飯
非常平凡，無論葱味定牛味都唔特出，反而帶明顯胡椒味，而且整體鹹左少少
牛尾舊肉都唔夠淰
大麥飯比較粒粒分明，反而似平時香港人食開泰國香米感覺，黏性唔算強


漬物只有白菜，但我都建議大家食曬
唔係話有幾好味，而係我相信大家係日本都係肉/海鮮多菜少，唔想大家便秘

到正題牛舌啦
牛舌厚度足，非常飽滿
牛舌表面同「善治郎」、「司」比會再黑少少，烤過程火候更猛，焦感更大
4舊牛舌都極為爽脆，牛味好重之餘又略帶焦香



重點係牛舌中間部分仲仍然係粉紅色，技術超好
油份又充斥住個口


我超後悔叫得4塊...好想食多4塊

暫時食左3間牛舌舖+幾年前食伊達同利久
個人心目中排名係： 閣 >= 司 >> 善治郎 >> 伊達 = 利久
閣焦香味同爽脆感最強、司口感豐富同較嫩、善治郎選擇多亦比較平衡

閑逛仙台站及臨近商場

叉完電又繼續shopping

「鯛 きち」越夜越多人


「PARCO2」相對中低-中價品牌比較多，H&M、Porter呢類都有
餐廳食肆都好多


「PARCO」8樓有間Pokemon專門店
我就奉命上去幫人買野


如果大家想食平民少少、順便夾下公仔、有關電話卡之類
仙台站東口一出「Bavi」絕對係大家不二之選


連接仙台站東西口兩端嗰行人通道都好值得大家行
因為呢條通道其實係連接住「S-Pal」呢個大商場



無論係手信、服飾、餐飲定精品，「S-Pal」都絕對幫到大家

「S-Pal」東館餐飲選擇甚多
好多唔同國家美食都有，米澤牛燒肉店「仔虎」、蠔專門店、日式西餐、居酒屋、拉麵應有盡有





買手信都可以一次過係「S-Pal」買


講起手信，其實仙台車站都有好多選擇

好似呢隻牛肉醬(金色唔辣，紅色辣) ￥900
都算係好多人會買返去試下撈飯撈麵
我就買左各1罐
我開左個罐辣味，其實都係甜辣少少味個類


其實好多唔同品牌都有出自家制牛肉醬
藍色個罐係伊達出品


好似呢類牛舌味薯片、百力滋都係仙台獨有
好唔好味就見仁見智
我食完就覺得鹹鹹地 / 燒烤味


另外各大牛舌舖都會有係仙台站販賣急凍牛舌
不過生牛舌大家就唔好買，帶唔返香港，唔入得境

好似利久都會賣罐頭牛舌、牛肉醬、大葱湯包等
罐頭牛舌大家就唔好中伏啦
我買左，口感真係好奇怪，好似食緊好多芡汁牛肉塊



行到9點，鋪頭大致上都結束營業
我就去買宵夜返酒店啦

LM

Day 5

今日行程相對輕鬆少少，所以都比自己訓耐少少先起身
再去食碗牛肉飯做早餐



《大崎八幡宮》

第一個景點就去左「大崎八幡宮」

「大崎八幡宮」係伊達政宗係1607創建嘅神社
用左日本最古老權現造法構建而成，被指定為國寶
係守護仙台城嘅神社

要去「大崎八幡宮」大家可以搭觀光巡迴巴士（盧葡兒仙台）
(我呢日無用到，反而下一日會用)

又或者好似我咁搭普通市營巴士去，用google map search就會見到有幾架巴士都會經
而且價錢都係￥170，比起搭單程觀光巡迴巴士會平一截，時間又會快好多

我係最近仙台站個間松屋門口個巴士站上車，只係20分鐘就到會「大崎八幡宮」

落車對面馬路就已經係「大崎八幡宮」


係紅色大鳥居行入去會見到兩旁都係燈籠
好似話當有祭典個陣會燃點所以燈籠



第二個鳥居映入眼簾
後面有枯枝，係櫻花樹，每年4月中就會盛開櫻花
不過數量唔多，所以未係好熱門賞櫻勝地



神社都要行樓梯...小弟最唔鍾意行樓梯


行完樓梯就係第3個鳥居


有個捐獻位，有錢出錢，有菜出菜


手水舍
以前我去神社會跟傳統清潔下，但而家疫情問題我就唔做啦


金刀比羅社
唔好記錯係高松個金刀比羅宮



然後會係繪馬殿位置


好多日本人係冬奧前都黎呢度祝願仙台兒子羽生結弦選手取得佳績


繪馬殿隔離有條大路，其實係去大崎八幡宮另一個入口同停車場



黎到主殿位置


而家搭建緊，所以唔能夠影到真正主殿比大家睇
唯有近近地影下
你地會見到牆壁同石之間天花板都有繪畫，完全體現桃山時代嘅風格


好搞笑，有2隻雞係度


然後有個後生仔不停同雞玩
雞一跑落地下，後生仔就即刻捉返上枱


如果大家要買御守可以係主殿隔離買


行返出黎繪馬殿會有2個好細個社 - 太元社同鹿島社


「大崎八幡宮」範圍唔算好大，一般預1個鐘左右都夠可以行曬


之後我就搭返普通巴士出返仙台站

《仙台朝市》

仙台站附近有個朝市，逢星期一至六同少數星期日都會營業
雖然話朝市，但其實營業時間係08:00 - 18:00 (冬天會09:00先開始)
當然啦，最多人時間會係上午

「仙台朝市」被稱為仙台嘅廚房
同大阪嘅廚房「黑門市場」唔同，「仙台朝市」絕對更加樸素、更加貼地

「仙台朝市」位置就係正「PARCO2」後面條街
穿過商場一出就會見到



見到大大塊寫住「仙台朝市」就代表你到左啦


「仙台朝市」集中係一條街，由好多鋪頭組成
當中有賣生果、鮮花、熟食、海鮮等，應有盡有，就真係好似個街市


呢度生果、菜價錢絕對平過係超市買
水芹係仙台另一樣出名食物，好多餐廳都有提供水芹鍋


呢間賣可樂餅超多人排隊，價錢都好平


向裏面行會係買海鮮鋪頭



對旅客黎講，都係可以即食嘅鋪頭最適合

場内有間食魚生飯，超多人排隊
原因只有一個，就係超平！
逢朝早就會有「朝市丼」，一碗魚生飯都只係￥500！！
就算其他定食都係￥550
如果大家酒店無訂早餐，可以試下呢度


我就唔太餓，所以繼續揾下野食

朝市内有幾間專係即食刺身、生蠔鋪頭
我就係呢間幫襯


有吞拿魚、白子、明太子、岩手縣生蠔、帶子、赤貝等等




如果你地人多，可以買一份大吞拿魚然後麻煩店員幫你地切

我就買左份好細份已經切好吞拿魚赤身+托羅 ￥1000
完全無筋，赤身重魚味，托羅好肥美
(場内燈光比較紅 唔係好影到)

生蠔1大1細 ￥400/300
鹽釜漁市場就相對更加平，同一價錢會買到大隻好多
但生蠔質素都好高，加上岩手縣生蠔一樣都出名肉質飽滿


帶子真係好正 ￥600
好甜好彈
帶子裙邊雖然擺入口會有少少滑漦漦，但一咬就已經好爽脆


整體成個「仙台朝市」都好熱鬧，好有氣氛
好推薦大家黎

不過大家記得要上網check定有無邊d日子唔開
https://sendaiasaichi.com/

仙台朝市個感覺真係街市，唔係招呼遊客或者堂食，去完見到啲新鮮食材好靚都買唔到，最後買咗啲乾貨走

你嗰間500円餐廳差唔多係朝市入面絕無僅有嘅堂食餐廳

抱完狐狸條頸巾勁大陣尿味
明明抱之前擺左入籃
特登買洗衣液洗都洗唔走陣味
返到香港拎去洗衣鋪先搞得掂