《馬の背》
食完魚生飯就正式開始今日去景點啦
好多時去完鹽釜漁市場,大部分人都會直接順路殺去松島
不過我就係中間加插左個真係無乜人知嘅地方 - 「馬の背」
講到松島灣,可能大家都會諗到平時松島海岸搭下遊覽船,望下唔同細島
而我去嘅「馬の背」其實係松島灣本島山邊一處突出嘅延伸部分
經歷過好長時間海潮侵蝕而成嘅天然棧橋
亦因為形狀幼長且稍稍高低起伏比人感覺似馬背而被命名為「馬の背」
要去「馬の背」首先就要搭JR去「陸前浜田駅」,同東鹽釜駅 & 松島海岸駅都係同處仙石線
由仙台出發都只係大概30分鐘
所以我都好建議大家同一日去曬「鹽釜漁市場」、「馬の背」、「松島海岸」
「陸前浜田駅」係個無人車站
一出車站望向左前方你會見到有間旅館
旅館右邊有條小路一路向上行就得
真心,一路都係上斜,需要少少腳骨力,
沿途景色我又唔覺得好靚
太多樹木遮蓋視線,只可以隱約望下個海岸
沿途有間餐廳叫「田里津庵」
好唔好食我就唔知啦,但就一定好景
好似話啲座位全部都面向海
大概行左15分鐘就會到有個觀景台 - 「瑞鳳之丘」
但其實都係一大遍樹木遮擋曬
所以我都無咩點停下腳步,繼續向「馬の背」前進
當大家見到呢個位就代表終點在望
係呢兩個牌隔離有條小路向下落去
唔洗猶豫,直接落去
不過真係要小心,有一小段好斜
見到指示牌就跟住個方向行
行到盡頭就會見到「馬の背」
可惜今日天色唔係好好,面向「馬の背」個邊超多雲又背光
話比大家知...其實我起初唔敢行過去,想打退堂鼓
後來見到有幾個日本啊婆由「馬の背」行返過黎同我講好易行 小心啲就得
搞到我自己都覺得有羞恥心
硬住頭皮慢慢行
其實係開頭個幾步特別窄,過左之後都好順利
行出去「馬の背」就可以睇到「松島灣」260個島中其中幾個
例如箕輪島、かぶと島、在城島、都島等
天色好陣會應該會靚,可以遠望到好多島嶼
因為少人,「馬の背」反而比我一種神秘同休閑感覺
轉身走個陣另一個就反而無咩雲,真係吹脹
行到見返呢個牌,我就向隔離小路一路行
行到適當位置大家就會可以見到「馬の背」全景
返到上大路後,大家可以沿路折返,或者繼續向前行都可以
其實本身我係打算繼續向前行,然後沿住海邊馬路行去松島海岸
點知落到山見到馬路先發現原來不設行人道...
唯有死死地氣穿過左手邊隧道返陸前浜田駅
如果大家去「馬の背」,我個人比較推介下午黎,等太陽升到去另一邊就減少背光影響