Day 3
早晨啊 仙台
《
鹽釜水產物仲卸市場 (鹽釜漁市場)》
要數東北地區美食,每個地方都總有自己特色食物
但唯獨有一個系列係共通地一流,就係海鮮
東北地區大部分城市都有自己漁市場
由於靠海,係漁市場可以試到新鮮海鮮
係仙台相對規模比較大嘅漁市場就係位於鹽釜嘅「鹽釜水產物仲卸市場」
想去漁市場就要搭JR去「東鹽釜站」,係仙台站搭大概4-5個字就會到,再步行10-15分鐘
係東鹽釜站一出見到個T字路口就轉左一直行
行到你見到頭頂有個牌指住鹽釜漁市場就係前面個燈口位轉右入去一直行
無幾耐你就會見到「鹽釜水產物仲卸市場」
行到入去你會覺得好似街市咁,非常樸素,但又好有市場味
唔會好似築地市場同黑潮市場咁重商業味
係「鹽釜漁市場」最出名就係可以玩DIY魚生丼飯
市場内好多鋪頭都有賣已經切好/處理好一份份魚生
之後再去6號區域有檔買定食鋪頭買一碗白飯自己砌魚生丼飯
(右上角就係6號區域)
比大家望下有咩選擇先
好似平常三文魚、吞拿魚、海膽、三文魚籽、蝦、帶子幾乎檔檔都有
而且好似白子都有 (鱈魚精囊,好高蛋白質,滋陰養顔,口感幾好架)
就算生蠔,大大隻都只係3-500Yen咋
如果你人多,可以買未切吞拿魚,要店家幫你厚切,質素仲正
又可以每樣買多啲,唔洗好似我咁一個胃食唔到好多
我Total買左4樣野,托羅、海膽、三文魚籽、帶子同蝦
海膽我係第一轉就買左,結果行來行去撞到爛曬......
之後再買左2隻岩手縣生蠔,每隻都係350Yen咋
我只係買中size已經同半隻筷子一樣長 cls...抵到爆
大家要買飯就係相中正面有人位置買
唔同size就唔同價,附送一碗麵豉湯
我個碗係「特」size
個人建議女士唔好叫呢個size,自問我嚓得都覺得分量多
辛辛苦苦砌好碗飯...好樣衰
帶子好厚又好甜,超正
帶子邊我知好多人未必食,但我好推介唔好錯過,口感爽脆
三文魚籽鹹鹹地,又係個口度爆開,送飯一流
托羅油脂重,係口咬咬下就會慢慢少少化開
蝦無乜味,但肉質都有少少爽
海膽稍稍腥,個人覺得係敗筆
其實我唔係一個鍾意食生蠔嘅人,平時食buffet都係為左回本先會食蚊型無肉生蠔
對上一次食大隻生蠔已經係2017年
岩手縣生蠔真係好大隻,食落我唔係好慣
但肉質好飽滿,而且超嫩滑又幾有甘甜味,蠔味好重
不過可能幫洗冲得耐,海水味冲淡左
食完就記得自己收拾好垃圾,擺係相應垃圾桶同托盤架
作為早餐,呢餐小弟好滿足
其實鹽釜漁市場内除左魚生,仲有唔少炸物店、玉子燒舖等
大家都可以發掘下
有朋友同我講場内有檔玉子燒舖好得,大家如果去食,記得話比我知係點