[多圖多字] 獨遊5日仙台+大内宿休閑之旅

朝市俾我感覺幾好 好地道feel 好舒服

嘩 咁嚴重
浸味仲要陪同左你咁多日

《荻之月》仙台手信

行行下到中午時間，但又唔肚餓
就去仙台有間出名甜點舖「荻之月」買個小蛋糕添肚


其實我買呢個小蛋糕最主要原因都係想試下適唔適合作為手信
呢個吉士小蛋糕係仙台好受歡迎小甜點
但我個人對日本呢種小蛋糕陪cream一直都印象麻麻，都唔想收到手信人士覺得伏


單個裝￥179


拆開包裝膠袋，同平時蛋糕仔差別不大
摸上手確實較為軟熟

咬洛去，個海綿體比較濕潤
而裏面pat醬都比較甜同口感似奶黃
所以你可以想象到成舊野都係綿綿濕濕


我就唔識欣賞啦


《仙台三井Outlet》

我份人比較薯，同太潮服飾緣分唔強
亦都無追求咩最新款
所以好多時我都鍾意去Outlet掃下平貨

係仙台有兩個outlet
- 仙台泉PREMIUM OUTLETS
- 仙台三井Outlet
相信大家對Premium同三井都outlet都有一定程度熟悉

係仙台如果要去「仙台泉PREMIUM OUTLETS」，最方便快捷係搭巴士「宮城大學線」可以直達
￥690，大概40分鐘

我既然買JR pass就無謂洗多餘錢搭巴士去Premium outlet啦
反正我買開牌子都係公廁，周圍都有

而「仙台三井Outlet」就可以搭JR仙石線去「中野栄駅」，再步行10分鐘

中野栄駅南口出


行去途中見到有紅葉


南口出完真係一直向前行就會到



Outlet佔地都大，而且有個摩天輪仔可以比大家玩



同一般三井outlet都一樣設計，都係兩層式，内圈加外圈設計



就算肚餓都唔怕，呢度food court超大


本身想買呢個煲，可以一次過做曬煎炸滾燉
不過買煲好似有啲On9 同埋又係最cheap係香港周街都買到


而且我個人一直偏好三井比較多，折頭主觀地感覺上多少少
同埋最重要好多位坐，出完血可以休息下再出

我買左咩買左幾多就唔比大家睇啦
只可以話我滿載而歸

《Super Sports Xebio》

講明係shopping day，緊係要繼續買野

小弟平時有打羽毛球同排球
係香港買羽毛球/排球裝備同服飾真係好貴
既然去到日本就緊係直接係日本買，唔洗白白捱代購費

唔單止仙台，甚至全日本，我都好鍾意去「Super Sports Xebio」買運動野
由仙台站搭5分鐘JR去長町駅，隔離就已經有「Super Sports Xebio」


係長町駅東口一出向左手邊條小路一直行，行到過馬路轉右就已經到


點解我會咁鍾意「Super Sports Xebio」
原因係各類運動用品都好齊全，而且擺放好企理
每一門運動分門別類擺



最後我都係度好開心買左羽毛球衫、排球鞋同短褲仔

荻之月好撚正喎 返到香港特登上樂天訂 利申好鍾意食吉士

去完會唔會搞到成身衫褲都有嗰浸臭味?

可能我本身唔太中意呢類蛋糕仔

我又無 不過可能係嗅覺同化左

燒牛舌名店 - 《東山》

Shopping真係一樣好消耗體力嘅工作
返到仙台去酒店擺低野我已經餓到不行

去返商店街附近覓食

本身我係plan左去仙台老字號「旨味太助」食牛舌 (都係tabelog前5)
但要行到去仙台三越個邊先有
我實在太餓頂唔緊

所以就係商店街附近食都好有名氣嘅「東山」牛舌


大家見唔見到個門牌印住仙台牛呢
無錯，呢間係有提供都相當具備名氣嘅仙台牛

打開Menu
大家會見到好多款鐵板仙台牛定食、生牛肉等
連牛舌刺身都有，但薄切





但我都只係重情於牛舌 sorry…

「東山」牛舌定食都分2個等級，普通(￥2178) vs 特選牛(￥2980)
如果唔想咁寡齋食牛舌，都有好多牛舌拼牛扒combo

我就叫左份特選牛牛舌定食(￥2980)

「東山」set價錢都算實惠，而且成個set都多野
大麥飯、大葱牛尾湯、前菜、漬物、山藥泥、蘿蔔泥同10舊牛舌
(橙汁係我另外自己叫咋)


先講大葱湯
表面油份比較多，飲落都強大葱味


前菜係燉牛肉
非常靭、好鞋，醬汁係甜甜地，類似鎮江骨


味増漬物鹹淡適中

重頭戲係牛舌啦

「東山」牛舌切得比坊間其他牛舌為幼，所以切左10塊
但應該同平時6塊個分量差唔多，厚度都差唔多


可以睇到表皮會交我前面食個3間都較為淺色，焦香味亦唔顯著
咬落去唔係屬於爽脆，而係屬於爽嫩個種，並非外層都烤至焦脆
肉質係好嫩，牛味好重
牛舌中間呈輕微粉嫩，油份都好重
每一舊都係爽嫩



而且「東山」隔離附有蘿蔔泥同Wasabi，係推薦食客可以蘸牛舌，改變味道
不過個人覺得我食燒牛舌，就係要食個重口味感
蘸完蘿蔔泥反而失去本身油脂感


Overall黎講「東山」真係唔差
我會覺得「東山」係肉質上表現好突出，但當然味道上我就覺得稍為失色少少
個人觀感都係比較鍾意食重口味牛舌

個500 yen 魚生飯我諗起函館朝市嗰個

流晒口水

食完晚餐，我就行下商店街，休閑地度過埋係仙台最後一個夜晚

臨近聖誕，周圍都掛起燈飾


途中見到有間「牛仁」燒肉店
呢間野我有bookmark到，有個好識食嘅朋友曾經推介過我
專食熟成仙台牛
而且裏面係一個個獨立包廂，私隱度好高


比個menu大家望下，價錢都好合理




但...我托酒店職員幫我book位個陣，「牛仁」話唔接受一人光顧
睇黎下次我要帶埋Mary黎幫襯

行到去「一番町四丁目」就會變左無瓦遮頭
但呢一帶真係好熱鬧，好多居酒屋、餐廳都係度


右手邊有間賣鯛魚燒，但我真係食唔落



《仙台光之樂章》燈飾活動

行到商店街盡頭就會係定禪寺通
而呢個亦都係我呢晚最後一個景點，我都期待左好耐

每年仙台係12月中上旬 - 12月尾都會係「定禪寺通」舉辦大型燈飾活動
而呢個燈飾活動就命名為「仙台光之樂章」

而2022年就係由9.12.2022 - 25.12.2022舉行
晚上7 - 10點 (星期六日會提早1個鐘) 係「定禪寺通」兩旁同中間並木大道掛上黃色燈飾

呢晚係星期六，我預左會好多人
點知係多人到水泄不通


見到樹上掛滿曬燈飾
雖然全部都係黃色，但密集程度好驚人
係夜晚亮燈，更顯得成條大道金光閃閃



9成人都過馬路行去並木大道中間慢慢行
掛滿燈飾嘅樹包圍住自己
眼前望到就係金黃色發曬光





但係...我呢啲矮撚好慘 要gut高先睇得清楚
乜而家日本人咁高架！！！


夜媽媽見到「夏の思い出」銅像，變得0吸引力


抬頭望上去燈飾，不斷縱橫交錯
好似為自己添上一個屋簷


行到仙台媒體中心附近，有個位比大家行上幾級會影得靚好多
但留意...係要比錢 ￥500


呢個心心背景就唔洗比錢啦，不過要排隊


成條定禪寺通都會係咁



我無行到盡頭啦，係心心位置就折返，出返去大路
一路行返去勾當台公園

係勾當台公園站外，會有表演單位
呢個男人好似話已經係度好多年，帶比群眾雜耍表演


睇左一陣，見到時間都已經9點幾
我都正式撤退返酒店啦

成晚流流長，要執好曬行李！
我個人偏好shopping會擺係尾2/3個日
就可以係尾2晚執好曬行李，唔洗去到最尾個日仲成日要打開個行李箱
而一般我最尾個日都唔會再點買野

樓豬之前啲遊記既圖load唔到想睇番山陽個個post啲圖俾大家知唔知有咩方法

https://blog.ulifestyle.com.hk/article/kky1216/3269912

我分左好多節 你可以係Google search “[遊記]7日獨遊日本山陽”

樓豬是最好的你知道嗎

之前去就係食左旨味太助同東山
旨味好食好多
今次會試下閣

唔該晒 Charles 巴
遲啲 plan 行程唔使愁

食埋司啦 唔同感受㗎

你臨情人節派我好人卡喎
山陽四國地區我都算熟 都去過2 3次
有咩唔怕可以一齊傾

低調啲！

依家三月尾有一日空咗，要即日返熱海，諗緊去大內宿好唔好。搵嚟搵去都唔確定三月尾仲有冇雪

想話睇下雪都唔知去邊好

利申手持 JR PASS

你嗰張係咩Pass先
利申 我就一定撐大內宿嘅熱海去過1次0感覺

啱啱check咗上兩年三月尾都冇雪啦
但你預咗東京去大內宿 你要早少少起身喎

全國 JR PASS
睇返其實喺東北過一晚夜都得，要睇雪係咪再上北啲好呢
青森或者秋田可能仲有雪，或者長野？

JR pass 最後一晚去熱海我係因為準備第二朝開始攞車自駕遊玩伊豆富士山啫，唔係專登去熱海

大佬求包養

如果三月尾真係要北海道or青森先有
秋田我見上年3月中後都係得一兩日有雪