米澤牛專門店 - 《仔虎》
仙台嘅景點去到仙台城跡就告一段落
而仙台最後嘅一餐我就揀咗食《仔虎》燒肉
講起仙台嘅燒肉舖, 大家做資料搜集都會搵到呢間《仔虎》燒肉店
《仔虎》係一間會提供米澤牛 / 山形牛 / 仙台牛嘅燒肉店
而佢嘅午餐更加會有個別set係提供米澤牛
喺網上面評價都非常高
《仔虎》喺仙台都有幾間分店,大部分都好方便
你哋可以揀一間方便自己嘅
而我就選擇咗喺仙台站新幹線嗰層隔離S-Pal分店
原因只係呢間舖頭11am就開門,但其他分店就11:30am先開
我準時到達都見到前面已經有幾個人排隊
順利入場之後就安排咗去毒撚位
送上一杯凍大麥茶
畀大家望下午餐menu
價錢由1300至4200 yen不等
我就揀咗最受歡迎嘅特選燒肉set (¥4200)
成個set包咗泡菜、沙律、紫菜蛋花湯、白飯、3款廚師當日決定嘅部位
而且呢個set嘅和牛係米澤牛
蛋花海帶湯胡椒味好重,蛋花都好滑,但過咸
沙律好重芝麻油香,但偏油膩
泡菜味道都好韓式
但真係唔好意思,小弟日文太水皮
問完佢係咩部位之後,唔識聽番佢嘅解釋
淨係知中間嗰隻係牛三角,亦都係我最愛嘅部位
咁我先燒望落油分最少嘅藤砌得最薄嘅牛先
雖然油脂望落唔算咁豐富
但佢牛味好重,而且好嫩
然後就燒我最鍾意嘅牛三角
唔係我認叻,而係我燒肉真係有一手
睇下中間幾粉嫩
其實牛三角唔使多講,油脂感好重,入口係慢慢化開
之後再燒最厚嗰塊肉
燒完出嚟油脂感超驚人,完全係入口即化
好多人會鍾意食任食嘅和牛燒肉
但真係高質素嘅和牛油脂感好重,其實食幾塊就會開始覺得油膩
唔知係咪年紀漸大,而家真係越嚟越少許任食嘅鋪頭
當見到你食得七七八八,店員就會送上一杯熱茶畀你解膩
食完行返出嚟影多兩幅舖頭相
S-Pal入面啲食肆間間都好多人排緊隊