Day 6
最後一日係仙台啦
好唔捨得,仲有好多地方未去
食完早餐我直接check out攞埋行李去仙台站寄存行李
費事完左上午行程仲要花時間為左行李走來走去
係仙台站旅客服務中心隔離就有coin locker,數量極多
行返出黎就正式上午行程
朝早我主要會行2個景點 - 「瑞鳳殿」、「仙台城址」
要行上面2個景點,最方便緊係搭我之前介紹過觀光巡迴巴士(盧葡兒仙台)
買完觀光巡迴巴士(盧葡兒仙台)1日乘車卷 (¥630)
就直接上第一班9:00,8:50已經好多係16號巴士站排緊隊
架車準時開出,外觀幾有特色
我推薦大家可以抽大半日比¥630就一次過去曬「瑞鳳殿」、「仙台城址」同「大崎八幡宮」
《瑞鳳殿》
搭大概10分鐘就要落車
巴士站係個山腳下,大家要沿呢條路慢慢行上去
越行越斜
行到分岔路口就跟住指示行左手個條路
呢條石板樓梯有62級,寓意當年伊達政宗統治時期嘅仙台藩石高62萬
我就無數到,因為小弟好虧已經喘緊氣
大家一路行石板樓梯嘅參道同時,都可以留意下兩旁嘅杉木
呢啲杉木巨大林立,樹齡已經超過380年
陽光透過杉木之間穿透係參道上,配合埋整個綠意,好有恬靜閑適之意
入「瑞鳳殿」就唔係免費架
行完樓梯就已經見到售票處
如果大家手持盧葡兒仙台Pass,就可以以優惠價¥460購買入場卷
否則就要比正價¥570
買完就正式入場
一正式踏入「瑞鳳殿」就會見到有塊參觀指南,寫左少少背景資料
但小弟睇唔明日文
等我都同大家介紹下少少「瑞鳳殿」背景先
「瑞鳳殿」係伊達政宗逝世後第二年,即係1637年而興建
目的係後人供奉伊達政宗嘅靈廟,擺放伊達政宗靈體,
「瑞鳳殿」係1931年被定為國寶,但可惜係之後戰爭中被燒毀
大家而家見到嘅「瑞鳳殿」係重建品
「瑞鳳殿」手水舍設計比較特別
水喉係設計到一條龍款式,並由龍口出水
我唔知有無咩特別意思,但套用華人傳統思想就會係體現個種霸氣同地位超然
呢個係「涅槃門」
已經可以見到成個設計比起平時京都個類寺廟顯得更為高貴同隆重
但我可以話比大家知,初代「瑞鳳殿」其實仲浮誇
初初建造時係木造建築,並以黃金作為裝飾...係黃金啊!!!
不過後來燒毀後要民眾集資,自然經費有限同不得過分奢華
重建品就改為用水泥整,原先係黃金部分就改為黃銅
相傳伊達政宗個遺體埋藏係地下好深位置,所以當年「瑞鳳殿」被燒毀並無波及到遺體
而後世亦不斷對墓所遺骨進行挖掘,並利用科技技術不斷還原遺體面貌
日本人會視去世豐功偉人為神一樣,認為偉人死後會化為神,鎮守當地
所以好多日本人都會參拜自己當地偉人
行多幾步樓梯就會到「瑞鳳殿」
跨過呢度門
我第一樣見到就係「瑞鳳殿」比一塊膠幕擋住!!!
然後膠幕上面寫住「瑞鳳殿」修復緊...
頂 反曬白眼
早知連個¥460都慳返啦
整個施工時間由31/10/2022 - 30/3/2023
係呢段期間去嘅朋友們就自己考慮下
期間我又見到同龍有關嘅野
我上網check左幾次都唔係太揾到伊達政宗同龍之間有咩關聯
有無朋友仔可以話我知
行返出去會見到呢度門,你一旦出左去就代表離場
出面area係唔洗比錢都可以行
不過係呢個比較清靜、莊嚴同傳統地方,硬係覺得有個自動門好格格不入...
跟住指示向「感仙殿」同「善應殿」行去
見到呢條參道行上去就會係「感仙殿」同「善應殿」
而「感仙殿」同「善應殿」其實就係伊達家第二代同第三代藩主墓所
確實好多人行完「瑞鳳殿」就已經會唔去其他位
名氣本身已經差好多遠
問你第二代同第三代藩主係乜水,無研究開都唔會知,分分鐘可能連伊達政宗都唔知係乜水
除左第二代墓所「感仙殿」同第三代墓所「善應殿」
呢度仲有第9代藩主之墓
同埋第11代藩主伉儷之墓
兜左個圈九正式落山
岩岩先講完覺得自動門格格不入
我見到呢堆樓梯就忽然好想呢度整條扶手電梯...
沿路行返落去,去返車站等下一班巴士前往仙台城跡
下一班巴士嘅設計係啡黃色