而我作為一個男性都只係識得係Yannes面前控制住自己嘅獸性，扮返一陣嘅正人君子。面對Charlotte嘅重重攻勢我都只可以秉承住唔敢主動，不能抗拒但又不負責嘅宗旨。當一個女仔扮下可憐，do下嘴咁望住你，屌你，點say no啫。
「點呀，你係咪返屋企喇？」
散場後我問Charlotte，諗住今次可以送佢返屋企補返數。
「唔係呀，我仲要去你學校搵班friend呀，佢哋係到練緊舞。」
所以話佢嘅生活真係好多姿多彩。
第二日，我約咗Yannes一齊係canteen食早餐。係我哋排緊隊嘅時候Michael就係我哋前方行過。原本我仲準備拎起隻手同佢打聲招呼，但望到佢個樣嘅一刻我就唔敢喇。
「嘩，做咩事呀，你殺咗佢全家呀？佢睥你睥到咁行嘅。」Yannes問。
「下？關我咩事呀，佢會唔會係睥你炸？」
其實我好清楚佢係睥緊我，仲要唔係睥咁簡單，係十冤九仇咁嘅樣。
「痴線，我都唔識佢嘅。」
「肯定係你喇，係咪你搞人條女呀？」Yannes繼續講。
「我？你個日見到發生咩事㗎喎，咁都入我數？」
「我咩都唔知㗎，我就醉咗咩都睇唔到嘅。」Yannes事不關己嘅樣極度嬲打。
「係，你淨係記得攬住Derek瞓覺同Derek傾計被Derek照顧，其他就乜都唔記得㗎喇。」
聽到我咁講，Yannes個樣即刻由寸寸貢變咗閪哂面，仲一拳打咗落我手臂到。
「妖！」
「好痛呀仆街。」
「抵死，鬼叫你亂講野呀！」
自從呢件事之後，我每次係學校見到Michael，佢就算唔睥住我都一定會扮唔識我。其實我同佢係ocamp嘅時候都尚算叫做幾啱傾啱玩㗎，但唔知係咩原因佢突然之間變得仲快過d女人。
「唉，救命呀。」Yannes邊講邊隊個電話俾我睇。
係佢同Derek嘅對話。
昨日
「下星期有冇興趣唱k?」
今日
「太遲 約咗人」
「咁聽日放學呢？」
「聽日都約咗人」
「同咗你講喇」
「老人痴呆」
屌你，呢條Derek真係癲㗎喎，咁樣死纏爛打嘅人我都係第一次見。
「咁你咪同佢講你都約咗人囉 。」我將Yannes嘅電話俾返佢。
「但我今日冇約人喎…」Yannes回答。
「噏啫，佢鬼知咩。」
「講大話會唔會唔係幾好呀？」
「咁我而家約你，咁得喇掛？」
「總知以後佢約你，你都話你約咗呀木就得㗎喇。」我續道。
Yannes聽到之後點一點頭，然後開始打字。
「你話你唔識拒絕人呀，咁以前點都會有人同你表過白㗎，咁你點答呀？你唔會個個都say yes㗎嗎。」我問。
「下，睇下係邊個喇。」
「咁如果係Derek呢？」
「咁梗係唔得喇。」
「咁味係囉，咁啫係你識㗎，你當佢同你表白咁拒絕佢味得囉。」
「下 咁都得㗎咩？」Yannes一副疑惑嘅樣問。
「得㗎喇 你下次諗住佢係同你表白 諗住要同佢一齊 你就自然唔會認承佢㗎喇」
「咁…如果個個係我呢？」我將頭擰向Yannes問。
Yannes聽到呢句，亦都將目光從電話mon轉移到我身上，我哋之間就係咁維持咗幾秒靜默嘅對望。
個時嘅我仲以為自己好撚醒，識得咁去試探佢，之後我回想返先知其實自己柒到爆。你問到咁匡智嘅都知你鐘意佢喇大佬。
