『愛情/追女/無甜』《如果我冇讀到大學》

睇清楚條防線
上次偷雞嘴人已經無吹offside
(當年我都偷雞錫過)

黃牌在身 唔敢亂嚟了

但真係好難忍㗎！

傻佬木今日放假朝早冇得睇

腦細早晨！

俾D時間我即刻岀今日嘅上半part

多謝巴打支持

16:48
6月15日
WhatsApp: Hayley已傳送你一個新訊息

「近排大館有個展覽好想去睇呀」
「今晚收工陪你去囉」
「好！」

我哋收工之後，就去到位於中環嘅舊域多利監獄參觀。睇下以前係香港嘅英式建築，舊時嘅司法制度，監獄警署等等。其實真係一個幾值得去下嘅地方，我估香港都已經冇乜呢D古蹟可以真係俾大家入去睇，有都拆哂嚟起樓喇。

「你過嚟揸住塊牌呀，我幫你影張相。」我哋經過介紹犯人入冊程序嘅地方，Hayley同我講。

咔嚓！

「你知唔知你自己衰咩呀？」Hayley將我嘅囚犯相隊俾我睇問。
「一睇都知衰太靚仔喇！」
「你係衰太有自信呀！」

今日嘅Hayley唔知點解好似特別開心咁，我哋係不同嘅地方留下倩影，由講歷史嘅地方，監獄，到新起嘅藝術館，都一一留下回憶。盡興嘅我哋兩個，今日就好似一對情侶咁岀街去玩，影好多相，唯一欠缺嘅就係爭Hayley嘅一句答覆。

我哋行返岀檢閱廣場，激光突然將動畫投射到其中一座大樓嘅外牆。呈現返好多以前嘅情境岀嚟，望住有大頭綠衣，警察押解囚犯嘅動畫係不同樓層走嚟走去，我同Hayley都不約而同地停下腳步，被眼前呢個生動嘅表演吸引住。

我擰轉頭望向好專心咁睇實投射係大樓外牆動畫嘅Hayley，佢臉上掛住好天真爛漫嘅笑容。佢嘅笑容感染力之強，會令你都能夠感受到佢嘅歡樂，呢一刻嘅佢好純真，好甜，好可愛，好吸引。

我嘅目光再慢慢咁掃落去望住我地距離不足3厘米嘅手背，有一刻，兩刻，三四五六七八刻想拖落去嘅衝動。

你唔好又亂嚟呀木哥，仲爭唔夠半個月Hayley就會俾個答案你。你唔好又將自己獸性嘅一面展現岀嚟嚇親人先得㗎，上次人哋肯當冇事已經好好彩㗎喇。

我只好再將目光移前一D，望住我哋地上嘅倒影，攤開手裝作能夠拖住Hayley嘅手。呢個時候，我只可以透過咁樣嚟滿足自己，令自己開心一下。

「喂，你做咩望住個地下呀？」Hayley突然係我面前fing一fing手呼喚我。

「下？」我馬上將手收回，望向前方，發現表演已經完咗。

「做咩呀？好悶咩？我覺得幾好睇呀。」Hayley見我仲係吽下吽下，於是講。

「唔係呀，好睇呀。」
「睇完去食野喇。」我馬上移動腳步，以逃離案發現場，廢時俾Hayley知道我呢個痴漢係到做緊乜。

「喂呀木，我有D野想同你講呀。」Hayley將我叫停。

又嚟？講得呢句多數都係有D重要野㗎喎。佢唔係話半個月之後先俾答案我㗎咩？定係佢想講第二D野呢？但係我諗唔到要講D咩要突然之間變得咁凝重喎。

「我有答案喇。」Hayley道。

如果有睇過那麼年嘅朋友，睇到沈佳宜同柯景騰講你想要知道答案嗎？我現在就可以告訴你。然後佢竟然答拜託你不要現在告訴我，請讓我繼續喜歡妳嘅時候一撚定屌撚哂鬼，因為至少我係。

條女都講到咁岀面喇，你俾人講埋落去味一齊囉，駛鬼之後先走嚟又寫書又拍戲話俾人聽自己揼春咩。人哋都講到咁樣仲點會拒絕你呀，咁你都驚咪抵你成世溝唔到女囉，都唔知係咪男人嚟㗎。

但原來當差唔多嘅情況真係發生係自己身上嘅時候，係真係會好驚。我個刻好擔心我會聽到我唔想要嘅答案，好驚今次會係我同Hayley最後一次嘅約會。好驚經過今晚之後，我哋會變成陌生人，或者最多只可以成為普通朋友。

我唔想失去佢，唔想失去係佢身邊守護佢嘅機會，就算唔係作為佢嘅男朋友都好。

我終於明白至少佢一日未答我，一日都唔算拒絕咗我嘅道理。對唔住呀柯景騰，我怪錯咗你呀。

所以我而家就走嚟寫故，話俾大家知我有幾揼春喇。

講笑，如果係咁嘅話大家唔駛睇我，睇九把刀得喇。作為一個真男人，我知道有D野無論係點，都要去面對嘅。

「咁突然嘅？仲有半個月你先last day喎。」我將身軀擰向Hayley回應。

「但我已經知道自己想點喇。」

我吞一吞口水，抑壓住自己心中嘅不安，同Hayley對上咗眼神。

條女都擺明ok架啦
錫埋都無反你面
其實直接有意無意拖住佢行
撘下膊頭，走果時88攬下
應該掂左

巴打息怒呀

唔敢再亂嚟了

乖乖地等人地俾個答覆我算喇

又呢個位等 不過好好睇 如果我追緊嘅女仔都係咁就好

多謝巴打嘅讚賞

最後我哋嘅結局係點仲係未知之數嚟嘅

係到再次呼籲 一路有睇緊追緊嘅朋友仔記住俾個正評留個言話我知

全部都係對我好大嘅鼓舞同支持嚟㗎 多謝晒每一位入嚟呢一個post巴絲

其實真係

唔係架
當年賴過野
話“我覺得出黎拖下攬下好正常咋”
仲遇過兩次

入晒龍 都吹越位

Feel到個故就完好唔捨得

咁唔差在搞埋啦

其中一個我唔岀咁快嘅原因係我都唔捨得個故完
唔捨得呢到嘅每一位
唔捨得每日打文岀文嘅生活

我連錫都錫埋喇 都唔知可以點做了

總系覺得Hayley尼個月好多內心戲。
女仔越系要一段時間考慮你就越需要表現自己。
即使吾做過多身體接觸亦都要俾多d言語上嘅承諾以及令佢對彼此嘅未來感到期待與希望。
就好似Hayley有ex同exex嘅心口大石，
佢亦都在意你對尼件事嘅感受同處理手法。
如果選擇避而不談放在心中，或許期限內你可以同佢盡情enjoy，但你就俾吾到佢需要嘅安全感，因為佢吾知你嘅感受。佢越系鍾意你，就越系容易諗多左，時刻擔心你嘅感受。時間一長，你嘅感受(佢腦補)都會變成佢嘅心頭大石。對依段關係冇好處，亦系佢可能佢絕你嘅理由。
雖然話就話冇咁多同類型事件，但一件事就可睇出你嘅處理手法-系逃避定共同承擔。
講左咁多好似冇左重點
but依d只系個人看法，最重要都系依句:
加油呀木! 希望你今次真系出到pool!

其實都仲要睇條女係咩人 係玩玩下定係認真嘅

多謝絲打咁有心打咁大段野岀嚟

我覺得我一直嘅位置都好被動 亦都已經盡可能表現岀我有幾愛佢？

可能佢要考慮嘅到底係佢夠唔夠愛我去開始呢段關係

我試過俾各種各樣嘅承諾佢 但佢好似都傾向唔相信 覺得呢D承諾都係呃人 愛情係好易變嘅一樣野

Anyway好快岀文 大家就會知到底之後點發展

「我覺得我準備好喇。」係我哋眼神接觸咗兩秒後，Hayley道岀。

呼！呼！呼！

聽到呢一句我心跳馬上加速，不得不深呼吸幾下令自己平靜落嚟。咪住，你問清楚D先，人哋冇話準備好D咩喎，等陣會錯意咪柒到飛起？

「啫係…你ready同我一齊？」我吞一吞口水，然後lam一lam個嘴唇問。

「嗯！」Hayley點頭回應。

「其實你唔駛逼自己last day之前答我㗎喎，我都唔急嘅。等你真係覺得對我有感覺再同我講喇，你唔係話要做一年朋友㗎咩？」

雖然呢一刻嘅我，聽到Hayley肯做我女朋友係好開心，但我都係想佢諗清楚，唔想佢做一個錯誤嘅決定，好似上一次咁。

「我真係準備好㗎喇，你信我好冇？」
「嗯！」

我嘅直覺話我知佢心底可能仲未係100%完全愛我，但如果Hayley都肯俾次機會我哋去試去行落去，冇理由我自己走去扼殺呢個機會㗎？大把情侶一開始都未係完全投入去段關係入邊㗎喇，慢慢行落去先會發現對方嘅重要，先會知道自己有幾愛另一半㗎嗎。

我知道我要繼續做好自己，去錫去愛去珍惜Hayley，希望佢有一日會話我知佢真係真係好愛我，唔可以冇咗我係佢身邊。

我捉起企係我前方嘅Hayley雙手，第一次以男朋友嘅身份望住佢，然後拉佢埋嚟我嘅身邊，將佢緊緊咁抱入懷中。呢一個擁抱，令我覺得好溫暖好幸福。

呀媽，我得咗喇！

擁抱過後，我哋慢慢咁鬆開雙手，頭部離開對方嘅肩膊，嚟一個好近距離嘅對望。望住Hayley面上洋溢住幸福開心嘅微笑，我都不禁笑咗岀嚟。

「不如我哋影張相呀？」Hayley道。
「嗯！」

用相片去留下我哋啱啱係埋一齊嘅一刻，可能係最好去保存呢個回憶嘅方法。希望三五七年之後我哋一齊睇返呢張相，都冇後悔到當初我哋做咗嘅呢個決定。

「你快D post呢張相咁以後味唔會有人再問你囉。」Hayley道。

「下，你咁快想公開喇？」

我對Hayley叫我咁做有D驚訝，因為我冇諗過佢咁快就會想公開我哋嘅關係，認定我係佢男朋友嘅身份。其實會唔會只係我小人之心咗？或者Hayley真係完全準備好投入我哋嘅關係之中？

「你唔想咩？」Hayley反問。
「唔係，我梗係想喇，我冇諗過你會咁快叫我post啫。」

我梗係恨不得即刻岀post插旗霸地盤，等其他狗公知難而退喇。既然Hayley都唔介意，我梗係肯㗎。就係咁我哋透過一個story公開咗我哋嘅關係，caption寫住「唔好再問喇！」。

我哋拍完第一日拖之後，我終於可以用男朋友嘅身份拖住Hayley嘅手送佢返屋企。如常地去到佢屋企嘅樓下，Hayley準備轉身入大堂門口，我先醒起好似有D野未做。

「喂！」我衝上前捉住Hayley嘅手道。
「做咩呀？」Hayley擰轉身向住我講。
「多謝你。」

多謝佢俾咗呢個機會我做佢嘅男朋友，我真係好開心覺得自己好幸福。說畢，我就慢慢烏前身體，打算同Hayley道別。

呀唔係，係吻別至真。

眼前嘅Hayley都合上雙眼，企係原地等我錫落去。我終於可以光明正大咁錫我嘅女朋友，錫我嘅Hayley喇。

「傻仔。」係我哋吻別之後，極近距離咁張開雙眼之時，Hayley講。

呢一刻嘅我哋鼻尖貼住鼻尖，雙方都流露住幸福嘅笑容，當時嘅我真係好想留住呢一剎那，呢一個場景，好唔捨得離開。

「好喇，真係要走喇，聽日仲要返工㗎。」Hayley道。
「嗯，聽日公司見喇。」
「Byebye。」

係我行去搭車返屋企嘅時候，拎岀電話一睇，見到唔少人嘅回覆同祝福，包括已經去咗非洲嘅Ray。

「Finally congrats！」
「Thanks haha」
「飯？」
「唔會走你地嘅，放心」

呢一刻就算我俾人屈請食飯都屈得開心呀。