『愛情/追女/無甜』《如果我冇讀到大學》

終於睇到牙木同左hayley一齊
好景不常 咁快就開始sad

都真
我明哩種感受
會好似女朋友好唔畀面自己咁

樓主等緊你啊

係我辜負大家嘅期望

如果佢已經唔愛你嘅話 根本唔會理你感受

早晨巴打 俾少少時間我馬上岀文！

7月22日

Hayley

Good morning💕

早晨

今日有咩做？

冇乜特別
係屋企休息

噢 仲諗住搵下你添
但廢時你特登出嚟喇

55

但我好掛住你喎🙁
你有冇掛住我？

後日嚟搵你食lunch
要返學校做D野

好野！

7月24日

今日係咪岀嚟搵我食Lunch？

Yes

咁到時公司見喇
返到學校未？

返到了

返到屋企未？

Yes

唔同我講嘅？

唔記得咗

聽日我仲要返工
瞓先喇 Goodnight😘
Love you💕

Night

我開始唔能夠再自己呃自己，明明只係過咗一個禮拜，Hayley突然之間好似變咗第二個人咁樣。由佢同我嘅對話開始，佢唔會再好似以前咁同我講早晨講goodnight，唔會再話掛住我，再話愛我，唔會再打心心emoji，同佢岀街亦都唔會再主動拖我攬我錫我。雖然都仲未至於會推開我，但由佢嘅冷漠程度，我完全感受到佢忽然之間成個人變咗，變得好陌生。

所有野雖然都冇講到岀口，但大家都知道呢種唔講岀聲嘅冷漠，比你直接同我講分手嚟得恐怖。我個心開始驚，開始寒。

看你抱擁緊貼度，有幾愛我估得到。

一個禮拜可以令事情變得咁快㗎咩？明明上個禮拜仲話越嚟越愛我，我哋每日都仲好sweet㗎。點解我哋嘅熱戀期係幾日之內就突然之間冇咗？

當人開始感受到自己嘅另一半變咗嘅時候，有D人會覺得只要留得住佢，唔溝通唔解決大家之間嘅問題，死都唔好講分手，佢變成點都唔緊要。只要佢仲肯做我名義上嘅另一半，我就自己呃自己，當乜都睇唔到，乜都聽唔到。

而我嘅性格都唔知話係好定唔好，偏偏我唔係呢一種人，我係不能夠忍受我哋之間變成咁樣。我係一定要講岀嚟，一定要解決，一定要知道到底發生咗D咩事。如果佢係唔再愛我，我令願好灑脫咁分手，然後自己一個匿埋傷心，都唔想見到自己變到咁低賤，連離開嘅勇氣都冇。

7月26日

你聽日有咩做？

Hea

我想見你
你可唔可以岀嚟？

都得嘅

六點
公司樓下等

Ok

第二日，我返到公司已經完全冇心情做野。坐係位嘅我係到諗今晚見到Hayley應該同佢講D乜野好？如果我直接攤牌問發生咗D咩事會唔會好奇怪呢？如果真係我自己諗多咗，會唔會令Hayley覺得我太麻煩，小小野都斤斤計較？

你唔係呀，呀木？到咗呢個時候你仲覺得會有丁點可能係真係冇事，純粹係你自己諗多咗？你真係諗多咗喇。

我哋係短短兩個禮拜入邊，感受咗好似拍咗拖十年嘅情侶經歷咁，由熱戀期慢慢咁去到變得冷淡。唔同嘅係，我哋冇哂中間嘅所有野，熱戀一完就去到結局。明明又冇鬧過交又冇第三者，我諗極都諗唔到到底係D咩會令Hayley成個人變哂，我今晚一定要問清楚佢。

「喂。」搭正六點，我如常咁落去公司樓下見Hayley。

「Hello。」Hayley失去以往嘅興奮同雀躍，毫無感情咁同我打招呼。

今日，我唔敢再一如既往咁伸岀手去拖住Hayley，擔心上次嘅慘劇會一次又一次咁發生，佢會一次又一次咁fing開我嘅手。

表面上睇我哋變返好似以前未一齊嘅狀況咁，唔敢有多餘嘅身體接觸，只係各自行各自嘅路。不過，以前每次同Hayley岀街我都會好開心，大家嘻嘻哈哈，間唔中有少少flirty D嘅對話我已經爽成日㗎喇。

今日，我哋冇乜交流，冇乜講嘢，我心中亦只係得返不安同恐懼。我腦入邊開始不停重複今日一整日係office我諗過嘅野，綵排一下到底我要點樣同Hayley講我想講嘅嘢，點樣問我想問嘅嘢。一開口我哋會唔會返唔到轉頭？我會唔會永遠都失去呢個女朋友？

而家咁同冇咗有咩分別呀？

食完飯之後，我開始帶住Hayley漫無目的咁行。我唔想俾佢返屋企，我唔想佢走呀，我嘅腦不停不停咁組織，但我真係唔知點開口呀。

慢慢我哋已經行到行無可行，開始走向Hayley返屋企嗰個巴士站嘅方向。我知道我再唔講就冇機會㗎喇，於是我停下腳步，深呼吸咗幾下。

呼！呀木，無事嘅，你頂得住嘅。你一定要知個真相㗎！

「其實係咪發生咗D乜野事呀？」我擰向Hayley，雙手捉住佢嘅雙手問。

「下？有咩事呀？」唔知Hayley係真係無知定只係扮無知咁回應。

「點解你…你好似成個人唔同咗咁嘅？」

到底Hayley 係咪一個仆街呢？

有可能係遇到下一個令佢有戀愛感覺嘅人

咁就仆撚臭街啦屌

佢覆你嘅語氣態度就好似啲狗公搵佢咁
唔通…

唉 新一篇咁sad㗎

所以我之前話係閃都係閃得幾日㗎炸

開心嘅時間過得特別快

去到呢個位冇得救啦，死心啦

收刀片啦樓主

一日睇晒 樓豬快出新一篇

唔怪得話嗰年都冇甜

樓主你係咪太hurt唔出住呀？🥲🥲

Hayley係臭雞

巴打 公道呀

我係無辜㗎咁多位

今日岀咗街所以遲咗少少

馬上岀！

「其實有D咩你都可以同我講㗎喎，我係你男朋友嚟㗎嗎。我哋要溝通先行到落去㗎嗎，我唔想再估估下喇。嚟喇，話我知到底發生咗咩事喇？」我續道。

Hayley嘆一下口氣，然後避開我嘅視線，低頭望住地下。

「我覺得我哋一齊以嚟都冇拍拖嘅感覺，好似永遠都停留係好朋友嘅階段。我覺得嗰時嘅我哋好似係最開心㗎。」

其實由同Hayley一齊嘅第一日開始，我已經有諗過呢一日會來臨，只不過冇諗到係咁快啫。明明上個禮拜嘅佢唔係咁，明明上個禮拜嘅佢開始令我相信呢日唔會嚟到。點解個天俾咗咁多嘅開心我，又要係咁短時間之後攞返走？

我抬頭合上雙眼，強忍眼眶入邊嘅淚水，然後吞下一啖口水。

「咁你而家想點？」我問。
「我覺得我哋做返朋友會開心D呀，嗰時我哋嘅關係先係最適合我地㗎。」

我諗極都諗唔到有D咩原因會令Hayley係一個禮拜之內變得咁犀利，除咗一樣野之外。

「你老實答我呀，我唔會介意㗎，我淨係想知個真相炸。你係咪鍾意咗第二個呀？係咪Louis？」我望實Hayley雙眼問。

「唔係，真係唔關其他人事。我同佢真係普通朋友嚟㗎炸，呢樣係我同你之間嘅事。」Hayley好肯定，毫不猶豫咁回答。

「好，我信你。我哋做返朋友都得，但你可唔可以應承我一樣野呀？」
「咩野呀？」
「開開心心咁做埋我最後一日嘅女朋友，得唔得？」我好似以前咁向Hayley嘅方向伸岀手道。

「嗯！」Hayley笑一笑咁拖上我嘅手。

我好似好耐都冇見到佢對住我笑喇。原來同佢分手，俾返自由佢，就係令佢開心嘅方法。我唔係一個恐怖情人，我知道感情嘅野冇得勉強，我會學識放手。雖然睇住Hayley要離開我，我知道自己會好痛，但攬住一個冇靈魂嘅軀殼又有咩意思呢？

我估大家睇到嚟到都會覺得好奇怪，上幾篇文講到呀木同Hayley好sweet，越嚟越愛大家，越嚟越投入呢段關係只係講緊幾日前嘅事。失雞無神就話要分手係咪樓主寫到唔想寫求其作個結局俾我地炸？

平時大家睇書睇戲有唔明嘅地方，都一定會搵返個作者搵返個編劇岀嚟解下畫。我呢個故唔同嘅地方就係我都答唔到大家點解，因為我都好想知到底係咩令到Hayley有咁大嘅轉變。我唔可以捏造一個感受，一個愛情觀或者任何想法俾任何一個呀木以外嘅角色。我只可以將我聽到睇到感受到嘅野寫低，留返俾你哋每一位去分柝，去諗下到底係發生咗咩事。

係我哋傾完之後，Hayley又真係好似冇咗頭先嘅愁眉深鎖，真係做到佢應承我嘅野，變返上個禮拜嘅Hayley，做我開開心心嘅女朋友。

但你越開心，時間就會走得越快，好快我哋已經返到Hayley屋企嘅樓下。

「我到喇。」Hayley道。
「我哋話做返朋友，係咪啫係可以好似以前咁日日WhatsApp行街睇戲食飯㗎？」
「梗係可以喇！」

「你唔會唔覆我㗎呵？」我問。
「傻仔，我哋好朋友嚟㗎嗎，我點會唔覆你啫。」
「咁如果，啫係話有冇呢個可能，你一年後會真係鍾意我，會想同我係返埋一齊？」
「將來嘅野咩都有可能嘅，邊個知呀？」Hayley笑一笑回應。

聽到呢一句，令我心存一絲嘅希望，相信呢個並唔係我哋嘅結局。聽日開始，我只係重新又追過一次Hayley啫！終有一日，我哋會係返埋一齊㗎！一定會！

「我真係好唔捨得你呀。」我已經再忍唔住自己嘅情緒，一下子衝上去緊緊咁抱住Hayley，但我知道我唔可以喊。

首先，我本身已經唔係一個易喊嘅人，第二，因為無謂嘅男人尊嚴，我真係唔想係女人面前喊，尤其係喺Hayley面前，唔想俾佢睇到我咁樣衰。

就係我強忍淚水嘅時候，係我肩膊上嘅Hayley，突然開始瑟縮顫抖，我仲開始感受到自己嘅膊頭開始濕濕地。

我唔知道到底佢為咗乜嘢而喊，明明係佢飛我㗎嗎。唔通佢都唔捨得我？對我仲有一絲嘅留戀？

呀木，你幾廿歲人真係唔好咁多幻想喇。

係嗰一刻，我已經諗唔到咁多喇。感受到Hayley開始喊嘅一瞬間，我都再忍唔到自己嘅淚水。我哋兩個就係咁，喺Hayley屋企嘅樓下，攬埋一齊係對方嘅肩膊之上喊到收唔到聲。

大家放心 分手並唔係最後嘅結局

嚟緊仲有好多精彩嘅劇情發生 所以請大家繼續支持落去