『愛情/追女/無甜』《如果我冇讀到大學》

18:49
9月4日
Whatsapp: Yannes已傳送你一個新訊息

「喂，你有冇係SU買過電腦呀？」
「買咗喇，開心使用中」
「咁你聽日可唔可以陪我去買呀？我一個人驚驚地」
「驚咩？SU d人唔會食人㗎喎」
「唔係呢，我又唔識揀又剩咁，你陪我去喇」
「是但喇」
「多謝大佬！」

第二日，我哋去SU個office到比咗錢之後佢哋話即場冇現貨，於是我哋就一齊搭車去個倉到攞。

「喂你知唔知邊個Derek呀？」係車上Yannes問我。
「咁你知唔知邊個Lucy呀？」
「唔知喎，邊個嚟㗎？」
「我都唔知喎。」
「妖，佢係我地個camp嘅oc嚟㗎，同我d組爸媽好熟㗎。」
「哦 咁又點呀？」
「佢好煩呀，佢add咗我ig之後成日問我得唔得閒喎？」Yannes皺著眉望住佢個電話講。
「咁你咪同佢講唔得閒約咗人囉。」
「我講咗喇，佢話佢可以係我約完人之後岀嚟陪我食糖水或者送我返屋企都得喎。」
「叫咗你咪收咁多兵㗎喇，而家又嫌人煩。」我反一反白眼道。

聽到呢句嘅Yannes冇岀聲，淨係攞佢牛乸咁大對嘅眼睥到我實一實。

「咁你味正面d拒絕佢或者唔好覆佢囉，佢慢慢會get到㗎喇。」我知道我唔會夠佢嘅大眼攻勢嚟，於是自己繼續講。
「唉，個問題係我唔識拒絕人呀，我由中學已經被呢樣野困擾住我好耐喇。」

我望住佢好苦惱咁望住個電話嘅樣心諗，真係有咁難咩？但我見已經到站就冇應到佢，只係用手踭推一推佢示意要落車。

「咁就咁就用得㗎喇？」我哋離開咗個倉之後揸住電腦嘅Yannes問。
「睇下你點介定用得囉。」
「啫係上網呀，做project個d囉。」
「呀姐 你冇買過電腦㗎？」
「點知喎 以前用個d都係我老豆搞掂嘅。」Yannes擺岀一副無辜嘅樣。

一見到呢個樣，我又知我輸咗了。

「咁你要用d咩味down d咩囉。」我對佢嘅無知苦笑一下，擰一擰頭道。
「唔該大佬！」
Yannes將佢手中嘅電腦雙手奉上。

「你先係大佬，我未見過有人一邊叫人大佬，一邊叫個大佬幫佢做野㗎。」

於是，我哋又坐返車返學校幫佢set up部機。

「要點樣先用到word個d㗎？呢樣最重要呀。」返到學校坐低之後Yannes問。
「Down落嚟味用到囉。」
「要比錢㗎？」
「本身要，但學校有比咗錢嘅可以download。」
「咁好㗎咩？」
「你每年比成幾皮野學費㗎，大佬。」

17:49
9月5日
Whatsapp: 戲劇學院red house已傳送你六個新訊息

係等緊幫Yannes download不同software嘅時候，我隨手拎起個電話㩒下，發現dramso嘅group又有新嘅message。

打開之後見到係一幅我同Yannes嘅背影相。十五分鐘前由Michael send岀。

「屌~」
我將個電話遞過去比Yannes睇。

「邊個嚟㗎咁得閒偷拍我地嘅？」佢笑一笑咁問。
「Michael囉 黑黑實實個個呀。」

之後個group當然會引嚟一陣騷動喇。

「一齊咗？」
「 恭喜哂！」
「Dramso好事近喇！」
「今晚係咪帶埋嚟食飯？」

今晚原本我係約咗佢地Re-U，於是我幫Yannes搞掂部電腦之後就岀發。

今日係咪仲有㗎？ 好似無尋日咁多咁

晏少少會再岀㗎 多謝巴打你支持

「呀木同Yannes一齊咗咁大件事冇人講？」組媽Joey一見到我嚟到就扮晒嘢係到問。
「冇人講我講！呀木你就唔啱喇，咁大嘅喜事都唔同我哋講。」
「冇呀，都冇一齊，點講呀？」 我答。

咁事實上我地係真係冇一齊到呀嗎，直到呢一刻都真係純粹朋友。

「明嘅明嘅，了解中，好快就會一齊㗎喇。」

「嗱，呀木，唔好講咁多，一句講哂，Yannes定Shirley先？」AK揸住杯啤酒問我。

係我自己有一個答案之前，大家開始討論起呢個問題。

「如果揀女朋友嘅話我一定會係揀Shirley，佢乖咁多，純品咁多，Yannes似玩開嘅多喎。」肥仔答。

「我就一定係揀Yannes嘅，Shirley太靜喇，做女朋友一定要啱傾先得㗎嗎。」AK反駁。

大家你來我往，基本上都係一半一半，揀Shirley嘅都係覺得佢乖，純品d，會係一個好女朋友，揀Yannes嘅就覺得佢可愛D個人fun d好傾d。當每個人都發表完自己嘅意見之後，目光又落返係我身上。

「嗱，我哋點揀都冇用嘅，最重要係你點揀先！」AK拍一拍我心口問。

我掃視枱上嘅各人，又再望一望Samuel。

唔知佢會唔會同返佢兩個講呢？

「Yannes！我揀Yannes。」

係個一個moment，如果要我揀一個，我係會揀Yannes。

「識貨呀木，飲杯！」AK拎起酒杯向住我同一眾揀Yannes嘅人講。

自從玩完ocamp之後我都一直keep住同Dora，Shirley同Yannes 3個女仔每日傾計，分享下自己做緊d乜，約下一齊食飯岀街食糖水。我知道咁樣唔可以長久地維持落去，咁樣我永遠都搵唔到一個真係拍拖嘅對象，所以我決定搵我嘅感情顧問傾下。

呀標係我一個識咗好多年嘅中學同學，雖然佢去咗加拿大讀書，但我哋間唔中都會傾下電話，尤其係有感情煩惱嘅時候。佢溝到溝唔到女都會同我講，但今次係我需要佢嘅幫忙。

「咁好簡單啫，你問心個句而家你最想同邊個發展先？」我同佢講哂我同Dora，Shirley同Yannes之間發生過嘅事之後，呀標問我。

我又再諗咗一諗，但都係決定揀返佢。

「其實問心，自從我識咗Yannes Shirley佢地之後，我好清楚我唔係真係鐘意Dora，我都揹唔係要佢同佢男朋友分手同我一齊呢個咁大嘅責任。至於Shirley同Yannes，Shirley真係好乖又文靜所以我好似同Yannes傾計相處會開心d多d野講，如果三個要我揀，而家我都係會揀Yannes。」

「屌，估到你條咸濕仔喇，聽你d口吻句句都幫住人咁。不過老實講如果你問我呢，我自己就覺得Shirley好D嘅，揀女朋友唔同玩玩下個D呀嗎，點都係揀個乖D純品D嘅好，但乜都假，最緊要係你自己鐘意，你係鐘意Yannes嘅就無計喇。咁你味慢慢疏遠Dora同Shirley，認真d追Yannes囉。」

「我知，但我驚如果Dora真係鐘意咗我，肯同佢男朋友分手同我一齊，咁我味好似好衰咁？」

「你試下咪食咗自信豆沙包咁先，人地有話過鐘意你咩？人地都係同男朋友鬧交先想搵個人陪下炸，何況你又唔係真係同其中一個拍緊拖，你都係了解緊啫，唔撚了解過點知邊個啱啫。」

我駁唔到，講得頭頭是道嘅呀標令我明白係我過慮咗。

「咁你覆少d，唔好主動約Dora同Shirley，慢慢佢地會get到㗎喇。疊埋心水專心溝Yannes喇。」
「溝撚到記住同我講呀！」呀標最後補充多句。

一個禮拜後就係約咗Dora佢地班人hall邊 re-u嘅日子，落咗堂之後我就行去約定嘅地方搵埋成班人一齊去買餸上hall打邊爐。當我仲係遠處行緊過去嘅時候，見到到咗嘅幾個人神情都變得好凝重。

「喂 頭先個個係咪Dora男朋友嚟㗎？」
「好似係喎，我之前係Dora ig到見過㗎。」

「做咩事呀？」我行到埋去之後問。
「Dora啱啱whatsapp我同我講話佢今晚嚟唔到喎。」組媽Yoyo答。
「哦 係咩？」

奇怪喇， 明明上次我問Dora佢都話會嚟嘅。

「咁都冇咩咁岀奇呀，放下飛機好正常啫。」我續道。

照計Dora唔嚟應該都會同我講聲㗎。

「梗係唔係咁簡單喇，我地頭先見到Dora個男朋友嚟咗搵佢，佢地係canteen好似講緊數，Dora仲想喊想喊咁添呀。」

仆街，唔係真係尋仇尋上門呀。

雖然我好想搵Dora睇下發生咗d乜野事，但我知佢男朋友就係佢嘅身邊。根據我哋嘅溝通模式，佢應該會係適當嘅時候會搵返我嘅，我可以做嘅就只有靜靜咁等待。

lm 鍾意睇毒撚故

見到有返d人真係好感動 好多謝樓上嘅所有巴絲

一路有睇又或在啱啱加入嘅 覺得好睇不妨俾個正皮或者留個名支持下

全部都係對我好大嘅鼓勵同俾我動力 等我堅持寫落去㗎 多謝晒大家

聽朝會再岀新文

lm! 好睇

好鐘意你whatsapp嗰種表達手法

沒有新的通知沒有新的通知沒有新的通知

真係道出毒撚心聲

多謝巴打一路嘅支持呀

初初用呢個手法都有d擔心 因為冇見其他人用過

但咁就叫做有d個人風格 有人鐘意就好喇

毒撚除咗等message等到灰 仲會成日以為自己個電話震

然後一打開 就係「沒有新的通知」

結果係等咗成晚，Dora都冇搵過我，令到我開始有d擔心佢。於是我又轉用第二個apps send咗句「你冇嘢呀嗎？」比佢，但最後我都係等唔到Dora嘅回覆。

10:38
9月15日
Facebook messenger: Dora已傳送你一個新訊息

「佢唔知發咩神經，冇喇喇連snapchat都睇，雖然睇唔到d對話但見到有好多火同心心。」

睇到呢句說話嘅我，已經冇上次個種好緊張好驚嘅感覺，反而覺得有d釋懷，或者呢個係個好機會搞清楚我哋呢段曖昧不清嘅關係。

「咁你哋傾咗d咩呀？」我覆返佢。
「冇乜特別，但如果你之後再搵我可能又要轉apps。」
「好呀。」

雖然我係講咗好，但自從呢件事之後我地之間嘅感覺已經唔同咗，我當然有我嘅理由，或者佢都知道我地咁落去係冇乜意思。我地冇再岀嚟食糖水食宵夜，唔會再一齊食早餐，傾計由以前一日一百幾十個messages到一日可能覆得一個，慢慢就真係真真正正咁疏遠咗。

過多一年半載之後，佢就算係學校撞到我，佢都唔會同我say hi，直情當唔識我一樣。我之後先知原來佢對成個ocamp嘅人都係咁。我哋嘅組爸都話Dora見到佢都唔會打招呼，好高竇。佢亦都學識咗打扮多咗，慢慢由一個當時天真嘅中學雞變成一個成熟嘅大學生。而據我所知，係我哋之後佢都仲同佢男朋友一齊咗一段時間，最後因為咩事而分開，我就不得而知。

每完一個女仔嘅情節之後我都想做少少總結，可能大家都會覺得Dora背住男朋友同我岀街都唔係d咩好女仔，以連登嘅標準直情係雞。我就當然係仆街喇，但我覺得佢都係一時同男朋友要轉變去一個新環境，有磨擦嘅地方又唔識諗先會轉向一個會關懷佢，肯發時間係佢身上，唔會同佢嘈嘅人啫。始終我地都冇做過任何越軌嘅事，而佢最後亦都返反去佢男朋友身邊。

唯一有d遺憾嘅係唔知點解我哋最後會連hi-bye friend都做唔成。每次係校園同佢擦身而過嘅時候，我都有諗住都佢say句hi，但發現佢根本眼尾都冇望過我。初初都仲諗住可能係咁啱見唔到我啫，但慢慢就發現佢每一次都係咁，明明我已經排隊企正係佢後面，佢都係當睇我唔到。

有d唏噓嘅係曾經令我心跳加速，小鹿亂撞嘅女仔最後唔知點解同我會係用一個咁嘅結局收場，但現實就係咁殘酷，人類嘅關係就係咁脆弱，琴日可以傾到雞啄唔斷嘅人，聽日只要你唔搵，我唔覆，好快就會同冇認識過一樣，所以希望大家都可以珍惜身邊每日會同你講早晨早抖，聽你呻做你樹窿嘅人。不論係情侶，曖昧對象，朋友或者屋企人，因為好老套咁講句，世界上冇野係必然㗎。

Anyway，我覺得佢都係一個好女仔嚟嘅，亦都好高興自己認識到佢，可以有佢陪伴展開咗我嘅大學生涯，希望佢會幸福快樂。

往後嘅日子，我已經的起心肝要追Yannes，所以我都只會約Yannes係學校一齊食早餐，溫書或者做project，就算佢有佢做我有我做都好，我哋都會約埋一齊。而唔知係好彩定唔好彩，我地成日都會比不同嘅人撞到或者偷拍，Dramso嘅人都好自然認定咗我地已經係一對，但我哋當然一一否認喇。

「拍拖味拍拖囉，又唔係明星，玩咩地下情啫。」呢句說話我都聽過唔少次。

大佬，唔係我唔想認呀，但我真係唔係呀嗎。

「喂，聽日Dramso re-u你會唔會去呀？」有一日我地如常咁一齊食緊早餐我問Yannes。
「去呀，你唔去咩？」佢邊玩電話邊答我。
「去，佢地話去雲來客棧喎，你知係邊咩？」
「唔知呀，但我地成house會約埋一齊去呀嗎。」
「我地都會，但我聽日要去買d野先，所以可能趕唔切，諗住自己去囉。」
「咁我陪你去買野之後一齊去囉，斷估佢地唔會賴低我地兩個掛。」
「好呀。」

「同埋我都要去買件白恤衫。」 佢嘅視線仍然冇離開過部電話。
「冇lala買恤衫做咩呀？」
「我地house話要dresscode喎，女仔要一齊著白恤衫，男仔要著女人個d超貼身短褲。」

Yannes望住我笑一笑講，但好快佢又將視線轉移返落個電話到。

「下，突登為咗班茂利買件衫咁揼本？」
「係囉，我都覺得好on9咁，你有冇白恤衫呀？」
「有，我以前d校服全部都係白恤衫嚟嘅，但啱你著咩？」我將佢全身打量一次。
「是但喇，頂住檔先啫，你聽日帶件比我呀？」
「好呀。」

眼見Yannes仍然仲係好苦惱咁望住個電話，我就中個頭埋去睇下。

「你睇緊咩啫，你個樣忟憎到呀。」
「咪Derek條友囉，佢係咁chur我問我聽日食完飯去唔去下場喎。」

Yannes講完就「隊」咗個電話過嚟比我睇。

我見到佢左上角寫住有三百幾個messages未覆。

「下？聽日有下場咩？定你同佢有下場炸。」

我個樣笑住，但個心酸住咁問。

「我就係唔知佢係講緊大家去下場定係佢私底下約我。」
「咁你味咪理佢住囉，唔通佢係成班人面前抆你走咩。」
「你仲有成三百幾個messages未覆喎。」我指住左上角個數字繼續講。
「d group嚟炸嗎，唔覆喇。」

第二日落堂之後我就帶埋件恤衫去搵Yannes，佢陪我去買完野就換咗我件恤衫返反學校 join大家。

「嘩， Yannes，你著咗你老豆件衫嚟呀？」

Yannes咩都冇講，只係尷尬咁用個眼神睄咗過嚟我呢邊。

「哦，明嘅明嘅。」

21:38
9月18日
WhatsApp: Yannes已傳送你一個新訊息

「喂，原來真係有下場個喎，我組爸啱啱同我講」

因為我地食飯時係要分house坐嘅關係，所以Yannes用WhatsApp同我講。

「我好似啱啱都聽到，係咪去bar？」
「Yes 你會去㗎呵？」
「你想去我咪陪下你去囉」
「下 我諗住陪你去㗎炸」
「咁我哋一齊去喇 好冇？」
「好！」

係食完飯之後，餐廳門外嘅人群就分成咗兩批。包括會去下場嘅人，同準備返屋企嘅人。

「喂，Shirley你唔一齊去呀？」
我係餐廳嘅門外見到Shirley準備返屋企嘅身影問。

「唔喇。」
「點解啫，一齊去玩炸嗎，Samuel Yannes都一齊去㗎。」
「我唔去喇，我唔係咁鐘意飲酒。」

見到Shirley一臉倦容，我都廢時強人所難。

「咁好喇，你返屋企小心d喇。」
「嗯，ByeBye。」Shirley向我哋一行人道。

道別過後，我哋就起程去到附近酒吧林立嘅地方。

個故幾寫實
btw男主角一定好靚仔

冇諗過有人會咁講

Anyway多謝 Almighty Dragon嘅支持

「喂，我好想睇呢套戲呀。」Yannes係我哋去嘅途中，突然同我講。
「聽朝去睇囉，如果你仲清醒嘅話。」我笑一笑，根本冇預過會成真。
「屌你喇，明知我唔飲得。你記住睇住我添呀，唔好比我瞓街呀！」
「得喇，呢到幾廿人，你驚你會死咩。」
「唔得，你要應承咗我先，我有咩冬瓜豆腐就入你數。」Yannes向我伸岀手指尾道。
「有冇咁誇張呀大佬，去bar啫去打仗咩。」

Yannes一話不說，只係繼續瞪大佢嘅雙眼，將手指尾伸到去我嘅面前。我知道我又一次咁輸咗喇。

「唉，得呀得呀，應承你喇。」我只好將我嘅手指尾勾上以應付Yannes嘅要求。

去到之後我同Yannes繼續孖公仔咁一齊坐，大家玩個d圍枚，大話骰佢完全唔識玩，人哋話佢輸就輸，叫佢飲就飲，佢好快已經wing wing地，捱住我瞓咗一陣。就係做Yannes枕頭嘅時候，我見到一個我唔識嘅女仔，係ocamp嘅時候從來都冇岀現過，係枱嘅另一邊同Michael玩緊，但其實唔知點解成日都會有d唔識嘅人失雞無神岀現係到，所以我都冇乜點理會。

「我想去廁所呀。」

Yannes大約瞓咗一個鐘之後，突然從我嘅膊頭醒來，睡眼惺忪咁向我講。

「你得唔得呀，駛唔駛我陪你去呀？」

佢好似有d驚訝，忽然擰轉頭望住我。

「I mean駛唔駛我係門口等你呀。」
「唔駛喇，係個到炸嗎我識路。」Yannes指住女廁門口道。

我見我嘅位置係可以直接望到廁所嘅門口，所以我就俾佢自己行過去。Yannes腳步浮浮，跌跌撞撞咁總算叫行到去女廁門口。正當我以為佢會推門入去之際，佢又係門外定咗一定好似想開門但又冇開到。起初，我以為只係入邊有人就無為意。點知佢下一秒就成個人累低咗。

「喂！醒呀喂！」
過到去見佢不省人事，我唯有打咗佢幾把，但都係一d反應都冇。

我將雙手分別放到去Yannes嘅頸同膝頭嘅下方，以公主抱嘅形式將佢由廁所門口抱返埋位。呢個舉動當然會令係酒吧見到嘅眾人引起一陣騷動。

「做咩呀，咁快比你隊冧咗喇？」肥仔問我。
「痴線！」
「好好睇住人呀，呢到好多豺狼㗎。」

佢唔會係講緊我呀嗎？

結果，大家嘅下場就係落bar飲酒，我嘅下場就係落bar做Yannes嘅枕頭。被Yannes捱住瞓嘅我睇住時間一分一秒咁過，頭先攝取嘅酒精就一滴一滴咁流入我嘅膀肝。雖然我知道有好多人係到覬覦著我嘅位置，但我嘅括約肌已經係到做緊垂死掙扎。

最後，我真係忍唔住。於是我將幾個cushion疊埋墊住Yannes個頭就急急腳咁衝咗去廁所，諗住好快會搞得掂。

唔知係我低估咗我膀胱嘅容量，定係我低估咗Derek嘅速度呢？

derek老強

當我去完廁所行返埋位嘅時候，我嘅位置經已俾Derek霸佔咗，而Yannes就瞓咗係佢個膊頭上。Derek用囂張跋扈嘅眼神望住我嘅一刹那，彷彿係到講「唔撚抵得呀？」。

雖然個刻嘅我嬲撚到震，但同時我都好清楚我根本咩都做唔到，我又唔係邊位，唔通衝上去打佢咩？要怪就怪自己個膀胱唔生性。呢個時候，我唯有揀個唔向住佢哋嘅位自己坐低就算。

我越坐條氣就越唔順，但就算我幾唔gur都好，我都好清楚我冇資格去做任何野，因為我嘅身份其實同Derek咪一樣，只不過都係Yannes嘅「朋友」，有乜資格要人讓返個位俾我啫？

就係我仰天長歎，條氣chok住chok住自己一個飲緊酒嘅時候，個個我未見過，頭先同Michael玩緊嘅女仔突然行過嚟坐低咗。

「你唔駛咁confuse喎，我唔係你地ocamp㗎，所以你冇見過我係正常㗎。」佢見我一臉疑惑嘅樣就同我講。

哦，原來我係正常嘅，我驚自己噏唔岀名就老尷喇。

漆黑之中雖然我唔係幾睇得清呢個女仔嘅容貌，但隱約都見到佢五官標緻，雙眼明亮，笑容亦都幾甜蜜嘅。帶住cap帽，臉上冇乜塗脂抹粉嘅佢，有幾分鄰家少女嘅味道。

而間bar作為一間bar，係一個又黑又嘈音樂又大聲嘅環境下，你唔係黃毓民嘅話想傾計都真係要哄埋d。

「我叫Charlotte呀，你叫咩名呀？」
但佢埋嘅程度直情係我隻耳仔會feel到佢個嘴唇嘅郁動，係直情貼住我隻耳仔添。

我感受到佢講野呼岀嘅氣息，由我嘅耳膜直接襲擊我嘅腦下垂體，我當場不禁打咗個尿震。

「我叫呀木。」
我將我嘅耳仔遠離返佢嘅嘴，擰轉頭望住佢回答。

但佢繼續用佢個嘴唇同我嘅耳仔交流，仲將隻手擺係我嘅大脾到。講得準確d，係我嘅大脾內側。第一次見到咁主動嘅女仔嘅我即刻硬哂軚，唔係淨係個到，係真係成個人硬晒軚，因為我根本唔知點handle，等陣我郁一郁唔覺意hi到佢，佢話我用條jer非禮佢隻手或者10年之後me too我咁點算呀。以我以往上連登嘅經驗，免費嘅野都係最貴，一定有camera係附近捕捉近我嘅反應，呢個九成九係情色陷阱嚟㗎！

呀木，唔好衰咸濕呀！

由於血液已經集中哂去另一個地方，我個腦經已運作唔到。只好佢問一句我答一句，不過原來佢唔單止唔係我哋ocamp，直情唔係我地間U添。

「咁你點解會係到嘅？」我覺得好奇怪所以就問。
「唔話你知。」

佢越係懶係神秘，就越令我深信我係會俾人捉黃腳雞。我即刻望一望附近有冇偷拍鏡頭。

「你覺唔覺得呢到好焗好嘈呀？不如你陪我岀去抖下氣呀，我有D唔舒服呀。」Charlotte將枱上嘅酒接二連三咁飲哂之後道。

我都未比得切反應，就已經俾佢一手捉住我，拉咗我岀門口。

佢真係老強都還好，起碼我可以衝上去打佢

而家淨係夠膽毒撚坐埋一邊

又有艷遇

樓豬去咗邊好掛字你

俾人捉黃腳雞炸

係到 多謝巴打支持

晏少少會岀新文俾大家收工睇

係狹窄嘅電梯大堂內，除咗我同Charlotte之外，幾個身位外仲企咗一個不知名嘅女子。Charlotte嘅步步進逼令到我不得不貼住牆邊企，然後佢就將頭放係我膊頭上邊，佢嘅面貼住我嘅面。

我哋唯持咗呢個動作大約幾分鐘。

飲咗唔少酒嘅我，面部不停被Charlotte嘅頭髮撫摸，一陣又一陣女人嘅香味傳入去我嘅鼻到。我知道我嘅理性就嚟㩒唔住自己嘅獸性喇，因為我嘅手已經不自覺咁慢慢移動到去Charlotte嘅腰間。

呢幾分鐘左腦同右腦，左手同右手，理性同獸性之間嘅交戰可以話係去到精神分裂嘅狀態。雖然我開始相信佢並唔係嚟捉我黃腳雞嘅，但我望住眼前嘅酒吧門口，腦海中浮現岀Yannes係入邊瞓緊覺嘅情景。忽然諗到，如果呢一刻Yannes行出嚟我咪前功盡廢？

呀木！你唔可以為咗眼前呢D過眼雲煙而放棄可能係你嘅終身幸福㗎！

Charlotte當然冇因為我嘅思緒而停止攻勢，就係我瀕臨崩潰嘅邊緣，我嘅救星岀現了。

一直係我哋隔離嘅女人突然之間爆喊，嚇得我同Charlotte都不約而同地望向佢嘅方向。

Charlotte將依偎係我身上嘅軀體慢慢移開，逐步走近個個喊緊嘅女仔。

「做咩事呀，你冇野呀嗎？」Charlotte邊拍佢嘅背脊邊安慰佢講。

鬆一口氣嘅我都唔知佢地係識定唔識嘅，但我見到呢個咁好嘅甩身機會，就將褲袋入邊嘅紙巾俾咗Charlotte，然後一個人入返酒吧。

就係我推開門，鬆一口氣嘅時候，見到肥仔坐咗係門口隔離。

「喂，你冇野呀嗎，我頭先見你成個人硬哂呔完全handle唔到咁喎，駛唔駛幫手呀？」
「OO…Ok嘅，應該冇事掛。」我仲未回過神嚟咁答。
「真係ok？ 拿，你要食我一定唔會阻你嘅，但如果你要幫手解圍就隨時出聲喇。」佢捉住我膊頭同我講。
「暫時應該ok嘅，佢都係出邊囉。」
「佢係你地D friend嚟？知唔知佢點解會係到嘅？」我諗住肥仔係組爸會識多D人，所以我問下佢。

「唔係呀，我都唔識佢㗎。」

呢個來歷不明而且極具威脅性嘅女仔，唔知係上天派嚟嘅祝福定係作弄，幾乎玩殘我呀大佬。