『愛情/追女/無甜』《如果我冇讀到大學》

有文

係咪睇得唉瘋人多，好有陰影

Push

我明
佢次次中間都寫到好幸福，然後臨尾一定sad end

hayley bb真係好乖

唔好誤會呀 我冇任何暗示㗎

純粹見大家睇到呀木同Hayley都覺得好開心好sweet

好奇點解呢位巴打會咁諗啫

呢個世界俾人玩嘅故事太多 幸福嘅太少

鍾生係咪已經忘記咗YanB喇？

臭雞收檔啦

真 願天下嘅臭雞都孤獨終老 搵唔到人埋單

樓主快啲出文啦

「點算呀，我好唔捨得你呀，你可唔可以唔好走呀？」我送到Hayley返屋企樓下之後攬實佢講。

「傻仔，乖喇，我好快返㗎喇，你乖乖地係香港等我喇，好冇？」

我知道唔可以改變佢要走嘅事實，但都希望佢可以多留一陣。

「咁你可唔可以唔好上去住呀？」我扮哂可憐咁同Hayley講。

「好喇，我帶你周圍去行下呀。」

Hayley拖住我行到去佢屋企附近不同嘅地方，去認識佢住嘅地區，去了解佢嘅生活。佢會同我介紹一下佢最鍾意食嘅餐廳呀，以前放學鐘意去邊到hea呀，平時同屋企人會去邊呀等等。

「哪，呢到就係我嘅中學喇。」Hayley帶我去到一間學校前講。

我望住眼前七層高嘅白色建築物，呢到就係Hayley充滿回憶嘅地方。

「唉，點算呀，我覺得自己好老呀。」Hayley摸住自己兩邊嘅臉頰道。
「人越大時間就過得越快，以前小學覺得自己成世都唔會畢業㗎，點知去到中學『雪』一聲就過咗六年。而家讀到大學，今年都唔知做咗D乜咁又一年喇。」我回應。

此時此刻，我同Hayley拖住手望住呢個每個人都有唔同回憶，唔同感覺，唔同故事嘅地方，回想一下自己嘅中學生涯，概嘆一下歲月嘅殘忍。

我望住身邊嘅Hayley，我知道淨返嘅三年大學生涯都一定會好快咁過咗。我希望到時Hayley仲會係我嘅身邊，陪伴我走每一段路，一齊經歷所有開心同唔開心嘅野，一直互相支持愛錫對方。

「好喇，真係要走喇，我聽日仲要搭飛機呀。」

我哋兜兜轉轉又返反去Hayley屋企嘅樓下。

「嗯。」我行前將Hayley緊緊咁攬住。

我知道100分嚟講，呢一刻我對Hayley嘅不捨可能有200。但我最想知嘅係到底佢又有幾掛住我？到底佢有冇係我身上搵到佢想要嘅感覺呢？

「ByeBye。」我講完，就將嘴唇同Hayley嘅嘴貼上，做一個深情嘅吻別。

去咗咁多地方之後，時間已經好夜，我亦都錯過咗尾班車，唯有call Uber返屋企。

02:13
7月1日
沒有新的通知

「快D沖涼執埋D行李就早D瞓喇 love you」

02:18
7月1日
來電：Hayley

「喂。」話筒傳嚟Hayley嘅聲音。
「喂？做咩無喇喇打俾我呀？仲唔快D執完野去瞓？」

「我突然之間好掛住你呀。」Hayley終於講岀我等咗好耐嘅說話。

「下？咁突然嘅？你頭先仲好冷靜咁安慰我㗎喎。」聽到呢句嘅我，已經忍唔住係車上笑咗岀嚟。

「我頭先扮㗎炸，而家返到屋企得返我自己一個我好掛住你呀，點算呀？」Hayley嘅聲線開始有D顫抖。

「傻妹，冇事㗎。」
「我可唔可以唔去呀？」

其實我哋都知唔可以，但偏偏都心存僥倖。

「痴線，你grad唔到我唔養你㗎。」
「你味當好似之前你去日本咁囉，你都話好似我一直都係你身邊咁㗎。有咩都同我分享，我會即刻覆你㗎嗎。」我續道。
「嗯。」

「好喇，快D瞓喇，你聽日一早要搭飛機㗎。」
「知道，ByeBye。」

Hayley呢一個電話，解答咗我最想知嘅問題。聽到佢咁講，其實我真係好開心，佢真係有唔捨得我，真係有係我身上搵到掛住一個人，想痴住一個人，愛一個人嘅感覺。

不幸嘅係，係冇咗Hayley嘅呢兩個禮拜，我哋唔係好似之前佢去日本咁可以無時無刻咁WhatsApp，佢亦都唔需要我去幫佢搵景點搵車搭。因為佢成日都要陪住D小朋友，帶佢哋去玩去參觀去學野。只有夜晚小小嘅空閑時間，先會同我傾下計，講下佢今日做咗D咩俾我聽。

21:43
7月5日
WhatsApp: Hayley已傳送你一個新訊息

我打開通知，見到係一張相入邊有兩個木製熊貓形狀嘅鎖匙扣。上面一個寫住個木字，一個寫住個桐字。

「送俾我嘅手信？」我回覆。
「我個仔咁啱都係叫呀木 佢今日送咗桐字嗰個俾我 覺得幾靚所以影俾你睇」

「車 仲以為有禮物收添」我抱怨一下道。
「考慮下喇 可能嘅」
「打算送咩俾我？」
「返嚟你味知囉」

「咁快做人老母喇？同人玩得好開心？」
「D細路好得意呀 我驚兩個禮拜之後我會唔捨得佢哋呀」
「但我呢個小朋友都好掛住你喎」
「乖喇 我好快返嚟㗎喇 返到嚟第二日即刻同你岀街！」
「Deal！see you 」

我打開電話嘅日曆一睇，發現嗰一日就係15號，啫係我同Hayley一齊咗一個月嘅日子。雖然唔係咩大節日，但我都想準備小小驚喜俾佢，氹下佢開心。不過唔知Hayley會唔會記得呢？我記得之前佢講過佢係唔會記呢D日子㗎喎。

已岀

多謝巴打支持！

Hayley一定會記得

12:19
7月9日
WhatsApp: Hayley已傳送你三個新訊息

我打開WhatsApp，見到係Hayley分享緊今日發生嘅事。大約係講緊佢哋準備咗好多野去帶D小朋友去玩，但因為天氣嘅關係，所有嘅計劃都實行唔到。

因為琴日應承咗會帶佢哋去嘅地方全部都去唔到，小朋友一個二個都變得好失望，Hayley亦因為咁而好唔開心好自責，覺得自己呃咗班小朋友，好想補償返俾佢哋，但自己又做唔到D咩。

而我睇到呢幾個message，亦都感到有一點嘅失望。因為呢幾個都唔係文字嘅信息，而係幾張Hayley同佢朋友嘅對話cap圖。

係我最唔開心最想搵人傾訴嘅時候，我一定係第一時間醒起我最愛嘅人，會好想有佢係我身邊陪住我安慰我。係我心目中呢一個人一定會係Hayley，而我亦都好希望我可以做到Hayley心目中嘅呢一個人。

但現實話我知原來當佢感到唔開心嘅時候，佢第一時間都係去搵佢嘅朋友傾訴。然後先會諗起我，但又廢時再打字同我講一次，就cap幾張圖話我知發生咗咩事就算。

我唔知大家點睇呢一件事，可能係其他人眼中只係一件好小嘅事？但好老實講，我係有少少介懷嘅，或者只係我自己玻璃心喇。明明當日佢走嘅時候仲話好掛住我㗎，乜佢唔係越嚟越鐘意我嘅咩？點解突然之間又會咁樣？到底係我真係諗得太多定係我係Hayley心目中真係冇我自己想像中咁重要呢？

不過係呢一刻，我知道照顧Hayley嘅感受先係最重要，我亦都唔想再為佢增加煩惱，只好繼續做好自己，講一D安慰佢嘅說話。心中期盼住佢下一次有咩事嘅時候，第一個諗起嘅會係佢嘅男朋友。

22:34
7月14日
WhatsApp: Hayley已傳送你一個新訊息

「啱啱返到屋企喇！」
「你終於返嚟喇 你知唔知我等得幾苦」
「傻仔 聽日味見到我囉」
「好喇 你快D沖涼執埋D行李早D瞓喇 聽日要同我岀街㗎！」

「知道！」

係我哋一齊一個月後嘅呢一日，我就帶住我一早準備好嘅小禮物，嚟見只係兩個禮拜冇見，但好似兩年冇見嘅Hayley。雖然我唔知佢會唔會記得，但係只要見到佢開心，咁就足夠㗎喇。

「喂！」我馬上一個箭步衝上去攬實Hayley。
「做咩呀？好掛住我呀？」Hayley係我嘅膊頭上問。

「嗯。」我點一點頭回應。
「咁你呢？你有冇掛住我呀？」我將Hayley放開，直視佢嘅雙眼追問。

「嗯…都有少少嘅。」Hayley含羞答答地回答。
「行喇，我哋去食嘢先喇。」

我拖住Hayley行到去一間我預先搵定嘅餐廳坐低，嗌好野食之後就準備將我嘅小禮物送上。

「嗱，送俾你嘅。」我將收埋係身後Hayley好鐘意但一直都搵唔到嘅香水遞上前。

「嘩，你係邊到搵到㗎？我搵咗好耐都搵唔到㗎？」Hayley笑得好開心咁拆開個紙盒問。

「你呢枝野真係難搵呀，我初初上韓國D網搵，諗住搵D公司代購返嚟喇。點知香水係易燃物品唔運得。之後我行咗好多間香水鋪先搵到㗎。」

「咁你咪嘥咗好多時間囉？」Hayley問。
「唔係你以為我呢兩個禮拜係到做咩呀？咁你鐘唔鐘意先？」
「鐘意！多謝你。」
「你鍾意D時間就冇嘥到㗎喇。」

「嘿嘿，做咩無喇喇送野俾我嘅？」Hayley問。
「男朋友送野俾女朋友有點解㗎咩？知你想要想你開心味送俾你囉。」

我知道Hayley應該都忘記咗今日係我哋拍拖一個月，所以我都唔想俾到壓力佢於是隨口亂咁噏。

「好喇，見你咁乖。嗱！俾你㗎。」Hayley係手袋入邊拎咗一樣野岀嚟遞到去我嘅面前。

我望住Hayley手中揸住嘅一封信，信封上寫住「給男朋友仔」。

開心死傻佬木了

給男朋友仔好閃阿木哥

做咗好多野先有呢個機會俾我閃下㗎

好戥呀木開心 希望我都可以快D搵到我嘅Hayley

hayley扮唔記得嚟畀surprise樓主

加油呀巴打 每個人都會搵到自己嘅真命天女㗎

嗰時開心死我了

見到Hayley原來有所準備，嗰一刻我心入邊真係好開心，原來佢有將我哋嘅野放上心。

「你寫情信俾我呀？」我接過Hayley手上嘅信封，準備打開佢道。

「唔准而家睇呀！」Hayley馬上伸手阻止咗我。
「但係我好想知你寫咩俾我喎。」我嘅手打算撕開信封上嘅貼紙。

「唔得呀，好肉酸好樣衰呀。」
「做咩呀，你寫得好肉麻㗎？」
「你而家拆我就以後都唔寫俾你㗎喇。」Hayley要脅我道。
「好喇好喇，我返屋企先睇喇。」

雖然Hayley越係阻止我，我就越想知到底入邊寫咗D乜，但為咗呢一封信唔好成為Hayley最後一封寫俾我嘅信，我都決定暫時收埋佢，返到屋企先睇。希望佢真係寫到有咁肉麻得咁肉麻喇。

我哋食完lunch之後仲去咗好多地方，科學館，海傍睇日落，行街。雖然我仲未知Hayley到底寫咗D乜野俾我，但我真係feel到佢越嚟越鍾意我，越嚟越投入我哋呢段關係。時間亦都證明我哋當初決定咗一齊係冇做錯到，的而且確我哋慢慢發展成一對情侶，一對好幸福嘅情侶。

「我哋影相呀。」Hayley係袋中拎岀一部即影即有道。
「好呀！」

咔嚓！

「唔好郁，影多張先。」Hayley同我講。

咔嚓！

「嗱，呢一張你嘅，呢一張我嘅。」Hayley分配佢手上嘅兩張相。
「做咩呀？俾我第時掛住你攞岀嚟睇呀？」我問。
「你鍾意幾時睇味幾時睇囉。」
「好喇，咁我放入銀包先。」

「呀，係呀，遲D九月呢有套舞台劇上，我好想去睇呀。不過…」Hayley道。
「我陪你去睇呀。」
「但你對舞台劇有興趣咩？」

「咁拍拖就係你陪下我做我鍾意嘅野，我陪下你做你鍾意嘅野㗎喇。何況我都未睇過，可能一睇會鍾意咗呢。到時我真係覺得悶囉，你下次再約friend去囉。」我回應。
「咁好嘅你？嘻嘻。」
「唔對你好對邊個好呀？」

說畢，我又一次將望住我笑嘅Hayley抱入懷中。呢一刻感覺到愛嘅我，真係覺得自己好幸福。前世我一定係拯救咗世界，今世先會得到呢個女朋友。

嗰一晚，我送完Hayley返屋企之後，係我一個人返屋企嘅途中，我就即刻忍唔住拆開Hayley寫俾我嘅信。

「給男朋友仔」

男朋友仔：

Hello！咁快就過咗一個月喇，而家睇返自己一個月前做嘅呢個決定，好感恩自己當初冇做錯到。係我哋分開咗嘅呢兩個禮拜，令到我更加清楚自己真係越嚟越愛你，會成日掛住你想痴住你。呢D大概就係愛情嘅感覺？

好多謝你呢一個月以嚟咁錫我咁照顧我，我真係覺得自己好幸福。我好慶幸自己有返到呢一份intern，識到打雜圍爐區嘅一班朋友，識到你，識到一個對自己咁好嘅男朋友。

D人成日話係一段關係入邊，女人係會越嚟越愛，男人就會變得越嚟越hea，唔嗲唔吊咁。你唔會係咁樣㗎呵？你唔會過咗一個月就話頂我唔順㗎嗎？

嚟緊嘅日子仲要拜托你繼續去愛我錫我。我咁論論盡盡，仲有好多野要你睇住我照顧我㗎。呀！仲有，你仲要帶我去日本旅行㗎嗎，所以你唔可以就咁走咗去㗎！

今次係我哋一齊過嘅第一個月，嚟緊我哋仲有好多日子，好多個月會一齊過。希望大家可以一路頂住大家，做對方嘅後盾，做對方嘅另一半，一直係對方嘅身邊陪住大家喇！

多謝你嘅好，多謝你嘅愛。I love you <3

愛你的女朋友仔Hayley上

係地鐵上睇到Hayley嘅呢封信，我真係好感動。一路而嚟我間唔中都會問，到底Hayley有冇越嚟越鍾意我？有冇係我身上搵到愛嘅感覺？今次呢封信幫我一一解答哂所有嘅問題，我亦都唔駛再質疑我哋嘅關係，我哋之間嘅愛。而我亦都好肯定自己真係好愛好愛Hayley，願意為佢奉上一切。雖然而家話要結婚就言之尚早，但至少我哋都仲有好長嘅路會一齊行落去，一齊扶持住對方。