「靚女,妳由台灣嚟?身材唔錯喎。」
「地獄。」
「哈哈,真識搞笑。」
從阿匡眼中,我知道佢係對孟采蘩動心,啟用佢嘅獵物Mode,每次佢想獵食,都會不斷讚人。我稱呢種係「乞求型」。
我唔擔心孟采蘩,佢係一個沒有心嘅女人,一定唔會受阿匡影響。
「咁妳平常鍾意做乜?」
「煲湯啊。」
「哈哈,妳真係識搞笑。無人讚過妳講嘢好笑咩?」
「倒真是沒有,我以前的都是見鬼比較多。」
「哈哈。」
「我是說真。」
「世上邊有鬼,鬼妹就有。身材真係⋯一流。當然,妳係樣貌取勝。」
「我說真,不信我帶你出去看看,土地廟有不少。」
我坐在喺吧枱,佢哋兩個一齊出咗去,唔使一陣就已經聽到阿匡嘅尖叫聲。
忽然感到空虛感,太孤獨之下,隨便飲咗幾啖酒,就請一個合眼緣嘅女生飲酒,然後直落下場。
出門口時,見到孟采蘩,她望望我身邊嘅女生,問:「你走了嗎?」
「妳同阿匡去玩,夜啲再返嚟。」
就係咁,當第二日醒返,頭係撕裂咁痛,嗰個女生一早走咗。
孟采蘩先咁啱返嚟。
「妳玩咗一晚。」
「他帶我去唱K了,人挺好。」
「只係唱K?」
「我又不是你,像一隻野獸一樣。」
「野獸唔好咩。」
「為什麼要這樣?」
「我都唔知道,好似可以填滿一啲自己。」
「我覺得不可能。」
「妳肚餓未?」
「餓死了,所以才回來找你。」
我們落樓打算買早餐時,又見樓下企住嗰個男人,仍然無目的咁望住大廈。
我只係當佢神經病,但孟采蘩又去撩佢。
「咦,又是你。不入去嗎?」
個男人唔想應佢,但孟采蘩問多兩句,佢終於開口。
「你哋新搬嚟?」
「對。」
「係咪凶宅嗰個單位?」
「你又知?」
「當然知,我係殺死佢嘅兇手⋯⋯」