西樓月如鈎
2022-01-06 22:58:17
「少少啦⋯⋯太突然。」
「對唔住。我死嘅時候就係咁⋯⋯我都唔想。」
「你⋯⋯你就係呢間屋嘅鬼?」
「係。都有五年。」
「Tony是一隻好鬼。」佢仍然大快朵頤咁食住薯片,不時舔下手指,滋味萬分。
「咁妳仲唔快啲畀湯佢飲?」我問:「點解一定要等我返嚟?」
「你不是要寫故事嗎?你住凶宅不是為了驅鬼的喔。」佢話。
「妳再同我講都一樣⋯⋯」我話。
其實佢講得啱,我都差啲又唔記得咗,我係要寫故事。
唔寫故事我會失業。
「而且Tony不想喝湯,他有事要你幫忙。」
「幫忙?」
「妳唔可以幫㗎咩?」
「我不熟人間啊,幫不了他。」
唉。
點解每次都咁麻煩。
「咁你想我點幫?」
Tony死嘅時候先二十三歲,年輕有為,一入公司就升到主管,前途無量。
佢正打算同女朋友結婚時,就死喺呢個住所。
「我記得,呢個住宅應該係死咗兩個人,點解得你?」我講完之後,忽然身體發毛,轉身向後,周圍望一望。
應該唔會有另一個人喺我身後掛。
孟采蘩好奇問:「你怎麼了?」
「無⋯⋯睇下係咪喺我身後。」
「白痴喔你。」佢笑住咁話。
「你女朋友呢?」我問。
「人家都殉情了,別問傷心事好嗎?可能已經是夫妻呢。」
「夫妻!?」Tony激動咁講:「佢先唔係我女朋友!」
「不是女朋友?你們不是殉情嗎?」
「唔係⋯⋯佢。」
Tony籌備婚禮時,認識咗一個女仔。
講起點認識,又係奇怪,佢哋係喺街度認識。
嗰個女生暈咗,Tony好心畀佢水同藥油,就咁認識咗。
第二日,嗰個女仔約佢出嚟,話要多謝佢嘅救命之恩。
「妳係點知我手機?」Tony好驚訝咁問。
「呢個年代,上網咩都查到。你嘅IG⋯⋯」
Tony當時無意識啲咩,只當係當佢嘅搜尋能力好,咁都搵到自己。
無估到。
佢係痴線。
佢算係一個幾鍾意講嘢嘅女生,鍾意講嘢嘅意思係,真的一味淨係講自己喜好,一餐飯,佢將所有自己嘅喜好都同晒佢講,包括自己有幾多個親人、屋企住邊度,收入幾多,有咩嚐好等等。
「我好鍾意太宰治。」佢話:「好鍾意好鍾意。」
嗰次聚會後,Tony以為事情告一段落,畢竟自己同對方都無咩嘢。
但之後一而再,再而三,個女仔都邀約咗Tony。
Tony畢竟係人哋未婚夫,而且嗰個女仔好似對自己有意思,所以就此拒絕。
點估到,嗰個女生再次打嚟。
「我要自殺啦。」
一句話,令Tony放下低影婚紗相,趕去見嗰個女仔。
「你嚟啦?」佢一個人企喺天台邊,望住萬家燈火話。
「妳落返嚟先啦!」Tony緊張咁伸出手。
「唔落,除非你應承會見我。」
「好⋯⋯」
嗰次一次後,如果Tony拒絕約會,嗰個女仔就會用自殺嚟威脅自己。
「我想死,你會唔會陪我死?」
直到嗰個女生說出呢句話,讓Tony心裏發寒,下定決心唔再理會佢。
「唔理我唔緊要,最後一次,當是我祝福你哋結婚快樂。」
嗰次見面,Tony上到房間,飲咗啖水,當佢醒返,發現自己已經離開身體,瞓喺床上嘅自己身中十幾刀,同嗰個女仔雙雙死喺房入面。