墨說
2021-10-01 01:46:48
「只希望佢嘅級別仲係我哋處理到,連奎斯都差啲死喺佢手上。」賴桑握住椅柄,眉頭不展:「班病獵仲喺上面挖掘緊,搵佢壓住咗喺邊。」
「咁無咗皇宮落腳,艾匡公主同少佐佢哋喺邊?」瑜小六問其他事情。
「寶翠公園嗰到,好似話進行緊軍訓,你有興趣可以去睇下。」賴桑笑一笑,提醒瑜小六:「同埋艾匡唔再係公主,佢依家係女皇。」
「時間過得真係快……」瑜小六感慨。
替大本營來收集情報的瑜小六,打開攜身帶備的一本記事簿並在上面草草繪畫出,艾寶琳皇宮倒塌的圖畫。
紀錄好後,轉向西面而行,來到寶翠公園外頭。好奇的不單止她一個,周遭市民鄰里全都圍在公園外面,觀看裡頭發生的事。
幸好瑜小六個子夠高,探頭一望便看見內裡情況。
身穿艾寶琳皇家軍服的舊制士兵正站在草地球場上,被反皇派中的叛軍監察著。
群眾對艾寶琳士兵鄙夷不屑,外加球場上幾盞高光燈,直接照射著他們,使得士兵臉上全是不安、焦慮、疲倦,儘管年年月月下已習慣站崗工作,還是敵不過台上講者的疲勞轟炸。
台上的講者,自然是韓湘。
「艾匡女皇善良,唔代表你哋無罪。」韓湘一如既往,對軍人洗腦:「你哋遵循艾康嘅命令,去殘害同國嘅人民,就係與民為敵,今日被批判都係理所當然。」
「我只係唔想死……我只係唔想死……」一名艾寶琳老兵滿是委屈,忍不住說出口:「違反艾康命令係會死嫁!我哋都唔想咁做……」
「將佢帶走。」韓湘不容忍他人插嘴。
「等、等陣呀,去邊呀!?唔好啊!對唔住啊……」那位艾寶琳老兵被強行帶走,某個不知明的地方。
其他艾寶琳士兵見狀,都自動變成啞巴。
「我哋你當中有部份人,當初都係唔願意咁聽從艾康命令,但既然你哋做出咗選擇,就要承擔接下落嚟嘅後果,依個唔係推卸責任嘅藉口。」韓湘望一望台下的少佐,兩人互相點個頭:「我要你哋參與一場戰爭,嚟為自己贖罪。」
一說到戰爭,大家表情都產生訝異。
墨說
2021-10-01 01:47:08
「呢位先生你係點入嚟?」其他反皇派的幹部,對於這位奇怪人士的出現都大感詫異。
貴華不失禮貌地微笑:「世上係無艾幣做唔到嘅事,我係特登嚟參觀下你哋反皇派嘅小基地,唔需要當我存在。」本來叠翠軒橋上擔當守衛的兩名反皇派,正忙著在地上撿錢。
港豬好好打量貴華一番,喃喃自說:「完全符合我理想中內閣首相嘅形象……」
「喂!呢到唔係講玩,請你立即離開呢到!」反皇派幹部都立即趕他離開。
只有港豬一人,恭迎他到來:「你一定係大名鼎鼎嘅貴華先生。」其他反皇派見白月草這麼客氣,都馬上收了聲。
「呢位先生係?」貴華抱拳。
「我叫白月草。」港豬介紹自己。
「白月草先生你嘅名字真係優雅。」
「貴華先生,實不相瞞,其實我留意咗你好耐,不時覺得你係個治國嘅人才,唔知你有冇意,擔當內閣首相呢個職位?」港豬誠意邀請。
「我?真係得咩……」貴華神情一呆,自己都不敢相信:「想問白月草先生你係睇中我邊一點?」
「聽聞……閣下財技十分了得。」
聽見別人讚賞的貴華,不禁沾沾自喜:「呵呵,玩弄艾幣我確實有一手。」
形象上來說,貴華於倖存區內經常行善的舉動,的確為他帶來了良好的聲譽,儘管他揮灑金錢只因空虛與寂寞。
「雖然有啲唐突,但如果貴華先生你願意嘅話,我哋可以立即草擬具法律效力嘅文件,任命你成為第三任艾寶琳皇朝嘅內閣首相。」
「我諗諗下!忽然好讚同你哋反皇派一直以嚟嘅崇高嘅理念!如果你哋真係無任何一個人才及得上我嘅話,我就唯有擔當呢個重要嘅職位。」貴華沉重地說。
「嚟人,即刻拎紙同筆寫返合約!」港豬喊。
反皇派律師旋即根據港豬所說的內容而起稿,一些正正常常的款項如職責範圍,任期只在君主立憲的過渡期間等等,港豬會朗聲閱讀讓律師寫下,順便讓貴華聆聽,直到以下一條款項,港豬刻意把閱讀聲量收至蚊蠅般細:
「本人願意獨自承擔一切前任皇政府留下的債務問題,即使離任後亦無法獲得責任上豁免。」
閱讀和寫上條款後,貴華沒有任何反應,仍在幻想自己擔當內閣首相後的無限風光。
港豬在頭套中揚上嘴角,心中吐出三隻字:「計劃通。」