【幫手推！】幼稚園俾業主玩嘢打壓迫走！學生臨開學先無學返！

192837465 · 2021-08-31T12:02:11+08:00

有啲長，但懇請大家都睇睇同埋幫手推。講返小小背景：我哋學校所在嘅呢一個物業係一個高級、低密度嘅住宅樓下嘅商場一樓全層。業主一直每月收緊超過100萬租金，我哋亦願意做開荒牛捱新場。唔好忘記這個只是一個商場鋪位，還要是極「隔涉」的澳南海岸CAPRI Place。而且除咗幼稚園，我們亦投資咗整個幼兒教育配套，比如係Playgroup同音樂課程。業主租咗俾我哋呢個租客，做教育，但做落佢先知道，原來做學校係有好多物業上需要配合嘅安排，例如返學放學排隊嘅措施、落雨嘅安排、校巴停泊等等。我哋嘅學生朝頭早返學同埋中午放學嘅時候會有好多家長喺門口排隊，但係管理處竟然話如果我哋嘅家長排隊排咗出去行人路，佢哋就會報警話我地阻街。到落雨天嘅時候，我哋拉一個可以移動伸縮嘅簷篷出嚟擋雨、等我哋嘅學生同埋家長唔使淋濕，管理處又話要報警，我哋嘅清潔姐姐為咗趕住收嗰個篷重夾親手。我哋想同業主申請個車位去停泊校巴，佢就話個停車場係唔屬於佢哋嘅（事實真係，但佢哋都無幫手同停車場業主傾）。我哋有申請過係響校門口隔離住宅嗰邊借有瓦遮頭嘅地方嗰度落車，但係業主又唔批准。結果我哋校巴要泊喺學校對出行人路落車之後距離學校都仲有呢200米，一到落雨啲學生就淋濕晒。學校係商場嘅全層，有三個出入口，有一個出入口比較隱蔽我哋想擺一個易拉架出去話俾家長聽喺邊便行樓梯，業主都唔俾。連掉垃圾，業主都話叫我哋掉出去出邊街嗰啲垃圾桶……. 政府部門嘅人係會定期嚟學校牌照要求檢驗場地，有次政府嚟到，要開風櫃檢查通風系統，業主竟然答佢，話商場風櫃唔可以話開就開，就算政府要查，都要早三日書面通知，叫政府部門人員搵日再上嚟，佢哋都話好無奈。去到2019年，我哋曾經請求業主減租，但業主一路無反應；到2020年疫情爆發，我哋再請求業主減租都係唔肯。最有趣嘅係，商場發展商原來一早將業權賣咗畀第二間發展公司，而管理公司又一直「扯貓尾」企喺商場業主一邊。商場要賺錢係無可厚非亦都係正常，但作為租客，尤其係做幼稚園嘅我哋，面對每個月超過100萬租金，面對呢兩年困境，根本好難捱（業主仲想加租）。而事實係，商場一直都係死場，直至隔離個屋苑租咗俾Donki，商場就一直就想踢幼稚園走，過橋抽板，仲不時恐嚇報警話，要趕走接返學放學嘅家長，根本就係玩到我哋無辦法運作，嚇親家長嚇親小朋友。我哋無辦法，真係頂唔到落去、畀佢地搞到無辦法運作，只可以宣佈停運。喺呢個時代，我哋只係想盡香港人嘅責任，無論幾艱難都想做好小朋友教育，同埋支持一班老師嘅生計，我哋只係想求公道，但業主真係想迫死我哋。多謝你睇到呢度，我哋只係求大家將呢件事推開去，將商場迫走幼稚園呢個惡行推開去，唔好再幫襯呢個商場。