「外賣到！」Jimmy喊道，和另外兩位男同事分別捧着Pizza、意粉和壽司等美食走到公司中央的大長方桌前放下，Candy和其他女同事則負責幫忙鋪枱，然後一起把食物從膠袋拿出來。
「James，食得野啦喂。」Jimmy走到James身旁說道。
「執埋啲圖先。」James目不轉睛地看着電腦屏幕說。
「邊有咁快執完呀，黎食咗先啦，一陣凍晒啦。」
「得啦，等我執埋依到先。」
「一陣食晒唔好怪我地呀吓。」
「你幫我留啲囉。」
「你食咩呀？」Jimmy無奈道。
「無所謂啦。」James的雙眼依然盯着屏幕的圖說。
「你話架下。」
回到長方桌前，Jimmy拿了個膠兜，把千島醬海鮮Pizza，芝士肉醬意粉和雞翼等，通通都夾了點進去，然後放在一旁，再拿了另一個膠兜。
「你攞咁多個兜做咩？」一位同事問道。
「嗰兜係留比James架。」
「佢唔自己黎食？」
「話執埋啲圖先喎。」
聽到這句，Candy拿起那膠兜，把Pizza、意粉等都夾回原處。
「喂，我啱啱先夾好，你做咩又夾返番去？」Jimmy伸手想要阻止Candy。
「佢唔食芝士架。」Candy說。
「吓，係咩，咁留啲壽司比佢囉。」Jimmy提議道。
「佢都唔食壽司。」Candy拒絕道。
「咁醃尖？咁唔洗食啦。」Jimmy說道。
「食白汁雞皇飯囉，加啲雞翼、薯條，夠佢食啦。」Candy連忙替James把飯盛到膠兜裏，又替他留了罐可樂，小聲說道：「最緊要有可樂。」
「哇，Candy姐人地鍾意食咩，唔鍾意食咩，你又會知得清楚嘅。」一位同事調侃道。
「咁平時一齊食野，知道少少好正常姐。」
「咁我呢？記唔記得有咩我係唔食架呀？」Jimmy問道。
「五花腩囉，叫親過橋米線都夾晒比我。」Candy理所當然道。
「哈哈！乜你唔食五花腩架咩？」老闆Kenny聽到後，笑得合不攏嘴，續說：「佢見你鍾意食五花腩先夾晒比你咋，傻妹。」
「喂！」Jimmy連忙叫住Kenny，深怕他會說出更多不應說的話，然後才開估道：「我唔食嘅係芽菜囉，明明次次同你去食我都走芽菜，咁都留意唔到，唉，我真係好失望囉。」
這時候，James剛好走了過來，問道：「我個兜呢？」
「依到，以為你仲有挑做，幫你留咗啲飯。」Candy殷勤地把兜和餐具遞到James手上。
「唔該你。」James說。
這時候，Candy感到有點口汗，便打開了一罐還在冒水珠的罐裝可樂。而當她放到口邊準備喝時，卻被James搶了過去，一口氣喝了三分一，滿足地呼出了一口氣，說：「正呀。」
「喂，你嗰罐我明明幫你留咗係嗰到，依罐係我架。」Candy無奈地說道。
「唔好意思喎，兩罐都係我嘅。你飲蘑菇湯啦。」
「吓，點解呀？明明一人一罐。」
「係囉，你做咩蝦Candy。」Jimmy替Candy抱不平道。
「廢事你聽日返唔到工，我又要做埋你嗰份。」James拿了一條薯條放進口說。
「我點解返唔到工？」
「哈，好話啦，唔知上次邊個話M痛返唔到工呢？好心你忍下口啦，一陣又痛死你。」
原來係擔心我M痛，估唔到你記得我黎緊M，Candy心想，心裏甜得臉也不自覺露出了笑意，卻還故作冷淡道：「喔。」
而這一切，都被老闆Kenny看進眼裏。
------------------
請繼續推文正評以換取更多文
鬼叫我哋窮要為五斗米折腰咩
