https://youtu.be/PqBmDfLTJ54
第七章(5)
「嗯,好香蛋味。」James說,拿起籃內的刀叉遞到Jessie面前,Jessie卻沒有接過。
「做咩?」James問道。
Jessie沒有作聲,只默默低着頭,一時之間不知從何說起。
「喔,我知啦,你肯定想我幫你切埋,懶呀你,咁懶,因住愈黎愈肥。」James雖然這樣說,卻還是動手替Jessie切起來,然後沾上藍莓與芝士醬,遞到Jessie嘴邊,張開口,說:「呀,食呀,係你最鍾意食嘅芝士。」
這次Jessie竟罕有地沒有被眼前的食物所吸引,盯着James的臉良久,才吐出一句:「你同Candy好熟架?咁多對話內容嘅。」
「一般啦,咪普通同事咁。食咗先啦,手軟啦。」James的手仍懸在半空。
普通同事,咁點解上次見到我咁閃縮?Jessie心想,開始把所有與Candy相關的畫面拼湊起來。
「真係?」Jessie追問道,還是沒有吃James手上的pancake。
「嗯!」
「咁你地平時會傾啲咩?」
「咪工作上嘅野,再講下啲無聊野囉。佢成日都講啲無聊野。」
你真係覺得無聊?Jessie心想。
「例如呢?」
「話明係無聊野點會記得架,快啲食咗Pancake先再講啦,一陣就漏晒氣。」
看着James誠懇的眼神,Jessie並非不相信James,只是內心的不安感無法放過自己。
「無聊都有內容架,例如呢?」Jessie一邊吃一邊問道。
「例如?⋯⋯例如⋯⋯」James想了一會,續說:「講吓佢啲仔有幾靚仔,佢放假食咗啲咩咁囉,總之就好無聊,你唔會想知。況且,你啱啱都睇晒啦,咪嗰啲囉。」
就係因為我睇晒,先更加要問你,Jessie心想。
「咁你點應佢?」
「都係嗰啲。」
每當問及James工作上的事,James都會這樣回答她,沒想到到這時候,還是離不開這些陳腔濫調的話。
「姐係咩?」Jessie追問道。
「咪你見到嗰啲無聊野,佢份人真係好無聊架呢。」
明明我地啲對話都無咩特別,點解你仲係要係咁問?James心想,把沾了奶茶醬的pancake放進口裏,味道卻因為Jessie的再三追問而大打折扣。
「姐係咩無聊野?」
James苦惱了片刻,回答道:「咪應下佢『乜係咩』,叫佢『早啲訓,第二日要返工呀』咁囉。」
「無啦?」
「你仲想有咩?」James語氣平淡地問道。
「你仲同佢講你宵夜食咗啲咩,飲咗啲咩,係屋企見到曱甴⋯⋯」
「嗯,咪啲無聊野囉。」James理所當然地說道,還是未能明白Jessie繼續追問下去的原因。
「你真係覺得係無聊野?」Jessie終於忍不住說出了心底的疑問。
「係呀,好無聊喎。」
於是,Jessie沒有再問下去,默默吃着自己的Pancake,臉上卻寫滿了她的不愉快。
「你做咩唔開心?」
「無呀。」Jessie口是心非道。
「你明明就有。」
「唔係呀,只係⋯⋯無特別開心。」
「我同佢都無野,唔好嬲啦。」James拉着Jessie的手臂哄道。
「我唔係話你地有野,但點解你要同佢講咁多無聊野?」
「無聊野咋喎,咁都係同事之間講兩句姐。」
「咁但嗰啲野你都無同我講。」
「咁嗰啲都唔重要。」James無辜又無奈地說道。
Jessie竟無法反駁。
「咁點解你要同佢講依啲無聊野,唔同其他人講,唔同Jimmy講,唔同K哥又或者Lemon講呀?」
「咁人地都唔會想知。」
「咁姐係Candy會想知?咁點解Candy會想知呀?」
「咁佢份人無聊呀嘛。」James仍舊無奈地回答道。
「佢真係因為無聊?咁點解佢唔去問Jimmy係要問你?點解佢又要同你分享咁多佢嘅日常?」Jessie問道,因為她清楚知道一個女人不會無緣無故地與一個男人分享自己的生活大小事。
「咁平時主要都係我教佢野呀嘛。」
「但佢講嘅好多都同公事無關。」
「咁你覺得係點?」
「我⋯⋯」Jessie不想懷疑James,她更願意讓James說服自己,但很明顯,他做不到。
「算啦,無野啦。」
於是,Jessie選擇了沉默,而James也沒有追問。
不是因為他不夠了解她,不知道她的沒事即是有事,而是他根本看不到Jessie看到的問題。
像是背對背而站,我不斷描述眼前的風景,而你始終不會明白,而我也終究無法明白你看到的原來不是一片風景,而是早被壓得支零破碎的頹桓敗瓦的世界。