測試玻璃貼報告出嚟喇!!!(終於找數)
今次訂嘅係
PDA工房9H硬度專用玻璃貼﹐考慮過熱脹冷縮問題(暴龍機畫面直徑係26mm)﹐怕太貼個膠邊會綻住暴龍機主體﹐同抹唔到塵(我買電話貼都唔買全包﹐我有少少潔癖)﹐所以買咗25mm尺寸。大家可以照買26mm。
貼mon貼嘅步驟:
1. 清理灰塵:暴龍機嘅膠面非常容易花﹐連塵粒都足以留低細痕﹐所以我用完全唔用力嘅方法交替用
シルコット(無酒精)溼紙巾吸附比較厚嘅灰塵同
Nepia鼻セレブ柔軟面紙去印乾。同好多軟布/羊毛一樣﹐柔軟嘅抹布/紙會甩少少毛屑出嚟﹐最後就用手工膠紙反覆黏走。
千祈唔好用眼鏡布/tempo紙巾抹!
2. 去除內貼:包裝袋入面得圓形貼同說明書﹐要留意內貼要撕走圓形薄膜掉走﹐如果搣走「吸著面保護用」嘅黃色膠紙都起唔到塊膜﹐可以用手工膠紙黏緊塊膜﹐再夾住玻璃貼兩側輕輕揭起塊膜。塊膜質感似膠mon貼﹐應該唔會掉錯。
3. 貼落mon:暴龍機嘅mon受唔起沖擊﹐包括玻璃貼嘅邊位﹐所以落貼嘅時候要平行落﹐對準中心位置貼落去(我用畫面四邊角做reference)。貼好後就可以盡情用任何嘢推出啲空氣泡泡﹐始終真係9H硬度﹐唔會問題。跟住就撕走面頭層膜。
後記:
唔一定要用我用嘅牌子溼紙巾/軟面紙﹐不過濕嘅紙巾要唔含酒精;軟面紙可以用抹
舊世代液晶熒幕專用嘅布或等個mon乾用膠紙黏走殘留物﹐都完全冇問題﹐因為個目的係要吸走水份唔刮到mon。
如果係黐mon貼老手﹐2同3我相信你哋會有更好嘅方法去做﹐希望大家會鍾意今次分享!