多謝你地等我,今晚出長啲~~
---------------
第二章(6)
面對滿桌美食,Miss Lam完全沒有碰過,全副心思都在斜對角,偷食的男朋友身上。
與此同時,阿祖的口沒有停過,但只要看到Miss Lam水汪汪的雙眼,就有種不舒服的感覺。
終於,甜品都吃過了,Miss Lam的男朋友和那火辣的偷情對象站了起來,準備離開。雖然二人在席間的舉動與一般情侶無異,可當離開時,卻連彼此的手都碰一下,走的時間還保持少許距離。
Miss Lam連忙把餐牌豎起,把整個頭埋在裏面,低着頭默念:你睇我唔到,你睇我唔到,你睇我唔到⋯⋯
當她緊張得手心開始發熱,幾乎要開始冒汗之際,阿祖說:「唔洗匿啦,走咗啦。」
Miss Lam還未全然放下戒心,用餐牌擋着半張臉,雙眼四處張望,確定他走了,她才放下餐牌,整個人攤坐在椅子上。
「我都食完啦,可以準備走,叫個Waiter黎埋單先。唔該!」阿祖把侍應喚了過來。
「係嘅,有咩幫到你呢?先生。」
「我想埋⋯⋯」阿祖還未說完,便被Miss Lam打斷了。
「要枝最烈嘅酒。」Miss Lam說,眼神沒有焦點,呆呆地盯着桌上空空如也的甜品碗。
「你會唔會有邊隻酒特別想飲?例如你想飲烈啲嘅米酒定Whisky?」
「都要。」
「咁我幫你落山崎嘅Whisky同佐賀吟釀,多謝晒。」說罷,侍應收去了甜品碗便走了。
阿祖看了看餐牌,普通一杯米酒都要百多元,心想:要飲幾多錢先飲到醉?
「Miss係唔同啲嘅,失戀都失得豪邁過人,飲杯酒都成百幾蚊。」阿祖翻看着餐牌說。
「邊個話我失戀?我地都未分手。」
「哇,Miss諗野咁前衛架咩,你接受到佢飲完冬蔭功,再返黎飲你依碗味噌呀?好抵得諗喎Miss。」
Miss Lam沒有說話,繼續默視着前方。
她能接受到嗎?當然不可能。然而,要她分手,也不可能,因為她知道那滋味有多可怕。
這時候,侍應捧着餐盤來了,餐盤上放了兩杯小小的酒杯,他把它們放到桌上,說:「你點嘅Whisky同米酒。」
侍應剛轉身,Miss Lam便一下子把整杯Whisky都灌了進肚。份量雖不多,可高濃度造成的那種灼熱的感覺卻久久都揮之不去,在她的嘴巴、喉嚨、食道、胃一點一點地蔓延開去。
她平日也會喝點酒,可頂多都是十多度的紅酒,甚少喝這樣高度數的酒精,因為她覺得味道像消毒酒精,刺鼻得很。
可這夜,她剛巧需要這刺鼻灼熱的感覺,好讓她分神,暫時忘卻久違的心痛。
看到Miss Lam喝酒,阿祖突然也想喝,竟拿起桌上的米酒,喝了一小口,說:「好飲咩?」
平日的阿祖大多都是喝啤酒,濃度不過幾percent,根本無法與這味道相比。
「喂,你未夠歲唔可以飲酒架同學。」Miss Lam奪過酒杯,頭往上抬,猛地把整整一杯梅酒都灌下去。
接着,Miss Lam又點了些燒酒,甚至是啤酒,因為她知道喝的種類愈多,她便能愈快醉。
只要她醉,就能像敷了麻藥一樣,暫時忘卻那種心痛的感覺。
一口一杯,一杯接着一杯,很快,Miss Lam的意識開始散渙,掛在眼眶的淚水失去控制,簌簌而下,滴在黑色的短T上格外顯眼。
「喂,唔好再飲啦。」阿祖忍不住伸手制止Miss Lam。
「如果可以,我都想我以後都可以唔洗再飲酒。」Miss Lam推開阿祖的手,又一口氣灌了半瓶燒酒。
「失戀姐,有幾閒呀,洗咪咁傷心?」看到這樣失控的Miss Lam,他沒有再把他看作Miss,而是一個為了出軌的男朋友而失去理智的普通女生。
「依啲野有得控制架咩?傷心就係傷心架啦,算啦,講你都唔會明。」
確實,阿祖沒失過戀,只有害人失戀的經驗。
「搵過第二個咪得囉。」阿祖埋所當然地說。
「我唔想要第二個,我淨係想要佢,但,佢偏偏唔淨係想要我。」Miss Lam苦笑道。
預防針?阿祖心想。
「你咁想挽回佢,咁你有無諗過點解佢會偷食呀?」
「新鮮感掛,都一齊咗咁多年。」
「咁你有無諗過點為依段感情保鮮?」
「佢成日都話忙,我點保鮮?都要仲鮮先有得保架。」
「咪係囉,都唔鮮,臭咗啦,你仲要黎做咩?過咗期、壞咗嘅野食你會dum咗佢,點解壞咗嘅人你仲要攬住唔放?」
看似理性的說話,不過是因為阿祖不曾牽掛過任何人,所以她無法理解像Miss Lam這類癡心一片的人。
在他心裏,這不僅是傻,簡直是笨。
「可能因為佢係芝士掛。」Miss Lam微笑道。
自從開始有幾分醉意,平日面無表情的Miss Lam臉上總掛着笑容,笑起來傻氣十足。
芝士?有咩關係?阿祖心想。
「芝士不嬲都係愈臭愈香架啦,男人都係架,男人不壞,女人不愛,原來依句係真嘅,哈!」Miss Lam冷笑道。
確實,聽似難以理解,可實事上,偏偏愈是壞掉的男人,卻愈叫人難以忘懷。
「女人都係架,就好似你去食自助餐,有啲餸擺到滿一滿係個兜到,一大兜係你面前,你又未必會夾黎食,但偏偏嗰啲個兜無乜剩嘅,你又會連餸尾都夾黎試試,仲有限時供應嗰啲,每次都排晒長龍。」
「姐係點?」Miss Lam變得笨重的腦袋無法思考。
「姐係你唔可以咁易比佢得到呀,男人不壞。女人不愛,女人咪又一樣,係要有人追下你,有人同佢爭佢先知死。」
一直以來都並非沒有人追過Miss Lam,只是她那冷淡的性格,總讓男人覺得自己沒有機會,也就懶得自討沒趣。
「仲有,愈濃味嘅往往都愈多人鍾意食,你估真係個個識欣賞咩上湯瑤柱娃娃菜咩?」
阿祖說的話好像都很有道理,可想深一層,Miss Lam又不知道他在說甚麼,脆乾說:「你講到咁勁,你教我啦。」
「我教人溝仔要收學費架喎。」
「你想點收法呀?」一邊聊天,Miss Lam就一邊喝酒,喝着喝着,眼神又迷蒙了點。
「我想⋯⋯」阿祖靠近Miss Lam,在她耳邊小聲地說:「肉償。」
「郁箱?咩箱?」Miss Lam的眼皮都快要合上,皺起眉頭瞇起眼睛問道。
「咩郁箱,我係話肉⋯⋯」阿祖準備在她耳邊強調一遍時,不勝酒力的Miss Lam突然一下子扒了在桌上。
「喂,唔好訓着呀你,我抬唔郁你架大佬,喂!」阿祖不斷拍Miss Lam的膊頭也沒反應。
仆街啦今次,唔係要送佢返去呀嘛?阿祖心想。
----------------
之後會發生咩事呢?
想聽日有文睇就要留言+正評啦,咁我先有動力捱眼訓打文
早抖啦
IG:
https://www.instagram.com/jessie_lannn/