《十七歲嗰年，我做咗Miss隻兵》

想食嘢了

好睇

因為Jessie 嗜辣

有些事還是不要說破

第六章 （6）

「咦，你都食三文治呀。」Leung Sir說，手上正拿着夾了蕃茄、生菜、火腿和雞蛋的雜匯三文治問道。

「係呀，今朝起得切身咪整囉。」Miss Lam呷了一口豆漿說。

「你個三文治咁特別嘅，中間綠色嘅係咩黎架？」Leung Sir盯着Miss Lam手上的三文治問道。

「牛油果囉，我仲加咗少少蛋碎同沙律醬係裏面添。」

「牛油果？我未試過喎，我嗰個都係今朝親手整，好足料架，不如交換半份試下呀。」

「可以呀。呀！差啲唔記得，你今日有無帶飯盒？」Miss Lam問道。

呃⋯⋯你咁問係想我答有定無呢？Leung Sir心想，猶豫了幾秒才說：「無呀，做咩？」

「咁就啱啦，我整多咗個飯盒，諗住順便多謝你上次幫我，我擺咗係Pantry左邊個雪櫃，面頭貼住張寫咗我名嘅Memo，你叮返熱就食得架啦。」

「哇，咁好！但其實我嗰日都只係順便，你唔洗咁客氣喎。」Leung Sir按捺着內心的歡喜，客套地說。

「我都係順便整多份姐，你唔好覺得難食就真。話時話，你個三文治好好食，由其係塊方包，又厚又鬆軟，你邊到買架？」

「真係架？我自己整架。」Leung Sir沾沾自喜道。

「哇，好犀利呀你，點整架你？咁鬆⋯⋯」Miss Lam未說完，Leung Sir竟打斷她，說：「你琴晚唔係已經為咗份筆記做到好夜啦咩，做咩你呀頭塊面咁窿嘅。」

Miss Lam順着Leung Sir的目光看過去，發現Miss Chan正朝自己的座位走來。

「Miss Lam呀，你記得今日要睇堂呀可？」Miss Chan問道。

Miss Lam連忙咽下口中的雜匯三文治，惶惑地問道：「呃⋯⋯唔係後日咩？」

「後日我同你都有堂，我無可能約你後日架喎，應該係今日先啱。」

「但⋯⋯你琴日真係講大後日⋯⋯」Miss Lam為難地說。

「姐係你今日未Ready？咁就弊啦，今朝咁啱撞到校長，佢話想睇下新老師堂，我仲話好添。」

吓，咁點算？Miss Lam心想，一時不知作何回應，只繼續為難地看着Miss Chan。

「咁唯有再約過啦。」Miss Chan沒想過Leung Sir會搭嘴，但經驗老到的她還是很快反應過來，說：「其實我真係無所謂，再下星期，又或者下個月先睇我都OK，但校長唔係呀嘛，佢咁忙，都唔知佢仲有邊日得閒，佢仲要講明新老師要睇兩次堂喎，Miss Lam你今日真係唔得呀？其實好似平時咁就得架啦，唔洗準備啲咩特別野架喎。」

Miss Lam微笑，腦子還在糾結。

這時Miss Chan又補刀，說：「我驚影響你下年續約咋，有睇好過無睇過呀嘛。」

「但如⋯⋯」Leung Sir想替Miss Lam說話，Miss Lam卻說：「好呀，我一陣去準備下。」

「咁就太好啦，唔該晒你呀Miss Lam。」Miss Chan說，微笑得雙眼快要合成一條縫。

待Miss Chan身影遠去，Leung Sir才說：「佢咁賤，你做咩應承佢？」

「閻王要你三更死，不得留人到五更，我有得揀咩？」Miss Lam無奈地說，把三文治狼吞虎咽進肚子後，便從書架拿起教科書趕往課室準備。


「起立。」Miss Lam站在教師桌前叫道。

平日的Miss Lam不大喜歡擺老師架子，所以很少要學生起立，加上這是早上第一節課，學生還未清醒，學生的動作極度遲緩，讓Miss Lam本來已很是緊張的心情更雪上加霜。

終於，同學都起立了，Miss Lam續說：「今日有Miss Chan同校長黎同我地一齊上堂，大家同校長同Miss Chan打招呼先。」

「Miss Chan早晨。」只有零星的敬禮聲，讓Miss Lam很是尷尬。

「各位同學早晨。」Miss Chan說道，臉上仍掛着那抹微笑。

「校長早晨。」敬禮聲一樣微弱，若只聽聲音，大概會以為課室只有三，兩個學生。

Miss Lam沒想到學生對校長的禮貌不僅沒有改善，反更是冷淡，教她更是不安。

「各位同學早晨。」校長說，微笑時幾乎要擠爆臉頰的肥肉。

「Miss Lam早晨。」然而，當對Miss Lam打招咪時，由於有了阿祖和肥仔文的聲音，頓時響亮不少，與方才形成強烈對比，也不知是好事還是壞事。

「各位同學早晨，坐低，拎你上一堂嘅筆記出黎。上一次我叫咗你地返去做筆記第6頁嘅填充。」

「有無人未做？未做嘅企起身。」Miss Lam其實很想這樣說，但她知道班上會做功課的人才是小數，若她真這樣說，大概大半班都需站起來，場面定很難看，便把說話換成了：「我依家比5分鐘時間你地同隔離位互相檢查大家嘅答案，如果有唔識或者答案唔一樣嘅，都可以趁依5分鐘時間討論下，一齊搵個正確答案出黎。」說罷，她按響了掛在黑板的計時器。
接着，校長從後排的座位站了起來，到處巡視學生的筆記，邊看邊搖頭。
「咇咇咇！」五分鐘過去，計時器響起。

「好啦，時間夠，好，第一條橫線應該填咩？」

「香港嘅政治制度應該係三權分立。」學霸子傑說。

「無錯⋯⋯」看着手上教師版的筆記，竟與自己本來製作的有所不同，竟由「三權分立」變成了「行政主導」，本來的「公民抗命」、「雨傘革命」、「反修例事件」都通通被刪去。

點解會咁嘅？Miss Lam驚訝，抬頭看着Miss Chan，她卻頭也不抬地看着手上的觀課評分紙。

她好像突然明白校長為甚麼堅持要這天來觀課了，不是因為Miss Chan的推波助瀾，而是故意要殺她一個措手不及，因為他們要看清楚她是教師還是教畜。

明明三權分立才正確，難道要身為教師的她睜着眼睛說謊嗎？其身不正，又何以教學生做個誠實正直的人？

然而，一子錯滿盤皆落索，只要她說錯一句話，就可以馬上被釘牌，每個月唐三樓的租金、兩老的家用、已付了多年錢的保險、買樓的計劃⋯⋯通通都要泡湯。

理想有價，只是她沒想到是這麼沉重。

當Miss Lam正掙扎時，目光剛好對上校長嚴厲的眼神。
--------------------------
如果你係Miss Lam會點？
正評＝答學生係三權分立先啱
負評＝答學生係行政主導先啱
P.S投票僅供參考
IG：https://www.instagram.com/jessie_lannn/

打到咁夜，我都想食野

阿祖可以失敗
但Leung sir得米我會反枱罷睇

唔quote文喇
樓豬擺明呃正皮啫





利申: 皮已正

lm

嘩玩咁大
利申己正皮

有啲難接落去
樓主加油

一諗到呢個係未來有機會出現嘅畫面就覺得好悲哀

突然好現實

新加入here

之前睇過hku+ive仔果篇 依家追番上黎啦

嘩 呢一篇文 好正 miss lam呢次難搞啦 本身以為呀祖會英雄救美 答哂啲問題添

係，所以大家嘅答案僅供參考，唔係接唔到落去

留意返阿祖係因為咩事比人逐出家門，佢點會幫Miss Lam

咁做兵就盲目咖啦 miss都有收留我既

第六章 （7）
當Miss Lam正掙扎時，目光剛好對上校長嚴厲的眼神，在等待她作出抉擇。

Miss Lam環視了整個課室一圈，看着平日都只會伏在桌上睡覺的學生，今天竟都坐直了身子，有的還炯炯有神地看着自己，尤其是那幾位少數勤力讀書的同學，正手執原子筆等待她的答案。

她始終無法違背自己的良心。

「答案應該係⋯⋯」

然而，當Miss Lam快要說出答案時，班上一位內地來的學生卻打斷了她，說：「唔係喎，前幾日電視先講完，係行政主導先啱喎Miss。」

這句話再一次打亂了Miss Lam的思緒，像是在水中浮沉多時好不容易抓緊的一塊浮板。她深呼吸了一口氣，說：「無錯，答案應該係行政主導先啱，如果有同學寫錯咗嘅記得改返個正確答案上去。」

「Miss，點寫呀？」Amy邊舉手邊問道。

Miss Lam頹然走到黑板前，拿起一根白色的粉筆，閉眼搖搖頭，還是開始寫那四個大字。

Miss Lam的手一邊寫，一邊有一種說不出的噁心與厭惡感從心底蔓延，蔓延到肺部、喉嚨、口腔——原來自己與電視上那些睜眼說空話的高官沒甚麼分別，原來她在不知不覺間已成了他們的一份子，成了個為了三萬多元月薪可以把課室僅餘的星火都淹埋的教畜。

是非黑白，在那四個白色字被寫出來的一刻瞬間顛倒。

「唔係喎Miss，我小學都係讀三權分立架喎。」阿祖看着黑板的字說。

聽到這句，Miss Lam寫字的手停了下來。

「咩呀，明明行政主導先啱。」剛才那一位同學堅持說道。

「我都記得小學學嘅明明係三權分立。」聽到阿祖的話，學霸子傑也和應道。

唉，我究竟要點答佢地先啱，Miss Lam猶豫、糾結，過了良久，久到班上同學都開始議論紛紛，她才轉過身，面向學生說：「係，三權係分立，不過由行政主導。」

「咁講都得？你肯定？」阿祖瞪大雙眼看着Miss Lam。

「算吧啦，你唔係以為Miss Lam睇落後稍為後生少少，就同其他老師有咩唔同呀嘛？哈，佢咪又同其他老師一樣，為咗份糧攣大眼講大話。」陳珊珊轉着手上的筆說。

經過上次那件事，陳珊珊被她的姑姐Miss Chan訓斥了一番，自那次起，她便收斂了不少。事實上，她連三權分立是甚麼都不大記得，但當聽到阿祖和子傑都在反駁Miss Lam，她還是忍不住往裏添鹽加醋。

這句話讓Miss Lam本來已內疚的心更是往下墜，使她無法再繼續掩埋良心。

「既然大家對依個答案有唔同嘅睇法，咁不如俾份功課大家，大家今晚返去就住香港嘅政治制度做下資料搜集，然後將相關資料Upload上Google-classroom，我地下堂再討論呀。依家我地填住下題嘅答案先？子傑，下一題你寫咗啲咩呀？」Miss Lam看着子傑問道。

「喔，下一題係⋯⋯」

就這樣，Miss Lam草草帶過了那題的答案，課堂得以順利進行。只是Miss Lam沒留意到，所謂的順利只是對她而言，阿祖卻再沒拿起筆寫過一個字。


午飯時間，同學都紛紛離開課室，只剩阿祖還坐在座位上。

「喂，你唔出去食野呀？」肥仔文走到阿祖身邊問道。

「唔啦，你去啦。」阿祖從書包拿出一個保溫飯盒和一對餐具。

「哇，你帶飯呀？我有無睇錯，咁多年都未見過你帶飯喎。」肥仔文驚訝地問道，看到阿祖打開飯盒，一陣香辣的味道撲鼻而來，更教他羨慕，說：「哇，好似好吸引喎。」

「羨慕呀？」阿祖得戚地說。

「估唔到Miss Lam咁識煮野食。」

「我都無諗過⋯⋯咪住，你啱啱講咩話？」阿祖瞪着肥仔文問道。

「我話估唔到Miss Lam咁識煮野食囉，整舊黎食呀。」肥仔文咽了一下口水，雙眼直勾勾地盯着飯盒裏的雞肉不放。

「你點知依個飯盒係Miss Lam煮架？」阿祖驚訝地問道。

「唔知架，我段估架咋，見你咁嘅反應，姐係我撞啱啦。唉，死啦，咁我咪要比晒啲Game你？但⋯⋯」

肥仔文苦惱，卻不知現在的阿祖感興趣的已不再是他手上的遊戲。阿祖打斷肥仔文道：「齋靠估？你有無咁醒呀？」

「喂，你咁咩意思，質疑我智商咁話啦喎。」肥仔文不滿地說。

「講．真．話，唔係嘅我一陣就去你屋企掃晒你啲Game。」

「咪呀，呀媽話我再同你有來往就斬開我一碌碌架，我都係瞞住我媽架咋。」

看着眼前的媽寶，阿祖反了個白眼，說：「咁你講啦！」

「車，係Yuki姐前幾日走黎問我，話：『點解阿祖日日都同Miss Lam同一架車返黎』，我咪估你同Miss Lam住埋咗一陣，咁你又唔識煮餸，個飯盒好自然就係Miss Lam整架啦，係咪呀？咁都要⋯⋯」

聽到Yuki的名字，阿祖再一次打斷肥仔文的話，着急地問道：「咁你點答佢？」
---------------------
肥仔文究竟係咪豬隊友
btw臨近聖誕真係好想開後續故，好想求其寫埋依個故嘅尾就算（我都係講下，唔會爛尾的放心）

Miss lam幾時開私房菜 夜晚睇到好餓

依家有良心咁教書真係好難班「好心」嘅家長瘋狂投訴不過唔只教書，依家連送個外賣帶個口罩都比人投訴真係好諷刺

唉，依家係咪都投訴架啦，但求問心無愧啦
咁快手要唔要加更

我又好想食格格脆