《只有做愛的時候我才聽得見聲音》

樓主多數4點左右先有文

翌日，Alex叫何管家打電話，俾之前一路睇開嘅嗰位相熟醫生。

佢想揾醫生重新檢查多一次耳仔，睇下耳仔嘅情況係咪比之前有所好轉。

而個醫生話自己去左英國參加醫學研討會，要等一個星期後先返嚟香港，到時返到嚟就會通知佢地。

何管家休息左一個月後，隻腳已經好返曬，終於可以復工，咁晴晴亦可以功成身退。

「晴晴，你過一過嚟呀，你啲糧我差唔多計好啦。」何管家坐喺客廳，揸住計數機，計算晴晴喺度做左一個月工人嘅人工。

「計好啦？有幾多呀？」晴晴喺廚房洗緊碗，一知話出糧，就馬上放低碗碟，行過去客廳。

「根據合同，你每日日薪就係一千四百五十蚊，咁你喺度做左二十八日，乘埋一齊就總共係40656蚊。」何管家計完話。

「俾我計下。」晴晴拎過計數機，自己計一次，計出相同嘅結果：「嗯，係呢個數啦，咁我呢個月啲額外洗費係咪都一齊報銷埋呀？」

「係呀，你拎啲單出嚟，我計埋俾你。」

「好呀，你等等。」

晴晴返上房，拎左一沓約莫一吋厚嘅收據。

何管家逐張檢視：「呢張係你自己買m巾嘅錢，咁都拎嚟報銷？」

「係呀，有次同Alex行超市順便買架嘛，你又話我同Alex一齊喺外面所花費嘅錢都可以報銷嘅？」

「但呢樣嘢…我諗唔得喎…」

「得嘅，Alex佢都話無問題。」

「少爺話無問題？」何管家半信半疑，「都係揾埋少爺過嚟一齊對。」

經過上次俾晴晴呃過話Alex同意帶隻貓返屋企後，何管家學精左，無咁容易上當，所以佢都係揾埋Alex嚟問清楚穩陣啲。

Alex跟住落埋嚟客廳，一齊檢視晴晴啲單據。

「唔得，m巾點啲私人嘢點幫你報銷？」Alex打字同晴晴講。

「唓~」晴晴扁嘴，感到失望，並問：「咁其他呢？其他有無問題？」

Alex細心翻看，除左類似m巾、脫毛膏呢類私人嘢外，其他開支佢都批准報銷。

當中佢發現有兩三張單係買止痛丸嘅收據，問晴晴：「見你有買止痛丸，乜你個肚仲痛咩？」

「一時時啦。」

「如果仲係痛就唔好死頂，去睇下醫生好啲。」Alex提醒話。

「知啦，我會架啦。」晴晴回覆完，心急咁問計緊數嘅何管家，計好個總數未。

「計好啦，人工加報銷嘅錢加埋一共70050蚊。」何管家報出總數。

晴晴又自己計一次，對下個數啱唔啱。

「哈，啱數呀，係70050蚊。」

「拿，呢度係十六萬零五十，呢個數計埋你今個月做『合約伴侶』嘅錢。」何管家劃一張支票俾對方。

「哈哈，多謝！」晴晴一臉開心咁，接過呢張十六萬嘅支票，「咁我要幾時搬走呀？」

「我諗呢兩日之內啦。」

「何管家，你話我如果繼續喺度住，得唔得呀拿？」晴晴問。

「呢個你就要睇下少爺俾唔俾啦？」何管家答話。

晴晴打字問Alex，對方答話：「得嘅，每個月收返八千蚊租金，制唔制？」

「啊？咁算啦，咁我都係返黃大仙。」

第二朝早，晴晴收拾行李搬出清水灣，返到黃大仙嘅劏房住所。

住左一個月大屋，返嚟呢間地方不足二百呎嘅劏房，一時時間係會有啲唔慣，但都無辦法啦，佢本來就唔屬於清水灣嗰啲高級地方，就算住到多兩三個月都住唔到一世。

點都好，話曬都叫做免費住過一個月海景獨立屋，都算係執到架啦。

唔洗再做工人，晴晴就返去女僕咖啡，做返全職侍應。

另一邊廂，屋企少左一個人，Alex其實都有啲唔慣。

平時三個人食早餐，家下唔慣側跟個位無人，亦唔慣無得食晴晴煮嘅飯餸，
不過佢諗呢啲唔慣都係暫時性，無左晴晴喺隔離煩住，樂得清靜，理應係好事。

晴晴做真女僕時，每日對住豆豆、Alex同何管家，家下返到café做「女僕」，佢又要日日對住個衰格老細。

「我頂！你條友抖左成個月都未夠，一返工又企喺度發夢恰眼訓？出面無嘢做就入廚房幫手，呢啲嘢唔洗我教啦下話？」咖啡店老細行到面前訓話。

「哦，知啦老細。」晴晴轉身行入廚房幫手洗碗。

返嚟做左幾日女僕侍應，佢都仲未係好習慣。

返工嗰陣，腦海中周不時會回想起自己做真女僕嘅日子，之後諗諗下，又會忍唔住回想返早幾日同Alex親吻嘅情景。

當時嘅佢面紅耳赤，心跳加速，依家諗返起，個心仍然係怦怦跳。

「喂！」老細行過嚟大喝一聲，嚇左晴晴一跳。

「咩事呀咁大聲呀老細？」晴晴拍拍心口定驚。

「我問你咩事呀？你自己睇下個洗手盤？」

晴晴望一望個洗手盤，發現成個盤都係白泡，啲泡幾乎多到流出嚟咁滯。

啱先佢諗嘢諗到走曬神，落左太多洗潔劑唔知，搞到家下正宗「一獲泡」。

「頂你個肺，洗幾隻碗碟都搞到咁，真係無鬼用！算啦，呢度唔洗你幫手啦，出返去啦你！」

「哦，對唔住老細。」

晴晴行返出去外面招呼客人，佳瑩聽到廚房嘅責罵聲，走嚟關心問：「搞咩呀你，呢幾日係咁做錯嘢，仲成日都心不在焉，神不守舍咁？」

「可能一時未習慣返。」

「哈哈，係未習慣定係掛住個有錢仔呀？做人阿四做上癮呀？」佳瑩笑笑口問。

「講咩呀？我邊有掛住Alex！」晴晴臉頰泛紅。

「咁大反應，即係講中左啦，你唔會係對得多左，然後日久生情，鐘意左個有錢仔呀嘛？」

「無呀，我邊有鐘意佢？」

然而晴晴分辨唔到究竟咩係鐘意，亦唔知咩係愛。

佢咁大個人，只係拍過一次拖。當時佢讀緊中五，返兼職識左個比自己大幾年嘅男仔。

個男仔好冧佢，向佢展開追求攻勢，又送花又請食飯，仲同佢表白，晴晴見對方咁有誠意，咁就接受左同左對方一齊，

佢唔知自己係咪真係鐘意個男仔，佢淨係知自己同對方錫嗰陣無咩感覺。

佢並唔抗拒嘴對嘴錫，只係無嗰種心跳加速嘅感覺。

之後佢地拍左兩個月拖就散左，晴晴唔開心左幾日就無事。

反而同Alex錫，佢個心就跳得好快，咁即係代表自己鐘意佢？

「佳瑩，鐘意一個人係點架？」晴晴問。

「鐘意一個人就係，你見唔到佢嗰陣你會好掛住佢，到一見到佢你個心就會怦怦怦咁跳。」

「咁…」

「仆你地個街！講完嘢未呀！講講講，我俾錢返嚟你地傾計架？快去做嘢啦！」老細嘅罵聲打斷二人嘅對話。

晴晴同佳瑩即刻收聲，去做返自己嘢。

而晴晴仍喺度思考緊佳瑩所講嘅說話。

見唔到對方就會掛住對方，咁自己成日喺度諗返喺清水灣同Alex一齊生活嘅日子，咁算唔算係掛住？

當佢同Alex錫嗰陣，佢會心跳加速，但又未去到一見到面就會緊張心跳，咁算唔算係鐘意？

呢兩條問題佢都諗左好耐，或者仲未得到確實嘅答案，但有一點可以肯定嘅係，佢嘅思緒一整日都係被Alex所佔據。

到晚上九點。

晴晴收左工就坐車入清水灣，原本佢想訓一陣休息下，但訓到中途，突然間作肚痛。

今次就似上次咁，小腹同後背一齊作痛。

佢掩住前後，露出痛苦嘅表情，隔離乘客問佢有無事。

「無事…」佢拿拿臨啪兩粒隨身帶備嘅止痛藥嚟止痛。

過左分幾鐘，身上嘅痛感先慢慢消失。

佢心諗咁樣唔係辦法，睇嚟真係要去醫院做個檢查下先得。

俾我等到

明日再更，早抖

子宮環其實傷害唔細,長期唔除仲危險

睇到女主角咁貪錢睇到好撚燥

頂係呢d位停

晴晴可唔可以好翻

欄主考慮過寫定一堆文再逐日出？
咁我哋咪日日都有一定數目嘅文睇 你又唔使太辛苦囉

儲文再逐日出，過程都需要啲時間我諗諗

好既樓主
Btw依家去到個故嘅幾多%?

進度過左一半了，進入緊中後段劇情

可唔可以俾2個ending我地揀

Btw今晚幾點有文

得既到時睇下反應先

未g

其實點解你收6半收工但深宵先有文

寫吓諗吓，諗吓寫吓，寫完執下文，就搞到咁夜囉

有時寫緊嗰陣，啲fd又R我玩幾手online poker，所以都會推慢左進度

樓主正職係老c?

白領定藍領先

白領