滄海肥豬
2020-04-18 02:01:55
第六十六話:
A:整理空間戒指入面物品嘅擺放
——————————
我決定趁住呢段空閒嘅時間,整理一下由吳順豪(管家)到攞返嚟嘅空間戒指,之前都淨係好粗略咁望下空間入面有啲咩,但係入面嘅物品堆積如山,一地亂咁擺,我決定要進行一次分類。
但係喺開始執位之前,我做咗一個好有趣嘅小實驗,內容係關於空間戒指內嘅時間流逝。
試想像如果空間戒指內嘅時間流逝係同現實唔同,咁我咪可以存放一啲保鮮期短嘅食物入去?
為咗搵出呢條問題嘅答案,我就做咗一連條串嘅實驗。
首先,我嘗試用意念溝通空間戒指,然後等意識一進入到儲物空間後,心入面就默數十秒再退出空間,然後發現現實一樣都係過咗十秒。
本來實驗就咁結束,當我已經諗住下結論嘅時候,我忽然靈機一觸,諗起既然係同意識意念有關,咁就係同精神力有關啦...
既然同精神力有...
咁就代表...
「思考大師」咪有可能會係影響實驗結果嘅變數!
一諗到呢到,我就抱住要探究到底嘅實驗精神,再進行多一次實驗。但呢次有少少唔同,就係我首先會以開啟住「思考大師」嘅狀態下聯繫空間戒指,然後同樣默數十秒再退離空間,竟然發現...現實世界只不過啱啱先過咗一秒!!.....
亦姐係話,空間戒指入面嘅時間流逝,係同使用者嘅思考速度掛鉤!
我開啟「思考大師」之後諗野快咗十倍,空間戒指入面嘅時間流逝就變慢十倍...
呵,真係有趣嘅發現。
雖然我仲未可以斷定,空間戒指嘅時間流逝變慢十倍,到底係喺有我嘅意識進入嘅時候先係咁啊...定係空間戒指會保持長期地同現實有個時間差距,呢啲都需要更多時間嘅考查探究,但而家明顯並冇咁多時間嚟做呢個實驗,所以我決定先將呢樣嘢擺埋一二邊,等有機會再詳細研究。
搞清楚儲物空間嘅時間流逝運作機制之後,我就啟動「思考大師」進入空間之內,然後開始著手執企理嗰個混亂不堪、成個亂葬崗同堆填區咁嘅儲物空間,嚟一次完整嘅分類同埋大!掃!除!。
~
經過一番身水身汗嘅整理後,呢個5m x 5m x 5m嘅正方形儲物空間大致上比我分咗做五個區域。
中央地帶為「財富區」,一座銀幣山堆疊而起,隱隱有要頂上天花板之勢,其風采唔輸現代嘅摩天大廈。
左上方為「戰鬥區」,各色各樣嘅武器同埋戰鬥物資應有盡有。
右上方為「生活用品區』,有各種檯檯凳凳之類嘅傢俱一應俱存,另外餅乾同水之類嘅食物,呢啲生活必需品都同樣分類為呢一區。
左下方為「管家區」,存放住一啲舊嘅抗爭物品,暫時仲未知呢啲嘢到底係吳順豪以前用過嘅,定係吳順豪曾經嘅敵人用過嘅,我而家面上嘅V煞面具都係出自呢一堆物品入面,而呢一區...只要我搵到真相,就會轉換做其他分類。
右下方為「雜物區」,簡單嚟講就係以上分類都唔算,然後擺埋一齊嘅雜物庫。
大致上就係咁啦。
見到呢個整齊嘅儲物空間,心情都舒服啲。
眼尾望一望左下方,睇住嗰一副副殘舊嘅豬嘴,同埋染住血嘅繃帶。
我暗地裏發誓...
他朝有日一定要搵出真相。
~
係儲物空間入面辛苦執咗九個幾鐘,返到現實世界先過咗未夠一個鐘。
有趣嘅係,身體開始出現類似時差嘅疲攰感。
正當我諗住閉目養神休息一下嘅時候。
聽到一陣久違嘅汽車聲。
嗡嗡嗡。
我聽到滿滿金錢嘅聲音!
一㗎黃色嘅法拉利FF漸漸進入我嘅視線,駛入寬大而寂寞嘅車道。
FF踩痕油門開到我哋面前然後一個甩尾停咗係到。
大門啪嘅一聲打開咗,首先踏出FF嘅係一對隨性嘅人字拖,跟住就係大腿,最後就係身體。
原來天琦傾電話時所謂嘅細路,並唔係一個暱稱,而係佢真係一個細路...
佢就係喺香港仔村門口偷穎玟銀幣嘅 —— 《大盜》林哲謙。
我應該...
A:前事不提
B:要佢比返啲錢我
——————————
滄海肥豬
2020-04-19 00:09:01
第六十七話:
B:要佢比返啲錢我
——————————
竟然係嗰個小偷。
估唔到會喺呢到撞返佢,而且佢仲要係認識天琦嘅。
唔通係手足?
正當我係到思考緊佢身分嘅時候,哲謙啪一聲大力閂埋車門,拋住車匙懶係型咁行埋嚟,佢望咗天琦一眼點點頭當打個招呼,然後就注視住我,疑惑咁問:
「咦,你就係天琦嘅隊友?你有啲面善啵,我係咪喺邊到見過你。」
我有少少嬲嬲地,呢個人竟然咁冇職業操守,偷完人哋嘢冇耐就已經唔認得咗人。
睇嚟佢偷過嘅人已經太多,多到分唔清邊個打邊個。
我冷漠咁答佢。
「係。」
「你偷咗我一千銀幣。」
「我而家俾個機會你還返啲錢比我,我就既往不咎。」
「如果唔係...」
我嘅眼神就快要殺死佢咁望實佢,睇下佢會有啲乜嘢反應。
哲謙就好似明白咗啲咩咁喔咗一聲,然後講:
「係咩,點解我冇印象嘅,我會比返錢你㗎,但係我想問我係幾時偷你嘢㗎?」
哲謙仲好似驚死我唔會講咁,補充咗句:
「得個知字,得個知字,無論點我都會還返啲錢俾你㗎。」
我應該...
A:答
B:唔答
——————————