第六十一話
A:專心輔助天琦
——————————
思緒快速噉流轉,諗到好多唔同嘅可能性,但我最後都係選擇全力輔助天琦,無謂為咗自己一時嘅風頭而令計劃出啲乜嘢差錯。
更何況就算我得到咗「斷空」,都唔代表我獲得獨自獵殺黑面琵鷺嘅能力。
所以我都係做返老本行,出奇不意噉喺關鍵時刻發動攻勢,限制敵人行動,配合天琦橫蠻無理嘅攻擊型獨有技「吞噬者」,就一定可以穩穩陣陣噉殺死黑面琵鷺。
天琦擰轉面望向我,眼神入面淨係得返黑面琵鷺嘅倒影,可以睇得出天琦對黑面琵鷺嘅執著。我點頭示意一切準備就緒,我哋就向黑面琵鷺嘅背後慢慢移動,途中儘量避免發出任何聲響。
我心入面默念:
「保護者。」
我哋兩個嘅身體外就出現咗一層薄薄嘅透明膜,緊貼住我哋嘅肌膚。
天琦雖然已經見過「保護者」一次,但佢都係忍唔住摸咗下薄膜,一副驚嘆不已嘅表情。睇嚟天琦對「保護者」嘅存在依然係好感嘆,但都正常嘅...畢竟每一個獨有技都係好稀有嘅存在。
一切準備就緒。
我哋交換眼神,點頭示意,天琦就一馬當先衝咗出去,我就繼續匿埋喺草叢堆入面,尋找一錘定音嘅機會。
天琦對黑面琵鷺嘅怨恨真係好大,一嚟就唔留手,唔存在啲咩試探,舉起左手,一個漆黑無比嘅魔法陣憑空出現。
「黑洞。」
天琦同時一手將「黑洞」揼向夜空。
竟然係嗰片閃耀住星輝光芒嘅夜空,而唔係黑面琵鷺所在嘅位置,點解呢?
因為黑面琵鷺喺天琦衝出草叢嘅嗰一刻已經洞察到危機,隨即振翅準備高飛。
但黑面琵鷺估唔到嘅係,天琦已經預測到佢嘅動向,預先將技能揼向天空,導致黑面琵鷺被「黑洞」嘅引力影響,無辦法高飛逃離。
厲害嘅係,黑面琵鷺好快已經作出調整,見到又係呢個可惡嘅人類,身後瞬速咁出現咗幾個湖水綠色嘅魔法陣,每個魔法陣中都蘊含住猛烈強風。
「六芒風陣。」
幾個魔法陣之間隱隱地有啲奇妙嘅聯繫,形影之間,魔法陣竟然喺黑面琵鷺嘅雙翼後面組成咗一個六芒星陣。
風力倍數級增強,開始同「黑洞」嘅引力形成相互抵銷嘅狀況。
但天琦並唔諗住就噉放過黑面琵鷺,雙手平排喺胸前,決定直接使用殺手鐧。
一個黑到無辦法睇清楚紋路嘅大型魔法陣憑空浮現。
「黑洞長矛。」
黑面琵鷺見到天琦又用呢招,左邊面忽然隱隱作痛,尖銳咁怪叫一聲,擘開扁長怪口,其中存在一個紋路奇異嘅魔法陣。
藍綠色魔法陣,上一次戰鬥入面淨係可以倉猝噉運用,冇辦法展現出佢嘅真正威力,今次,要為佢正名。
風起了,風又止了,史詩級技能。
「風眼地帶。」
暴風其央雲淡輕,萬法不侵無所重。
九里烈風靜若水,雨停風定皆為空。
世間一切, 喺「風眼地帶」嘅面前都會變得乖巧,頑皮至極嘅學生都逃唔過被訓話後安靜落嚟嘅下場。
就係依家!
佢哋兩個僵持緊嘅呢一刻!
天琦吸引曬黑面琵鷺嘅注意力,呢一刻就係我偷襲嘅最佳時機!
黑面琵鷺距離我二十米左右,我應該...
A:「強光乍現」-> 跑近 -> 「斷空」
B:跑近 -> 「強光乍現」->「斷空」
C:跑近 -> 「斷空」
D:跑近 -> 「強光乍現」
E:開放式作答
——————————
注意:每個施法都需要少量嘅時間