考慮到年紀漸大
體力直線下降
出年又有奧運會
如果今年再唔上既話
睇怕都真係未必有機會可以上到去
咁兩個月黎
睇住咁多人放棄左個良心
睇住高官每日都係度講一堆大話
然而身邊都仲有好多唔願醒過人
而每日就睇住義士為自由受傷
生活係香港真係好累好累
我地乜都做唔到
只可以自制左張banner帶上山頂
叫做幫香港人打打氣
而呢篇遊記同以前一樣
都係純粹自我滿足之用
如果大家真係屌既都希望屌細力d
講番呢段旅程
登富士山當然係全程重點
上山之前就係迪卡儂課左唔少金
兩支行山杖
行山背囊
行山鞋
頭燈
太陽眼鏡
再係uniqlo買左兩件運動衫
係運動舖買埋條爬山褲
加埋自己工程撚用開樣樣衰衰既防曬帽同勞工手套
基本上都叫做齊裝
但真係未出發
先課成兩千幾買裝
我記得已經好耐無同過親戚朋友一齊去日本
對上幾次唔係獨遊就係同屋企人
自己獨撚一個我都唔夠膽上山
就好彩總算搵到d唔怕比豬隊友拖累既十九朋友同我一齊出發登頂
事前準備功夫唔只係課金買裝
仲有要book係山頂過一夜既小屋
本身應該四月初就要book
不過因為山小路維修book房既日子都推遲左
本身一直都係想book御來光館
不過求穩陣就book埋元祖室
最係二揀一之下友人們都決定左住元祖室
雖然第二日上山會耐左
但考慮到第一日上山可以唔洗咁辛苦
結果到登山當日終於發現呢個決定係完全正確既
另外仲有要提一提山頂間郵局
登山日子基本上只有七月至九月
而山頂郵局係八月中就會休息
因為係佢度可以買到一張登山證明書
咁我認為上得到頂咁當然要買番張證明咁先安樂既
就好似之前去左日本最北一樣
今次係難度再高上到日本最高點
咁當然想要呢張證明
所以我地就決定左8月5-6日呢兩日登山
日子就決定好係星期六到東京
星期日由東京落河口湖
再住多晚就星期一即係8月5日朝早上山開始上山
星期二登頂
我認為呢個咁既進度應該係最舒服
而其實網上亦都有張再正式d既登山證書
http://www.fujisan3776.com/
可以寫埋名同貼相上去
寄到香港連埋運貴就需要2880yen
日本人有句俗語係唔上富士山就係馬鹿
上兩次富士山亦都係馬鹿
咁難得一生人一次既登山經驗
除左郵局既證明
呢張有相既證書就更加要整黎留念
先此聲明
本人係肥底
細路仔讀書果時上體育堂跑步都係跑尾幾
平時無乜運動
耐唔耐先有去游一兩次水
以前最多都係去到日本果下小山意思意思一下
咁我都叫做上過幾次兩千幾米既山
高山反應我就無乜點驚
係驚自己體力不繼上唔到頂
結果因為出發前既日子都好忙
連操下體能既機會都無乜
再講下我呢個死肥仔今次既登山經驗
一定絕對
唔會係輕鬆架啦
對我黎講
呢次登頂係成世人最辛苦既兩日
但因為有人陪係我身邊
無左以前行小山都會行到懷疑人生既感覺
互相扶持我覺得好重要
可以為對方打氣
行落去都比較有動力
結果我第一日行左七個幾鐘先上到八合目元祖室
而第二日我更加無上山頂睇御來光
直接係山小屋睇完日出先出發
咁講真個景就無咩分別
我只求可以平平安安上到頂
最後再用多三個幾鐘上到山頂
其實諗番起就只有第一日行到最後最辛苦
由八合目白雲莊果段路行上去雖然可能只有一百米唔夠既高度
但行左成日真係累到仆街
腳都差D提唔起
不過我係好在兩日連一滴雨都無落過
爬石有時係好難
但起碼無濕無冼
我都覺得自己好好彩
落山呢段路我慢慢都叫做四個鐘落到去
除左腳痛之外就無乜特別問題
另外因為體能關係
唔敢帶部無反上山
又買多部rx100m6
可以影到御來光
作為一生人一次既經驗
我覺得都算值得
話說呢個旅程除左富士山登頂
仲會睇到三場煙花
體會一下每日都三十七度既夏日
如果係平時
我一定唔會揀暑假呢D日子去旅行
但係今年上富士山
出年去睇奧運
睇黎起碼呢兩年都要感受到呢種溫度
同埋今次除左係山梨縣入面轉圈
頭尾都會經過東京
一直以後
我都對東京唔太感興趣
最多最有夜晚經過食餐飯
今次終於有個機會可以係東京市內周圍走
可以飲飲食食
食左tabelog全日本排第一既拉麵同排到四既鰻魚飯
睇怕以後都唔多呢D機會
行程表
03/08 DAY1 香港->成田機場->東京->江戶城->歌舞伎町->新宿
04/08 DAY2 新宿->富士山景觀特急->河口湖->河口湖富士山全景纜車->河口湖湖上祭前夜祭->河口湖
05/08 DAY3 河口湖->吉田五合目->六合目->七合目->八合目
06/08 DAY4 八合目->九合目->富士山頂上->吉田五合目->河口湖
07/08 DAY5 河口湖->富士登山電車->甲府->神明花火大會->甲府
08/08 DAY6 甲府->甲府城->御岳昇仙峽->甲府市役所展望台->甲府
09/08 DAY7 甲府->武田神社->甲斐善光寺->山梨縣立科學館->甲府
10/08 DAY8 甲府->東京->四谷須賀神社->上野恩賜公園->秋葉原->神宮外苑花火大會->上野
11/08 DAY9 上野->成田機場->香港
今年如無意外都唔會再去日本
呢一篇遊記亦都終於可以慢慢咁寫
如果遇到香港有事發生心情低落隨時都會暫休
希望各位原諒
日本山陰山陽
https://lihkg.com/thread/220010/page/11
日本關西名古屋
https://lihkg.com/thread/395127/page/1
英國倫敦
https://lihkg.com/thread/278840/page/8
日本東海道
https://lihkg.com/thread/451855/page/1
日本南九州
https://lihkg.com/thread/535359/page/1
意大利西北
https://lihkg.com/thread/624247/page/1
日本中部北陸
https://lihkg.com/thread/684922/page/1
俄羅斯
https://lihkg.com/thread/753355/page/1
台灣嘉義
https://lihkg.com/thread/869213/page/1
日本北信越
https://lihkg.com/thread/951368/page/1
日本南北海道
https://lihkg.com/thread/1049262/page/1
日本中九州
https://lihkg.com/thread/1121830/page/1
日本道北
https://lihkg.com/thread/1285227/page/1
行程表
https://travel98.com/member/62235/trip
