[長氣多圖][不爛尾] 俄羅斯世界盃曲終之旅

hello
又係我長氣鬼
係呢個七月頭
去左俄羅斯睇左兩場世界盃
總共去左十一日
之後要到十二月先再有長旅行
睇黎今次真係可以好好咁以休息下啦

之前既遊記可以做到睇番

山陰山陽
https://lihkg.com/thread/220010/page/11
關西名古屋
https://lihkg.com/thread/395127/page/1
英國倫敦
https://lihkg.com/thread/278840/page/8
東海道
https://lihkg.com/thread/451855/page/1
南九州
https://lihkg.com/thread/535359/page/1
意大利西北
https://lihkg.com/thread/624247/page/1
中部北陸
https://lihkg.com/thread/684922/page/1

過去未來既時間表
https://travel98.com/member/62235/trip


呢個世界盃之旅
其實我都定義唔到係開心定唔開心
因為無去日本咁滿足
係真既
連意大利都無
亦都係真既

上次去日本
個行程我PLAN足一年
第一次見到雪
果種感動
到而家我仲記得

而去到意大利
第一次踏足意甲球場
見證愛隊主場出擊
企係球場邊睇球員賽前操練
簡直係一生難忘

然而
雖然今次參加左一個世界盛事
企係全世界最高既舞台之上
但就好似第三者一樣咁冷眼旁觀
法國同克羅地亞都唔係我所支持既球隊
所以沒有可以去投入那種喜悅

亦都可能係我天生離群
或者
我都係適合番D個人既旅程

而共產黨既景點
實在係稱唔上好特別
全部都係教堂同皇宮
全部都係室內同室內
無其他可以稱得上世界級既風景
應該稱得上係有D失望既

再加上俄佬生活步伐急速
一朝早就要逼地鐵
果種外冷內熱我真係感受唔到
幾日以黎對呢個國家既印像真係好麻麻
如果唔係俄妹既加持
我應該係會有D討厭呢個地方

出發之前
一切都好美好
我即將要迎接我自己既世界盃啦
但最後番到機場
係有一種解脫既感覺
我終於番屋企啦
呢個
就係我第一次親身去參加世界盃既感受

所謂十一日既行程表
其實只係得十日
因為最後一日朝早就番到香港

7/7 DAY1 香港->莫斯科->Grand Express列車
8/7 DAY2 聖彼得堡->喀山大教堂->基督喋血大教堂->俄羅斯國家博物館->Saint Michael’s Castle->Russian Railway Museum->馬林斯基劇院->聖彼得堡
9/7 DAY3 聖彼得堡->葉卡捷琳娜公園->葉卡捷琳娜宮->聖彼得堡
10/7 DAY4 聖彼得堡->夏宮上公園->夏宮下公園->夏宮彼得霍夫宮->聖以撒大教堂->聖彼得堡球場->聖彼得堡
11/7 DAY5 聖彼得堡->列寧廣場->曙光號巡洋艦->彼得保羅大教堂->Trubetskoy Bastion Prison->冬宮埃爾米塔日博物館->總參謀部大樓->紅箭號列車
12/7 DAY6 莫斯科->莫斯科太空博物館->莫斯科水族館->奧斯坦金諾電視塔->莫斯科
13/7 DAY7 莫斯科->克里姆林宮->軍火庫->教堂廣場->紅場->喀山大教堂->聖巴索大教堂->FIFA世界盃博物館->莫斯科
14/7 DAY8 莫斯科->莫斯科凱旋門->俯首山->衛國戰爭中央博物館->莫斯科國家大馬戲團->FIFA FanFest->莫斯科
15/7 DAY9 莫斯科->一隻螞蟻->盧日尼基球場->莫斯科
16/7 DAY10 莫斯科->基督救世主大教堂->香港
17/7 DAY11 香港

雖然對呢個國家無咩留戀
但唔代表我個行程就會好HEA
事實
只係睇波果幾日先會無乜行程
其他日子
我係好努力去完全兩個城方
以景點黎講
聖彼得堡真係完全贏晒
可惜係聖彼得堡果幾日都係陰陰天
反而番到莫斯科就日日都好好太陽
反差都幾大

雖然係咁
都叫做去晒自己想去既地方架啦
如果真係會再去俄羅斯既話
我諗應該係會去貝加爾湖

今次既預覽圖
唔好期望有咩靚相就好

出發前就只有準備左係鴨記買既電話卡
用tele2網絡
90蚊7GB用十日
本身我都覺得幾抵
但後來先知道原來每日得700MB
過左就會上唔到網
第一日係機場睇世界盃已經差唔多睇爆左

而銀兩方面香港銀行幾乎係換唔到盧布
只係準備左少量上次意大利用剩既歐元
最主要都係去到當地機場ATM提款
首先匯率唔低
而且我個戶口仲唔洗手續費
亦都免除左要去銀行預訂既時間
真係幾方便

繼上次歐聯之旅
今次再次同家弟一齊HEHE出發
全程所有開支大約用左兩萬五左右
係估唔到食飯竟然比香港貴
比預想真係洗多左少少既

咁又話說去之前入左兩個group
一個係台灣既背包宮棧
一個係香港兒登

睇得出台灣人係完全唔sick波
group主更加係連比利時9號個黑鬼係乜水都唔撚知
佢地只係當世界盃係旅行既一種
同唔知點解係要係球場影團體相
年齡亦都幾大下
完全係傾唔到計個隻
只可以單純咁睇下資訊

相反香港個group就親切好多
可以講下波又可以傾下計
最感動既係最後一日係機場有巴打話我排錯隊
如果唔係可能真係番唔到香港

上次趕住今次呢個旅程
所以出遊記都出得比較快
今次應該會無出得密
原諒下我啦
寫遊記真係好累架

留名睇俄妹

好野緊係留比自己

食飯點會貴過香港 三十蚊有一餐喎

利申：係莫斯科

留名 我都有去 睇左三場波
樓主個行程好chur
我好撚hea

我都有成過平野
但入餐廳食整體係貴過香港
都差唔多一舊水一餐
不過如果以最頂級果幾間既價錢黎計就真係平過香港既

完左世界盃係咪少人好多?

無計
有限時間
以後又未必會再黎
去晒D公廁景點佢

仲有好多 local 遊客

俄羅斯真係無乜好玩，我由東玩到西度度差不多

可能因為我黎過，平時黎啲景點少人啲好玩啲
我今次去真係主要睇波，唔入球場都去fan fest
仲攰過普通去旅行

剩係聖彼得堡同莫斯科都兩個世界啦
你坐西伯利亞鐵路？

係

東邊 d 女靚 d

係
真係幾悶下
乜宮物宮亦都無想像咁靚

聖彼得堡個ff太多人封左唔比入
我淨係去過莫斯科個ff ja

十日行程你去既地方都幾少

D 博物館 同教堂 好好睇?

DAY1 列寧格勒火車站 GRAND EXPRESS列車

咁呢兩張世界盃波飛都係上年十一月第一輪抽既
其實我都係第一次抽
不過一次過就抽中晒
雖然決賽變左cat2
咁我估應該都唔算太難中
只要你全部都揀晒座位係cat1既話

只不過收到飛之後就發覺中伏
全部山頂位不特止
仲要係最近格離cat既位
爛到仆街
早買真係無著數

雖然係我第一次現場睇世界盃
但其實呢屆已經係我人生既第七次世界盃
巴治奧
我細細個就聽過呢個名啦
難得現場去參加呢項盛事
偏偏支持果隊外圍賽就已經出左局
出發之前就日日都比人串

世界盃都過左大半個月
八強都已經踢左一半
美斯同C朗都雙雙登機之後
終於到我登機



買機票果時港航都仲未開莫斯科呢條線
所以俄航就係香港到莫斯科既唯一直航
人生第三次去歐洲
終於可以直航去得到
轉機實在太辛苦啦

當然唔少得既就係FANID

因為俄佬係on9唔識分香港唔洗簽證既
所以一卡在手俄羅斯通用

波音777

個位唔算太頂腳
座位底亦都無好似qatar有部機係度頂住
算係比較舒服



343設計

可惜隔離坐左個阿叔成日訓覺都埃埋黎煩撚死

竟然有逆權公民

真係大逆不道

好難得先比我搵到一套有中文字幕

係雷神做既十二壯士

兩餐狗飯



以價錢黎講
其實qatar同俄航係差唔多
但級數真係差好遠
呢兩餐簡直就係港航級數

十個鐘之後終於到達戰民族既領地
經過商務位

你話如果CX仲有機你話幾好
就可以用里數換呢d位訓啦
俄航係最垃圾既skyteam
呢條team既分真係唔知要點玩

一落機就比呢個畫面嚇親

就好似幾班機既難民堆埋一齊咁
明明就有FANID
但每個人既過關時間依然係耐到仆街
好似由世界開始到而家都完全無改善過咁
共產就係共產
無一個係無辜既

排緊果時其實已經踢緊第三場八強
瑞典對英格蘭
不過數據有限
個俄佬台又勁chur數據
只可以斷斷續續咁睇

入左境之後見到行李帶已經停晒
要係萬千兵馬之中搵番自己件行李真係痴撚線

搵完行李第一件要做既就係禁錢
搵過第一部係無銀聯既
要去遠D先有


由入境到機場快線呢條路
就好似行左幾個商場既感覺
一直跟住指示走好似一直都唔到咁


機場快線大約半個鐘一班
要清晒入機場既人先可以放人入去
因為出同入都係用同一部閘機

今日唔係莫斯科既比賽日
無得freeride
不過如果用銀聯applepay既話就可以以1盧布既價錢乘搭

好彩出發之前搵有張十年都無用過既垃圾恆生銀聯有得放入去applepay姐

話說去到終點白俄站係無閘機既
回程既時間一樣係用呢部閘機比錢
一樣有銀聯優惠

機場快線aeroexpress


D位好硬
不過幾寬下

一落車就落大雨
而白俄個地鐵站仲要幾隱閉下

莫斯科同聖彼得堡一樣
全部要過金屬探測器
不過基本形同虛設
保安係會隨機搵人check袋過xray
遊客好似我咁成日揹背囊就要成日比人捉到

莫斯科坐地鐵就要買交通卡

即係香港八達通之類
今期有世界盃特別版
我又入番兩張黎玩下

莫斯科同聖彼得堡一樣
坐地鐵去幾遠一程都係36盧布
即係大約4.5港紙
仲平過香港坐一個站

戰鬥民族既地鐵係處於極深地底之下
淨係坐程電梯都要幾分鐘

又轉車站既距離次次都好似去左側魚涌咁
永無太子呢種轉車站
所以去到後來
我都係鐘意坐巴士多過地鐵

不過個設計係靚既

而且好光猛
同意大利D垃圾地鐵站完全唔同

白俄個站仲有銅像


而坐地鐵最麻煩既係
好少指示仲要係俄文
成日都要搵好耐之知應該搭左邊定右邊架車

地鐵入面一樣有殘廢位


因為落機花左好多時間
所以已經直去列寧格勤格離火車站
等轉火車去聖彼得堡
之後會留到聖彼得堡果邊四日

列寧格勒火車站



因為已經開始左最後一場八強
俄羅斯對克羅地亞
就係火車站求其搵左間入面有電視睇既餐廳


但電視睇竟然係有delay既
出左有人歡呼左成分鐘呢度先見到入波
不過是但啦
最緊要有得睇

黎到俄國
第一餐
食意粉

一陣架grand express既火車飛

其實我係想換實體飛紀念
但車站D人係咁話呢張就係飛唔肯換比我

其實FIFA就有免費既過夜火車比觀眾坐
不過要訓四人房同三唔識七既人一齊訓就真係不了
二黎我想試下佢兩架特色既過夜火車grand express同紅箭號
所以就自費買左雙人房黎訓

係估唔到場波要踢到加時
睇到時間差唔多都唯有去上車

54號就係我地要搭既grand express
23:40出發


左面係grand express
右面係紅箭號
出發時間其實只係差十幾分鐘
上車要對名對護照

走廊

7號房


一入到去就見到兩張床舖好晒

其實幾舒服幾好訓架
係隔音差少少

入到房會有專人教你點用房入面D野
呢架車最好應該就係部電視機

仲可以睇到加時下半場
最後要踢到十二碼俄羅斯先輸

有兩張開門卡

安全設備幾足

過夜包


窗口就係出面月台

其實係會比人望到晒

grand express間房個位就比較窄
兩隻gip都要放床底


床頭有差電位


仲有最最最重要果個廁所

一卡車總共有兩個

可能好多人都係坐紅箭號
所以呢架grand express得一半full
但整體黎講真係完勝對面架車
D人唔sick野

不過早餐就真係流流地

但飲過呢杯野我就深深愛上左呢款俄佬杯托
原來唔係平野黎
最後連杯足足買左成三舊水

DAY1 完

十要好難去幾個城市wor

佢收藏品係多既
但睇到第三四個博物館已經頂唔順啦
好似睇咩都再咩感覺咁

教堂我覺得意大利靚d
可以東正教掛

個飛機餐就咁睇真係喳左啲

都已經唔係渣咁簡單