孖八帶我沿著樓梯上去，當經過三樓時，其中一個單位的門口就掛了一塊很殘舊的招牌，上面寫著「龍氏宗親會」。
我被「龍氏」這兩個字觸動了神經，心想那有這麼巧，直覺告訴我這個「龍氏」一定跟「龍雲海」有關，他的夾萬很可能就藏在裡面，便叫住了孖八，道：「喂喂，我諗我啲朋友入咗去呢度喎。」
孖八訝異的道：「嘩，你啲朋友有癖好架？呢個單位丟空咗好耐架啦，有時半夜仲傳啲女人喊聲出嚟，好鬼猛架！」
「咪生人唔生膽啦，我啲 Friend 真係好似喺裡面架，有無計可以𥄫到裡面搞乜呀？」我急急問道。
「呵呵，原來有癖好嗰個係你，鍾意玩偷窺咁過癮添呀？好，見你咁靚仔，阿姐就陪你癲下！」孖八風騷的用手指篤一篤我臉龐，再笑道：「咁我要搵多個姊妹幫手架喎，雙飛你頂唔頂得蒲先？」
我點一點頭，孖八便按了「龍氏宗親會」旁邊一個單位的門鈴。
未幾，一個年紀不小但風韻猶存的老舉把門打開，此時她只圍了一條大毛巾，似乎剛沐浴過後匆匆出來應門。
「唓，我仲以為有生意添，乜原來係你呀？」老舉板起臉道。
「孖二姐，咩無生意呀？我呢個客要玩啲特別嘢，想一路𥄫住隔嚟個單位，一路起雙飛呀！」孖八眉飛色舞地道。
無獨有偶，原來老舉的名字也是一個數字。
孖二姐用疑惑的目光打量著我，再質疑地問道：「隔離有乜嘢咁好𥄫呀？」
「嗱，我哋呢頭好少何有啲咁『四正』嘅客架，咪話大家樓上樓下有好嘢唔益你呀？哈哈。」孖八笑道。
我也醒目的從銀包拿了兩張金牛出來，塞入孖二姐的手中，道：「孖二姐呀呵？幫幫手啦！」
孖二姐攤直那兩張金牛檢查了一會，終於開顏笑道：「咁仲唔入嚟，老細？」
進了孖二姐的單位後，她繼續說：「你都真係好彩，我哋呢層樓畀上手個大業主劏到古靈精怪，我呢度有個雜物房道門咁啱係痴住隔嚟個單位，你的確係可以喺道門頂個氣窗𥄫到隔離架。」
我們一直跟著孖二姐走著，發覺這個單位面積也不小，用板間了許多房間，我想本來應該還有其他租客，但這時顯然只剩下孖二姐一人還沒有搬走，所以她便可以獨佔了這裡。
沿走廊走了一會，孖二姐終於打開盡頭的一道房門，這應該便是她剛才提起過的雜物房，裡面果然還有另一道門，門上面有一個氣窗的玻璃正透著光，代表隔壁的單位真的有人在！
「估唔到個丟空咗嘅單位真係有人喎！」孖八吃驚地道。
孖二姐連忙「殊」了她一聲，示意要她輕聲點。
我也不理她們，自顧自的企在那門前的一個大木箱上面，急不及待的看看那個帶頭人和跟著我的兩個黑影是否真的在「龍氏宗親會」裡面？
孖八和孖二姐當然不執輸，也跟著我跳上大木箱上，看看隔壁在搞甚麼。
我們站著的角度，剛好可以一覽整個「龍氏宗親會」的大廳，只見那裡跟一般麻雀館無異，卻大約有七、八十人圍著另一邊的一個巨型靠牆櫃，這個櫃由地下頂到上天花板，裡面放著一列又一列的神主牌，櫃底本來被一幅紅布蓋著，但這刻中間的部分被揭起了，裡面竟藏了一個夾萬。
站得最近夾萬是那個帶頭女人，而面向著她是兩個身穿黑衫的少女，應該就是剛才跟著我的兩個黑影。
我一眼就認出她們是「寧波紫霞」。
「好彩阿嫂有先見之明，一早叫晒我哋三大長老嚟恭候你，如果唔係都唔可以揭穿你嘅陰謀！」其中一個身形瘦削的阿伯冷冷地道。
「阿彤，我由細睇到你大，你幾時心腸變得咁歹毒？」另外一個較肥胖的老人搖頭歎道：「之前阿嫂話你係叛徒我都唔信，但係而家事實擺在眼前，唉，你點可以做出呢啲咁嘅事？」
當中年紀看來最大的白髮老翁，更憤怒地說：「你搞到阿嫂咁後生就無咗個老公，我哋『龍雀門』無咗個『雀魁』，你今晚喺龍家列祖列宗面前，點都要有個交代！」
那個帶頭人果然是阿彤，只見她一副混血兒的容貌，五官精緻，英姿凜凜，秀氣逼人，縱使面對群雄的圍攻臉上仍無半絲懼色，更優雅地撥著長長的秀髮，氣定神閒地說著流利的中文，道：「你哋三大長老都已經阿嫂前阿嫂後咁，唔駛問都知畀個妖女灌咗唔少迷湯。」之後，她走到那三位老人家前面，逐一說著：「中伯，你份人不褸矇盛盛，畀個妖女迷倒一啲都唔奇，不過發叔，你都識講你由細睇到我大，我阿彤份人係點唔通你唔知道架咩？嗰個女人入咗龍家門有幾耐呀？你信佢都唔信我？」
白頭翁踏前了一步，想替肥老頭出頭的時候，阿彤已先走到他的面前，指著他喝道：「最令我失望係你呀，白老頭，三個老屎忽你年資就最大，大家都睇你頭諗住你會主持公道，點知最糊塗、最信個妖女反而係你呀！」
這三位老人家應該就是「龍雀門」的三大長老，身形瘦削的是「中伯」，肥老頭是「發叔」，三人之首就是那個叫「白老頭」的白頭翁。
而阿彤口中的「妖女」和三大長老所稱呼的「阿嫂」，我想是指剛剛跟我在靈堂中鬼混的龍夫人了。
未等三大長老回應，阿彤又走到「寧波紫霞」的面前，語氣回復平和地問道：「你哋跟咗我咁耐跟到嚟呢度，係幫我？定幫個妖女先？」
「彤師叔，自從師公出咗事之後，師傅就失埋蹤，四圍傳話你想同『福永』夾份吞併『龍雀門』，又話你為咗要三大長老推薦你做『雀魁』，會想盡辦法偷返兩大聖物出嚟，本座同師妹都好想知道究竟發生緊咩事，見你喪禮中途匆匆忙忙咁走咗，覺得你有古怪，咪一直吊住你尾嚟到呢度囉。」阿紫答道。
「但係我哋頭先係親眼見到你鬼鬼崇崇咁想打開個夾萬，如果唔係我同師姐跳出嚟，仲有三大長老原來一早哺住喺度，你唔係已經偷咗嗰兩大聖物啦咩？」阿霞接著道：「我哋唔係唔信彤師叔你，之不過．．．．唉．．．．」
這時，門鈴響起，其中一個門生跑去把大門打開，聽到恭敬地叫了一聲「阿嫂」後，便見龍夫人盈盈走進來，極豐滿的胴體被一襲黑色蕾絲旗袍喪服緊緊包裹著，將曼妙的身材曲線表露無遺。
雖然我之前在靈堂的密室中曾享用過龍夫人的身體，只可惜在漆黑中無法親眼一睹赤裸的真身，這刻她的出現當堂令我眼前一亮，更要命的是我現在身處的雜物房明明與大廳隔著一道門，我卻仍隱隱若若聞到那股熟悉的幽香，心跳頓然急劇的加速起來。
「嘩，呢條女好大波呀！」孖八見狀也禁不住輕聲叫道：「佢對波仲大過我呀！」
聽到孖八這樣說，我立即瞟了她的胸口一眼，薄薄吊帶裙上圍位置撐得脹卜卜，果然也是有料之人。
「唓！佢好索咩？阿姐後生時索過佢多多聲啦！」孖二姐不屑地道。
突然間，又聽到龍夫人高聲道：「三位長老，各位叔伯兄弟，先夫不幸被奸人所害，阿彤竟然趁『龍雀門』上上下下出席先夫喪禮嘅時候，嚟到呢度想偷兩大聖物出嚟，家陣人贓並獲，阿彤謀朝篡位嘅狠子野心路人皆見，妾身懇請各位可以主持公道，為先夫報仇雪恨！」
「阿嫂，你放心，我哋三長老一定會畀個交代你。」白老頭轉頭指著阿彤，喝道：「阿彤，你而家擺明欺師滅袓，你仲有咩說話好講？」
阿彤豪邁地笑了一笑，道：「交代我今晚一定會畀大家，之不過而家都未人齊，一陣等人齊嘅時候再講啦。」之後，便找了張櫈坐下來。
龍夫人哭著臉向白老頭，道：「白長老，阿彤擺明玩花樣，你真係要幫妾身作主呀！」
「阿嫂，稍安無躁，如果連小小時間都唔畀佢，一眾兄弟會話白某偏幫晒一邊。」白老頭轉個頭對著阿彤，再叫道：「我哋就畀一個鐘，唔好，就半個鐘啦，到時我睇你仲有咩解釋！」說罷，便跟其餘兩位長老坐在一邊，一同拿起了煙斗出來抽。
龍夫人再沒說甚麼，都安靜地坐了下來。
而其餘「龍雀門」的門生，竟然四個四個的圍在麻雀枱上，一邊打著牌一邊等。
轉眼間，整個大廳也充斥著麻雀耍樂的嘈雜聲。
此時，孖二姐終於忍不住問我：「老老實實，你究竟係咩人？仲乜你咁想知佢哋『龍雀門』啲嘢？你同龍雲海有咩關係？」
我想了一想，然後苦笑道：「我受委託查緊龍雲海，而佢有可能係我老竇。」
孖二姐差點被我的話嚇得從木箱上跌下來，之後定一定神，再一字一語的對我說：「你無可能係龍雲海個仔，因為佢性無能架！」
這次，輪到我被孖二姐的話，嚇得真的從木箱上跌了下來。
（待續）
